ຂ່າວຫຼ້າສຸດ

ອາຊີບຫັດຖະກຳຈັກສານ ສ້າງລາຍຮັບໃຫ້ຄອບຄົວເປັນປະຈໍາ

391 06 ພ.ຈ. 2018 ຂ່າວໜ້າ​ໜຶ່ງ
ອາຊີບຫັດຖະກຳຈັກສານ ສ້າງລາຍຮັບໃຫ້ຄອບຄົວເປັນປະຈໍາ

    ຫັດ­ຖະ­ກຳ​ຈັກ­ສານ ຖື​ເປັນ​ອາ­ຊີບ​ໜຶ່ງ​ທີ່​ໄດ້​ຮັບ​ການ​ສືບ​ທອດ​ຕໍ່​ກັນ​ມາ​ຈາກ​ບັນ­ພະ­ບຸ­ລຸດ​ຮຸ່ນ​ຕໍ່​ຮຸ່ນ ໂດຍ​ໄດ້​ນຳ​ໃຊ້​ໄມ້­ໄຜ່ ຫຼື ຫວາຍ​ນຳ​ມາ​ຈັກ­ສານ​ອອກ​ມາ​ເປັນ​ຜະ­ລິດ​ຕະ​ພັນ​ສຳ­ເລັດ​ຮູບ​ຕ່າງໆ​ເຊັ່ນ: ຕິບ­ເຂົ້າ ພາ­ເຂົ້າ ໂອ ຂັນ​ໃສ່​ບາດ ແລະ ຜະ­ລິດ​ຕະ​ພັນ​ເຄື່ອງ­ໃຊ້​ຊອຍ​ໃນ​ຄົວ​ເຮືອນ ຖື​ໄດ້​ວ່າ​ເປັນ​ຜະ­ລິດ​ຕະ​ພັນ​ທີ່​ເຮັດ​ດ້ວຍ​ສີ­ມື​ຂອງ​ຊາວ​ຊ່າງ​ຫັດ­ຖະ­ກຳ​ລາວ ສະ­ນັ້ນ ພວກ​ເຮົາ​ຈຶ່ງ​ຄວນ​ຫັນ​ມາ​ຊຸກ­ຍູ້​ສົ່ງ­ເສີມ ແລະ ອະ­ນຸ​ຮັກ​ຜະ­ລິດ​ຕະ​ພັນ​ຈັກ­ສານ ເພື່ອ​ໃຫ້​ມີ​ຄວາມ​ຍືນ​ຍົງ​ຕະ­ຫຼອດ​ໄປ​ດ້ວຍ​ການ​ນຳ​ໃຊ້​ຜະ­ລິດ​ຕະ​ພັນ​ດັ່ງ­ກ່າວ ໃຫ້​ນັບ​ມື້​ຫຼາຍ​ຂຶ້ນ.

