ເບີ່ງບ້ານເຂົາເອົາບົດຮຽນ 31-10-2018

225 31 ຕ.ລ. 2018 ຫົວຂໍ້ຂ່າວອື່ນໆ

       ມື້ນີ້​ມີ​ຂ່າວ​ອ່າວ​ເກົ່າ​ກ່ຽວ​ກັບ​ການ​ປະພຶດ​ແບບ​ແຕກ​ປອກ ຂອງ​ນັກກີລາ​ທີ່​ເຂົ້າ​ຮ່ວມ​ມະ ຫະ​ກຳ​ກີລາ​ອາຊີ ທີ່​ອິນ​ໂດ​ເນຍ​ເຊຍ ຕໍ່​ໃສ່​ເລື່ອງ​ການ​ສັ່ງ​ຫ້າມ​ຂາຍ​ເຂັມ​ໃນ​ຮ້ານ​ໃຫຍ່ໆ​ທີ່​ອົດ​ສະ​ຕຣາ​ລີ ແລະ ບັນຫາ​ຕົ້ມ​ຕຸນ​ຜ່ານ​ລະບົບ​ອິນ​ເຕີ​ເນັດ ທີ່ ສ ເກົາຫຼີ.

       ທີ່ ອິນ​ໂດ​ເນຍ​ເຊຍ: ໜັງສືພິມ ເດິ​ເນ​ເຊິນ (The Nation) ສະບັບ​ວັນ​ທີ 23 ເດືອນ​ສິງຫາ​ປີ​ນີ້​ໄດ້​ສະເໜີ​ກ່ຽວ​ກັບ​ເຫດການ​ໜຶ່ງ​ທີ່​ສ້າງ​ຄວາມ​ເສື່ອມ​ເສຍ​ໃຫ້​ແກ່​ພາບ​ພົດ​ຂອງ​ມະ​ຫະ​ກຳ​ກີ ລາ​ອາຊີ​ທີ່​ອິນ​ໂດ​ເນຍ​ເຊຍ ເປັນ​ເຈົ້າພາບ​ຈັດ​ຂຶ້ນ ຈາກ​ການ​ປະພຶດ​ຂອງ​ຄະນະ​ກີລາ​ຈາກ​ຍີ່ປຸ່ນ ເລື່ອງ​ມີ​ຢູ່​ວ່າ ນັກກີລາ​ບານສົ່ງ​ຊາຍ​ຍີ່ປຸ່ນ ສີ່​ຄົນ ໄດ້​ສວຍໂອກາດ​ຫຼອຍ​ອອກ​ໄປ​ມົ້ວ​ສຸມ​ກັບ​ຍິງ​ໂສເພນີ​ໃນ​ຍ່ານ​ບັນເທີງ ຢູ່​ນະຄອນຫຼວງ ຈາ​ກາ​ຕາ ທັງໆ​ທີ່​ຍັງ​ຢູ່​ໃນ​ຊຸດ​ທິມ​ກີລາ​ບານ ສົ່ງ ທາງ​ການ​ຂອງ​ຍີ່ປຸ່ນ ເຫດ​ເກີດ​ຂຶ້ນ​ພາຍຫຼັງ​ນັກກີລາ​ທັງ​ສີ່​ຄົນ​ອອກ​ໄປ​ຮັບ​ປະທານ​ອາ ຫານ​ແລງ ແລະ ຖືກ​ນາຍ​ໜ້າ​ຕິດຕໍ່​ຊັກ​ຊວນ​ເຂົ້າ​ໂຮງແຮມ​ກັບ​ໂສເພນີ ພໍ​ເລື່ອງ​ນີ້​ແດງ​ຂຶ້ນ ທ່ານ ມົວ​ລິບ​ຊາ ຜູ້​ແທນ​ສະພາ​ນະຄອນຫຼວງ​ຈາ​ກາ​ຕາ ໄດ້​ມີ​ຄຳ​ເຫັນ​ວ່າ “ເປັນ​ການ​ຕົບ​ໜ້າ” ສຳລັບ​ນະຄອນຫຼວງ​ຂອງ​ອິນ​ໂດ​ເນຍ​ເຊຍ ແລະ  ວ່າ​ເຫດການ​ນີ້​ໄດ້​ເຕືອນ​ໃຫ້​ພວກ​ເຮົາ​ຮູ້​ວ່າ​ໂສເພນີ​ຍັງ​ບໍ່​ໝົດ​ໄປ​ຈາກ​ຈາ​ກາ​ຕາ​ເທື່ອ ສ່ວນ​ຫົວໜ້າ​ຄະນະ​ຜູ້​ແທນ​ກີລາ​ຍີ່ປຸ່ນ​ນັ້ນ ໄດ້​ອອກ​ມາ​ກ່າວ​ກ່ຽວ​ກັບ​ເຫດການ​ນີ້​ວ່າ: ມີ​ຄວາມ​ຮູ້ສຶກ​ອັບອາຍ ແລະ ກ່າວ​ຂໍ​ໂທດ​ປະເທດ​ເຈົ້າພາບ ຢ່າງ​ເລິກ ເຊິ່ງ​ພ້ອມ​ທັງ​ໃຫ້​ຄຳ​ໝັ້ນ​ສັນຍາ​ວ່າ ຈະ​ຄຸ້ມ​ຄອງ​ນັກກີລາ​ຢ່າງ​ເຄັ່ງ​ຄັດ ແລະ ທົ່ວ​ເຖິງ ທາງ​ເບື້ອງ​ຫົວໜ້າ​ທິມ​ກີລາ​ບານສົ່ງ​ຍີ່ປຸ່ນ​ນັ້ນ​ມີ​ຄວາມ​ເຫັນ​ວ່າ ຂ້າພະເຈົ້າ​ຂໍ​ໂທດ ຕໍ່​ປະຊາຊົນ​ຍີ່ປຸ່ນ ຄະນະ​ກຳມະການ​ກີລາ​ໂອ​ລິມ​ປິກ​ຍີ່ປຸ່ນ ແລະ ຂາ​ສະໜັບສະໜູນ​ທິມ​ກີລາ​ບານສົ່ງ​ຍີ່ປຸ່ນ​ທຸກໆ​ຄົນ ທີ່​ເຫດການ​ເສື່ອມ​ເສຍ​ນີ້​ເກີດ​ຂຶ້ນ ຂ່າວ​ບອກ​ວ່າ ນັກກີລາ​ທັງ​ສີ່​ຄົນ ທີ່​ມົ້ວ​ສຸມ​ໂສເພນີ​ນັ້ນ​ຖືກ​ສັ່ງ​ກັບ​ປະເທດ​ດ່ວນ ເພື່ອ​ຮັບ​ໂທດ​ຢ່າງ​ເໝາະ​ສົມ​ກັບ​ຄວາມ​ຜິດ.

