ຂ່າວຫຼ້າສຸດ

ນະຄອນຫຼວງ ຫວນຄືນມູນເຊື້ອວັນສ້າງຕັ້ງເມືອງວຽງໄຊ

543 05 ພ.ຈ. 2018 ຂ່າວໜ້າ​ໜຶ່ງ
ນະຄອນຫຼວງ ຫວນຄືນມູນເຊື້ອວັນສ້າງຕັ້ງເມືອງວຽງໄຊ

    ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ (ນວ) ຮ່ວມ​ກັບ​ຄະ­ນະ​ໂຄ­ສະ­ນາ​ອົບ­ຮົມ ນວ ຈັດ​ປາ­ຖະ­ກະ­ຖາ​ວັນ​ສ້າງ­ຕັ້ງ​ເມືອງ​ວຽງ​ໄຊ-ຖານ​ທີ່​ໝັ້ນ​ຂອງ​ການ​ປະ­ຕິ­ວັດ​ລາວ ຄົບ­ຮອບ 50 ປີ (30/11/1968-30/11/2018) ຂຶ້ນ​ວັນ​ທີ 2 ພະ­ຈິກ 2018 ທີ່ ນວ ປາ­ຖະ­ກະ­ຖາ​ໂດຍ​ທ່ານ ສົມ​ສະ­ຫວາດ ເລັ່ງ​ສະ​ຫວັດ ອະ­ດີດ​ຮອງ​ນາ­ຍົກ­ລັດ­ຖະ­ມົນ­ຕີ ທີ່​ປືກ​ສາ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ມີ​ບັນ­ດາ​ຄະ­ນະ​ພັກ ນວ ເລ­ຂາ​ພັກ​ເມືອງ ເຈົ້າ­ເມືອງ ຫົວ­ໜ້າ​ພະ​ແນກ ອົງ­ການ​ທຽບ​ເທົ່າ ທະ­ຫານ ຕຳ­ຫຼວດ ຕະ­ຫຼອດ​ຮອດ​ພະ­ນັກ­ງານ​ຫຼັກ​ແຫຼ່ງ​ອ້ອມ​ຂ້າງ ນວ ເຂົ້າ​ຮ່ວມ.

    ໂອ­ກາດ​ນີ້ ທ່ານ ສົມ​ສະ­ຫວາດ ເລັ່ງ​ສະ​ຫວັດ ໄດ້​ຍົກ​ໃຫ້​ເຫັນ​ຄວາມ​ໝາຍ​ຄວາມ​ສຳ­ຄັນ​ຂອງ​ການ​ສ້າງ­ຕັ້ງ​ເມືອງ​ວຽງ​ໄຊ-ຖານ​ທີ່​ໝັ້ນ​ຂອງ​ການ​ປະ­ຕິ­ວັດ​ລາວ ມູນ­ເຊື້ອ​ຄວາມ​ປີ​ຊາ​ສາ­ມາດ ຄວາມ​ສະ­ຫຼາດ​ສ່ອງ​ໃສ​ຂອງ​ພັກ ໃນ​ການ​ນຳ­ພາ​ການ​ປະ­ຕິ­ວັດ ເປັນ​ການ​ລະ­ນຶກ​ຈົດ​ຈຳ​ລ້ຳ​ລຶກ​ໄຊ­ຊະ­ນະ​ອັນ​ຍິ່ງ​ໃຫຍ່​ຂອງ​ກອງ­ທັບ ແລະ ປະ­ຊາ­ຊົນ​ບັນ­ດາ­ເຜົ່າ ກໍ່​ຄື​ຜົນ­ງານ​ອັນ​ລ້ຳ​ເລີດ ແລະ ຄຸນ­ງາມ­ຄວາມ­ດີ​ອັນ​ໃຫຍ່​ຫຼວງ​ຂອງ​ການ​ນຳ​ຮຸ່ນ​ກ່ອນ ໂດຍ​ສະ­ເພາະ ປະ­ທານ ໄກ­ສອນ ພົມ­ວິ­ຫານ ແລະ ຜູ້­ນຳ​ຄົນ​ອື່ນໆ​ທີ່​ນຳ­ພາ​ພາ­ລະ­ກິດ​ປະ­ຕິ­ວັດ​ຕໍ່­ສູ້​ປົດ​ປ່ອຍ​ຊາດ ການ​ສ້າງ​ເມືອງ​ວຽງ​ໄຊ​ເປັນ​ຖານ​ທີ່​ໝັ້ນ​ອັນ​ແຂງ​ແກ່ນ ເພື່ອ​ເຮັດ​ສຳ­ເລັດ​ການ​ປະ­ຕິ­ວັດ​ຊາດ​ປະ­ຊາ­ທິ­ປະ­ໄຕ ນຳ​ເອົາ​ປະ­ເທດ​ຊາດ​ກ້າວ​ສູ່​ສັງ­ກາດ​ໃໝ່.

