ພາກລັດ ແລະ ເອກະຊົນ ຮ່ວມກັນແກ້ໄຂອຸປະສັກການທ່ອງທ່ຽວ

190 05 ພ.ຈ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ປຶກ­ສາ​ຫາ­ລື ກ່ຽວ​ກັບ​ການ​ແກ້​ໄຂ​ອຸ­ປະ­ສັກ​ໃນ​ຂົງ­ເຂດ​ວຽກ​ງານ​ການ­ທ່ອງ­ທ່ຽວ ລະ­ຫວ່າງ​ພາກ​ລັດ ແລະ ພາກ​ທຸ­ລະ​ກິດ ຈັດ​ຂຶ້ນ​ວັນ​ທີ 2 ພະ­ຈິກ 2018 ທີ່​ຫໍ​ວັດ­ທະ­ນະ­ທຳ​ແຫ່ງ​ຊາດ ເປັນ​ປະ­ທານ​ໂດຍ​ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ມີ​ຮອງ​ລັດ­ຖະ­ມົນ­ຕີ ບັນ­ດາ​ຫົວ­ໜ້າ​ກົມ ຮອງ​ກົມ ຈາກ​ກະ­ຊວງ​ອ້ອມ​ຂ້າງ ຜູ້­ຕາງ­ໜ້າ​ຈາກ​ພາກ​ລັດ ແລະ ພາກ​ທຸ­ລະ​ກິດ​ເຂົ້າ​ຮ່ວມ.

    ທ່ານ ບໍ່​ແສງ​ຄຳ ວົງ​ດາ­ລາ ໄດ້​ກ່າວ​ວ່າ: ການ​ເປີດ​ປີ​ທ່ອງ​ທ່ຽວ 2018 ເປັນ​ກິດ­ຈະ­ກຳ​ທີ່​ສຳ­ຄັນ ນອກ­ຈາກ​ຈະ​ເປັນ​ການ​ສົ່ງ­ເສີມ​ການ­ທ່ອງ­ທ່ຽວ​ແລ້ວ ຍັງ​ເປັນ​ການ​ອະ­ນຸ​ຮັກ​ວັດ­ທະ­ນະ­ທຳ​ທີ່​ເປັນ​ເອ­ກະ­ລັກ ແລະ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ລາວ ສ້າງ​ຄວາມ​ຄຶກ­ຄື້ນ​ເພື່ອ​ຊຸກ­ຍູ້​ເສດ­ຖະ­ກິດ​ທາງ​ກົງ ແລະ ທາງ​ອ້ອມ ໂດຍ​ສະ­ເພາະ​ແມ່ນ​ບັນ­ດາ​ຫົວ­ໜ່ວຍ​ທຸ­ລະ​ກິດ​ທີ່​ປິ່ນ​ອ້ອມ​ໃນ​ຂະ­ແໜງ​ການ­ທ່ອງ­ທ່ຽວ ກິດ­ຈະ­ກຳ​ປີ​ທ່ອງ​ທ່ຽວ​ລາວ 2018 ປະ­ກອບ​ມີ ກິດ­ຈະ­ກຳ​ທັງ​ພາຍ​ໃນ ແລະ ຕ່າງ­ປະ­ເທດ ເຊັ່ນ: ບັນ­ດາ​ບຸນ​ປະ­ເພ­ນີ ເທ​ສະ­ການ​ຕ່າງໆ​ໃນ​ບັນ­ດາ​ແຂວງ​ໃນ​ຂອບ​ເຂດ​ທົ່ວ​ປະ­ເທດ ອຸດ­ສາ­ຫະ­ກຳ​ການ­ທ່ອງ­ທ່ຽວ​ໃນ​ລາວ ໄດ້​ມີ​ການ​ຂະ­ຫຍາຍ­ຕົວ​ຢ່າງ​ບໍ່​ຢຸດ​ຢັ້ງ ສະ­ເພາະ​ປີ 2016 ໄດ້​ມີ​ນັກ​ທ່ອງ​ທ່ຽວ​ສາ­ກົນ​ເຂົ້າ​ມາ​ທ່ຽວ​ລາວ 4,2 ລ້ານ​ເທື່ອ​ຄົນ ສ້າງ​ລາຍ​ຮັບ​ທັງ​ໝົດ​ໄດ້ 724 ລ້ານ​ໂດ​ລາ​ສະ­ຫະ­ລັດ ແລະ ຄາດ​ວ່າ​ຈະ​ເພີ່ມ​ຂຶ້ນ​ເຖິງ 1 ຕື້​ໂດ​ລາ ໃນ​ປີ 2020.