       ທີ່ ອົດ​ສະ​ຕຣາ​ລີ: ເຫດການ​ສະ​ຫຍົດ​ສະຫຍອງ​ເກີດ​ຂຶ້ນ​ຢູ່ ອົດ​ສະ​ຕຣາ​ລີ ນັ້ນ​ກໍ່​ຄື ໄດ້​ມີ​ການ​ກວດ​ພົບ​ເຂັມ​ສຽບ​ຢູ່​ໝາກ​ສະ​ຕໍ​ເບີ​ຣີ​ສົດ​ຫຼາຍ​ກວ່າ 100 ກໍ​ລີ (ຕົວ​ເລກ​ໃນ​ວັນ​ທີ 20 ເດືອນ​ກັນຍາ​ປີ​ນີ້) ມາ​ພ້ອມໆ​ກັບ​ຂ່າວ​ນີ້ ທາງ​ກຸ່ມ​ບໍລິສັດ​ຮ້ານ​ສັບພະ​ສິນຄ້າ ວູນ​ເວີດ (Woolworths) ເຊິ່ງ​ເປັນ​ໜຶ່ງ​ໃນ​ສອງ​ເຄືອ​ຄ່າຍ​ຮ້ານ​ສັບພະ​ສິນຄ້າ​ໃຫຍ່​ທີ່​ສຸດ​ຂອງ​ປະເທດ ກໍ່​ໄດ້​ເອົາ​ມາດ​ຕະການ​ຫ້າມ​ຂາຍ​ເຂັມ​ຫຍິບ​ຜ້າ ໂດຍ​ໄດ້​ຖອນ​ຜະລິດ​ຕະ​ພັນ​ເຂັມ​ທັງ​ໝົດ​ອອກ​ຈາກ​ເຄືອ​ຄ່າຍ​ຮ້ານ​ຄ້າ ເລີ່ມ​ແຕ່​ວັນ​ທີ 20 ເດືອນ​ກັນຍາ​ປີ​ນີ້ ເປັນຕົ້ນ​ມາ ຍ້ອນ​ວິ​ຕົກວ່າ​ຈະ​ມີ​ພວກ​ບໍ່​ດີ​ນຳ​ເຂັມ​ໄປ​ສຽບ​ໃສ່​ໝາກ​ສະ​ຕໍ​ເບີ​ຣີ ໃນ​ຄະນະ​ດຽວ​ກັນ​ເຈົ້າ​ໜ້າທີ່​ຕຳຫຼວດ ອົດ​ສະ​ຕຣາ​ລີ ໄດ້​ຂຸ້ນຂ້ຽວ​ຕິດຕາມ​ຫາ​ຜູ້​ກໍ່​ເຫດ ເພື່ອ​ລະງັບ​ເຫດການ​ບໍ່​ເພິ່ງ​ປາຖະໜາ​ນີ້​ລົງ ແລະ ເພື່ອ​ສ້າງ​ຄວາມ​ໝັ້ນ​ໃຈ ແກ່​ຜູ້​ບໍລິໂພກ​ໝາກ​ໄມ້​ຊະນິດ​ນີ້​ຢູ່​ພາຍ​ໃນ​ປະເທດ ກໍ່​ຄື ບັນດາ​ປະເທດ​ທີ່​ນຳ​ເຂົ້າ​ສະ​ຕໍ​ເບີ​ຣີ ຈາກ​ອົດ​ສະ​ຕຣາ​ລີ.

