ເຈົ້າຄອງນະຄອນຫຼວງ ຕ້ອນຮັບທູດຝຣັ່ງຄົນໃໝ່ປະຈຳລາວ

393 06 ພ.ຈ. 2018 ຂ່າວໜ້າ​ໜຶ່ງ
ເຈົ້າຄອງນະຄອນຫຼວງ ຕ້ອນຮັບທູດຝຣັ່ງຄົນໃໝ່ປະຈຳລາວ

    ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ​ນາງ ຟລໍ​ຮັອງ​ສ ຊັອງ​ບັອງ ຣີດ​ແລກ ເອກ​ອັກ​ຄະ​ລັດ​ຖະ​ທູດ​ຝຣັ່ງ ປະ­ຈຳ​ລາວ​ຄົນ​ໃໝ່ ວັນ​ທີ 2 ພະ­ຈິກ 2018 ຢູ່​ຫ້ອງ​ວ່າ­ການ​ປົກ­ຄອງ ນວ ເນື່ອງ​ໃນ​ໂອ­ກາດ​ທີ່​ມາ​ດຳ­ລົງ​ຕຳ­ແໜ່ງ​ທາງ​ການ​ທູດ​ຢູ່ ສປປ ລາວ.

    ໂອ­ກາດ​ນີ້ ທ່ານ​ເຈົ້າ​ຄອງ ກໍ່​ໄດ້​ສະ­ແດງ​ຄວາມ​ຍິນ​ດີ​ຕ້ອນ­ຮັບ ຊົມ­ເຊີຍ ແລະ ຕີ​ລາ­ຄາ​ສູງ​ຕໍ່​ທ່ານ​ນາງ ຟລໍ​ຮັອງ​ສ ຊັອງ​ບັອງ ຣີດ​ແລກ ທີ່​ໄດ້​ຮັບ​ການ​ແຕ່ງ­ຕັ້ງ​ໃຫ້​ມາ​ດຳ­ລົງ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ຝຣັ່ງ​ຄົນ​ໃໝ່ ປະ­ຈຳ​ລາວ ໃນ​ຄັ້ງ​ນີ້ ພ້ອມ​ທັງ​ສະ­ແດງ​ຄວມ​ເຊື່ອ​ໝັ້ນ​ວ່າ ຕະ­ຫຼອດ​ໄລ­ຍະ​ການ​ມາ​ປະ­ຕິ­ບັດ​ໜ້າ­ທີ່​ທາງ​ການ​ທູດ​ຢູ່​ລາວ ທ່ານ​ທູດ​ຈະ​ສືບ­ຕໍ່​ຊຸກ­ຍູ້​ສົ່ງ­ເສີມ​ການ​ພົວ­ພັນ​ຮ່ວມ​ມື​ມິດ­ຕະ­ພາບ​ສອງ​ປະ­ເທດ ລາວ-ຝຣັ່ງ ໂດຍ​ສະ­ເພາະ ການ​ຊຸກ­ຍູ້​ສົ່ງ­ເສີມ​ການ​ແລກ­ປ່ຽນ​ພົວ­ພັນ​ຮ່ວມ​ມື​ລະ­ຫວ່າງ ນວ ແລະ ນະ­ຄອນ­ຫຼວງ​ປາ​ຣີ ໃຫ້​ມີ​ຄວາມ​ແໜ້ນ​ແຟ້ນ​ຍິ່ງ​ຂຶ້ນ ນອກ​ນີ້ ທັງ​ສອງ​ຝ່າຍ​ໄດ້​ປືກ​ສາ​ຫາ­ລື​ກ່ຽວ​ກັບ​ການ​ຮ່ວມ​ມື​ຊ່ວຍ­ເຫຼືອ​ເຊິ່ງ​ກັນ ແລະ ກັນ​ໃນ­ຕໍ່­ໜ້າ ເພື່ອ​ເຮັດ​ໃຫ້­ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ມີ​ຜົນ­ສຳ­ເລັດ​ຫຼາຍ​ຂຶ້ນ​ເຊັ່ນ: ການ​ສະ­ໜັບ​ໜູນ​ໂຄງ­ການ​ອອກ​ແບບ­ແຜນ​ຜັງ­ເມືອງ​ຢູ່ ນວ ການ​ປັບ­ປຸງ​ທາງ​ແກ້​ໄຂ​ສະ­ພາບ​ທາງ​ເຂົ້າ-ອອກ​ໂຮງ­ຮຽນ​ອໍ​ເຟ ບ້ານ​ບຶງ​ຂະ​ຫຍອງ ເມືອງ​ສີ​ສັດ­ຕະ​ນາກ ການ​ຊ່ວຍ​ຍົກ​ລະ­ດັບ​ດ້ານ​ການ​ສຶກ​ສາ ການ​ໃຫ້​ທຶນ​ຊ່ວຍ​ໃນ​ການ​ແລກ­ປ່ຽນ ແລະ ສົ່ງ​ວິ­ຊາ​ການ​ຂອງ ນວ ໄປ​ທັດ­ສະ­ນະ​ສຶກ​ສາ​ຮຽນ​ຮູ້​ລະ­ບົບ​ແຜນ​ຜັງ­ເມືອງ​ຢູ່​ປາ​ຣີ ການ​ຊຸກ­ຍູ້​ສົ່ງ­ເສີມ​ວຽກ​ງານ​ການ­ທ່ອງ­ທ່ຽວ ແລະ ອື່ນໆ.

    ທ່ານ​ເອກ​ອັກ​ຄະ​ລັດ​ຖະ​ທູດ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ທ່ານ​ເຈົ້າ​ຄອງ ນວ ທີ່​ໄດ້​ໃຫ້­ການ​ຕ້ອນ­ຮັບ​ອັນ​ອົບ​ອຸ່ນ ພ້ອມ​ທັງ​ຢືນ­ຢັນ​ຈະ​ສຸມ​ທຸກ​ຄວາມ​ພະ­ຍາ­ຍາມ ແລະ ສະ­ຕິ​ປັນ­ຍາ​ຂອງ​ຕົນ ເຂົ້າ​ໃນ​ການ​ປະ­ກອບ­ສ່ວນ​ເສີມ​ຂະ­ຫຍາຍ​ການ​ພົວ­ພັນ​ຮ່ວມ​ມື​ລະ­ຫວ່າງ ລາວ-ຝຣັ່ງ ໃຫ້​ນັບ​ມື້​ເຂັ້ມ­ແຂງ ແລະ ມີ​ຜົນ­ສຳ­ເລັດ.

ຂ່າວທີ່ກ່ຽວຂ້ອງ