ເບິ່ງຄົນລະມຸມ... ເຫັນຄົນລະແບບ

248 26 ຕ.ລ. 2018 ນານາສາລະ

    ຂ້າ­ພະ­ເຈົ້າ​ຄິດ​ວ່າ ຜູ້​ທີ່​ຕ້ອງ­ການ​ເບິ່ງ​ໃຫ້​ເຫັນ​ສິ່ງ​ໃດ​ໜຶ່ງ ຫຼື ບັນ­ຫາ​ສັງ­ຄົມ​ໃຫ້​ຮູ້​ແຈ້ງ ຄວນ​ເລືອກ​ຫາ​ບ່ອນ​ຢືນ​ຫຼາຍ​ແບບ ທັງ​ເບິ່ງ​ຈາກ​ຂ້າງ​ເທິງ​ລົງ​ລຸ່ມ ແລະ ເບິ່ງ​ຈາກ​ຂ້າງ​ລຸ່ມ​ຂຶ້ນ​ເທິງ​ໃນ​ປະ­ຫວັດ­ສາດ​ຂອງ​ບາງ​ສະ­ໄໝ ຫຼື ບາງ​ປະ­ເທດ ເຮົາ​ອ່ານ​ພົບ​ວ່າ ຜູ້​ບໍ­ລິ­ຫານ​ສູງ​ສຸດ​ບາງ​ທ່ານ ໄດ້​ປອມ​ໂຕ​ທ່ອງ​ທ່ຽວ​ໄປ​ຕາມ​ໝູ່​ບ້ານ​ຕ່າງໆ ເພື່ອ​ຊອກ​ຮູ້​ບັນ­ຫາ​ມາ​ແກ້​ໄຂ​ໃຫ້​ຖືກ​ຈຸດ ຍົກ​ຕົວ­ຢ່າງ: ຄົນ​ຊັ້ນ​ລຸ່ມ​ກໍ່​ຈະ​ມີ​ວິ­ຖີ​ຊີ­ວິດ​ຫາ​ຢູ່​ຫາ​ກິນ​ແບບ​ໜຶ່ງ ຜູ້​ມີ​ເສດ­ຖະ­ກິດ​ເຂັ້ມ­ແຂງ ກໍ່​ຈະ​ໃຊ້​ຊີ­ວິດ​ຕ່າງ​ກັນ​ປານ​ຟ້າ​ກັບ​ດິນ​ກໍ່​ມີ​ປະ­ເດັນ​ນີ້ ມັນ​ຈຶ່ງ​ພົວ­ພັນ​ເຖິງ​ຊ່ອງ​ຫວ່າງ​ຂອງ​ຄົນ​ໃນ​ສັງ­ຄົມ.

