ເບີ່ງບ້ານເຂົາເອົາບົດຮຽນ 25-10-2018

389 25 ຕ.ລ. 2018 ຫົວຂໍ້ຂ່າວອື່ນໆ

    ມື້ນີ້ ມີ​ເລື່ອງ​ຫົວໜ້າ​ກົມ​ການບິນ​ມາ​ເລ​ເຊຍ​ລາ​ອອກ​ຍ້ອນ​ບໍ່​ສາມາດ​ຄົ້ນ​ພົບ​ເຄື່ອງ​ບິນ​ໂດຍສານ​ທີ່​ຫາຍ​ສາບ​ສູນ​ເມື່ອ 4 ປີ​ກ່ອນ ຕໍ່​ໃສ່​ບັນຫາ​ການ​ພະນັນ​ອອນ​ລາຍ​ຢູ່​ຫວຽດນາມ ແລະ ປິດ​ທ້າຍ​ກັບ​ເລື່ອງ​ການ​ປະກັນ​ສຸຂະພາບ​ຂອງ​ຜູ້​ທຸກ​ຍາກ​ຢູ່​ອິນ​ເດຍ.

    ທີ່​ມາ​ເລ​ເຊຍ: ຂ່າວ​ໜຶ່ງ​ທີ່​ພວກ​ເຮົາ​ມັກໄດ້​ຍິນ​ເປັນ​ປະຈຳ​ເວລາ​ເກີດ​ມີ​ອຸບັດ​ຕິ​ເຫດ​ຂັ້ນ​ຮ້າຍ​ແຮງ​ເກີດ​ຂຶ້ນ​ຢູ່​ຫຼາຍໆ​ປະເທດ ຈຶ່ງ​ເປັນ​ເຫດ​ໃຫ້​ມີ​ການ​ສູນ​ເສຍ​ຊີວິດ ແລະ ຊັບ​ສິນ​ຢ່າງ​ຫຼວງຫຼາຍ ນັ້ນ​ກໍ່​ຄື​ການ​ລາ​ຕຳແໜ່ງ​ຂອງ​ຜູ້ນຳ​ລະດັບ​ຕ່າງໆ​ທີ່​ກ່ຽວຂ້ອງ ເພື່ອ​ສະແດງ​ຄວາມ​ຮັບຜິດຊອບ ບໍ່​ວ່າ​ຈະ​ເປັນຄວາມ​ຮັບຜິດຊອບ​ໂດຍ​ກົງ ກໍ່​ຄື​ຄວາມ​ຮັບຜິດຊອບ​ຕໍ່​ຫາງ​ສຽງ​ຂອງ​ສັງຄົມ ເລື່ອງ​ນີ້ ມີ​ຂ່າວ​ໜຶ່ງ​ທີ່​ຂໍ​ຍົກ​ມາ​ເປັນ​ຕົວຢ່າງ ເຊັ່ນ: ທ່ານ ອາ​ຈາ​ຣຸດ​ດິນ ອັບ​ດູນ ຣາ​ມານ ຫົວໜ້າ​ກົມ​ການບິນ​ມາ​ເລ​ເຊຍ ໄດ້​ປະກາດ​ລາ​ອອກ​ຈາກ​ຕຳແໜ່ງ ໃນ​ວັນ​ທີ 31 ເດືອນ​ກໍລະກົດ ປີ​ນີ້ (ໜັງສືພິມ​ລາວ​ພັດທະນາ 2/8/2018) ເພື່ອ​ສະແດງ​ຄວາມ​ຮັບຜິດຊອບ​ຕໍ່​ເຫດການ​ເຮືອບິນ​ໂດຍສານ MH 370 ຂອງ​ມາ​ເລ​ເຊຍ​ຕົກ ແລະ ຮອດ​ເວລາ​ນີ້​ກໍ່​ຍັງ​ບໍ່​ສາມາດ​ຄົ້ນ​ພົບ​ຄຳ​ຕອບ ທັງໆ​ທີ່​ເວລາ​ໄດ້​ລ່ວງ​ເລີຍ​ມາ​ແລ້ວ ເປັນ​ເວລາ 4 ປີ ໃນ​ການ​ປະກາດ​ລາ​ອອກ​ຈາກ​ຕຳແໜ່ງ ທ່ານ​ຫົວໜ້າ​ກົມ​ການບິນ​ພົນ​ລະ​ເຮືອນ​ຂອງ​ມາ​ເລ​ເຊຍ​ບອກ​ວ່າ: ເຖິງ​ວ່າການ​ສືບສວນ​ກ່ຽວ​ກັບ​ຄວາມ​ປອດ​ໄພ ບໍ່​ໄດ້​ລະບຸ​ວ່າ​ກົມ​ການບິນ​ພົນ​ລະ​ເຮືອນ ເປັນ​ສາເຫດ​ໃຫ້​ເຮືອບິນ​ຕົກ​ກໍ່​ຕາມ ແຕ່​ກໍ່​ໄດ້​ກ່າວ​ເຖິງ​ການ​ປະຕິບັດ​ໜ້າທີ່​ຂອງ​ສູນ​ຄຸ້ມ​ຄອງ​ທາງ​ອາກາດ ກົວ​ລາ​ລຳ​ເປີ​ວ່າ ບໍ່​ສອດຄ່ອງ​ກັບ​ລະບຽບ​ການ ທ່ານ ອາ​ຈາ​ຣຸດ​ດິນ ໄດ້​ຄອງ​ຕັ່ງ​ຫົວໜ້າ​ກົມ​ການບິນ ພົນ​ລະ​ເຮືອນ​ມາ​ເລ​ເຊຍ​ຕະຫຼອດ ໃນ 4 ປີຜ່ານມາ ທ່ານ​ໄດ້​ໃຊ້​ຄວາມ​ພະຍາຍາມ​ສຸດ​ຂີດ ເພື່ອ​ຊອກ​ຄົ້ນ​ຫາ​ເຄື່ອງ​ບິນ​ໂດຍສານ MH 370 ທີ່​ຫາຍ​ສາບ​ສູນ ແຕ່​ໄຮ້​ຜົນ ດັ່ງນັ້ນ ຈຶ່ງ​ຂໍ​ລາ​ຕຳແໜ່ງ ເພື່ອ​ສະແດງ​ເຖິງ​ຄວາມ​ຮັບຜິດຊອບ.

