ຂ່າວຫຼ້າສຸດ

ຫຼວງພະບາງຮາບມາລາທອນ ລະດົມທຶນຊື້ອຸປະກອນການແພດ

308 25 ຕ.ລ. 2018 ວົງຈອນກີລາ
ຫຼວງພະບາງຮາບມາລາທອນ ລະດົມທຶນຊື້ອຸປະກອນການແພດ

    ໂຮງ­ໝໍ​ເພື່ອນ​ລາວ​ສຳ­ລັບ​ເດັກ​ແຂວງ​ຫຼວງ​ພະ​ບາງ ຈັດ​ງານ​ແລ່ນ​ຫຼວງ​ພະ​ບາງ​ຮາບ​ມາ­ລາ​ທອນ ຄັ້ງ​ທີ 6 ປະ­ຈຳ​ປີ 2018 ວັນ​ທີ 21 ຕຸ­ລາ 2018 ໂດຍ​ມີ​ທ່ານ ຄຳ​ຂັນ ຈັນ­ທະ​ວີ​ສຸກ ເຈົ້າ­ແຂວງ​ຫຼວງ​ພະ​ບາງ ມີ​ນັກ​ແລ່ນ​ຈາກ​ພາຍ​ໃນ ແລະ ຕ່າງ­ປະ­ເທດ 64 ກວ່າ​ປະ­ເທດ​ເຂົ້າ​ຮ່ວມ 1.600 ກວ່າ​ຄົນ.

    ເພື່ອ​ປຸກ­ລະ­ດົມ​ທຸກ​ຄົນ​ໃນ​ສັງ­ຄົມ ແຂກ​ພາຍ​ໃນ ແລະ ຕ່າງ­ປະ­ເທດ ມີ​ສ່ວນ​ຮ່ວມ​ສົມ­ທົບ​ທຶນ​ຈັດ​ຊື້​ອຸ­ປະ­ກອນ​ການ​ແພດ ແລະ ພັດ­ທະ­ນາ​ໂຮງ­ໝໍ​ເດັກ​ໃນ​ແຂວງ​ຫຼວງ​ພະ​ບາງ ແລະ ແຂວງ​ພາກ​ເໜືອ ໃນ​ນີ້ ຜູ້​ເຂົ້າ​ຮ່ວມ​ຕ້ອງ​ລົງ­ທະ­ບຽນ​ເປັນ​ເງິນ ແລະ ລາຍ​ໄດ້​ທັງ​ໝົດ​ຈະ​ມອບ​ເຂົ້າ​ກອງ​ທຶນ​ພັດ­ທະ­ນາ​ຂອງ​ໂຮງ­ໝໍ​ເພື່ອນ​ລາວ ສຳ­ລັບ​ເດັກ ທັງ​ເປັນ​ການ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ປີ​ທ່ອງ​ທ່ຽວ​ລາວ 2018 ຢູ່​ແຂວງ​ຫຼວງ​ພະ​ບາງ ແລະ ເປັນ​ການ​ປຸກ­ລະ­ດົມ​ໃຫ້​ທຸກ​ຄົນ​ໃນ​ສັງ­ຄົມ ຫັນ​ມາ​ຫຼີ້ນ​ກີ­ລາ​ເພື່ອ​ສຸ­ຂະ­ພາບ​ໃຫ້​ຫຼາຍ​ຂຶ້ນ ເຊິ່ງ​ປີ​ນີ້​ມີ 3 ໄລ­ຍະ​ທາງ​ຄື: 7 ກິ­ໂລ­ແມັດ 14 ກິ­ໂລ­ແມັດ ແລະ 21 ກິ­ໂລ­ແມັດ ເລີ່ມ​ຈາກ​ໜ້າ​ຫໍ​ພິ​ພິ​ທະ​ພັນ​ແຫ່ງ​ຊາດ​ຫຼວງ​ພະ​ບາງ ອ້ອມ​ຮອບ​ເທ­ສະ​ບານ​ນະ­ຄອນ­ຫຼວງ​ພະ​ບາງ ແລ້ວ​ເຂົ້າ​ເສັ້ນ​ໄຊ​ຢູ່​ຈຸດ​ເລີ່ມ​ຕົ້ນ ສຳ­ລັບ​ຜູ້​ຊະ­ນະ​ແມ່ນ​ໄດ້​ຮັບ​ຫຼຽນ​ທີ່​ລະ­ນຶກ ແລະ ໂລ້​ລາ­ງວັນ​ພິ­ເສດ​ສຳ­ລັບ​ປີ​ນີ້​ໄດ້​ຈັດ​ກິດ­ຈະ­ກຳ​ແລ່ນ​ແຕ່​ວັນ​ທີ 7 ຕຸ­ລາ 2018 ໂດຍ​ນັກ​ແລ່ນ​ກຸ່ມ​ໜຶ່ງ​ທີ່​ມີ​ຄວາມ​ມຸ່ງ​ໝັ້ນ​ໃນ​ການ​ແລ່ນ ແລະ ເຕັມ​ໃຈ​ທີ່​ຈະ​ຮັບ​ພາ­ລະ­ກິດ​ແລ່ນ​ແຕ່​ແຂວງ​ອັດ​ຕະ​ປື-ແຂວງ​ຜົ້ງ​ສາ­ລີ ລວມ​ໄລ­ຍະ​ທາງ 1.569 ກິ­ໂລ­ແມັດ ພາຍ​ໃນ 16 ວັນ ກໍ່​ໄດ້​ເຂົ້າ​ຮ່ວມ​ກິດ­ຈະ­ກຳ​ຄັ້ງ​ນີ້ ເຊິ່ງ​ໄດ້​ສ້າງ​ສີ­ສັນ​ປະ​ທັບ​ໃຈ​ໃຫ້​ຜູ້​ເຂົ້າ​ຮ່ວມ​ງານ​ເປັນ​ຢ່າງ​ດີ.

