ລາວ-ຈີນ ເສີມຂະຫຍາຍສາຍພົວພັນຮ່ວມມືຮອບດ້ານໝັ້ນຄົງ ແລະ ຍາວນານ ຕາມທິດ 4 ດີ

338 06 ພ.ຈ. 2018 ຂ່າວໜ້າ​ໜຶ່ງ
ລາວ-ຈີນ ເສີມຂະຫຍາຍສາຍພົວພັນຮ່ວມມືຮອບດ້ານໝັ້ນຄົງ ແລະ ຍາວນານ ຕາມທິດ 4 ດີ

    ໂດຍ​ຕອບ​ສະ­ໜອງ​ຕາມ​ການ​ເຊີນ​ຂອງ​ທ່ານ ສີ ຈິ້ນ​ຜິງ ປະ­ທານ​ປະ­ເທດ ແຫ່ງ ສາ­ທາ­ລະ­ນະ​ລັດ ປະ­ຊາ­ຊົນ​ຈີນ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ພ້ອມ​ດ້ວຍ​ຄະ­ນະ ໄດ້​ເຂົ້າ​ຮ່ວມ​ງານ​ວາງ­ສະ­ແດງ​ສິນ­ຄ້າ​ນຳ​ເຂົ້າ​ສາ­ກົນ​ຈີນ ຄັ້ງ​ທີ 1 (China International Import - Expo) ຊຶ່ງ​ຈັດ​ຂຶ້ນ​ໃນ​ລະ­ຫວ່າງ​ວັນ​ທີ 5-10 ພະ­ຈິກ 2018 ທີ່ ນະ­ຄອນ​ຊຽງ​ໄຮ້ ສປ ຈີນ.

    ໃນ​ວັນ​ທີ 4 ພະ­ຈິກ 2018 ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ໄດ້​ພົບ​ປະ​ກັບ​ທ່ານ ສີ ຈິ້ນ​ຜິງ ປະ­ທານ​ປະ­ເທດ ແຫ່ງ ສປ ຈີນ ເຊິ່ງ​ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ການ​ຕ້ອນ­ຮັບ ແລະ ຮູ້­ສຶກ​ເປັນ​ກຽດ​ຢ່າງ​ສູງ​ຕໍ່​ການ​ເຊື້ອ​ເຊີນ​ຄະ­ນະ​ຜູ້​ແທນ ສປປ ລາວ ມາ​ຮ່ວມ​ງານ​ວາງ­ສະ­ແດງ​ສິນ­ຄ້າ​ນຳ​ເຂົ້າ​ສາ­ກົນ​ຈີນ ຄັ້ງ​ທີ 1 ນີ້ ພ້ອມ​ກັນ​ນັ້ນ ທ່ານ​ນາ­ຍົກ­ລັດ­ຖະ­ມົນ­ຕີ ຍັງ​ໄດ້​ນຳ​ເອົາ​ຄວາມ​ຢື້​ຢາມ​ຖາມ​ຂ່າວ​ອັນ​ອົບ​ອຸ່ນ​ຂອງ​ທ່ານ​ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ບຸນ​ຍັງ ວໍ­ລະ​ຈິດ ເຖິງ​ທ່ານ ສີ ຈິ້ນ​ຜິງ ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ແຫ່ງ ສປ ຈີນ ແລະ ຝາກ​ສະ­ແດງ​ຄວາມ​ຂອບ­ໃຈ​ຢ່າງ​ສູງ​ຕໍ່​ການ​ຕ້ອນ­ຮັບ​ຢ່າງ​ອົບ​ອຸ່ນ​ມາ​ຍັງ​ທ່ານ ສີ ຈິ້ນ​ຜິງ ໃນ​ໂອ­ກາດ​ທີ່​ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ​ແຫ່ງ ສປປ ລາວ ໄດ້​ມາ​ຢ້ຽມ­ຢາມ​ເຮັດ​ວຽກ​ຢູ່ ສປ ຈີນ ໃນ​ເດືອນ​ພຶດ­ສະ­ພາ 2018 ທີ່​ຜ່ານ​ມາ ການ​ພົບ​ປະ​ໃນ​ຄັ້ງ​ນີ້ ສອງ​ຝ່າຍ​ໄດ້​ຕີ​ລາ​ຄືນ​ການ­ຈັດ­ຕັ້ງ​ປະ­ຕິ­ບັດ​ຂອບ​ການ​ຮ່ວມ​ມື ໂດຍ​ສະ­ເພາະ​ການ­ຈັດ­ຕັ້ງ​ຜັນ​ຂະ­ຫຍາຍ​ຜົນ​ຂອງ​ການ​ຢ້ຽມ­ຢາມ​ທາງ​ລັດ​ຖະ​ກິດ​ຢູ່ ສປປ ລາວ ຂອງ​ທ່ານ ສີ ຈິ້ນ​ຜິງ ໃນ​ຕົ້ນ​ເດືອນ​ພະ­ຈິກ 2017 ທີ່​ຜ່ານ​ມາ​ນັ້ນ ເຊິ່ງ​ໄດ້​ກາຍ­ເປັນ​ເຫດ­ການ​ທີ່​ສຳ­ຄັນ ຍິ່ງ​ຕໍ່​ການ​ເສີມ​ຂະ­ຫຍາຍ​ສາຍ​ພົວ­ພັນ​ຮ່ວມ​ມື​ຮອບ­ດ້ານ​ໝັ້ນ­ຄົງ ແລະ ຍາວ​ນານ ລະ­ຫວ່າງ​ສອງ​ປະ­ເທດ ຕາມ​ທິດ 4 ດີ ແລະ ການ​ເປັນ​ຄູ່​ຮ່ວມ​ຊາ­ຕາ­ກຳ​ສັງ­ຄົມ​ນິ­ຍົມ​ຂອງ​ສອງ​ພັກ ສອງ​ລັດ ກໍ່​ຄື​ປະ­ຊາ­ຊົນ​ສອງ​ຊາດ ລາວ-ຈີນ.