    ນາງ ເດັ່ນ ປະ­ຊາ­ຊົນ​ບ້ານ​ຊຽງ​ແມນ ເມືອງ​ວຽງ​ໄຊ ແຂວງ​ຫົວ­ພັນ ໄດ້​ໃຫ້​ສຳ­ພາດ​ໃນ​ໂອ­ກາດ​ເຂົ້າ​ຮ່ວມ​ງານ​ວາງ­ສະ­ແດງ​ງານ​ມະ​ຫະ​ກຳ​ສີ­ມື​ຫັດ­ຖະ­ກຳ​ລາວ ຄັ້ງ​ທີ 17 ວ່າ: ມີ​ຄວາມ​ພາກ­ພູມ​ໃຈ ແລະ ດີ­ໃຈ​ທີ່​ໄດ້​ຕາງ­ໜ້າ​ໃຫ້​ແຂວງ​ຫົວ­ພັນ​ເຂົ້າ​ມາ​ສາ­ທິດ​ວິ­ທີ​ຈັກ­ສານ​ໂອ ແລະ ຂັນ​ໃສ່​ບາດ ໃຫ້​ມວນ​ຊົນ​ໄດ້​ເຫັນ​ເຖິງ​ກຳ​ມະ​ວິ­ຖີ​ເປັນ​ຄັ້ງ​ທຳ​ອິດ​ຢູ່​ໃນ​ງານ​ຄັ້ງ​ນີ້ ທີ່​ຈັດ​ຂຶ້ນ​ຢູ່​ສູນ​ການ​ຄ້າ​ລາວ-ໄອ​ເຕັກ ນະ­ຄອນ­ຫຼວງ​ວຽງ​ຈັນ ລະ­ຫວ່າງ​ວັນ​ທີ 27 ຕຸ­ລາ-4 ພະ­ຈິກ 2018 ສຳ­ລັບ​ຂ້າ­ພະ­ເຈົ້າ​ໄດ້​ຖື​ເອົາ​ອາ­ຊີບ​ຫັດ­ຖະ­ກຳ​ຈັກ­ສານ​ເປັນ​ອາ­ຊີບ ສ້າງ​ລາຍ​ຮັບ​ໃຫ້​ຄອບ­ຄົວ​ເປັນ​ປະ­ຈຳ ໂດຍ​ໄດ້​ສືບ​ທອດ​ຈາກ​ພໍ່​ແມ່ ເພາະ​ພື້ນ­ຖານ​ດັ່ງ​ເດີມ​ຂອງ​ປະ­ຊາ­ຊົນ​ບ້ານ​ຊຽງ​ແມນ ໄດ້​ໃຊ້​ຊີ­ວິດ​ຕິດ​ພັນ​ກັບ​ຫັດ­ຖະ­ກຳ​ຈັກ­ສານ​ມາ​ແຕ່​ດົນ​ນານ ສະ­ນັ້ນ ຈຶ່ງ​ໄດ້​ອາ­ໄສ​ຄວາມ​ຊຳ­ນິ​ຊຳ­ນານ​ຢຶດ​ເປັນ​ອາ­ຊີບ​ຫຼັກ ເຊິ່ງ​ໃນ​ເບື້ອງ​ຕົ້ນ​ໄດ້​ຈັກ­ສານ​ແບບ​ປະ­ຖົມ​ປະ​ຖານ ຕາມ​ທີ່​ເຄີຍ​ເຮັດ​ສືບ​ທອດ​ກັນ​ມາ ສົ່ງ​ຜົນ​ໃຫ້​ຜະ­ລິດ​ຕະ​ພັນ​ບໍ່​ໄດ້​ຮັບ​ຄຸ­ນະ­ພາບ​ດີ​ເທົ່າ​ທີ່​ຄວນ ຕໍ່​ມາ​ໄດ້​ມີ​ໂຄງ­ການ​ພີ​ເອັມ​ມາ​ເຝິກ­ອົບ­ຮົມ ໃຫ້​ກ່ຽວ​ກັບ​ຂັ້ນ​ຕອນ​ການ​ຜະ­ລິດ​ເຄື່ອງ​ຫັດ­ຖະ­ກຳ ເພື່ອ​ໃຫ້​ມີ​ຄຸ­ນະ­ພາບ​ດີ ໂດຍ​ໄດ້​ໃຫ້​ຄວາມ​ຮູ້​ກ່ຽວ​ກັບ​ການ​ຂ້າ​ເຊື້ອ​ຣາ (ມອດ) ແລະ ການ​ອອກ​ແບບ​ຜະ­ລິດ​ຕະ​ພັນ ເພື່ອ​ຍົກ​ສູງ​ຄຸ­ນະ­ພາບ​ຂອງ​ຜະ­ລິດ​ຕະ​ພັນ ຈາກ​ນັ້ນ ນັບ​ແຕ່​ປີ 2010 ເປັນ­ຕົ້ນ​ມາ ຈຶ່ງ​ໄດ້​ຫັນ­ປ່ຽນ​ການ​ຈັກ­ສານ​ໃນ​ຮູບ​ແບບ​ໃໝ່​ມາ​ເລື້ອຍໆ.

    ສຳ­ລັບ​ຜະ­ລິດ​ຕະ​ພັນ​ທີ່​ຜະ­ລິດ​ປະ­ກອບ​ມີ: ໂອ ຂັນ ຕິບ­ເຂົ້າ ແລະ ເຄື່ອງ­ໃຊ້​ຊອຍ​ຄົວ​ເຮືອນ​ຕ່າງໆ ທີ່​ນຳ​ໃຊ້​ວັດ­ຖຸ​ດິບ​ໄມ້­ໄຜ່​ຈາກ​ທຳ​ມະ​ຊາດ​ມາ​ຜະ­ລິດ ແລະ ຕະ­ຫຼາດ​ຈຳ­ໜ່າຍ​ສ່ວນ​ຫຼາຍ​ຈະ​ມີ​ແມ່​ຄ້າ​ມາ​ຮັບ​ຊື້​ກັບ​ທີ່ ສະ­ເລ່ຍ​ເດືອນ​ໜຶ່ງ​ສ້າງ​ລາຍ​ຮັບ​ໄດ້​ບໍ່​ຕ່ຳ​ກວ່າ 5 ແສນ​ກີບ ເຊິ່ງ​ເປັນ​ອາ­ຊີບ​ໜຶ່ງ​ສາ­ມາດ​ສ້າງ​ວຽກ​ເຮັດ​ງານ​ທຳ ແລະ ສ້າງ​ລາຍ​ຮັບ​ໃຫ້​ຄອບ­ຄົວ​ເປັນ​ປະ­ຈຳ ເພື່ອ​ພາ​ຄອບ­ຄົວ​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ.

ຂ່າວທີ່ກ່ຽວຂ້ອງ