ເກີດ​ອຸບັດເຫດ​ທາງ​ການບິນ ຢູ່​ໃນ​ອັງກິດ ແລະ ອິນ​ໂດ​ເນ​ເຊຍ

632 30 ຕ.ລ. 2018 ຂ່າວຕ່າງປະເທດ
ເກີດ​ອຸບັດເຫດ​ທາງ​ການບິນ ຢູ່​ໃນ​ອັງກິດ ແລະ ອິນ​ໂດ​ເນ​ເຊຍ

      ສະໂມສອນ​ບານເຕະ ເລ​​ສ​ເຕີ ຊີ​ຕີ (Leicester City) ມີ​ແຈ້ງ​ການ​ອອກ​ມາ​ຢ່າງ​ເປັນ ທາງ​ການ ໂດຍ​ໄດ້​ຢັ້ງຢືນ​ວ່າ​ທ່ານ ວິ​ໄຊ ສີ​ວັດທະນາ​ປະພາ (ມະຫາ​ເສດຖີ​ຊາວ​ໄທ) ປະທານ​ຂອງ ສະໂມສອນ​ດັ່ງກ່າວ ແລະ​ຜູ້​ອື່ນໆ​ອີກ 4 ຄົນ (ໃນ​ນັ້ນ​ມີ​ນັກ​ບິນ 2 ຄົນ) ໄດ້​ເສຍ​ຊີວິດ​ຍ້ອນ​ອຸບັດເຫດ ທາງ​ດ້ານ​ການບິນ ຊຶ່ງ​ເກີດ​ຂຶ້ນ​ຢູ່​ດ້ານ​ນອກ​ສະໜາມກິລາ ຄິງ ພາວ​ເວີ   (King Power) ໃນ​ປະເທດ​ອັງກິດ ເມື່ອ​ວັນ​ທີ 28 ຕຸລາ​ນີ້.

    ທ່ານ ວິ​ໄຊ ສີ​ວັດທະນາ​ປະພາ ໄດ້​ຈັດ​ຊື້​ເອົາ​ສະໂມສອນ ເລ​​ສ​ເຕີ ຊີ​ຕີ ດ້ວຍ​ລາຄາ 39 ລ້ານ​ປອນ ເມື່ອ​ເດືອນ​ສິງຫາ ປີ 2010 ແລະ​ໄດ້​ຖືກ​ແຕ່ງຕັ້ງ​ເປັນ​ປະທານ​ສະໂມສອນ​ດັ່ງກ່າວ ໃນ​ເດືອນ​ກຸມພາ ປີ 2011.

    ສ່ວນ​ຢູ່​ທີ່​ອິນ​ໂດ​ເນ​ເຊຍ ເຮືອບິນ​ໂດຍສານ Boeing 737 MAX 8 ລຳ​ໜຶ່ງ ຂອງ​ບໍລິສັດ ການບິນ ໄລ​ອອນ ແອ​​ຣ (Lion Air) ຂອງ​ອິນ​ໂດ​ເນ​ເຊຍ ໄດ້​ປະສົບ​ເຫດ​ຕົກ ຫຼັງ​ຈາກ​ທີ່​ບິນ​ຂຶ້ນ ຈາກ​ສະໜາມ​ບິນ​ໃນ​ນະຄອນຫຼວງ ຈາ​ກາ​ຕາ ໃນ​ຕອນ​ເຊົ້າ​ຂອງ​ວັນ​ທີ 29 ຕຸລາ​ນີ້.

    ຜູ້ອຳນວຍການ​ຂອງ​ບໍລິສັດ​ການບິນ Lion Air ເວົ້າ​ວ່າ ເຮືອບິນ​ດັ່ງກ່າວ​ໄດ້​ຂາດ​ການ​ຕິດຕໍ່ ກັບ​ຫໍ​ຄວບ​ຄຸມ​ການ​ສັນຈອນ​ທາງ​ອາກາດ ໃນ​ຂະນະ​ທີ່​ບິນ​ຂຶ້ນ​ຈາກ​ສະໜາມ​ບິນ​ໃນ​ນະຄອນຫຼວງ ຈາ​ກາ​ຕາ​ໄດ້​ບໍ່​ດົນ ໃນ​ຕອນ​ເຊົ້າ​ຊອງ​ວັນ​ທີ 29 ຕຸລາ ເພື່ອ​ມຸ່ງ​ໜ້າ​ໄປ​ຍັງ​ເມືອງ ປັງ​ກາກ​ປີ​ນັງ ໃນ​ແຂວງ ບັງ​ກາ ເບລີ​ຕຸງ. ສື່ສານ​ໃນ​ທ້ອງຖິ່ນ ລາຍ​ງານ​ໃນ​ເວລາ​ຕໍ່​ມາ​ວ່າ ເຮືອບິນ​ລຳ​ດັ່ງກ່າວ ໄດ້​ປະສົບ​ເຫດ​ຕົກ ໃນ​ຂະນະ​ທີ່​ອົງການ​ກູ້​ໄພ​ຂອງ​ອິນ​ໂດ​ເນ​ເຊຍ ກໍ​ຢັ້ງຢືນ​ວ່າ ເຮືອບິນ​ດັ່ງກ່າວ ໄດ້​ປະສົບ​ເຫດ​ຕົກລົງ​ໃນ​ທະເລ.

 

ຂ່າວທີ່ກ່ຽວຂ້ອງ