ປັບໂລກະທັດໃໝ່ ເພື່ອເຕີບໃຫຍ່ໃນຕະຫຼາດທຶນ

537 06 ພ.ຈ. 2018 ຂ່າວໜ້າ​ໜຶ່ງ
ປັບໂລກະທັດໃໝ່ ເພື່ອເຕີບໃຫຍ່ໃນຕະຫຼາດທຶນ

    ຕະ­ຫຼາດ​ຫຼັກ​ຊັບ​ລາວ ຮ່ວມ​ກັບ​ສຳ­ນັກ­ງານ​ຄະ­ນະ​ກຳ­ມະ­ການ​ຄຸ້ມ​ຄອງ​ຫຼັກ​ຊັບ ບໍ­ລິ­ສັດ​ຈົດ​ທະ­ບຽນ ບໍ­ລິ­ສັດ​ຫຼັກ​ຊັບ ແລະ ບໍ­ລິ­ສັດ​ເປົ້າ​ໝາຍ​ທີ່​ກຽມ​ຈົດ​ທະ­ບຽນ 17 ພາກ­ສ່ວນ ຈັດ​ງານ​ເປີດ​ໂລກ​ແຫ່ງ​ການ​ລົງ­ທຶນ 2018 ພາຍ​ໃຕ້​ຫົວ­ຂໍ້ “ປັບ​ໂລ​ກະ­ທັດ​ໃໝ່​ເພື່ອ​ເຕີບ​ໃຫຍ່​ໃນ​ຕະ­ຫຼາດ​ທຶນ” ຈັດ​ຂຶ້ນ​ວັນ​ທີ 3-4 ພະ­ຈິກ 2018 ຢູ່​ສູນ​ການ​ຄ້າ​ວຽງ​ຈັນ​ເຊັນ​ເຕີ ໂດຍ​ເປັນ​ປະ­ທານ​ຂອງ​ທ່ານ ວັນ​ຄຳ ວໍ​ຣະ​ວົງ ຜູ້­ອຳ­ນວຍ­ການ​ໃຫຍ່​ຕະ­ຫຼາດ​ຫຼັກ​ຊັບ​ລາວ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ວຽກ​ງານ​ຕະ­ຫຼາດ​ທຶນ ເປັນ​ວຽກ​ງານ​ໃໝ່ ແລະ ສຳ­ຄັນ​ສຳ­ລັບ ສປປ ລາວ ໂດຍ​ສະ­ເພາະ​ໄລ­ຍະ​ແຫ່ງ​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ ເນື່ອງ​ຈາກ​ຕະ­ຫຼາດ​ທຶນ​ເປັນ​ຊ່ອງ​ທາງ​ທີ່​ສາ­ມາດ​ອຳ­ນວຍ​ຄວາມ​ສະ­ດວກ ໃນ​ການ​ລະ­ດົມ​ທຶນ​ໄລ­ຍະ​ຍາວ​ໃຫ້​ວິ​ສາ​ຫະ​ກິດ​ພາກ​ລັດ ແລະ ພາກ​ເອ­ກະ​ຊົນ ເພື່ອ​ນຳ​ໃຊ້​ໃນ​ການ​ສ້າງ​ພື້ນ­ຖານ​ໂຄງ​ລ່າງ ພັດ­ທະ­ນາ ແລະ ຂະ­ຫຍາຍ​ທຸ­ລະ​ກິດ ປະ­ກອບ­ສ່ວນ​ໃນ​ການ​ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໃຫ້​ດີ​ຂຶ້ນ ປັດ­ຈຸ­ບັນ​ຍັງ​ມີ​ຫຼາຍ​ຫົວ­ໜ່ວຍ​ວິ​ສາ​ຫະ​ກິດ​ທີ່​ຕ້ອງ­ການ​ເຂົ້າ​ຫາ​ແຫຼ່ງ​ທຶນ​ໄລ­ຍະ​ຍາວ ແຕ່​ຍັງ​ບໍ່​ທັນ​ເຂົ້າ­ໃຈ​ເລິກ­ເຊິ່ງ​ກ່ຽວ​ກັບ​ພາບ​ລວມ​ຕະ­ຫຼາດ​ທຶນ ລວມ​ເຖິງ​ການ​ກະ­ກຽມ​ດ້ານ​ຕ່າງໆ ເພື່ອ​ໃຫ້​ສາ­ມາດ​ອອກ​ຈຳ­ໜ່າຍ​ຫຼັກ​ຊັບ ແລະ ເຂົ້າ​ຈົດ​ທະ­ບຽນ​ໃນ​ຕະ­ຫຼາດ​ຫຼັກ​ຊັບ​ໄດ້ ງານ​ເປີດ​ໂລກ​ແຫ່ງ​ການ​ລົງ­ທຶນ​ປະ­ຈຳ​ປີ 2018 ເປັນ​ບາດ­ກ້າວ​ສຳ­ຄັນ ເພື່ອ​ສົ່ງ­ເສີມ​ຄວາມ​ເຂົ້າ­ໃຈ​ຂອງ​ມວນ​ຊົນ​ຕໍ່​ວຽກ​ງານ​ຕະ­ຫຼາດ​ທຶນ ເວົ້າ​ລວມ ເວົ້າ​ສະ­ເພາະ​ຄື ບໍ­ລິ­ສັດ​ເປົ້າ​ໝາຍ​ຈົດ​ທະ­ບຽນ ແລະ ນັກ​ລົງ­ທຶນ​ພາຍ​ໃນ ທີ່​ຈະ​ເປັນ​ຜູ້​ຊຸກ­ຍູ້​ການ​ພັດ­ທະ­ນາ​ປະ­ເທດ​ຊາດ​ໃຫ້​ຂະ­ຫຍາຍ­ຕົວ ໃນ​ຍຸກ​ການ​ເຊື່ອມ​ໂຍງ​ປະ­ຊາ​ຄົມ​ເສດ­ຖະ­ກິດ​ອາ​ຊຽນ ຕະ­ຫຼາດ​ທຶນ​ຍິ່ງ​ມີ​ບົດ­ບາດ​ສຳ­ຄັນ ເພື່ອ​ສົ່ງ­ເສີມ​ທຸ­ລະ​ກິດ​ໃຫ້​ສາ­ມາດ​ເພີ່ມ​ທະ­ວີ​ຄວາມ​ສາ­ມາດ​ໃນ​ການ​ແຂ່ງ­ຂັນ ແລະ ທ່ວງ​ທັນ​ກັບ​ການ​ປ່ຽນ­ແປງ​ແຕ່​ລະ​ໄລ­ຍະ​ຂອງ​ເສດ­ຖະ­ກິດ ສາ­ມາດ​ຊ່ວຍ​ໃຫ້​ປະ­ເທດ​ລາວ​ຫຼຸດ​ພົ້ນ​ຈາກ​ຄວາມ­ທຸກ​ຍາກ​ຕາມ​ນະ­ໂຍ­ບາຍ​ຂອງ​ພັກ-ລັດ ພາຍ​ໃນ​ງານ​ຍັງ​ມີ​ການ​ສຳ​ມະ​ນາ​ກ່ຽວ​ກັບ​ປະ­ສົບ​ການ​ອັນ​ລ້ຳ​ຄ່າ​ຂອງ​ບໍ­ລິ­ສັດ​ຈົດ​ທະ­ບຽນ ວິ­ໄສ​ທັດ​ຕໍ່​ສິ່ງ​ທ້າ​ທາຍ​ຂອງ​ການ​ຈົດ​ທະ­ບຽນ ຍຸດ​ທະ​ສາດ​ກ່ອນ​ການ​ລົງ­ທຶນ​ໃນ​ຮຸ້ນ ບາດ­ກ້າວ​ແຫ່ງ​ຄວາມ​ສຳ­ເລັດ​ຂອງ​ການ​ລົງ­ທຶນ​ໃນ​ຮຸ້ນ ແລະ ເຕັກ­ນິກ​ວິ­ເຄາະ​ຮູ້​ຂັ້ນ​ພື້ນ­ຖານ​ສູ່​ຄວາມ​ສຳ­ເລັດ.

