ຫັນປ່ຽນກົນໄກເກັບຄ່າບໍລິການລົດເມຈາກມອບເໝົາ ມາເປັນເກັບປີ້ເຮັດໃຫ້ລາຍຮັບເພີ່ມຂຶ້ນ

542 06 ພ.ຈ. 2018 ຂ່າວໜ້າ​ໜຶ່ງ
ຫັນປ່ຽນກົນໄກເກັບຄ່າບໍລິການລົດເມຈາກມອບເໝົາ ມາເປັນເກັບປີ້ເຮັດໃຫ້ລາຍຮັບເພີ່ມຂຶ້ນ

    ໃນ​ຫຼາຍ​ປີ­ຜ່ານ­ມາ ລັດ​ວິ​ສາ​ຫະ​ກິດ​ລົດ­ເມ​ນະ­ຄອນ­ຫຼວງ​ວຽງ​ຈັນ ໄດ້​ຈັດ​ຕັ້ງ​ປະ­ຕິ­ບັດ​ການ​ເກັບ​ຄ່າ​ບໍ­ລິ­ການ ຜູ້­ໂດຍ­ສານ​ລົດ­ເມ​ສາ­ທາ­ລະ­ນະ​ຮູບ​ແບບ​ມອບ​ເໝົາ​ຕົວ​ເລກ ໃຫ້​ພະ­ນັກ­ງານ​ຂັບ​ລົດ​ເປັນ​ຖ້ຽວ​ເປັນ​ສາຍ​ທາງ ຖ້າ​ເກັບ​ໄດ້​ເກີນ​ທີ່​ກຳ­ນົດ​ໃຫ້​ກໍ່​ຖື​ວ່າ​ມີ​ກຳ­ໄລ ແລະ ຖ້າ​ບໍ່​ໄດ້​ກໍ່​ຖື​ວ່າ​ຂາດ­ທຶນ ເຮັດ​ໃຫ້​ພະ­ນັກ­ງານ​ຂັບ​ລົດ​ມີ​ໜີ້​ສິນ​ຕໍ່​ບໍ­ລິ­ສັດ​ລົດ­ເມ ນອກ​ນີ້​ແລ້ວ ກໍ່​ຍັງ​ມີ​ຊ່ອງ​ຫວ່າງ​ໃຫ້​ພະ­ນັກ­ງານ​ຂັບ​ລົດ​ຈຳ­ນວນ​ໜຶ່ງ​ທີ່​ບໍ່​ມີ​ຄວາມ​ຈິງ​ໃຈ​ຕໍ່​ບໍ­ລິ­ສັດ ເປັນ­ຕົ້ນ ປິດ​ບັງ​ລາຍ​ຮັບ​ຍາມ​ໃດ​ກໍ່​ວ່າ​ບໍ່​ໄດ້​ຕາມ​ຕົວ​ເລກ​ຄາດ­ໝາຍ ແລະ ຍັງ​ສວຍ­ໂອ­ກາດ​ເອົາ​ບັດ​ນັກ​ສຶກ​ສາ​ມາ​ເປັນ​ຈຳ­ນວນ​ລາຍ​ຮັບ​ທີ່​ເປັນ​ຈຳ­ນວນ​ຫຼາຍ ເພື່ອ​ມາ​ຕໍ່​ລອງ​ເອົາ​ເງິນ​ຄືນ​ນຳ​ບໍ­ລິ­ສັດ​ຕື່ມ​ອີກ ແຕ່​ພາຍ­ຫຼັງ​ທີ່​ນຳ​ໃຊ້​ກົນ​ໄກ​ແບບ​ໃໝ່ ຈາກ​ມອບ​ເໝົາ​ມາ​ເປັນ​ເກັບ​ປີ້ ໂຄງ­ການ​ຂອງ​ອົງ­ການ​ໄຈ​ກາ ສາ­ມາດ​ຮູ້​ໄດ້​ວ່າ​ມີ​ລາຍ​ຮັບ​ເພີ່ມ​ຂຶ້ນ ໂດຍ​ການ​ທົດ​ລອງ​ຢູ່​ສາຍ​ທາງ​ທ່າ​ເດື່ອ.

