ສັງຄົມ ກັບ ການສຶກສາ

307 31 ຕ.ລ. 2018 ນານາສາລະ

    ຜູ້​ຂຽນ​ເຂົ້າ­ໃຈ​ວ່າ ບາງ­ເທື່ອ​ສັງ­ຄົມ​ອາດ​ຍັງ​ເຂົ້າ­ໃຈ​ບໍ່​ເລິກ ກ່ຽວ​ກັບ​ພັນ­ທະ ແລະ ໜ້າ­ທີ່​ຂອງ​ຕົນ ທີ່​ພົວ­ພັນ​ກັບ​ວຽກ​ສຶກ​ສາ ໂດຍ​ສະ­ເພາະ ອົງ​ການ­ຈັດ­ຕັ້ງ​ທາງ​ສັງ­ຄົມ ເຊັ່ນ: ບັນ­ດາ​ຫົວ­ໜ່ວຍ​ທຸ­ລະ​ກິດ ແລະ ຜູ້​ປະ­ກອບ​ການ​ອື່ນໆ ເທົ່າ​ທີ່​ຂຽນ​ໄວ້​ໃນ​ກົດ­ໝາຍ​ການ​ສຶກ​ສາ ມາດ­ຕາ 52 ວ່າ: ຕ້ອງ​ໃຫ້​ຄວາມ​ຮ່ວມ​ມື ອຳ­ນວຍ​ຄວາມ​ສະ­ດວກ ແລະ ສະ­ໜັບ­ສະ­ໜູນ​ຄູ ຫຼື ຜູ້​ຮຽນ​ເຂົ້າ​ໄປ​ສຶກ​ສາ​ຄົ້ນ­ຄວ້າ ທັດ­ສະ­ນະ​ສຶກ​ສາ ແລະ ຝຶກ​ງານ​ຢູ່​ບ່ອນ​ປະ­ກອບ​ການ​ຂອງ​ຕົນ ພ້ອມ​ນີ້ ສື່​ມວນ​ຊົນ​ຍັງ​ຈະ​ຕ້ອງ​ໂຄ­ສະ­ນາ ເຜີຍ­ແຜ່​ວຽກ​ງານ​ການ​ສຶກ​ສາ​ໃຫ້​ແກ່​ພົນ­ລະ­ເມືອງ.

    ຜູ້​ປົກ­ຄອງ ຫຼື ຜູ້​ບໍ­ລິ­ຫານ​ການ​ສຶກ​ສາ ຈຶ່ງ​ບໍ່​ຄວນ​ຖື​ເບົາ​ຕໍ່​ພັນ­ທະ ແລະ ໜ້າ­ທີ່​ຂອງ​ຕົນ ເພາະ​ກົດ­ໝາຍ​ການ​ສຶກ​ສາ ມາດ­ຕາ 52 ໄດ້​ກຳ­ນົດ​ໄວ້​ວ່າ: ພໍ່ ແມ່ ຫຼື ຜູ້​ປົກ­ຄອງ​ມີ​ພັນ­ທະ​ສ້າງ​ເງື່ອນ­ໄຂ​ອຳ­ນວຍ​ຄວາມ​ສະ­ດວກ​ແກ່​ລູກ​ຫຼານ ທີ່­ຢູ່​ໃນ​ຄວາມ​ຮັບ­ຜິດ­ຊອບ​ຂອງ​ຕົນ ໃຫ້​ໄດ້​ຮັບ​ການ​ສຶກ​ສາ ຮ່ວມ​ມື​ກັບ​ຄູ ແລະ ໂຮງ­ຮຽນ... ຜູ້​ຂຽນ​ຂໍ​ຍົກ​ຕົວ­ຢ່າງ: ອົງ​ປະ­ກອບ​ຂອງ​ການ​ສຶກ​ສາ ຄື: (1) ຫຼັກ­ສູດ (2) ຄູ ເຊິ່ງ​ຈະ​ຕ້ອງ​ຫຼິ້ນ​ບົດ­ບາດ​ເປັນ​ຜູ້​ກະ​ຕຸ້ນ​ໃຫ້​ນັກ­ຮຽນ ເກີດ​ຄວາມ​ກະ​ຕື​ລື​ລົ້ນ​ຕໍ່​ການ​ສຶກ​ສາ​ດ້ວຍ​ຕົນ​ເອງ (3) ນັກ­ຮຽນ ຖ້າ­ວ່າ​ຄູ​ໃນ​ສະ​ຖາ​ບັນ​ການ​ສຶກ​ສາ ຫາກ​ມີ​ຄວາມ​ຮູ້ ມີ​ຄຸ­ນະ­ພາບ​ໃນ​ການ​ສິດ­ສອນ ທຸກ​ຄົນ​ກໍ່​ສາ­ມາດ​ຜັກ​ດັນ​ນັກ­ຮຽນ​ໃຫ້​ກ້າວ​ໄປ​ສູ່​ຄຸ­ນະ­ພາບ​ໄດ້ ເຊິ່ງ​ປະ­ກອບ​ກັບ​ການ​ເອົາ­ໃຈ­ໃສ່​ຂອງ​ຜູ້​ບໍ­ລິ­ຫານ​ການ​ສຶກ​ສາ ຕ້ອງ​ໄປ​ຄູ່​ຂະ­ໜານ​ກັນ.

