ອາໂນໄທ ພໍໃຈຜົນງານ ໃນການແຂ່ງຂັນຍິງປືນຊີງຂັນນາຍົກ

155 06 ພ.ຈ. 2018 ວົງຈອນກີລາ
ອາໂນໄທ ພໍໃຈຜົນງານ ໃນການແຂ່ງຂັນຍິງປືນຊີງຂັນນາຍົກ

    ອາ​ໂນ​ໄທ ເມືອງ​ມະ­ນີ ນັກ­ກີ­ລາ​ຍິງ​ປືນ​ໄອ​ພີ​ເອັດ​ຊີ ທີມ​ຊາດ​ລາວ ສະ­ແດງ​ຄວາມ​ພໍ­ໃຈ​ຕໍ່​ຜົນ­ງານ​ຂອງ​ຕົນ ແລະ ຕົ້ນ​ຄຳ ເມືອງ​ມະ­ນີ ລູກ​ຊາຍ ຫຼັງ​ສ້າງ​ຜົນ­ງານ​ໄດ້​ຕາມ​ຄາດ​ທີ່​ວາງ​ໄວ້​ໃນ​ການ​ເຂົ້າ​ຮ່ວມ​ງານ​ແຂ່ງ­ຂັນ​ກີ­ລາ​ຍິງ​ປືນ ໄອ​ພີ​ເອັດ​ຊີ ລະ­ດັບ​ສາ­ກົນ ເລ​ໂວ 3 ຊີງ​ຂັນ​ທ່ານ​ນາ­ຍົກ­ລັດ­ຖະ­ມົນ­ຕີ​ແຫ່ງ ສປປ ລາວ ຄັ້ງ​ທີ I ປະ­ຈຳ​ປີ 2018 ທີ່ ສປປ ລາວ ເປັນ​ເຈົ້າ­ພາບ ວັນ​ທີ 26-28 ຕຸ­ລາ 2018 ຢູ່​ສະ­ໜາມ​ກີ­ລາ​ຍິງ​ປືນ 5 ເມ­ສາ ນະ­ຄອນ­ຫຼວງ​ວຽງ​ຈັນ ໂດຍ​ມີ​ການ​ຊີງ​ໄຊ 6 ລາຍ­ການ​ຄື: ປືນ​ສະ​ແຕນ​ດາດ ປືນ​ໂປຣ​ດັກ​ຊັນ ປືນ​ໂປຣ​ດັກ​ຊັນ ອັອບ​ຕິກ ປືນ​ໂອ​ເພັນ ປືນ​ຣີ​ໂວນ​ເວີ ແລະ ປືນ​ຄລາ​ສ​ສິກ ແຂ່ງ­ຂັນ 15 ສະ­ໜາມ ມີ​ນັກ­ກີ­ລາ 128 ຄົນ ຈາກ 6 ປະ­ເທດ​ຄື: ລາວ ກຳ­ປູ­ເຈຍ ໄທ ຈີນ ເຂດ​ປົກ­ຄອງ​ພິ­ເສດ​ຮົງ​ກົງ ແລະ ໂປ​ໂລຍ.

    ສຳ­ລັບ​ລາວ​ໄດ້​ສົ່ງ​ນັກ­ກີ­ລາ​ເຂົ້າ​ຮ່ວມ 37 ຄົນ ຍິງ 1 ຄົນ ລົງ​ແຂ່ງ­ຂັນ 4 ລາຍ­ການ ຄື: ປະ­ເພດ​ປືນ​ສະ​ແຕນ​ດາດ ປືນ​ໂອ​ເພັນ ປືນ​ໂປຣ​ດັກ​ຊັນ ແລະ ປະ­ເພດ​ປືນ​ໂປຣ​ດັກ​ຊັນ ອັອບ​ຕິກ ນອກ​ນີ້​ຍັງ​ມີ​ການ​ຈັດ​ແຂ່ງ­ຂັນ​ຍິງ​ປືນ ສະ­ເພາະ​ນັກ­ກີ­ລາ​ພາຍ​ໃນ​ເຮົາ​ຕື່ມ​ອີກ ເພື່ອ​ແນ­ໃສ່​ພັດ­ທະ­ນາ​ວົງ​ການ​ກີ­ລາ​ຍິງ​ປືນ​ລາວ ໃຫ້​ກ້າວ​ສູ່​ລະ­ດັບ​ສາ­ກົນ ຜ່ານ​ການ​ແຂ່ງ­ຂັນ​ທັບ​ນັກ­ກີ­ລາ​ຍິງ​ປືນ​ໄອ​ພີ​ເອັດ​ຊີ ທີມ​ຊາດ​ລາວ ສາ­ມາດ​ຍາດ​ໄດ້ 4 ຫຼຽນ​ຄຳ 2 ຫຼຽນ​ເງິນ ແລະ 1 ຫຼຽນ​ທອງ ສະ­ເພາະ​ອາ​ໂນ​ໄທ ແລະ ຕົ້ນ​ຄຳ ຍາດ​ໄດ້ 4 ຫຼຽນ (2 ຫຼຽນ​ຄຳ ແລະ 2 ຫຼຽນ​ເງິນ).

    ອາ​ໂນ​ໄທ ເມືອງ​ມະ­ນີ ໃຫ້​ສຳ­ພາດ​ວ່າ: ການ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ນີ້ ຕົນ​ເອງ​ໄດ້​ລົງ​ແຂ່ງ­ຂັນ 2 ລາຍ­ການ ຄື: ປືນ​ໂປຣ​ດັກ​ຊັນ ອັອບ​ຕິກ ລະ­ດັບ​ສາ­ກົນ 1 ລາຍ­ການ ແລະ ພາຍ​ໃນ 1 ລາຍ­ການ ສ່ວນ​ຕົ້ນ​ຄຳ ເມືອງ​ມະ­ນີ (ລູກ​ຊາຍ) ລົງ​ແຂ່ງ­ຂັນ 2 ລາຍ­ການ​ເຊັ່ນ​ກັນ​ຄື: ປືນ​ສະ​ແຕນ​ດາດ ລະ­ດັບ​ສາ­ກົນ 1 ລາຍ­ການ ແລະ ພາຍ​ໃນ 1 ລາຍ­ການ ຜ່ານ​ການ​ແຂ່ງ­ຂັນ​ຕົນ​ເອງ ຍາດ​ໄດ້ 2 ຫຼຽນ​ເງິນ ໃນ​ນີ້ ລະ­ດັບ​ສາ­ກົນ 1 ຫຼຽນ ພາຍ​ໃນ 1 ຫຼຽນ ສ່ວນ​ຕົ້ນ​ຄຳ ຍາດ​ໄດ້ 2 ຫຼຽນ​ຄຳ ໃນ​ນີ້ 1 ຫຼຽນ​ຄຳ ຈາກ​ຮຸ່ນ​ເຍົາ­ວະ​ຊົນ​ຊາຍ ລະ­ດັບ​ສາ­ກົນ 1 ຫຼຽນ​ຄຳ ຈາກ​ຮຸ່ນ​ທົ່ວ​ໄປ ລະ­ດັບ​ພາຍ​ໃນ​ປະ­ເທດ.

ຂ່າວທີ່ກ່ຽວຂ້ອງ