    ທ່ານ ຄຳ​ພູນ ເຕ​ເມ​ລາດ ຜູ້­ອຳ­ນວຍ­ການ​ລັດ​ວິ​ສາ​ຫະ​ກິດ​ລົດ­ເມ​ນະ­ຄອນ­ຫຼວງ​ວຽງ​ຈັນ ໃຫ້​ສຳ­ພາດ​ເມື່ອ​ບໍ່​ດົນ​ນີ້​ວ່າ: ເລີ່ມ​ຈັດ​ຕັ້ງ​ປະ­ຕິ­ບັດ​ກົນ​ໄກ​ການ​ບໍ­ລິ­ການ​ຈາກ​ມອບ​ເໝົາ​ເປັນ​ເກັບ​ປີ້​ຢູ່​ສາຍ​ທາງ 14 ເສັ້ນ ທາງ​ທ່າ​ເດື່ອ​ໃນ​ເດືອນ​ມິ­ຖຸ­ນາ 2018 ເປັນ­ຕົ້ນ​ມາ ແລະ ຜ່ານ​ການ​ທົດ​ລອງ 3 ເດືອນ​ເບື້ອງ​ຕົ້ນ ຖ້າ​ທຽບ­ໃສ່ 3 ເດືອນ​ໄລ­ຍະ​ດຽວ​ກັນ​ຂອງ​ປີ 2017 ສາ­ມາດ​ປະ​ເມີນ​ຜົນ​ໄດ້​ວ່າ ເຮັດ​ໃຫ້​ລາຍ​ຮັບ​ທີ່​ເກັບ​ເງິນ​ໄດ້​ຈາກ​ຜູ້­ໂດຍ­ສານ​ຕົວ​ຈິງ​ເພີ່ມ​ຂຶ້ນ 5% ບໍ່​ນັບ​ຄົນ​ຂຶ້ນ​ລົດ­ເມ​ທີ່​ນຳ​ໃຊ້​ບັດ​ຕື່ມ​ອີກ ເຊິ່ງ​ການ​ປັບ­ປຸງ​ກົນ​ໄກ​ແບບ​ນີ້​ມີ​ອັນ​ດີ​ຫຼາຍ​ຢ່າງ ເປັນ­ຕົ້ນ ເຮັດ​ໃຫ້​ບໍ­ລິ­ສັດ​ສາ­ມາດ​ເກັບ​ເງິນ​ໄດ້​ໝົດ ບໍ່​ຕົກ­ເຮ່ຍ​ເສຍ​ຫາຍ​ຄື​ຜ່ານ​ມາ.

    ສ່ວນ​ໃນ​ອະ­ນາ­ຄົດ​ຂ້າງ​ໜ້າ ຈະ​ສືບ­ຕໍ່​ປະ­ຕິ­ບັດ​ກົນ​ໄກ​ແບບ​ໃໝ່​ຢູ່​ສາຍ​ທາງ​ດົງ​ໂດກ ແລະ ສາຍ​ທາງ​ອື່ນໆ​ທີ່​ຍັງ​ເຫຼືອ ໃຫ້​ສຳ­ເລັດ​ພາຍ​ໃນ​ປີ 2019 ແຕ່​ປັດ­ຈຸ­ບັນ​ກຳ­ລັງ​ສຶກ​ສາ​ເນື່ອງ​ຈາ​ການ​ໃຊ້​ລະ­ບົບ​ນີ້ ຕ້ອງ​ເພີ່ມ​ຈຳ­ນວນ​ພະ­ນັກ­ງານ​ກະ​ເປົ໋າ​ລົດ­ເມ ດັ່ງ­ນັ້ນ ມັນ​ຈຶ່ງ​ມີ​ສິ່ງ​ທ້າ​ທາຍ​ທີ່​ບໍ­ລິ­ສັດ ຈະ​ໄດ້​ເພີ່ມ​ລາຍ​ຈ່າຍ​ໃຫ້​ພະ­ນັກ­ງານ​ຈາກ​ການ​ມອບ​ເໝົາ ໃຊ້​ພຽງ​ຜູ້​ດຽວ​ທັງ​ເກັບ​ເງິນ ແລະ ຂັບ​ລົດ ມາ​ເປັນ 2 ຄົນ​ຜູ້​ເກັບ​ເງິນ ແລະ ຜູ້​ຂັບ​ລົດ.

ຂ່າວທີ່ກ່ຽວຂ້ອງ