ສ້າງຄວາມເຂົ້າໃຈການປາຖະກະຖາ ວັນສ້າງຕັ້ງເມືອງວຽງໄຊໃຫ້ເລິກເຊິ່ງ

341 05 ພ.ຈ. 2018 ຂ່າວໜ້າ​ໜຶ່ງ
ສ້າງຄວາມເຂົ້າໃຈການປາຖະກະຖາ ວັນສ້າງຕັ້ງເມືອງວຽງໄຊໃຫ້ເລິກເຊິ່ງ

    ອະ­ນຸ​ກຳ­ມະ­ການ​ເນື້ອ​ໃນ​ໂຄ­ສະ­ນາ ແລະ ປະ­ຊາ­ສຳ­ພັນ ສົມ­ທົບ​ກັບ​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ຈັດ​ກອງ​ປະ­ຊຸມ​ເຜີຍ­ແຜ່​ເພື່ອ​ແນະ­ນຳ​ການ​ປາ­ຖະ­ກະ­ຖາ ກ່ຽວ​ກັບ​ວັນ​ສ້າງ­ຕັ້ງ​ເມືອງ​ວຽງ​ໄຊ-ຖານ​ທີ່​ໜັ້ນ​ຂອງ​ການ​ປະ­ຕິ­ວັດ​ລາວ ຄົບ­ຮອບ 50 ປີ ຂຶ້ນ​ວັນ​ທີ 2 ພະ­ຈິກ 2018 ທີ່​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ເປັນ​ປະ­ທານ​ຂອງ​ທ່ານ ກິ​ແກ້ວ ໄຂ​ຄຳ​ພິ­ທູນ ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ຮອງ​ຫົວ­ໜ້າ ທັງ​ເປັນ​ຜູ້​ປະ­ຈຳ­ການ​ຄະ­ນະ​ຮັບ­ຜິດ­ຊອບ​ກະ­ກຽມ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ ເມືອງ​ວຽງ​ໄຊ-ຖານ​ທີ່​ໝັ້ນ​ຂອງ​ການ​ປະ­ຕິ­ວັດ​ລາວ ຄົບ­ຮອບ 50 ປີ ມີ​ບັນ­ດາ​ຄະ­ນະ​ພັກ​ກະ­ຊວງ ອົງ­ການ​ອ້ອມ​ຂ້າງ​ສູນ​ກາງ ຄະ­ນະ​ພັກ​ນະ­ຄອນ­ຫຼວງ ຫົວ­ໜ້າ ຮອງ​ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ​ທົ່ວ​ປະ­ເທດ ແລະ ພະ­ນັກ­ງານ​ວິ­ຊາ​ການ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ສ້າງ​ຄວາມ​ຮັບ​ຮູ້​ເຂົ້າ­ໃຈ​ໃຫ້​ຄະ­ນະ​ພັກ​ຄະ­ນະ​ນຳ​ບັນ­ດາ​ກະ­ຊວງ ອົງ­ການ ແລະ ຄະ­ນະ​ໂຄ­ສະ­ນາ​ອົບ­ຮົມ​ນະ­ຄອນ­ຫຼວງ ແລະ ແຂວງ ໃນ​ການ­ຈັດ­ຕັ້ງ​ການ​ປາ­ຖະ­ກະ­ຖາ​ກ່ຽວ​ກັບ​ວັນ​ສ້າງ­ຕັ້ງ​ເມືອງ​ວຽງ​ໄຊ-ຖານ​ທີ່​ໝັ້ນ​ຂອງ​ການ​ປະ­ຕິ­ວັດ​ລາວ ຄົບ­ຮອບ 50 ປີ ເປັນ​ການ​ຫວນ​ຄືນ​ເຖິງ​ມູນ­ເຊື້ອ​ຄວາມ​ປີ​ຊາ​ສາ­ມາດ ຄວາມ​ສະ­ຫຼາດ​ສ່ອງ​ໃສ​ຂອງ​ພັກ ໃນ​ການ​ນຳ­ພາ​ການ​ປະ­ຕິ­ວັດ ເປັນ​ການ​ລະ­ນຶກ​ຈົດ​ຈຳ​ລ້ຳ​ລຶກ​ໄຊ­ຊະ­ນະ​ອັນ​ຍິ່ງ​ໃຫຍ່​ຂອງ​ກອງ­ທັບ ແລະ ປະ­ຊາ­ຊົນ​ບັນ­ດາ­ເຜົ່າ ກໍ່​ຄື ຜົນ­ງານ​ອັນ​ລ້ຳ​ເລີດ ຄຸນ­ງາມ­ຄວາມ­ດີ​ອັນ​ໃຫຍ່​ຫຼວງ​ຂອງ​ການ​ນຳ​ຮຸ່ນ​ກ່ອນ ໂດຍ​ສະ­ເພາະ ປະ­ທານ​ໄກ­ສອນ ພົມ­ວິ­ຫານ ແລະ ຜູ້­ນຳ​ຄົນ​ອື່ນໆ​ທີ່​ໄດ້​ນຳ­ພາໆ​ລະ​ກິດ​ປະ­ຕິ­ວັດ​ຕໍ່­ສູ້​ປົດ​ປ່ອຍ​ຊາດ ການ​ສ້າງ­ຕັ້ງ​ເມືອງ​ວຽງ​ໄຊ​ເປັນ​ຖານ​ທີ່​ໝັ້ນ​ອັນ​ແຂງ​ແກ່ນ ເພື່ອ​ເຮັດ​ສຳ­ເລັດ​ການ​ປະ­ຕິ­ວັດ​ຊາດ ປະ­ຊາ­ທິ­ປະ­ໄຕ ນຳ​ເອົາ​ປະ­ເທດ​ຊາດ​ກ້າວ​ໄປ​ສູ່​ການ​ໄຂ​ສັງ­ກາດ​ໃໝ່.

