ເບີ່ງບ້ານເຂົາເອົາບົດຮຽນ 06/11/2018

134 06 ພ.ຈ. 2018 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ແຜນ​ຈຳ­ກັດ​ການ​ເຂົ້າ​ເຖິງ​ວີ​ດີ​ໂອ​ເກມ ສຳ­ລັບ​ເດັກ­ນ້ອຍ​ມາ​ເລ​ເຊຍ ແລະ ເລື່ອງ​ເມືອງ​ໜຶ່ງ​ຂອງ ສ ອາ​ເມ​ຣິ​ກາ ປະ­ຕິ­ເສດ​ທຸ­ລະ​ກິດ​ສະ­ໜອງ​ຕຸກ­ກະ­ຕາ​ເພື່ອ​ເປົ້າ​ໝາຍ​ທາງ​ເພດ.

    ທີ່ ມາ​ເລ​ເຊຍ: ຂ່າວ​ຕ່າງ­ປະ­ເທດ​ຫວ່າງ​ບໍ່​ດົນ​ມາ​ນີ້ ໄດ້​ໃຫ້​ຊາບ​ວ່າ ທາງ​ການ​ມາ​ເລ​ເຊຍ ມີ​ແຜນ​ຈຳ­ກັດ​ການ​ເຂົ້າ​ເຖິງ​ອິນ​ເຕີ​ເນັດ​ຂອງ​ໄວ​ໜຸ່ມ ອາ­ຍຸ​ຕ່ຳ​ກວ່າ 17 ປີ ທັງ​ນີ້ ເພື່ອ​ປ້ອງ​ກັນ​ບໍ່​ໃຫ້​ເຍົາ­ວະ​ຊົນ​ລຸ້ນ​ຄົນ​ສືບ​ທອດ​ຕົກ​ເປັນ​ເຫຍື່ອ​ວີ​ດີ​ໂອ​ເກມ ຕາມ​ສະ­ຖິ­ຕິ​ທາງ​ການ​ເດັກ­ນ້ອຍ​ມາ​ເລ​ເຊຍ ອາ­ຍຸ​ລະ­ຫວ່າງ 13-17 ປີ ຈຳ­ນວນ 34,9% ນັ້ນ ເສບ​ຕິດ​ວີ​ດີ​ໂອ​ເກມ ຜ່ານ​ອິນ​ເຕີ​ເນັດ​ໃນ​ທົ່ວ​ປະ­ເທດ​ມີ​ຄົນ​ໃຊ້​ອິນ​ເຕີ​ເນັດ ປະ­ມານ 24,1 ລ້ານ​ຄົນ ໃນ​ນັ້ນ 80% ນຳ​ໃຊ້​ສື່​ສັງ­ຄົມ​ອອນ​ລາຍ ໂດຍ​ສະ­ເລ່ຍ 4 ຊົ່ວ­ໂມງ​ຕໍ່​ຄົນ/ມື້ ແຜນ​ຈຳ­ກັດ​ເວ­ລາ​ສຳ­ລັບ​ການ​ເຂົ້າ​ເຖິງ​ວີ​ດີ​ໂອ​ເກມ ສຳ­ລັບ​ໄວ​ໜຸ່ມ​ໃນ­ຕໍ່­ໜ້າ​ນັ້ນ​ແມ່ນ​ຈະ​ເລີ່ມ​ຈາກ​ທ່ຽງ​ຄືນ​ຫາ 6 ໂມງ​ເຊົ້າ​ວັນ​ໃໝ່ ເພື່ອ​ໃຫ້​ໄວ​ໜຸ່ມ​ໄດ້​ພັກ­ຜ່ອນ ແລະ ສຸມ​ຈິດ​ສຸມ​ໃຈ​ໃສ່​ການ​ສຶກ​ສາ​ຮ່ຳ­ຮຽນ ແລະ ວຽກ​ງານ​ໃນ​ອະ­ນາ­ຄົດ ແທນ​ທີ່​ຈະ​ເປັນ​ບ້າ​ນຳ​ໜ້າ​ຈໍ​ນີ້​ຄື​ຄຳ​ເຫັນ​ຂອງ​ທ່ານ ລີ​ບຸນ​ເຈຍ (Lee Boon Chye) ຮອງ​ລັດ­ຖະ­ມົນ­ຕີ ກະ­ຊວງ​ສາ­ທາ­ລະ­ນະ​ສຸກ​ມາ​ເລ​ເຊຍ ຂ່າວ​ໃຫ້​ຮູ້​ຕື່ມ​ວ່າ ຢູ່​ມາ​ເລ​ເຊຍ ນັ້ນ ມີ​ບາງ​ເວັບ​ໄຊ ໄດ້​ບໍ­ລິ­ການ​ວີ​ດີ​ໂອ​ເກມ ໂດຍ​ມີ​ກຳ­ນົດ​ຈຳ­ກັດ​ເວ­ລາ ຄື​ໃຫ້​ໂອ­ກາດ​ຫຼິ້ນ​ພຽງ 1-2 ຊົ່ວ­ໂມງ ເທົ່າ​ນັ້ນ ຢູ່​ຍີ່­ປຸ່ນ ແລະ ສ ເກົາ­ຫຼີ ນັ້ນ ມີ​ບົດ­ຮຽນ​ດີ​ໃນ​ການ​ຈຳ­ກັດ​ເວ­ລາ​ສຳ­ລັບ​ໄວ​ໜຸ່ມ ໃນ​ການ​ເຂົ້າ​ເຖິງ​ເວບ​ໄຊ ວີ​ດີ​ໂອ​ເກມ ເຊິ່ງ​ມາ​ເລ​ເຊຍ ພວມ​ສຶກ​ສາ​ເອົາ​ເປັນ​ຕົວ​ແບບ.

