ໂວວີນາມລາວ ສ້າງຜົນງານເດັ່ນຊີງແຊັມອາຊີ

118 06 ພ.ຈ. 2018 ວົງຈອນກີລາ
ໂວວີນາມລາວ ສ້າງຜົນງານເດັ່ນຊີງແຊັມອາຊີ

    ຄະ­ນະ​ນັກ­ກີ­ລາ​ໂວ​ວີ​ນາມ ທີມ​ຊາດ​ລາວ ສ້າງ​ຜົນ­ງານ​ໄດ້​ຢ່າງ​ໂດດ​ເດັ່ນ ສາ­ມາດ​ຍາດ​ມາ​ໄດ້ 1 ຫຼຽນ​ຄຳ ແລະ 1 ຫຼຽນ​ເງິນ ໃນ​ການ​ແຂ່ງ­ຂັນ​ໂວ​ວີ​ນາມ ຊີງ​ແຊັມ​ອາ­ຊີ ຄັ້ງ​ທີ 4 ຢູ່​ປະ­ເທດ​ອິນ​ໂດ​ເນ​ເຊຍ ວັນ​ທີ 4 ພະ­ຈິກ 2018 ຈາກ​ທ້າວ ໄພ­ລັດ ທຳ​ມະ​ວົງ­ສາ ທັງ 2 ຫຼຽນ ໃນ​ນີ້ 1 ຫຼຽນ​ຄຳ ໄດ້​ຈາກ​ປະ­ເພດ​ຟ້ອນ​ປະ­ກອບ​ອາ­ວຸດ “ກະ­ບອງ” ມີ 7 ປະ­ເທດ​ເຂົ້າ​ຮ່ວມ​ທີ 2 ຕົກ​ເປັນ​ຂອງ​ນັກ­ກີ­ລາ​ຈາກ​ຫວຽດ­ນາມ (ເຈົ້າ​ຂອງ​ກີ­ລາ​ປະ­ເພດ​ນີ້) ແລະ ທີ 3 ຮ່ວມ​ເປັນ​ນັກ­ກີ­ລາ​ຈາກ​ກຳ­ປູ­ເຈຍ ແລະ ມຽນ​ມາ ສ່ວນ 1 ຫຼຽນ​ເງິນ ໄດ້​ຈາກ​ປະ­ເພດ​ຕໍ່­ສູ້ ຮຸ່ນ​ນ້ຳ­ໜັກ 64 ກິ​ໂລ ມີ 6 ປະ­ເທດ​ເຂົ້າ​ຮ່ວມ ໂດຍ​ຮອບ​ຊີງ​ເສຍ​ໃຫ້​ນັກ­ກີ­ລາ​ຈາກ​ອີ​ຣານ ສ່ວນ​ອັນ​ດັບ 3 ຮ່ວມ ເປັນ​ນັກ­ກີ­ລາ​ຈາກ​ຈີນ ແລະ ອັຟ​ກາ​ນິດ​ສະ­ຖານ.

    ສຳ­ລັບ​ວັນ​ທີ 5 ພະ­ຈິກ 2018 ນັກ­ກີ­ລາ​ໂວ​ວີ​ນາມ​ລາວ ຈະ​ລົງ​ແຂ່ງ­ຂັນ​ປະ­ເພດ​ຍິງ ນາງ ມາ­ລາ ຈັນ­ທະ​ລັກ​ສາ ລົງ​ແຂ່ງ​ປະ­ເພດ​ຟ້ອນ​ຍິງ​ດ່ຽວ​ບໍ່​ມີ​ອາ­ວຸດ ແລະ ນາງ ພິກ​ສະ­ໄໝ ອິນ​ສຸ​ມັງ ລົງ​ແຂ່ງ​ປະ­ເພດ​ຟ້ອນ​ຍິງ​ດ່ຽວ​ປະ­ກອບ​ອາ­ວຸດ “ດາບ​ດ່ຽວ” ໂດຍ​ທັງ 2 ຈະ​ລົງ​ແຂ່ງ​ປະ­ເພດ​ຟ້ອນ​ຄູ່​ຍິງ​ປະ­ກອບ​ອາ­ວຸດ​ດາບ​ຄູ່​ຍິງ ຫຼັງ​ຈາກ​ຈົບ​ປະ­ເພດ​ຟ້ອນ ທັງ​ສອງ​ຈະ​ລົງ​ແຂ່ງ​ປະ­ເພດ​ຕໍ່­ສູ້ ຮຸ່ນ​ນ້ຳ­ໜັກ 45 ກິ​ໂລ ແລະ 42 ກິ​ໂລ ຕາມ​ລຳ­ດັບ.

    ການ​ແຂ່ງ­ຂັນ​ຄັ້ງ​ນີ້ ມີ​ນັກ­ກີ­ລາ​ມາ​ຈາກ 17 ປະ­ເທດ​ໃນ​ອາ­ຊີ​ເຂົ້າ​ຮ່ວມ ສະ­ເພາະ​ທີມ​ຊາດ​ລາວ ໄດ້​ສົ່ງ​ຄະ­ນະ​ນັກ­ກີ­ລາ​ເຂົ້າ​ຮ່ວມ 5 ຄົນ ໃນ​ນີ້​ເປັນ​ນັກ­ກີ­ລາ 3 ຄົນ ແຂ່ງ­ຂັນ​ແຕ່​ວັນ​ທີ 2-7 ພະ­ຈິກ 2018.

ຂ່າວທີ່ກ່ຽວຂ້ອງ