      ທີ່  ສ ເກົາຫຼີ: ສ ເກົາຫຼີ ເປັນ​ປະເທດ​ໜຶ່ງ​ທີ່​ປະ​ເຊີນ​ກັບ​ບັນຫາ​ຂະ​ບວນ​ການ​ສໍ້​ໂກງ ຕົ້ມ​ຕຸນ​ທາງ​ອິນ​ເຕີ​ເນັດ ສຸດ​ທ້າຍ​ກໍ່​ມີ​ຂ່າວ(ວຽງ​ຈັນ​ທາມ 28 ກັນຍາ 2018) ກ່ຽວ​ກັບ​ທາງ​ການ​ຂອງ​ປະເທດ​ນີ້​ໄດ້​ເປີດເຜີຍ​ຕົວ​ເລກ​ອາ​ຊະ​ຍາ​ກຳ​ສໍ້​ໂກງ ຕົ້ມ​ຕຸນ​ທາງ​ອິນ​ເຕີ​ເນັດ​ໃນ 4 ປີ​ຜ່ານ ມາ​ວ່າ ມີ​ຄົນ ສ ເກົາຫຼີ ຈຳນວນ 16.802 ຄົນ ຖືກ​ຈັບ​ກຸມ ຍ້ອນ​ມີ​ການ​ພົວພັນ​ກັບ​ອາ​ຊະ​ຍາ​ກຳ​ດັ່ງກ່າວ ໃນ​ນັ້ນ 97% ແມ່ນ​ເພດ​ຊາຍ ເຊິ່ງ​ເທົ່າ​ກັບ 16.375 ຄົນ ຂ່າວ​ຍັງ​ໄດ້​ໃຫ້​ລາຍ​ລະອຽດ​ຕື່ມ​ວ່າ 15,7% ຂອງ​ຜູ້​ກະທຳ​ຜິດ ເພດ​ຊາຍ​ນັ້ນ​ແມ່ນ​ຄົນ​ໃກ້​ຄຽງ ຫຼື ເພື່ອນ​ຮ່ວມ​ງານ​ຂອງ​ຜູ້​ທີ່​ຕົກ​ເປັນ​ເຫຍື່ອ (ຜູ້​ຖືກ​ຕົ້ມ​ຕຸນ) ຜູ້​ຕົ້ມ​ຕຸນ ເຫຍື່ອ​ເພດ​ຍິງ​ສ່ວນ​ໃຫຍ່​ນັ້ນ​ລ້ວນ​ແຕ່​ເປັນ​ຄົນ​ຮັກ ຫຼື  ຊູ້​ເກົ່າ​ຂອງ​ເຫຍື່ອ​ນັ້ນ​ເອງ.

ຂ່າວທີ່ກ່ຽວຂ້ອງ