    ນອກ​ນີ້​ຍັງ​ເປັນ​ການ​ສຶກ​ສາ​ອົບ­ຮົມ​ພະ­ນັກ­ງານ ສະ­ມາ­ຊິກ​ພັກ ນັກ­ຮົບ ປະ­ຊາ­ຊົນ​ບັນ­ດາ­ເຜົ່າ ໂດຍ​ສະ­ເພາະ ຄົນ​ຮຸ່ນ​ໜຸ່ມ​ໃຫ້​ຮັບ​ຮູ້ ເຂົ້າ­ໃຈ​ຢ່າງ​ເລິກ­ເຊິ່ງ ກ່ຽວ​ກັບ​ເສັ້ນ­ທາງ​ກ້າວ​ເດີນ​ອັນ​ລະ​ອິດ​ລະ​ອ້ຽວ​ຂອງ​ການ​ປະ­ຕິ­ວັດ ມູນ­ເຊື້ອ​ຕໍ່­ສູ້​ມີ​ໄຊ ແລະ ການ​ນຳ­ພາ​ອັນ​ສະ­ຫຼາດ​ສ່ອງ​ໃສ​ຂອງ​ພັກ ກໍ່​ຄື ຄົ້ນ­ຄວ້າ​ຮ່ຳ­ຮຽນ​ເອົາ​ແບບ­ຢ່າງ​ຄຸນ­ສົມ­ບັດ ສິນ​ທຳ​ປະ­ຕິ­ວັດ​ຂອງ​ບັນ­ດາ​ທ່ານ​ຜູ້­ນຳ​ປະ­ຕິ­ວັດ​ຮຸ່ນ​ກ່ອນ ທັງ​ເປັນ​ການ​ເສີມ​ຂະ­ຫຍາຍ​ມູນ­ເຊື້ອ​ແຫ່ງ​ການ​ຊີ້​ນຳ-ນຳ­ພາ​ຮອບ­ດ້ານ​ຂອງ​ພັກ ມູນ­ເຊື້ອ​ຕໍ່­ສູ້​ພິ­ລະ​ອາດ​ຫານ​ຂອງ​ກອງ­ທັບ ແລະ ປະ­ຊາ­ຊົນ​ບັນ­ດາ­ເຜົ່າ ມູນ­ເຊື້ອ​ສາ­ມັກ­ຄີ​ປອງ​ດອງ​ຊາດ ແລະ ມູນ­ເຊື້ອ​ດຸ­ໝັ່ນ​ຂະ­ຫຍັນ​ພຽນ​ໃນ​ການ​ອອກ­ແຮງ​ງານ ສ້າງ­ສາ​ພັດ­ທະ­ນາ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ເຂົ້າ​ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ກ້າວ​ຂຶ້ນ​ສູ່​ຈຸດ­ໝາຍ​ທີ່​ກຳ­ນົດ​ໄວ້​ຢ່າງ​ມີ​ໄຊ ເຊິ່ງ​ໃນ​ລະ­ຫວ່າງ​ເດືອນ​ພະ­ຈິກ 2018 ພັກ-ລັດ ໄດ້​ຈັດ​ຫຼາຍ​ກິດ­ຈະ­ກຳ​ປິ່ນ​ອ້ອມ​ໃສ່​ພິ­ທີ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ເມືອງ​ວຽງ​ໄຊ ຄົບ­ຮອບ 50 ປີ​ຢ່າງ​ເປັນ​ຂະ​ບວນ​ການ​ຈັດ​ຂະ​ບວນ​ຄາ​ລາ​ວານ ປາ­ຖະ­ກະ­ຖາ ສຳ​ມະ​ນາ ແລະ ອື່ນໆ ເພື່ອ​ເປັນ​ການ​ໂຄ­ສະ­ນາ​ໃຫ້​ສັງ­ຄົມ​ໄດ້​ຮັບ​ຮູ້​ວັນ​ດັ່ງ­ກ່າວ​ຢ່າງ​ກວ້າງ­ຂວາງ.

ຂ່າວທີ່ກ່ຽວຂ້ອງ