ການແພດວິຖີພຸດ

377 02 ພ.ຈ. 2018 ນານາສາລະ

    ພຸດທະ​ສາສະໜາ​ສອນ​ໄວ້​ວ່າ: ມະນຸດ​ເຮົາ​ຈະ​ມີ​ໂລກ​ພະຍາດ​ຢູ່ 2 ປະການ ຄື: 1. ພະຍາດ​ທາງ​ກາຍ ​ແລະ 2. ພະຍາດ​ທາງ​ໃຈ ​ເຊິ່ງ​ໂລກ​ພະຍາດ​ທາງ​ກາຍ​ນັ້ນ​ເກີດ​ຍາກ ແຕ່​ຮັກສາ​ງ່າຍ​ກວ່າ ສ່ວນ​ພະຍາດ​ທາງ​ຈິດ​ໃຈ​ນັ້ນ​ເກີດ​ງ່າຍ ​ແຕ່​ປິ່ນປົວ​ໄດ້​ຍາກ ​ແລະ ພະຍາດ​ທາງ​ໃຈ​ນີ້​ເອງ ​ທີ່​ເປັນສາ​ເຫດ​ໃຫ້​ເກີດ​ໂລກ​ພະຍາດ​ທາງ​ກາຍ ​ເພາະ​ຖ້າ​ຄົນ​ເຮົາ​ມີ​ກິ​ເລດ​ໜາ (​ໂລບ​ ​ໂກດ ຫຼົງ) ຫຼາຍ​ພຽງ​ໃດ​ກໍ່​ຈະ​ເຮັດ​ໃຫ້​ເກີດ​ພະຍາດ​ຫຼາຍ​ເປັນ​ເງົາ​ຕາມ​ໂຕ.

    ພະພຸດທະ​ເຈົ້າ​ສອ​ນ​ໄວ້​ວ່າ: ການ​ເຈັບ​ໄຂ້​ໄດ້​ປ່ວຍ​ນັ້ນ​ເປັນ​ສິ່ງ​ທຳ​ມະ​ດາ​ຂອງ​ມະນຸດ ບາງ​ຄົນ​ອາດ​ສາມາດ​ຮັກສາ​ສຸຂະພາບ​ບໍ່​ເຈັບ​ປ່ວຍ​ຕະຫຼອດ​ຊີວິດ ​ແຕ່​ບໍ່​ສາມາດ​ຮັກສາ​ພະຍາດ​ທາງ​ໃຈ​ໄດ້ ຍົກ​ເວັ້ນພະ​ອໍລະຫັນ ດັ່ງ​ນັ້ນ ຊີວິດ​ຂອງ​ຄົ​ນຈຶ່ງ​ກ່ຽ​ວຂ້ອງ​ກັບຄຳ​ວ່າ ກຳ​ເກົ່າ ​ແລະ ກຳ​ໃໝ່ ການ​ໃຊ້​ເວນ​ໃຊ້​ກຳ ​ເຊິ່ງຂຽນ​ມາ​ຮອດ​ນີ້​ ບາງ​ຄົນ​ອາດ​ຫາ​ວ່າ​ຜູ້​ຂຽນ​ເວົ້າມົ້ວ ​ເຊິ່ງຂໍ​ບອກ​​ໄວ້​ວ່າ ຖ້າ​ຄົນ​ໃດ​ບໍ່​ໄດ້​ສຶກສາ​ກົດ​ແຫ່ງ​ກຳ​ໃຫ້​ເຂົ້າ​ໃຈ ກໍ່​ຈະ​ເຫັນວ່າ​ເລື້ອງ​ເຫຼົ່າ​ນີ້​ໄຮ້​ສາລະ ພະພຸດທະ​ເຈົ້າ​ສອນ​ໄວ້​ໃນ​ພະ​ສູດ​ເລື້ອງ​ໜຶ່ງ ຊື່ວ່າ: ຄໍ​ລາ​ນະສູດ ​ເຊິ່ງ​ເວົ້າ​ເຖິງ​ຄົນ​​ໄຂ້ (ຜູ້​ປ່ວຍ) ​ໃນ​ໂລກ​ນີ້​ມີ 3 ປະ​ເພດ ຄື: ພວກ​ທີ່​ບໍ່​ມີ​ດີ​ຈາກ​ພະຍາດ ພວກ​ບໍ່​ປິ່ນປົວ​ກໍ່​ດີ ​ແລະ ພວກ​ທີ່​ປິ່ນປົວ​ດີ​ກໍ່​ຈະ​ດີ​ຈາກ​ພະຍາດ ບາງ​ຄົນ​ອາດ​ຍັງ​ງົງ ຈຶ່ງ​ຂໍ​ອະທິບ​າຍຕື່ມ​ລຸ່ມ​ນີ້:

