IMF ຮັບຮອງ​ບ້ວງ​ເງິນ​ຊ່ວຍເຫຼືອ 56,3 ຕື້​ໂດ​ລາ ໃຫ້​ແກ່​ອາກ​ຊັງ​ຕິນ

574 30 ຕ.ລ. 2018 ຂ່າວຕ່າງປະເທດ
IMF ຮັບຮອງ​ບ້ວງ​ເງິນ​ຊ່ວຍເຫຼືອ 56,3 ຕື້​ໂດ​ລາ ໃຫ້​ແກ່​ອາກ​ຊັງ​ຕິນ

     ກອງ​ທຶນ​ເງິນຕາ​ສາກົນ (IMF) ແຈ້ງ​ໃຫ້​ຮູ້ເມື່ອ​ວັນ​ທີ 26 ຕຸລາ​ທີ່​ຜ່ານ​ມາ ວ່າ​ໄດ້​ໃຫ້ການ ຮັບຮອງ​ບ້ວງ​ເງິນ​ຊ່ວຍເຫຼືອ ໃຫ້​ແກ່​ອາກ​ຊັງ​ຕິນ ມູນ​ຄ່າ 56,3 ຕື້​ໂດ​ລາ​ສະຫະລັດ​ນັ້ນ​ຢ່າງ​ເປັນ ທາງ​ການ​ແລ້ວ ໂດຍ​ມີ​ກຳນົດ 3 ປີ.

    ບ້ວງ​ເງິນ​ສິນ​ເຊື່ອ​ດັ່ງກ່າວ ໜ້ອຍ​ກວ່າ​ເມື່ອ​ທຽບໃສ່​ຕົວ​ເລກ​ທີ່​ຄາດ​ຄະເນ​ໄວ້ 57,1 ຕື້​ໂດ​ລາ ສະຫະລັດ ຊຶ່ງ​ສອງ​ຝ່າຍ​ນຳ​ອອກ​ມາ ໃນ​ເວລາ​ເລີ່ມ​ການ​ເຈລະຈາ ເມື່ອ​ເດືອນ​ກັນຍາ​ທີ່​ຜ່ານ​ມາ.

    ແຈ້ງ​ການ​ຂອງ IMF ໃຫ້​ຮູ້​ວ່າ ການ​ຕົກລົງ​ດັ່ງກ່າວ ມີ​ອອກ​ມາ​ຫຼັງ​ການ​ປະຊຸມ ຂອງ​ນະ​ນະ​ບໍລິຫານ​ງານ IMF ພາຍ​ໃຕ້​ການ​ເປັນ​ປະທານ​ຂອງ​ທ່ານ​ນາງ ຄຣິ​​ສ​ຕິນ ລາ​ກາດ ຜູ້ອຳນວຍການ​ໃຫຍ່ IMF. ຕາມ​ການ​ຕົກລົງ​ນັ້ນແລ້ວ ກໍ​ແມ່ນ IMF ຈະ​ເຫັນ​ດີ​ເປີດ​ກວ້າງ​ບ້ວງ​ກູ້​ຢືມ ສິນ​ເຊື່ອ​ປ້ອງ​ກັນ​ສຳຮອງ​ໃຫ້​ແກ່​ອາກ​ຊັງ​ຕິນ ຈາກ 50 ຕື້​ໂດ​ລາ​ສະຫະລັດ ຂຶ້ນ​ເປັນ 56,3 ຕື້​ໂດ​ລາ ສະຫະລັດ ເພື່ອ​ຊ່ວຍເຫຼືອ​ພື້ນຖານ​ເສດຖະກິດ ອາກ​ຊັງ​ຕິນ ຜ່ານ​ຜ່າ​ໄລຍະ​ທີ່​ຫຍຸ້ງຍາກ​ໃນ​ປັດຈຸບັນ.

    ການ​ທີ່ IMF “ເປີດ​ໄຟ​ຂຽວ” ໃຫ້​ແກ່​ອາກ​ຊັງ​ຕິນ ເຂົ້າ​ຫາ​ບ້ວງ​ກູ້​ຢືມ​ສິນ​ເຊື່ອ​ດັ່ງກ່າວ ມີ​ຂຶ້ນ​ໜຶ່ງ​ມື້ ຫຼັງ​ຈາກ​ທີ່​ສະພາ​ຕ່ຳ​ຂອງ​ອາກ​ຊັງ​ຕິນ ຮັບຮອງ​ຮ່າງ​ງົບປະມານ​ປີ 2019 ໂດຍ​ແມ່ນ ລັດຖະບານ​ນຳ​ສະເໜີ. ຕາມ​ຮ່າງ​ງົບປະມານ​ນັ້ນ ກໍ​ແມ່ນ​ອາກ​ຊັງ​ຕິນ​ຄາດ​ວ່າ​ຈະ​ຕັດ​ຫຼຸດ​ປະມານ 400 ຕື້​ເປ​ໂຊ (ເທົ່າ​ກັບ​ກວ່າ 10 ຕື້​ໂດ​ລາ​ສະຫະລັດ) ເມື່ອ​ທຽບໃສ່​ປີ 2018 ຢູ່​ໃນ​ບ້ວງ​ໃຊ້​ຈ່າຍ​ພາກ​ລັດ ທ່າມກາງ​ທີ່​ພື້ນຖານ​ເສດຖະກິດ​ອາກ​ຊັງ​ຕິນ ພວມ​ຜ່ານ​ຜ່າ​ໄລຍະ​ທີ່​ຫຼຸດ​ຖອຍ​ຮ້າຍ​ແຮງ.

    ບົດ​ລາຍ​ງານ​ຂອງ​ລັດຖະບານ​ອາກ​ຊັງ​ຕິນ ໃຫ້​ຮູ້​ວ່າ ພື້ນຖານ​ເສດຖະກິດ​ຂອງ​ປະເທດ​ນີ້ ຄາດ​ວ່າ​ຈະ​ຫຼຸດ​ລົງ​ແຕ່ 2% ຫາ 3% ໃນ​ປີ 2018 ແລະ ແຕ່ 0,5% ຫາ 2% ໃນ​ປີ 2019 ກ່ອນ​ທີ່​ຈະ​ເລີ່ມ​ໄດ້​ຮັບ​ການ​ຟື້ນ​ຟູ.

 

ຂ່າວທີ່ກ່ຽວຂ້ອງ