    ໂອ­ກາດ​ນີ້ ທ່ານ ກິ​ແກ້ວ ໄຂ​ຄຳ​ພິ­ທູນ ໄດ້​ໃຫ້​ກຽດ​ໂອ້​ລົມ​ແນະ­ນຳ​ການ​ປາ­ຖະ­ກະ­ຖາ​ວັນ​ດັ່ງ­ກ່າວ ເຊິ່ງ​ທ່ານ​ໄດ້​ອະ­ທິ­ບາຍ​ແນະ­ນຳ ພ້ອມ​ທັງ​ສະ­ໜອງ​ຂໍ້​ມູນ​ເພື່ອ​ນຳ​ໃຊ້​ເຂົ້າ​ໃນ​ການ​ປາ­ຖະ­ກະ­ຖາ​ທີ່­ຢູ່​ໃນ​ຄວາມ​ຮັບ­ຜິດ­ຊອບ​ຂອງ​ຕົນ ໃນ​ນີ້ ໄດ້​ເນັ້ນ​ໃຫ້​ກຳ​ໄດ້​ຈຸດ­ປະ­ສົງ ແລະ ຄາດ­ໝາຍ ແນ­ໃສ່​ເສີມ​ຂະ­ຫຍາຍ​ມູນ­ເຊື້ອ​ຄວາມ​ປີ​ຊາ​ສາ­ມາດ ສະ­ຫຼາດ​ສ່ອງ​ໃສ ແລະ ເສີມ​ຂະ­ຫຍາຍ​ມູນ­ເຊື້ອ​ແຫ່ງ​ການ​ຊີ້​ນຳ-ນຳ­ພາ​ຮອບ­ດ້ານ​ຂອງ​ພັກ ມູນ­ເຊື້ອ​ຕໍ່­ສູ້​ພິ­ລະ​ອາດ​ຫານ​ຂອງ​ກອງ­ທັບ ແລະ ປະ­ຊາ­ຊົນ​ບັນ­ດາ­ເຜົ່າ​ທີ່​ມີ​ຄວາມ​ດຸ­ໝັ່ນ ໃນ​ການ​ອອກ­ແຮງ​ສ້າງ­ສາ​ພັດ­ທະ­ນາ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ລາວ.

ຂ່າວທີ່ກ່ຽວຂ້ອງ