    ກຸ່ມ​ນັກ​ແລ່ນ​ດັ່ງ­ກ່າວ ມີ​ຄວາມ​ມຸ່ງ​ໝັ້ນ​ທີ່​ຈະ​ລະ­ດົມ​ທຶນ 425 ລ້ານ​ກີບ ເພື່ອ​ຊ່ວຍ​ຊື້​ອຸ­ປະ­ກອນ​ການ​ແພດ​ໃຫ້​ໂຮງ­ໝໍ​ເພື່ອ​ລາວ ສຳ­ລັບ​ເດັກ​ແຂວງ​ຫຼວງ​ພະ​ບາງ ແລະ ແຂວງ​ອັດ​ຕະ​ປື ປັດ­ຈຸ­ບັນ​ສາ­ມາດ​ລະ­ດົມ​ທຶນ​ໄດ້​ແລ້ວ 227 ລ້ານ​ກ່າວ​ກີບ ແລະ ຈະ​ສືບ­ຕໍ່​ແລ່ນ​ເພື່ອ​ລະ­ດົມ​ທຶນ​ຕໍ່​ອອກ​ຈາກ​ແຂວງ​ຫຼວງ​ພະ​ບາງ-ແຂວງ​ຜົ້ງ​ສາ­ລີ ໃນ​ຕອນ​ເຊົ້າ​ວັນ​ທີ 23 ຕຸ­ລາ 2018. 

    ການ​ແລ່ນ​ເພື່ອ​ການ​ກຸ­ສົນ​ໃນ​ຄັ້ງ​ນີ້ ຜູ້​ບໍ­ລິ­ຫານ​ບໍ­ລິ­ສັດ​ເບຍ​ລາວ ນຳ​ໂດຍ​ທ່ານ ເຮັນ​ຣິກ ແອນ​ເດີ​ເຊັນ ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ​ເບຍ​ລາວ ພ້ອມ​ຄະ­ນະ ກໍ່​ໄດ້​ເປັນ​ສ່ວນ​ໜຶ່ງ​ໃນ​ການ​ປະ­ກອບ­ສ່ວນ​ໃນ​ກິດ­ຈະ­ກຳ​ຄັ້ງ​ນີ້ ຊຶ່ງ​ບໍ­ລິ­ສັດ​ເບຍ​ລາວ ໂດຍ​ຜະ­ລິດ​ຕະ​ພັນ​ນ້ຳ​ດື່ມ​ກາ​ຫົວ​ເສືອ ມີ​ຄວາມ​ພາກ­ພູມ​ໃຈ ທີ່​ໄດ້​ເປັນ​ຜູ້​ສະ­ໜັບ­ສະ­ໜູນ​ຫຼັກ​ໃນ​ການ​ຈັດ​ກິດ­ຈະ­ກຳ ຫຼວງ​ພະ​ບາງ ຮາບ​ມາ­ລາ​ທອນ 2018 ເປັນ​ປີ​ທີ 6 ຕິດ­ຕໍ່​ກັນ ຍ້ອນ​ການ​ໃຫ້​ຄວາມ​ສຳ­ຄັນ​ຊ່ວຍ­ເຫຼືອ​ສັງ­ຄົມ​ຢ່າງ​ຕໍ່​ເນື່ອງ ບໍ­ລິ­ສັດ​ເບຍ​ລາວ ຈຶ່ງ​ໄດ້​ຮັບ​ລາ­ງວັນ​ກຽດ­ຕິ­ຍົດ ຈາກ​ໂຮງ­ໝໍ​ເພື່ອນ​ລາວ ສຳ­ລັບ​ເດັກ­ນ້ອຍ ມອບ​ໂດຍ​ທ່ານ ດຣ ເຄັນ​ໂຣະ ອີ​ຊຸ ຜູ້​ກໍ່​ຕັ້ງ​ມູນ​ນິ­ທິ​ເພື່ອນ​ບໍ່​ມີ​ພົນ​ແດນ ຊຶ່ງ​ພິ­ທີ​ອັນ​ຊົງ​ກຽດ​ນີ້ ພະ​ອົງ​ຍິງ ບິ​ທຣິກ ແຫ່ງ ຢອກ ພະ​ເຈົ້າ​ຫຼານ​ຂອງ​ພະ​ລາ​ຊີ​ນີ​ອາ​ລິ​ສ​ເບ​ສ ທີ II ຂອງ​ອັງ­ກິດ ກໍ່​ໃຫ້​ກຽດ​ເຂົ້າ​ຮ່ວມ​ງານ.

ຂ່າວທີ່ກ່ຽວຂ້ອງ