    ໄລ­ຍະ​ຜ່ານ​ມາ​ພັກ ແລະ ລັດ­ຖະ­ບານ ໄດ້​ເອົາ­ໃຈ­ໃສ່​ຊີ້​ນຳ​ພາກ­ສ່ວນ​ກ່ຽວ­ຂ້ອງ​ພ້ອມ​ກັນ​ສົ່ງ­ເສີມ ແລະ ພັດ­ທະ­ນາ​ຕະ­ຫຼາດ​ທຶນ​ໃຫ້​ມີ​ການ­ເຄື່ອນ­ໄຫວ​ຢ່າງ​ຕັ້ງ­ໜ້າ ອັນ​ພົ້ນ​ເດັ່ນ​ແມ່ນ​ການ​ຊຸກ­ຍູ້​ສົ່ງ­ເສີມ​ລັດ​ວິ​ສາ​ຫະ​ກິດ​ປັບ­ປຸງ​ຕົນ ໃຫ້​ສາ­ມາດ​ເຂົ້າ​ຈົດ​ທະ­ບຽນ​ໄດ້​ຄື​ປີ 2011 ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ ມະ­ຫາ­ຊົນ ບໍ­ລິ­ສັດ ຜະ­ລິດ​ໄຟ­ຟ້າ​ລາວ​ມະ­ຫາ­ຊົນ ເຊິ່ງ​ສາ­ມາດ​ລະ­ດົມ​ທຶນ​ໄດ້ 1.000 ກວ່າ​ຕື້​ກີບ ທັງ 2 ບໍ­ລິ­ສັດ​ຍັງ​ໄດ້​ສືບ­ຕໍ່​ອອກ​ຮຸ້ນ​ເພີ່ມ​ທຶນ​ອີກ​ເປັນ​ມູນ​ຄ່າ 4.700 ກວ່າ​ຕື້​ກີບ ໃນ​ປີ 2012 2015 2017 ນອກ​ນີ້ ວິ​ສາ​ຫະ​ກິດ​ເອ­ກະ​ຊົນ 4 ບໍ­ລິ­ສັດ ກໍ່​ສາ­ມາດ​ລະ­ດົມ​ທຶນ​ໄດ້ 400 ກວ່າ​ຕື້​ກີບ ແລະ ສາ­ມາດ​ເຂົ້າ​ຈົດ​ທະ­ບຽນ​ໃນ​ປີ 2013 2014 2015 2017 ສ່ວນ​ປີ 2018 ມີ 3 ວິ​ສາ​ຫະ​ກິດ​ເອ­ກະ​ຊົນ​ລະ­ດົມ​ທຶນ​ໄດ້ 68 ກວ່າ​ຕື້​ກີບ ປັດ­ຈຸ­ບັນ​ມີ​ບໍ­ລິ­ສັດ​ຈົດ​ທະ­ບຽນ​ໃນ​ຕະ­ຫຼາດ​ຫຼັກ​ຊັບ​ລາວ 9 ບໍ­ລິ­ສັດ ນັບ​ແຕ່​ປີ 2011 ເປັນ­ຕົ້ນ​ມາ ວິ​ສາ​ຫະ​ກິດ​ພາກ​ລັດ ແລະ ເອ­ກະ​ຊົນ ສາ­ມາດ​ລະ­ດົມ​ທຶນ​ໄດ້​ຫຼາຍ​ກວ່າ 6.400 ກວ່າ​ຕື້​ກີບ ກວມ​ເອົາ 4,5% ຂອງ​ລວມ​ຍອດ​ຜະ­ລິດ​ຕະ​ພັນ​ພາຍ​ໃນ (GDP) ໃນ​ປີ 2017.

ຂ່າວທີ່ກ່ຽວຂ້ອງ