    1. ປະ​ເພດ​ປິ່ນປົວ​ແນວ​ໃດ​ກໍ່​ຍັງ​ບໍ່​ດີ​ຈາກ​ພະຍາດ ​ເຖິງ​ແມ່ນ​ວ່າ​ຈະ​ກິນ​ອາຫານ​ດີ​ຕໍ່​ສຸຂະພາບ​ພຽງ​ໃດ ​ໄດ້​ຢາ​ດີ​ພຽງ​ໃດ ​ໄດ້​ແພດ​ໝໍດີ​ຊັ້ນ​ຍອດ​ປິ່ນປົວ ​ແຕ່​ກໍ່​ສາມາດ​ປົວ​ດີ​ແຕ່​ພະຍາດ​ທົ່ວ​ໄປ ​ແຕ່​ບໍ່​ສາມາດ​ປິ່ນປົວ​ໂລກ​ເວນ​ໂລກ​ກຳ​ໄດ້ ​ເຊິ່ງ​ເອີ້ນ​ອີກ​ແບບ​ໜຶ່ງ​ວ່າ ມັນ​ຄື​ໂລກ​ພະຍາດ​ທີ່​ເກີດ​ຈາກ​ວິບາກ​ຂອງ​ກຳ​ທີ່​ຄົນໆ​ນັ້ນ​ໄດ້​ກໍ່​ເອົາ​ໄວ້.

    2. ພວກ​ບໍ່​ມີ​ອາຫານ​ດີ ບໍ່​ມີ​ຢາ​ດີ ​ແຕ່​ກໍ່​ສາມາດ​ປິ່ນປົວ​ໃຫ້​ດີ​ຈາກ​ພະຍາດ​ໄດ້ ​ເພາະ​ຄຳ​ຕອບ​ກໍ່​ຄື ພວກ​ນີ້​ໄດ້​ສ້າງ​ສົມ​ບຸນ​ເກົ່າ​ໄວ້​ຫຼາຍ ຜົນ​ຂອງ​ບຸນ​ຈຶ່ງ​ສົ່ງ​ຜົນ​ໃຫ້​ເຂົາ​ໄດ້​ເຊົາ​ຈາກ​ການ​ເຈັບ​ປ່ວຍ​ໄດ້ ​ເຊິ່ງຜົນ​ບຸນ​ນັ້ນ​ເປັນ​ຢາ​ວິ​ເສດ​ຢ່າງ​ໜຶ່ງ ຄົນ​ໄຂ້​ປະ​ເພດ​ນີ້​ຈຶ່ງ​ມັກ​ປະຕິບັດ​ທຳ ສ້າງ​ຄຸນງາມຄວາມດີ​ໄວ້​ກັບ​ສັງຄົມ.

    3. ພວກ​ໃດ​ໄດ້​ຢາ​ດີ ໝໍ​ດີ ຈຶ່ງ​ເຊົາ​ຈາກ​ພະ​ຍາດ​ໄດ້ ພວກ​ນີ້​ອາດ​ເຄີຍ​ສ້າງ​ບາບ​ໄດ້ ​ແຕ່​ຊາດ​ນີ້​ເຂົາ​ໄດ້​ສ້າງ​ບຸນຂຶ້ນ​ຫຼາຍ ​ເຮັດ​ໃຫ້​ຜົນ​ບຸນ​ດັ່ງກ່າວ​ ດົນ​ບັນດານ​ໃຫ້​ຊີວິດ​ເຂົາ​ເຊົາ​ເຈັບ​ປ່ວຍ​ໄດ້​ໄວ.

    ການ​ແພດ​ແບບ​ວິຖີ​ພຸດ​ຈຶ່ງ​ພໍ​ສະຫຼຸບໄດ້​ວ່າ: ຕາບ​ໃດ​ຄົນ​ບາງ​ຄົນ​ຍັງ​ມີ​ກິ​ເລດ​ໜາ​ ເຕັມ​ໄປ​ດ້ວຍ​ຄວາມ​ໂລບ​ຢາກ​ໄດ້​ຝ່າຍ​ດຽວ ກອບ​ໂກຍ​ຢ່າງ​ດຽວ ​ແລະ ສ້າງ​ກຳ​ຊົ່ວ​ໄວ້ ຍ່ອມ​​ເປັນ​ບຸກຄົນ​ທີ່​ບໍ່​ເຊົາ​ຈາກ​ຄວາມ​ເຈັບ​ປ່ວຍ​ທາງ​ຈິດ​ວິນ​ຍານ ​ເຊິ່ງກົງກັນຂ້າມ​ກັບ​ພວກ​ປະພຶດ​ປະຕິບັດ​ທຳ ​ເຖິງ​ແມ່ນ​ວ່າ​ຈະ​ເກີດ​ໂລກ​ພະຍາດ ​ແຕ່​ກໍ່​ສາມາດ​ປົວ​ເຊົາ​ໄດ້​ໄວ ​ເພາະ​ຜົນ​ບຸນ​ທີ່​ທຳ​ໄວ້ ດັ່ງນັ້ນ ​ໂລກ​ເວນ​ໂລກ​ກຳ​ເກົ່າ​ຈຶ່ງ​ບໍ່​ມີ​ມະນຸດ​ໜ້າ​ໃດ​ໜີ​ມົ້ມໄດ້ !.

ໂດຍ: ດັ້ນ​ກີບ​ເມກ

ຂ່າວທີ່ກ່ຽວຂ້ອງ