ຂ່າວຫຼ້າສຸດ

ຢູ-19 ລາວ ເຂົ້າຮ່ວມບານເຕະຍິງ ຊີງແຊັມອາຊີ 2019 ຮອບຄັດເລືອກຢູ່ມຽນມາ

325 25 ຕ.ລ. 2018 ວົງຈອນກີລາ

    ທັບ​ນັກ­ກີ­ລາ​ເຕະ­ບານ​ຍິງ​ທີມ​ຊາດ​ລາວ ຮຸ່ນ​ອາ­ຍຸ​ບໍ່​ເກີນ 19 ປີ ອອກ​ເດີນ­ທາງ ວັນ​ທີ 22 ຕຸ­ລາ 2018 ຈາກ​ສະ­ໜາມ​ບິນ​ສາ­ກົນ​ວັດ​ໄຕ ໄປ​ເຂົ້າ​ຮ່ວມ​ການ​ແຂ່ງ­ຂັນ​ເຕະ­ບານ​ຍິງ ຮຸ່ນ​ອາ­ຍຸ​ບໍ່​ເກີນ 19 ປີ ຊີງ​ແຊັມ​ອາ­ຊີ 2019 ຮອບ​ຄັດ​ເລືອກ​ກຸ່ມ F ຮອບ​ທີ 1 ຢູ່​ປະ­ເທດ​ມຽນ​ມາ ວັນ​ທີ 24-28 ຕຸ­ລາ 2018 ໂດຍ​ທີມ​ຊາດ​ລາວ ຢູ່​ຮ່ວມ​ກຸ່ມ​ກັບ​ທີມ​ຊາດ​ອີ​ຣານ ແລະ ທີມ​ຊາດ​ມຽນ​ມາ.

    ລາຍ​ຊື່​ຄະ­ນະ​ນຳ ຄະ­ນະ​ຄູ​ເຝິກ ແລະ ນັກ­ກີ­ລາ​ຊຸດ​ນີ້ ປະ­ກອບ​ມີ: ທ່ານ​ນາງ ຍອດ​ແກ້ວ ພາ­ວະ​ດີ ຫົວ­ໜ້າ​ຄະ­ນະ ທ່ານ ວົງ​ມີ​ໄຊ ສຸ​ບົວ​ຄຳ ຫົວ­ໜ້າ​ຄູ​ເຝິກ ທ່ານ​ນາງ ຄານ​ສະ​ນິດ ຄຳ​ຈະ­ເລີນ ຜູ້​ຊ່ວຍ​ຄູ​ເຝິກ ທ່ານ​ນາງ ດອນ​ສະ­ຫວັນ ໄຊ​ຍະ​ສົມ­ບັດ ຄູ​ເຝິກ​ປະ­ຕູ ທ່ານ​ນາງ ເຄືອ​ວັນ ເມັງ​ວິ­ໄລ ແພດ​ປະ­ຈຳ​ທີມ ທ່ານ​ນາງ ພິດ­ສະ­ໄໝ ນັນ­ທະ​ວົງ​ວິ­ໄລ ຜູ້​ຈັດ­ການ​ທີມ ທ່ານ ສີ​ຈັນ ສູນ​ນະ­ລາດ ຊ່າງ​ພາບ ແລະ ທ່ານ ສາຍ​ຍັນ ພອນ​ວິ­ໄລ ອຸ­ປະ­ກອນ ພ້ອມ​ດ້ວຍ​ນັກ­ກີ­ລາ 23 ຄົນ.

    ສ່ວນ​ຕາ­ຕະ­ລາງ​ການ​ແຂ່ງ­ຂັນ​ທີມ​ຊາດ​ລາວ ຈະ​ລົງ​ແຂ່ງ­ຂັນ​ນັດ​ທຳ​ອິດ ວັນ​ທີ 24 ຕຸ­ລາ 2018 ເວ­ລາ 15:00 ໂມງ ພົບ ທີມ​ຊາດ​ອີ​ຣານ ຢູ່​ສະ­ໜາມ Thuwunna Stadium ນັດ​ທີ 2 ພົບ​ທີມ​ຊາດ​ມຽນ​ມາ ວັນ​ທີ 26 ຕຸ­ລາ 2018 ເວ­ລາ 18:00 ໂມງ ຢູ່​ສະ­ໜາມ​ດຽວ​ກັນ.

ຂ່າວທີ່ກ່ຽວຂ້ອງ