ຣັດ​ເຊຍ ຝຣັ່ງ ເຢຍ​ລະ​ມັນ ຕວກ​ກີ ອອກ​ຖະແຫຼງການ​ຮ່ວມ​ກ່ຽວ​ກັບ​ຊີ​ຣີ

586 30 ຕ.ລ. 2018 ຂ່າວຕ່າງປະເທດ
ຣັດ​ເຊຍ ຝຣັ່ງ ເຢຍ​ລະ​ມັນ ຕວກ​ກີ ອອກ​ຖະແຫຼງການ​ຮ່ວມ​ກ່ຽວ​ກັບ​ຊີ​ຣີ

    ວັນ​ທີ 27 ຕຸລາ​ທີ່​ຜ່ານ​ມາ ຜູ້ນຳ​ຂອງ​ຣັດ​ເຊຍ ຝຣັ່ງ ເຢຍ​ລະ​ມັນ ແລະ ຕວກ​ກີ ໄດ້​ອອກ​ຖະແຫຼງການ​ຮ່ວມ ຫຼັງ​ຈາກ​ການ​ປະຊຸມ​ສຸດ​ຍອດ​ສີ່​ຝ່າຍ ກ່ຽວ​ກັບ​ບັນຫາ​ຊີ​ຣີ ຊຶ່ງ​ຈັດ​ຂຶ້ນ​ທີ່​ນະຄອນ ອິ​​ສ​ຕັງ​ບູນ (ປະເທດ​ຕວກ​ກີ).

    ໃນ​ຖະແຫຼງການ​ຮ່ວມ​ດັ່ງກ່າວ ຜູ້ນຳ​ຂອງ​ສີ່​ປະເທດ​ລ້ວນ​ແຕ່​ເຫັນ​ດີ​ເປັນ​ເອກະສັນ​ກັນ​ວ່າ ວິ​ກິດ​ການ​ຢູ່​ໃນ​ຊີ​ຣີ ສາມາດ​ໄດ້​ຮັບ​ການ​ແກ້​ໄຂ​ດ້ວຍ​ມາດ​ຕະການ​ທາງ​ດ້ານ​ການເມືອງ-ການ​ທູດ​ເທົ່າ​ນັ້ນ ພ້ອມ​ກັນ​ນັ້ນ​ກໍ​ເນັ້ນ​ໜັກ​ເຖິງ​ຄວາມ​ສຳຄັນ​ຂອງ​ມາດ​ຕະການ​ຢຸດ​ຍິງ​ຍາວ​ນານ​ຢູ່​ໃນ​ຊີ​ຣີ ກໍ​ຄື​ຄວາມ​ຈຳເປັນ​ຂອງ​ການ​ຕໍ່ສູ້​ກັບ​ບັນດາ​ກຸ່ມ​ມື​ປືນ.

    ນອກຈາກ​ນັ້ນແລ້ວ ຜູ້ນຳ​ຂອງ​ສີ່​ປະເທດ​ດັ່ງກ່າວ ກໍ​ໄດ້​ສະແດງ​ຄວາມ​ສະໜັບສະໜູນ ຕໍ່​ຂະ​ບວນ​ການ​ການເມືອງ​ຮອບດ້ານ ທີ່​ຈັດ​ສັນ​ໂດຍ​ສະຫະ​ປະຊາ​ຊາດ ໂດຍ​ແມ່ນ​ປະຊາຊົນ​ຊີ​ຣີ​ເປັນ​ຜູ້ນຳ​ໜ້າ ແລະ​ເປັນ​ເຈົ້າ​ຕົນ​ເອງ.

    ຜູ້ນຳ​ທັງ​ສີ່ ກໍ​ໄດ້​ເນັ້ນ​ໜັກ​ເຖິງ​ຄວາມ​ຈຳເປັນ ຂອງ​ການ​ສ້າງ​ເງື່ອນໄຂ​ສະດວກ​ໃນ​ທົ່ວ​ປະເທດ​ຊີ​ຣີ ເພື່ອ​ໃຫ້​ຜູ້​ລີ້​ໄພ​ກັບ​ຄືນ​ບ້ານ​ເດີມ​ດ້ວຍ​ຄວາມ​ສະໝັກ​ໃຈ. ໃນ​ຂະນະ​ດຽວ​ກັນ ຖະແຫຼງການ​ຮ່ວມ ຍັງ​ໄດ້​ຮຽກຮ້ອງ​ໃຫ້​ສ້າງຕັ້ງ​ຄະນະ​ກຳມະການ ຮ່າງ​ລັດ​ຖະ​ທຳ​ມະນູນ​ຊີ​ຣີ ຂຶ້ນ​ມາ​ກ່ອນ​ທ້າຍ​ປີ 2018.

 

ຂ່າວທີ່ກ່ຽວຂ້ອງ