    ພ້ອມ​ດຽວ​ກັນ​ນີ້ ສປປ ລາວ ກໍ່​ໄດ້​ແຈ້ງ​ຄວາມ​ຄືບ​ໜ້າ​ໃນ​ການ​ປະ­ຕິ­ບັດ​ບັນ­ດາ​ໂຄງ­ການ​ຊ່ວຍ­ເຫຼືອ​ຕ່າງໆ​ຂອງ​ລັດ­ຖະ­ບານ ສປ ຈີນ ຢູ່ ສປປ ລາວ ເຊິ່ງ​ເຫັນ​ວ່າ​ມີ​ຄວາມ​ຄືບ​ໜ້າ​ດີ ເປັນ­ຕົ້ນ​ແມ່ນ​ໂຄງ­ການ​ກໍ່­ສ້າງ​ເສັ້ນ­ທາງ​ລົດ­ໄຟ​ຄວາມ​ໄວ​ສູງ ລາວ-ຈີນ ທີ່​ດຳ­ເນີນ​ການ​ກໍ່­ສ້າງ​ມາ​ໄດ້​ກວ່າ 41% ໂຄງ­ການ​ກໍ່­ສ້າງ​ໂຮງ­ຮຽນ​ເຕັກ­ນິກ​ທາງ​ລົດ­ໄຟ ເພື່ອ​ສະ­ໜອງ​ບຸ​ຄະ­ລາ​ກອນ​ຮັບ​ໃຊ້​ທາງ​ລົດ­ໄຟ​ຢູ່ ສປປ ລາວ ໂຄງ­ການ​ກໍ່­ສ້າງ​ໂຮງ­ໝໍ​ມະ­ໂຫ­ສົດ​ຫຼັງ​ໃໝ່ ແລະ ໂຄງ­ການ​ອື່ນໆ ນອກ​ນັ້ນ ສອງ​ຝ່າຍ​ຍັງ​ໄດ້​ເປັນ​ເອ­ກະ​ພາບ​ກັນ​ກຳ­ນົດ​ເອົາ​ປີ 2019 ເປັນ​ປີ​ທ່ອງ​ທ່ຽວ ລາວ-ຈີນ.