    ຜູ້​ຂຽນ​ຂໍ​ຍົກ​ເອົາ​ບາງ​ຕອນ​ຂອງ​ບົດ​ຂຽນ ພັນ​ໂທ ທອງ​ວັນ​ນັນ­ທະ​ວົງ ລົງ​ໃນ​ວາ­ລະ­ສານ​ນະ­ຄອນ­ຫຼວງ ໜ້າ 28 ປີ ທີ 5 ສະ­ບັບ​ທີ 34 ເລື່ອງ​ກຳ​ແໜ້ນ​ແນວ​ຄິດ​ຊີ້​ນຳ​ຂອງ​ປະ­ທານ ໄກ­ສອນ ກ່ຽວ​ກັບ​ການ​ຝຶກ​ຝົນ​ຫຼໍ່​ຫຼອມ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ​ໃນ​ໄລ­ຍະ​ໃໝ່​ວ່າ: “... ໄລ­ຍະ​ແຫ່ງ​ການ​ຕໍ່­ສູ້​ປະ­ຕິ­ວັດ ພະ­ນັກ­ງານ ສະ­ມາ­ຊິກ​ພັກ ສ່ວນ​ຫຼວງ­ຫຼາຍ​ໄດ້​ຍົກ​ສູງ​ບົດ­ບາດ​ນ້ຳ­ໜັກ ເປັນ​ແບບ­ຢ່າງ​ທະ­ນຸ​ບຳ­ລຸງ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ... ແຕ່​ໜ້າ​ເສຍ­ດາຍ​ວ່າ ມາ​ຮອດ​ໄລ­ຍະ​ໃໝ່​ຂອງ​ການ​ປະ­ຕິ­ວັດ ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ ສະ­ມາ­ຊິກ​ພັກ​ຈຳ­ນວນ​ໜຶ່ງ ບໍ່​ສາ­ມາດ​ຮັກ­ສາ​ທາດ​ແທ້​ປະ­ຕິ­ວັດ​ອັນ​ດີ­ງາມ ລັກ­ສະ­ນະ​ນຳ​ໜ້າ ເປັນ​ແບບ­ຢ່າງ​ທີ່​ດີ ມີ​ການ​ກະ­ທຳ​ຝືນ​ກັບ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ ແລະ ອຸ­ດົມ​ຄະ­ຕິ​ຂອງ​ພັກ​ໄດ້​ສວຍ​ໃຊ້​ໂອ­ກາດ ສິດ​ອຳ­ນາດ​ໜ້າ­ທີ່​ຕຳ­ແໜ່ງ ດ້ວຍ​ການ​ກິນ​ສິນ​ບົນ ສໍ້​ລາດ​ບັງ​ຫຼວງ ສໍ້​ໂກງ​ເອົາ​ຊັບ​ສົມ­ບັດ​ຂອງ​ລັດ ຂອງ​ປະ­ຊາ­ຊົນ ຂົ່ມ­ຂູ່​ມະ­ຫາ­ຊົນ...” ດັ່ງ­ນັ້ນ ຖ້າ­ວ່າ​ເຮົາ​ຢາກ​ເຫັນ​ບັນ­ຫາ​ຢ່າງ​ແຈ່ມ​ແຈ້ງ ແລະ ຈິງ​ຈັງ​ແກ້​ໄຂ​ຕ້ອງ​ໄດ້​ລົງ​ໄປ​ຫາ​ຫຼາຍ​ຈຸດ ຫຼາຍ​ຂອດ ງວາກ​ຊ້າຍ ແລະ ຂວາ ເພື່ອ​ຟັງ­ສຽງ​ມະ­ຫາ­ຊົນ ເພື່ອ​ເບິ່ງ​ໃຫ້​ເຫັນ​ບັນ­ຫາ​ໂດຍ​ຫຼີກ­ເວັ້ນ​ການ​ນັ່ງ​ເບິ່ງ​ບັນ­ຫາ​ຈາກ​ຈຸດ​ດຽວ ແລ້ວ​ສັ່ງ​ການ​ແກ້​ໄຂ.

    ພວກ​ເຮົາ​ຕ່າງ​ກໍ່​ຍອມ­ຮັບ​ກັນ​ວ່າ ສັງ­ຄົມ​ມີ​ປາ­ກົດ­ການ​ຫຍໍ້­ທໍ້​ຫຼາຍ​ແບບ​ທີ່​ເກີດ​ຂຶ້ນ ທັງ​ຂີ້­ລັກ ຂີ່​ຢາ ຂີ້​ຕົວະ ເຊິ່ງ​ມັນ​ເກີດ​ຈາກ​ການ​ມີ​ແນວ​ຄິດ​ບໍ່​ຖືກ­ຕ້ອງ ເລີຍ​ຊອກ​ວິ­ທີ​ລ້ຽງ​ຊີບ​ທາງ​ຜິດ ຫຼື ບັນ­ຫາ​ສ່ວນ​ໜຶ່ງ ກໍ່​ອາດ​ເກີດ​ມາ​ຈາກ​ເສດ­ຖະ­ກິດ​ໜີບ​ຮັດ ເຮັດ​ໃຫ້​ບາງ​ຄົນ​ຈົນ​ມຸມ​ໃນ​ການ​ຊອກ​ຢູ່​ທຳ​ກິນ... ເບິ່ງ​ຄົນ​ລະ​ມຸມ ຈຶ່ງ​ເຫັນ​ຄົນ​ລະ​ແບບ ຈຶ່ງ​ບໍ່​ຄວນ​ສະ­ຫຼຸບ​ບັນ­ຫາ​ແບບ​ອັດ​ຕະ​ວິ­ໄສ ເຫັນ­ແກ່​ໂຕ ຫຼື ແບບ​ອັດ​ຕະ​ທິ​ປະ​ໄຕ ຖ້າ​ເຮັດ​ແນວ​ນັ້ນ ກໍ່​ຈະ​ໄດ້​ແຕ່​ພວກ​ສະ­ຫຼາດ​ແກມ​ໂກງ ແຕ່​ຈະ​ບໍ່​ໄດ້​ພວກ​ເກ່ງ ແລະ ສຸດ­ຈະ­ລິດ ດັ່ງ­ນັ້ນ ຢາກ​ໄດ້​ທັງ​ວຽກ ທັງ​ຄົນ​ດີ ກໍ່​ຕ້ອງ​ເບິ່ງ​ໃຫ້​ຮອບ​ຄອບ ປາ­ສະ­ຈາກ​ອະ­ຄະ­ຕິ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