ເບີ່ງບ້ານເຂົາເອົາບົດຮຽນ 31-10-2018

187 01 ພ.ຈ. 2018 ຫົວຂໍ້ຂ່າວອື່ນໆ

      ຄໍ​ລຳ​ປະຈຳ​ວັນ​ນີ້ ຂໍ​ສະເໜີ​ກ່ຽວ​ກັບ​ມາດ​ຕະການ​ຮັບປະກັນ​ຄວາມ​ປອດ​ໄພ​ຂອງ​ຜູ້ໂດຍສານ ກັບ​ລົດ​ທີ່​ບໍລິສັດ​ໃຫ້​ບໍລິການ​ເລື່ອງ​ກົດໝາຍ​ບຳນານ​ຂອງ​ຣັດ​ເຊຍ ແລະ ການ​ປັບ​ຫຼຸດ​ອາຍຸ​ປ່ອນ​ບັດ​ເລືອກ​ຕັ້ງ​ຢູ່​ມາ​ເລ​ເຊຍ

    ທີ່ ​ສປ ຈີນ: ຫວ່າງ​ບໍ່​ດົນ​ມາ​ນີ້ ມີ​ຂ່າວ​ວ່າ: ລັດຖະບານ​ຈີນ​ໄດ້​ເຄັ່ງ​ມາດ​ຕະການ​ຄຸ້ມ​ຄອງ​ຄວາມ​ປອດ​ໄພ​ຂອງ​ຜູ້​ໂດຍ ສານ ພາຍຫຼັງ​ໄດ້​ມີ​ເຫດ​ຂົ່ມຂືນ ແລະ ຄາຕະກຳ​ຜູ້ໂດຍສານ​ຄົນ​ໜຶ່ງ ທີ່​ໃຊ້​ບໍລິການ​ລົດ​ຈາກ ຄາ​ພູນ (Car pool) ຂອງ​ບໍລິສັດ ຕີ​ຕີ ຊູ​ຊິງ ທີ່​ໃຫ້​ບໍລິການ​ຮຽກ​ລົດ​ລາຍ​ໃຫຍ່​ທີ່​ສຸດ​ຂອງ​ໂລກ (ເບິ່ງ​ຕາມ​ຕົວ​ເລກ​ການ​ໃຫ້​ບໍລິການ) ນີ້​ເປັນ​ເຫດ ການ​ຄາຕະກຳ​ຄັ້ງ​ທີ​ສອງ​ທີ່​ເກີດ​ຂຶ້ນ​ກັບ​ຜູ້ໂດຍສານ​ຂອງ​ບໍລິສັດ ຕີ​ຕີ ຊູ​ຊິງ ເຊິ່ງ​ໄດ້​ສ້າງ​ຄວາມ​ຄຽດ​ແຄ້ນ​ໄປ​ທົ່ວ​ໂລກ​ອອນ​ລາຍ ແລະ ທຳລາຍ​ພາບ​ພົດ​ຄວາມ​ໜ້າ​ເຊື່ອ​ຖື​ຂອງ​ບໍລິສັດ​ນີ້​ລົງ​ຢ່າງ​ຮາບ​ຄາບ ທາງ​ບໍລິສັດ​ເອງ​ກໍ່​ໄດ້​ປະກາດ​ຢຸດ​ໃຫ້​ບໍລິການ ນັບ​ແຕ່​ວັນ​ທີ 27 ສິງຫາ ປີ​ນີ້​ເປັນຕົ້ນ​ມາ ຈາກ​ເຫດການ​ທີ່​ຍອມຮັບ​ບໍ່​ໄດ້​ນີ້ ໄດ້​ມີ​ການ​ປົດ​ຜູ້​ບໍລິຫານ​ສອງ​ຄົນ​ຂອງ​ບໍລິສັດ​ອອກ​ຈາກ​ຕຳແໜ່ງ ແລະ ເລີ່ມ​ຄົ້ນຄວ້າ​ຮູບ​ແບບ​ທຸລະ​ກິດ​ໃໝ່​ທີ່​ຮັບປະກັນ​ຄວາມ​ປອດ​ໄພ​ຂອງ​ຜູ້ໂດຍສານ ເພື່ອ​ປ່ຽນ​ແທນ “ຄາ​ພູນ” ສ່ວນ​ເບື້ອງ​ລັດຖະບານ​ນັ້ນ​ກໍ່​ມີ​ຄຳ​ເຫັນ​ວ່າ: ທາງ​ບໍລິສັດ​ຕ້ອງ​ຮັບຜິດຊອບ​ຕໍ່​ເຫດການ​ທີ່​ເກີດ​ຂຶ້ນ​ກັບ​ຜູ້ໂດຍສານ​ທຸກ​ກໍລະນີ ນັບ​ແຕ່​ຜູ້ໂດຍສານ​ກ້າວ​ຂາ​ຂຶ້ນ​ລົດ ທີ່ ຄາ​ພູນ ໃຫ້​ບໍລິການ.