    ສປປ ລາວ ຢືນ­ຢັນ​ສືບ­ຕໍ່​ສະ­ແດງ​ການ​ສະ­ໜັບ­ສະ­ໜູນ​ຂໍ້​ລິ​ເລີ່ມ “ໜຶ່ງ​ແລວ ໜຶ່ງ​ເສັ້ນ­ທາງ” ຂອງ ສປ ຈີນ ເຊິ່ງ​ມີ​ນະ­ໂຍ­ບາຍ​ເສີມ​ຂະ­ຫຍາຍ ແລະ ຮັດ​ແໜ້ນ​ການ​ເຊື່ອມ​ຈອດ​ໃນ​ພາກ​ພື້ນ​ກໍ່​ຄື​ສາ­ກົນ ສອງ​ຝ່າຍ​ຕົກ­ລົງ​ສືບ­ຕໍ່​ເອົາ­ໃຈ­ໃສ່​ປະ­ສານ​ສົມ­ທົບ​ກັນ​ໃຫ້​ລະ­ອຽດ​ເລິກ­ເຊິ່ງ ແລະ ທັນ​ການ​ຂຶ້ນ​ກວ່າ​ເກົ່າ ເພື່ອ​ຮັບ­ປະ­ກັນ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ຮ່ວມ​ມື​ກໍ່­ສ້າງ​ເສັ້ນ­ທາງ​ລົດ­ໄຟ ລາວ-ຈີນ ໃຫ້​ສຳ­ເລັດ​ຕາມ​ຄາດ­ໝາຍ​ທີ່​ວາງ​ໄວ້ ສືບ­ຕໍ່​ຮ່ວມ​ມື​ຢ່າງ​ແໜ້ນ​ແຟ້ນ​ໃນ​ການ​ເປັນ​ປະ­ທານ​ຮ່ວມ​ຂອງ ສປປ ລາວ ແລະ ສປ ຈີນ ໃນ​ຂອບ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ​ໃຫ້​ໄດ້​ຮັບ​ຜົນ​ດີ ຊຶ່ງ ສປປ ລາວ ຈະ​ໄດ້​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ລະ­ດັບ​ລັດ­ຖະ­ມົນ­ຕີ​ໃນ​ເດືອນ​ທັນ­ວາ 2018 ທີ່​ນະ­ຄອນ­ຫຼວງ​ພະ​ບາງ.

    ໃນ​ໂອ­ກາດ​ນີ້ ຝ່າຍ​ລາວ​ກໍ່​ໄດ້​ຂໍ​ສະ­ເໜີ​ໃຫ້ ສປ ຈີນ ສືບ­ຕໍ່​ຊຸກ­ຍູ້​ນັກ​ລົງ­ທຶນ​ຈີນ​ໄປ​ລົງ­ທຶນ​ຢູ່ ສປປ ລາວ ໃຫ້​ຫຼາຍ​ຂຶ້ນ ໂດຍ​ສະ­ເພາະ​ໃນ​ຂະ­ແໜງ​ຕ່າງໆ​ໃຫ້​ຂະ­ແໜງ­ການ​ທີ່​ທັງ​ສອງ​ຝ່າຍ​ມີ​ທ່າ­ແຮງ ເປັນ­ຕົ້ນ ກໍ່­ສ້າງ​ພື້ນ­ຖານ​ໂຄງ​ລ່າງ ຄົມ­ມະ­ນາ­ຄົມ​ຂົນ­ສົ່ງ ພະ­ລັງ­ງານ ການ­ທ່ອງ­ທ່ຽວ ອຸດ­ສາ­ຫະ­ກຳ​ປຸງ​ແຕ່ງ ກະ­ສິ­ກຳ​ສະ­ອາດ ແລະ ອື່ນໆ.

    ນອກ​ນັ້ນ ທ່ານ​ນາ­ຍົກ­ລັດ­ຖະ­ມົນ­ຕີ ແລະ ຄະ­ນະ ກໍ່​ໄດ້​ໄປ​ຢ້ຽມ­ຢາມ​ຫົວ­ໜ່ວຍ​ການ​ຜະ­ລິດ​ເສດ­ຖະ­ກິດ​ສຳ­ຄັນ​ຂອງ​ນະ­ຄອນ​ຊຽງ​ໄຮ້ ແລະ ໄດ້​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ນັກ​ລົງ­ທຶນ​ຈາກ ສປ ຈີນ ທີ່​ໄປ​ລົງ­ທຶນ​ຢູ່ ສປປ ລາວ ຈຳ­ນວນ​ໜຶ່ງ.

ຂ່າວທີ່ກ່ຽວຂ້ອງ