    ທີ່​ຫວຽດນາມ: ໜັງສືພິມ​ລາວ​ພັດທະນາ ສະບັບ​ວັນ​ທີ 26 ເດືອນ​ກັນຍາ​ປີ​ນີ້ ໄດ້​ໃຫ້​ຮູ້​ກ່ຽວ​ກັບ ຜົນສຳເລັດ​ໃນ​ບັ້ນ​ກວາດ​ລ້າງ​ເຄືອ​ຄ່າຍ​ການ​ພະນັນ​ອອນ​ລາຍ​ຢູ່​ຫວຽດນາມ ເຊິ່ງ​ມີ​ມູນ​ຄ່າ 7 ເດືອນ 26 ລ້ານ​ໂດ​ລາ​ສະຫະລັດ ໂດຍ​ສາມາດ​ຈັບ​ກຸມ​ຜູ້​ກະທຳ​ຜິດ​ໄດ້ 10 ຄົນ ເງິນສົດ 20.000 ໂດ​ລາ​ສະຫະລັດ ປືນ​ເຫຼັກ​ຍາວ 2 ກະບອກ ລົດ​ໃຫຍ່​ຫຼາຍ​ຄັນ ແລະ ໂທລະສັບ​ມື​ຖື​ຫຼາຍ​ໜ່ວຍ ສ່ວນ​ຫົວ​ໂປ່​ໂຕ​ການ ຊື່​ທ້າວ ຫງຽນ​ກ໋ອກ​ຫວຽດ ນັ້ນ​ກໍ່​ໜີ​ບໍ່​ມົ້ມ​ກັບ​ມື​ຂອງ​ເຈົ້າ​ໜ້າທີ່​ຕຳຫຼວດ ຂ່າວ​ບອກ​ວ່າ: ເຄືອ​ຄ່າຍ​ການ​ພະນັນ​ອອນ​ລາຍ ໄດ້​ຂະຫຍາຍ​ໄປ​ພາກ​ກາງ ແລະ ພາກ​ໃຕ້​ຢ່າງ​ໄວວາ ດ້ວຍ​ຮູບ​ການ​ໃຫ້​ບໍລິການ​ຫຼິ້ນ​ການ​ພະນັນ ກີລາ ແລະ ປະເພດ​ອື່ນໆ ເຊິ່ງ​ມີ​ຜູ້​ເຂົ້າ​ຮ່ວມ​ຫຼິ້ນ​ການ​ພະນັນ ກັບ​ເຄືອ​ຄ່າຍ​ຈຳນວນ​ຫຼາຍ​ຮ້ອຍ​ຄົນ ນອກຈາກ​ຫົວ​ໂປ່​ໂຕ​ການ​ແລ້ວ ເຈົ້າ​ໜ້າທີ່​ຍັງ​ໄດ້​ຈັບ​ກຸມ ຜູ້​ມີ​ສ່ວນ​ຮ່ວມ​ຈັດ​ຕັ້ງ​ເຄືອ​ຄ່າຍ​ດັ່ງກ່າວ​ອີກ 7 ຄົນ ແລະ ມີ​ຜູ້​ເຂົ້າ​ຮ່ວມ​ຕື່ມ​ອີກ 3 ຄົນ ການ​ສືບສວນ-ສອບ​ສວນ​ໄດ້​ໃຫ້​ຮູ້​ວ່າ: ຜູ້​ຖືກ​ຈັບ​ກຸມ​ໄດ້​ດຳເນີນ​ທຸລະ​ກິດ​ຜິດ​ກົດໝາຍ​ຫຼາຍ​ປະເພດ ເຊັ່ນ: ການ​ປ່ອຍ​ເງິນ​ກູ້​ດອກ​ເບ້ຍ​ສູງ ແລະ ຮັບຈ້າງ​ທວງ​ໜີ້​ການ​ພະນັນ ຢູ່​ຫວຽດນາມ ກົດໝາຍ​ໄດ້​ກຳນົດ​ລົງໂທດ ເຈົ້າ​ຂອງ​ທຸລະ​ກິດ​ການ​ພະນັນ​ອອນ​ລາຍ ດ້ວຍ​ໂທດ​ຈຳ​ຄຸກ​ສູງ​ສຸດ 10 ປີ.