    ຜ່ານ​ຈັດ​ຕັ້ງ​ປະ­ຕິ­ບັດ​ການ​ສົ່ງ­ເສີມ​ປີ​ທ່ອງ​ທ່ຽວ​ລາວ 2018 ໃນ 9 ເດືອນ​ຜ່ານ​ມາ ມີ​ນັກ​ທ່ອງ​ທ່ຽວ​ເຂົ້າ​ມາ 2.918.673 ເທື່ອ​ຄົນ ຫຼື ເພີ່ມ​ຂຶ້ນ 3,24% ເມື່ອ​ທຽບ­ໃສ່​ໄລ­ຍະ​ດຽວ​ກັນ​ປີ 2017 ໂດຍ​ອີງ​ຕາມ​ຕົວ​ເລກ​ສະ­ຖິ­ຕິ​ການ­ທ່ອງ­ທ່ຽວ ສາ­ມາດ​ເວົ້າ​ໄດ້​ວ່າ ການ­ທ່ອງ­ທ່ຽວ​ຢູ່​ລາວ ເປັນ​ຂະ­ແໜງ­ການ​ໜຶ່ງ​ທີ່​ເປັນ​ທ່າ­ແຮງ​ໃນ​ການ​ປະ­ກອບ­ສ່ວນ​ເຂົ້າ​ໃນ​ການ​ສ້າງ​ລາຍ​ຮັບ​ເຂົ້າ​ປະ­ເທດ ຈັດ​ເປັນ​ອັນ​ດັບ​ທີ 4 ດັ່ງ­ນັ້ນ ເພື່ອ​ພົບ​ປະ ແລະ ປຶກ­ສາ​ຫາ­ລື​ກັບ​ບັນ­ດາ​ພາກ­ສ່ວນ​ທີ່​ກ່ຽວ­ຂ້ອງ​ທັງ​ພາກ​ລັດ ແລະ ພາກ​ທຸ­ລະ​ກິດ ເພື່ອ​ຮ່ວມ​ມື​ກັນ​ຊອກ​ຫາ​ຊ່ອງ​ທາງ​ໃນ​ການ​ແກ້​ໄຂ​ອຸ­ປະ­ສັກ ຫຼື ບັນ­ຫາ​ຕ່າງໆ​ທີ່​ມີ​ໃນ​ວຽກ​ງານ​ທ່ອງ​ທ່ຽວ ແນ­ໃສ່​ປັບ­ປຸງ​ຄຸ­ນະ­ພາບ ແລະ ມາດ­ຕະ­ຖານ​ການ­ທ່ອງ­ທ່ຽວ​ຂອງ​ລາວ​ໃຫ້​ສູງ​ຂຶ້ນ ພ້ອມ​ທັງ​ສ້າງ​ຄວາມ​ປະ​ທັບ​ໃຈ ແລະ ອຳ­ນວຍ​ຄວາມ​ສະ­ດວກ​ໃຫ້​ແກ່​ນັກ​ທ່ອງ​ທ່ຽວ ທີ່​ຈະ​ເຂົ້າ​ມາ​ຢ້ຽມ­ຢາມ​ລາວ​ປີ​ທ່ອງ​ທ່ຽວ 2018 ກໍ່​ຄື ຊຸມ​ປີ​ຕໍ່​ໄປ ເປັນ­ຕົ້ນ ອຳ­ນວຍ​ຄວາມ​ສະ­ດວກ​ໃນ​ການ​ເຂົ້າ-ອອກ​ປະ­ເທດ​ຂອງ​ນັກ​ທ່ອງ​ທ່ຽວ​ຕ່າງ­ປະ­ເທດ ບາງ​ຄັ້ງ​ຍັງ​ຊັກ​ຊ້າ ຫຍຸ້ງ­ຍາກ ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ ການ​ຈ່າຍ​ເງິນ​ຄ່າ​ເຂົ້າ​ຊົມ​ແຫຼ່ງ​ທ່ອງ​ທ່ຽວ​ບາງ​ແຫ່ງ​ບໍ່​ມີ​ຄວາມ​ຍຸ­ຕິ​ທຳ ສິ່ງ​ທ້າ​ທາຍ​ຂອງ​ການ​ສຳ​ປະ­ທານ​ແຫຼ່ງ​ທ່ອງ​ທ່ຽວ ການ​ພັດ­ທະ­ນາ​ການ­ທ່ອງ­ທ່ຽວ​ຍັງ​ຂາດ​ການ​ວິ­ໄຈ ການ​ດຳ­ເນີນ​ກິດ­ຈະ­ກຳ​ຂອງ​ນັກ​ລົງ­ທຶນ​ຕ່າງ­ປະ­ເທດ ມີ​ບາງ​ຮູບ​ແບບ​ບໍ່​ສອດ­ຄ່ອງ​ກັບ​ລະ­ບຽບ​ກົດ­ໝາຍ​ຂອງ​ລາວ ແລະ ບັນ­ຫາ​ອື່ນໆ​ອີກ​ດ້ວຍ.

ຂ່າວທີ່ກ່ຽວຂ້ອງ