    ທີ່​ຣັດ​ເຊຍ: ໃນ​ວັນ​ທີ 26 ເດືອນ​ກັນຍາ​ປີ​ນີ້ ສະພາ​ຕ່ຳ ຫຼື ສະພາ​ດູ​ມາ ຂອງ​ສະຫະພັນ​ຣັດ​ເຊຍ ໄດ້​ເປັນ​ເອກະ ສັນ​ກັນ​ຮັບຮອງ​ເອົາ​ກົດໝາຍ​ວ່າ​ດ້ວຍ​ບຳນານ ເຊິ່ງ​ໄດ້​ກຳນົດ​ໄວ​ບຳນານ​ສຳລັບ​ເພດ​ຍິງ ໃນ​ອາຍຸ 60 ປີ ແລະ 65 ປີ ສຳລັບ​ເພດ​ຊາຍ ໄວ​ເກນ​ອາຍຸ​ບຳນານ ໃນ​ນີ້ ຈະ​ເລີ່ມ​ປະຕິບັດ​ນັບ​ແຕ່​ປີ 2019 ເປັນຕົ້ນ​ໄປ ນອກຈາກ​ເບ້ຍ​ບຳນານ​ແລ້ວ ທ່ານ​ປະທານາທິບໍດີ ວະ​ລາ​ດີ​ເມຍ ປູ​ຕິນ ຍັງ​ໄດ້​ສະເໜີ​ເພີ່ມ​ເງິນ​ອຸດ​ໜູນ​ວ່າງ​ງານ​ຂຶ້ນ​ສອງ​ເທົ່າ​ຕົວ ສຳລັບ​ຜູ້​ທີ່​ຍັງ​ບໍ່​ທັນ​ເຖິງ​ອາຍຸ​ບຳນານ ແລະ ຈະ​ມີ​ກົນ​ໄກ​ບຸລິມະສິດ​ໃນ​ການ​ຮັບ​ເບ້ຍ​ບຳນານ ສຳລັບ​ແມ່ຍິງ​ທີ່​ມີ​ລູກ​ຫຼາຍ​ຄົນ ເກນ​ອາຍຸ​ບຳນານ​ຂອງ​ຄົນ​ຣັດ​ເຊຍ ທີ່​ປະຕິບັດ​ຢູ່​ໃນ​ປັດຈຸບັນ ແມ່ນ 55 ປີ ສຳລັບ​ເພດ​ຍິງ ແລະ 60 ປີ​ສຳລັບ​ເພດ​ຊາຍ ຜ່ານ​ມາ​ກໍ່​ເຄີຍ​ມີ​ຂໍ້​ສະເໜີ​ໃຫ້​ປັບ​ຂຶ້ນ​ອາຍຸ​ບຳນານ​ເພດ​ຍິງ ເປັນ 63 ປີ ແຕ່​ບໍ່​ໄດ້​ຮັບ​ການ​ສະໜັບສະໜູນ​ຈາກ​ສະພາ ໃນ​ປັດຈຸບັນ ຄົນ​ຮັບ​ເບ້ຍ​ບຳນານ​ຢູ່​ຣັດ​ເຊຍ​ນັ້ນ ມີ​ຈຳນວນ​ທັງ​ໝົດ 46,5 ລ້ານ​ຄົນ ກົດໝາຍ​ບຳນານ​ສະບັບ​ໃໝ່​ຍັງ​ຮັກສາ​ໄວ້​ທຸກໆ​ສິດທິ​ທາງ​ດ້ານ​ສະຫວັດດີ​ການ​ສັງຄົມ ສຳລັບ​ຜູ້​ຮັບ​ເບ້ຍ​ບຳນານ​ທຸກໆ​ຄົນ.

