ປກສ ຈັດແຂ່ງຂັນເຕະບານ ຢູ-13 ຕ້ອນຮັບວັນຊາດ

388 26 ຕ.ລ. 2018 ວົງຈອນກີລາ
ປກສ ຈັດແຂ່ງຂັນເຕະບານ ຢູ-13 ຕ້ອນຮັບວັນຊາດ

    ທ່ານ​ຮ້ອຍ​ໂທ ຄິດ​ສາ­ຄອນ ຈຳ​ປາ­ທອງ ຄູ​ເຝິກ​ບານ­ເຕະ​ເຍົາ­ວະ​ຊົນ ກະ­ຊວງ​ປ້ອງ​ກັນ​ຄວາມ​ສະ­ຫງົບ (ປກສ) ໃຫ້​ສຳ­ພາດ​ວັນ​ທີ 24 ຕຸ­ລາ 2018 ວ່າ: ອາ­ທິດ​ຜ່ານ​ມາ ກົມ​ກີ­ລາ ກະ­ຊວງ ປກສ ໄດ້​ຈັບ​ສະ­ຫຼາກ​ແບ່ງ​ສາຍ​ການ​ແຂ່ງ­ຂັນ​ເຕະ­ບານ​ຊາຍ ຮຸ່ນ​ອາ­ຍຸ​ບໍ່​ເກີນ 13 ປີ ປະ­ຈຳ​ປີ 2018 ຊີງ​ຂັນ​ຫົວ­ໜ້າ​ກົມ​ກີ­ລາ ປກສ ເພື່ອ​ສະ­ເຫຼີມ­ສະ­ຫຼອງ​ຕ້ອນ­ຮັບ​ວັນ­ຊາດ ຄົບ­ຮອບ 43 ປີ ໂດຍ​ມີ 8 ສະ­ໂມ­ສອນ​ເຂົ້າ​ຮ່ວມ ໃນ​ນີ້​ສາຍ ກ ມີ​ສະ­ໂມ­ສອນ​ພີ​ວີ​ເອັບ​ຊີ ສະ­ໂມ­ສອນ​ໄຊ​ເສດ​ຖາ ສະ­ໂມ­ສອນ​ປະ­ສານ​ໃຈ​ເອັບ​ຊີ ແລະ ສະ­ໂມ­ສອນ​ເຄ​ດີ​ດີ​ເອັບ​ຊີ ສາຍ ຂ ມີ​ສະ­ໂມ­ສອນ ປກສ ເອັບ​ຊີ ສະ­ໂມ­ສອນ​ລ້ານ​ຊ້າງ​ຢູ​ໄນ​ເຕັດ ສະ­ໂມ­ສອນ​ເຄ​ພີ​ເອັດ​ເອັບ​ຊີ ແລະ ສະ­ໂມ­ສອນ​ມາດ​ເຕີ​ເຊ​ເວັນ​ເອັບ​ຊີ.

    ສຳ­ລັບ​ການ​ແຂ່ງ­ຂັນ​ລາຍ­ການ​ດັ່ງ­ກ່າວ ຈະ​ຈັດ​ຂຶ້ນ​ວັນ​ທີ 27 ຕຸ­ລາ-24 ພະ­ຈິກ 2018 ຢູ່​ເດີ່ນ​ສະ­ໜາມ​ມ້າ ກົມ​ກີ­ລາ ປກສ ຮູບ​ແບບ​ຂອງ​ການ​ແຂ່ງ­ຂັນ ຮອບ​ແບ່ງ​ສາຍ​ຈະ​ຄັດ​ເລືອກ​ເອົາ​ທີມ​ທີ່​ມີ​ຄະ­ແນນ​ທີ່​ດີ​ທີ່​ສຸດ 2 ທີມ​ເຂົ້າ​ສູ່​ຮອບ 4 ທີມ​ສຸດ​ທ້າຍ ແຂ່ງ­ຂັນ​ກັນ​ແບບ​ເສຍ​ແລ້ວ​ຕົກ ຈົນ​ຮອບ​ນັດ​ຊີງ​ຊະ­ນະ​ເລີດ ໃນ​ນີ້​ຈະ​ແຂ່ງ­ຂັນ​ທຸກ​ອາ­ທິດ​ຕອນ​ບ່າຍ ໂດຍ​ອັນ​ດັບ 1 ຈະ​ໄດ້​ຮັບ​ຂັນ​ຊະ­ນະ​ເລີດ 1 ໜ່ວຍ ພ້ອມ​ເງິນ​ລາ­ງວັນ 5 ແສນ​ກີບ ທີ 2 ໄດ້​ຂັນ 1 ໜ່ວຍ ພ້ອມ​ເງິນ​ລາ­ງວັນ 4 ແສນ​ກີບ ທີ 3 ເງິນ​ລາ­ງວັນ 3 ແສນ​ກີບ.

ຂ່າວທີ່ກ່ຽວຂ້ອງ