    ທີ່ ສະ­ຫະ­ລັດ​ອາ​ເມ​ຣິ​ກາ: ຂ່າວ​ຈາກ​ໜັງ­ສື­ພິມ ເດິ​ເນ​ເຊິນ ໃຫ້​ຮູ້​ໃນ​ຕົ້ນ​ເດືອນ​ຕຸ­ລາ​ປີ​ນີ້​ວ່າ: ອຳ­ນາດ​ການ​ປົກ­ຄອງ​ເມືອງ​ຮູ​ສະ​ຕັນ ລັດ​ເທັກ​ຊັດ ສ ອາ​ເມ​ຣິ​ກາ ໄດ້​ອອກ­ສຽງ​ຄັດ­ຄ້ານ​ແຜນ​ສ້າງ​ສູນ​ບໍ­ລິ­ການ​ຕຸກ­ກະ­ຕາ ຮູບ​ຮ່າງ​ຄື​ຄົນ​ແທ້ ເພື່ອ​ບໍ­ລິ­ການ​ທາງ​ເພດ​ໃຫ້​ຜູ້​ຕ້ອງ­ການ​ສູນ​ທີ່​ວ່າ​ນີ້ ເປັນ​ສາ­ຂາ​ຂອງ​ບໍ­ລິ­ສັດ​ກາ​ນາ​ດາ ຢູ່​ເມືອງ​ໂຕ​ຣົນ​ໂຕ ທີ່​ມີ​ຊື່­ວ່າ ສະ​ກິງ​ກີ​ໂດນ (Skinky Dolls) ທ່ານ ຊິ​ເວ​ສະ​ເຕີ​ເນີ ເຈົ້າ­ເມືອງ​ຮູ​ສະ​ຕັນ ໄດ້​ອອກ­ສຽງ​ຄັດ­ຄ້ານ​ວ່າ: “ພວກ​ເຮົາ​ບໍ່​ຕ້ອງ­ການ​ທຸ­ລະ​ກິດ​ປະ­ເພດ​ນີ້ ຢູ່​ເມືອງ​ຂອງ​ພວກ​ເຮົາ” ສ່ວນ​ຊາວ​ເມືອງ​ເຊິ່ງ​ລວມ​ມີ​ທັງ​ນັກ​ການ­ເມືອງ ຜູ້­ນຳ​ທາງ​ສາ­ສະ­ໜາ ແລະ ປະ­ຊາ­ຊົນ​ທຳ​ມະ​ດາ ຕ່າງ​ກໍ່​ເອີ້ນ​ສູນ​ທີ່​ຈະ​ສ້າງ­ຕັ້ງ​ຂຶ້ນ​ນັ້ນ​ວ່າ “ສູນ​ບໍ­ລິ­ການ​ໂສ­ເພ­ນີ” ຕາມ​ແຜນ­ການ​ຂອງ​ບໍ­ລິ­ສັດ “Skinky Dolls” ນັ້ນ ກໍ່​ແມ່ນ​ຈະ​ບໍ­ລິ­ການ​ຕຸກ­ກະ­ຕາ​ທີ່​ມີ​ຄວາມ​ສະ­ຫຼາດ ແລະ ໜ້າ​ຕາ​ເໝືອນ​ຄົນ​ບໍ່​ມີ​ຜິດ​ໃຫ້​ຄົນ​ເຊົ່າ (ໄປ​ນອນ​ນຳ) ຖ້າ​ຖືກ​ໃຈ​ກໍ່​ຈຶ່ງ​ຊື້ ແຕ່​ໃນ​ທີ່​ສຸດ ແຜນ​ສ້າງ­ສາ​ຂາ​ສູນ​ບໍ­ລິ­ການ​ຕຸກ­ກະ­ຕາ ເພື່ອ​ເປົ້າ​ໝາຍ​ທາງ​ເພດ​ນີ້ ກໍ່​ຖືກ​ລົ້ມ​ລ້າງ​ໄປ ເພາະ​ທາງ​ເມືອງ​ຮຸ​ສະ​ຕັນ ໄດ້​ມີ​ມະ­ຕິ​ເກືອດ​ຫ້າມ​ເລື່ອງ​ນີ້​ຢ່າງ​ເດັດ­ຂາດ ນອກ­ຈາກ​ນັ້ນ ທາງ​ເມືອງ​ກໍ່​ຍັງ​ມີ​ແຜນ​ສະ­ເໜີ​ດັດ­ແກ້​ລັດ​ຖະ​ທຳ​ມະ­ນູນ ທີ່​ກຳ­ນົດ​ເກືອດ​ຫ້າມ​ເລື່ອງ​ໂສ­ເພ­ນີ ບໍ່​ວ່າ​ຈະ​ເປັນ​ຄົນ ເປັນ​ຕຸກ­ກະ­ຕາ ກໍ່​ຄື ອຸ­ປະ­ກອນ​ເຕັກ​ໂນ​ໂລ​ຊີ​ຕ່າງໆ​ກໍ່​ຕາມ ເມື່ອ​ກ່ອນ​ນັ້ນ ກົດ­ໝາຍ​ໄດ້​ໃຫ້​ນິ​ຍາມ “ໂສ­ເພ­ນີ” ໂດຍ​ຈຳ­ກັດ​ໃສ່​ຄົນ​ເທົ່າ​ນັ້ນ (ຈາກ The Nation5/10/2018).

ຂ່າວທີ່ກ່ຽວຂ້ອງ