ປະທານ​ສະພາ​ແຫ່ງ​ຊາດ​ສີ​ລັງກາ​ຮັບ​ຮູ້​ຖານະ​ການ​ເປັນ​ນາຍົກລັດຖະມົນຕີ​ຂອງ​ທ່ານ ວິກ​ເກຣ​ເມ​ຊິງ​ເກ

552 30 ຕ.ລ. 2018 ຂ່າວຕ່າງປະເທດ
ປະທານ​ສະພາ​ແຫ່ງ​ຊາດ​ສີ​ລັງກາ​ຮັບ​ຮູ້​ຖານະ​ການ​ເປັນ​ນາຍົກລັດຖະມົນຕີ​ຂອງ​ທ່ານ ວິກ​ເກຣ​ເມ​ຊິງ​ເກ

   ທ່ານ ກາ​ຣູ ລາ​ຢາ​ຊູ​ຣີ​ຢາ ປະທານ​ສະພາ​ແຫ່ງ​ຊາດ​ສີ​ລັງກາ ກ່າວ​ເມື່ອ​ວັນ​ທີ 28 ຕຸລາ​ນີ້ ໂດຍ​ໄດ້​ຍອມຮັບ​ຮູ້​ວ່າ​ທ່ານ ຣາ​ນີ​​ລ ວິກ​ເກຣ​ເມ​ຊິງ​ເກ ເປັນ​ນາຍົກລັດຖະມົນຕີ​ທີ່​ຖືກຕ້ອງ​ຕາມ​ກົດໝາຍ ຂອງ​ປະເທດ​ນີ້ ຊຶ່ງ​ການ​ຍອມຮັບ​ນັ້ນ​ມີ​ຂຶ້ນ 3 ວັນ ຫຼັງ​ຈາກ​ທີ່​ທ່ານ ວິກ​ເກຣ​ເມ​ຊິງ​ເກ ຖືກ​ປົດ​ຕຳແໜ່ງ​ຈາກ​ປະທານາທິບໍດີ ມາຍ​ທຣີ​ປາ​ລາ ຊີ​ຣີ​ເຊ​ນາ.

    ປະທານ​ສະພາ​ແຫ່ງ​ຊາດ​ສີ​ລັງກາ  ເວົ້າ​ວ່າ​ທ່ານ ວິກ​ເກຣ​ເມ​ຊິງ​ເກ ສະເໜີ​ໃຫ້​ມີ​ການ ຮັບປະກັນ​ຄວາມ​ສະຫງົບ ແລະ​ສິດທິ​ພິເສດ​ການ​ເປັນ​ນາຍົກລັດຖະມົນຕີ​ຂອງ​ຕົນ ໃຫ້​ມີ​ຄວາມ​ຍຸຕິ​ທຳ ໄປ​ຈົນ​ກວ່າ​ຜູ້​ສະໝັກ​ຮັບ​ເລືອກ​ຕັ້ງ​ຄົນ​ອື່ນ ໄດ້​ຮັບ​ການ​ໃຫ້​ສັດຕະຍາບັນ​ຈາກ​ສະພາ​ແຫ່ງ​ຊາດ ເຂົ້າ​ມາ​ດຳລົງ​ຕຳແໜ່ງ​ດັ່ງກ່າວ. ໃນ​ຈົດໝາຍ​ທີ່​ສົ່ງ​ໄປ​ຍັງ​ປະທານາທິບໍດີ ຊີ​ຣີ​ເຊ​ນາ ນັ້ນ​ທ່ານ ຈາ​ຢາ​ຊູ​ຣີ​ຢາ ຂຽນ​ວ່າ ຂໍ້​ສະເໜີ​ດັ່ງກ່າວ​ມີ​ຄວາມ​ຍຸຕິ​ທຳ ແລະ​ ປະຊາທິປະໄຕ.

    ກ່ອນ​ໜ້າ​ນັ້ນ ປະທານາທິບໍດີ ຊີ​ຣີ​ເຊ​ນາ ໄດ້​ປົດ​ຕຳແໜ່ງ​ນາຍົກລັດຖະມົນຕີ​ຂອງ​ທ່ານ ວິກ​ເກຣ​ເມ​ຊິງ​ເກ ແລະ ບົ່ງ​ຕົວ​ອະດີດ​ປະທານາທິບໍດີ ມາ​ຮິນ​ດາ ຣາ​ຈາ​ປັກສາ ໃຫ້​ເປັນ​ນາຍົກ ລັດຖະມົນຕີ​ຄົນ​ໃໝ່. ຕໍ່​ມາ ປະທານາທິບໍດີ ຊີ​ຣີ​ເຊ​ນາ ກໍ​ໃຫ້​ງົດ​ການເຄື່ອນໄຫວ​ຂອງ​ສະພາ​ແຫ່ງ​ຊາດ ເປັນ​ການ​ຊົ່ວຄາວ ໄປ​ຈົນ​ຮອດ​ວັນ​ທີ 16 ພະຈິກ​ໜ້າ​ນີ້.

 

ຂ່າວທີ່ກ່ຽວຂ້ອງ