    ທີ່​ມາ​ເລ​ເຊຍ: ໜັງສືພິມ ເດິ​ເນ​ເຊິນ (The Nation 20/09/2018) ໃຫ້​ຮູ້​ວ່າ: ລັດຖະບານ​ມາ​ເລ​ເຊຍ​ໄດ້ ຕົກລົງ​ປັບ​ຫຼຸດ​ເກນ​ອາຍຸ​ຜູ້​ມີ​ສິດ​ປ່ອນ​ບັດ​ເລືອກ​ຕັ້ງ ຈາກ 21 ປີ​ລົງ​ມາ​ເປັນ 18 ປີ.

    ການ​ຕົກລົງ​ດັ່ງກ່າວ​ຂອງ​ລັດຖະບານ ຍັງ​ຕ້ອງ​ໄດ້​ຫັນ​ເປັນ​ກົດໝາຍ ເພື່ອ​ມີ​ຜົນ​ສັກສິດ​ທາງ​ປະຕິບັດ ດັ່ງນັ້ນ ທາງ​ກະຊວງ​ຊາວ​ໜຸ່ມ ແລະ ກີລາ ຕ້ອງ​ໄດ້​ປະສານ​ງານ ແລະ ເຮັດ​ວຽກ​ຢ່າງ​ໃກ້ຊິດ​ກັບ​ພາກສ່ວນ​ຊາວ​ໜຸ່ມ​ຂອງ​ພັກ​ຝ່າຍ​ຄ້ານ ເພື່ອ​ປັບປຸງ​ກົດໝາຍ​ການ​ເລືອກ​ຕັ້ງ ທີ່​ຕ້ອງ​ໄດ້​ຮັບ​ສຽງ​ສະໜັບສະໜູນ 2/3 ເຊື່ອ​ວ່າ​ໃນ​ການ​ເລືອກ​ຕັ້ງ​ຊຸດ​ຕໍ່​ໄປ ພົນລະເມືອງ​ມາ​ເລ​ເຊຍ​ໃນ​ໄວ 18 ປີ ຈະ​ໄດ້​ມີ​ສິດ​ປ່ອນ​ບັດ​ຢ່າງ​ແນ່ນອນ ຢູ່​ມາ​ເລ​ເຊຍ ຄົນ​ອາຍຸ 18 ປີ ຖື​ວ່າ​ເປັນ​ອາຍຸ​ທີ່​ບັນລຸ​ນິຕິພາວະ ມີ​ສິດ​ທາງ​ກົດໝາຍ ແລະ ມີ​ຄວາມ​ຮັບຜິດຊອບ​ຢ່າງ​ເຕັມ​ສ່ວນ​ໃນ​ທຸກໆ​ການ​ກະທຳ ເຊັ່ນ: ສິດ ແລະ ຄວາມ​ຮັບຜິດຊອບ​ໃນ​ການ​ຂັບ​ຂີ່ ແຕ່ງດອງ ແລະ ສິດ​ໃນ​ການ​ເຊັນ​ສັນຍາ​ຂໍ້​ຜູກ​ພັນ​ຕ່າງໆ ແຕ່​ເກນ​ອາຍຸ​ທີ່​ມີ​ສິດ​ປ່ອນ​ບັດ​ເລືອກ​ຕັ້ງ ຜັດ​ຍັງ​ກຳນົດ​ຢູ່​ໃນ​ເກນ​ອາຍຸ 21 ປີ ເຊິ່ງ​ຖື​ວ່າ​ບໍ່​ສອດຄ່ອງ​ກັບ​ສະພາບ​ຄວາມ​ເປັນ​ຈິງ ດັ່ງນັ້ນ ຈຶ່ງ​ຈຳເປັນ​ຕ້ອງ​ໄດ້​ປັບ​ຫຼຸດ​ລົງ​ເປັນ 18 ປີ.

ຂ່າວທີ່ກ່ຽວຂ້ອງ