    ທີ່​ອິນ​ເດຍ: ໃນ​ວັນ​ທີ 23 ເດືອນ​ກັນຍາ​ປີ​ນີ້ ທ່ານ ນະ​ເຣນ ທຼາ​ໂມ​ດີ ນາຍົກ​ອິນ​ເດຍ ໄດ້​ປະກາດ​ໂຄງການ​ປະກັນ​ສຸຂະພາບ​ຂະໜາດ​ໃຫຍ່​ສຸດ​ຂອງ​ໂລກ ທີ່​ຈະ​ສາມາດ​ໃຫ້​ບໍລິການ​ຜູ້​ທຸກ​ຍາກ ໄດ້​ເຖິງ 500 ລ້ານ​ຄົນ ໂຄງການ​ທີ່​ໃສ່​ຊື່ວ່າ: “ໂມ​ດິ​ແຄ” ນີ້ ຈະ​ມອບ​ເງິນ​ໃຫ້​ແຕ່​ລະ​ຄົວ​ເຮືອນ​ທຸກ​ຍາກ ຈຳນວນ 5 ແສນ​ຣູ​ປີ ຕໍ່ 1 ປີ ເພື່ອ​ເກັບ​ໄວ້​ໃຊ້​ປິ່ນປົວ​ໃນ​ກໍລະນີ​ເຈັບ​ປ່ວຍ​ໜັກ ເພື່ອ​ໃຫ້​ບັນລຸ​ເປົ້າ​ໝາຍ ດັ່ງກ່າວ ທາງ​ການ​ອິນ​ເດຍ​ຕ້ອງ​ໄດ້​ໃຊ້​ງົບປະມານ​ແຕ່​ລະ​ປີ ເກືອບ 1,5 ຕື້​ໂດ​ລາ​ສະຫະລັດ ແລະ ວ່າ​ງົບປະມານ​ດັ່ງກ່າວ​ຈະ​ເພີ່ມ​ຂຶ້ນ​ຕາມ​ເງື່ອນໄຂ ແລະ ຄວາມ​ຕ້ອງການ​ຕົວ​ຈິງ​ຂອງ​ປະຊາຊົນ ໂຄງ ການ​ນີ້ ຖື​ເປັນ​ບາດກ້າວ​ສຳຄັນ ເພື່ອ​ຊ່ວຍເຫຼືອ​ຄອບຄົວ​ທຸກ​ຍາກ ປະມານ 100 ລ້ານ​ຄົວ​ເຮືອນ ໃຫ້​ສາມາດ​ເຂົ້າ​ເຖິງ​ການ​ບໍລິການ​ດ້ານ​ສາ​ທາ​ລະ​​ນະ​ສຸກ​ຢ່າງ​ທົ່ວ​ເຖິງ.

ຂ່າວທີ່ກ່ຽວຂ້ອງ