    ສຳ­ລັບ​ຂະ​ບວນ​ການ​ບໍ­ລິ­ຫານ​ໂຮງ­ຮຽນ​ບາງ​ປະ­ເທດ ຜູ້​ບໍ­ລິ­ຫານ​ການ​ສຶກ​ສາ​ກໍ່​ໃຊ້​ສູດ CPO: Creative and Productive Organization ເຊັ່ນ: ຕ້ອງ​ເຂົ້າ­ໃຈ​ວັດ­ທະ­ນະ­ທຳ ແລະ ບຸ​ຄະ­ລາ​ກອນ​ຂອງ​ສະ​ຖາ​ບັນ​ການ​ສຶກ​ສາ​ທີ່​ຕົນ​ຮັບ­ຜິດ­ຊອບ​ຢູ່ ເຊິ່ງ​ເນັ້ນ​ໃຫ້​ຜູ້​ບໍ­ລິ­ຫານ​ຕ້ອງ​ມີ Creative and Productive Mind (ສ້າງ­ສັນ ແລະ ສ້າງ​ຜົນ­ງານ) ເພື່ອ​ສ້າງ​ນັກ­ຮຽນ​ໃຫ້​ໄດ້​ຄຸ­ນະ­ພາບ ແລະ ມີ​ສະ­ຕິ​ປັນ­ຍາ ຄິດ​ວິ­ເຄາະ​ໄດ້​ໃນ​ສັງ­ຄົມ​ບໍ­ລິ­ໂພກ​ນິ­ຍົມ ແລະ ບໍ່​ຕົກ​ເປັນ​ເຫຍື່ອ​ຂອງ​ການ​ໂຄ­ສະ­ນາ​ຊວນ​ເຊື່ອ.

    ສັງ​ລວມ​ໄດ້​ວ່າ: ໃຜໆ​ກໍ່​ເຂົ້າ­ໃຈ​ແລ້ວ​ວ່າ­ການ​ສຶກ​ສາ ຄື​ເຄື່ອງ­ມື​ສຳ­ຄັນ​ຂອງ​ການ​ພັດ­ທະ­ນາ​ປະ­ເທດ ຖ້າ­ວ່າ​ການ​ສຶກ​ສາ​ຫາກ​ສອດ­ຄ່ອງ​ກັບ​ລະ­ບົບ​ຕ່າງໆ​ຂອງ​ສັງ­ຄົມ ກໍ່​ຈະ​ເຮັດ​ໃຫ້​ສັງ­ຄົມ​ດີ­ງາມ​ຄຽງ​ຄູ່​ກັນ​ໄປ ດັ່ງ­ນັ້ນ ການ​ສຶກ​ສາ​ຈຶ່ງ​ຖືກ​ກຳ­ນົດ​ໃຫ້​ເປັນ​ເຄື່ອງ­ມື​ໃນ​ການ​ເພີ່ມ​ພູນ​ຄວາມ​ຮູ້ ຄວາມ​ຊຳ­ນານ ແລະ ທັກ​ສະ​ບາງ​ປະ­ການ​ທີ່​ສອດ­ຄ່ອງ​ກັບ​ການ​ປ່ຽນ­ແປງ​ຂອງ​ເສດ­ຖະ­ກິດ ຍົກ​ຕົວ­ຢ່າງ: ບັນ­ຫາ​ຂອງ​ຄູ​ອາ­ສາ​ທີ່​ຍັງ​ແກ້​ໄຂ​ບໍ່​ຕົກ ເພາະ​ເມືອງ​ກໍ່​ຖິ້ມ​ໃຫ້​ແຂວງ ເຊິ່ງ​ໂຍນ​ໄປ​ໂຍນ​ມາ ແລະ ຫຼາຍ​ເມືອງ ຫຼື ບາງ​ແຂວງ ກໍ່​ຂາດ​ການ​ປະ​ເມີນ​ຕົວ​ຈິງ ເພາະ​ອາດ​ມີ​ແຜນ​ສອບ­ເສັງ​ຄັດ​ເລືອກ​ເອົາ ແຕ່​ບາງ​ແຫ່ງ​ບໍ່​ເຄີຍ​ປະ­ຕິ­ບັດ​ກໍ່​ມີ​ເຮັດ​ໃຫ້​ຄູ​ອາ­ສາ​ທີ່​ດີ​ສູນ​ເສຍ​ກຳ­ລັງ​ໃຈ.

ຂ່າວທີ່ກ່ຽວຂ້ອງ