ຟື້ນຟູຊີວິດການເປັນຢູ່ ຜູ້ໄດ້ຮັບຜົນກະທົບຈາກໂຄງການໄຟຟ້າຫົງສາ-ເຂື່ອນໄຟຟ້ານ້ຳຂອງ

205 07 ພ.ຈ. 2018 ຂ່າວໜ້າ​ໜຶ່ງ

    ກົມ​ທຸ­ລະ​ກິດ​ພະ­ລັງ­ງານ ກະ­ຊວງ​ພະ­ລັງ­ງານ ແລະ ບໍ່​ແຮ່ ໃນ​ນາມ​ກອງ​ເລ­ຂາ​ຄະ­ນະ​ກຳ­ມະ­ການ​ຊີ້​ນຳ​ຮ່ວມ ບັນ­ດາ​ໂຄງ­ການ​ເຂື່ອນ​ໄຟ­ຟ້າ ຈັດ​ກອງ​ປະ­ຊຸມ​ຄະ­ນະ​ກຳ­ມະ­ການ​ຊີ້​ນຳ​ຮ່ວມ​ຂອງ​ໂຄງ­ການ​ໄຟ­ຟ້າ​ພະ­ລັງ​ຄວາມ​ຮ້ອນ​ຫົງ​ສາ ແລະ ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ​ໄຊ​ຍະ​ບູ​ລີ ຈັດ​ຂຶ້ນ​ໃນ​ອາ­ທິດ​ຜ່ານ​ມາ ຢູ່​ໂຮງ­ແຮມ​ຄຣາວ​ພລາ​ຊາ ໂດຍ​ເປັນ​ປະ­ທານ​ຂອງ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ປະ­ທານ​ຄະ­ນະ​ກຳ­ມະ­ການ​ຊີ້​ນຳ​ຮ່ວມ​ໂຄງ­ການ​ໄຟ­ຟ້າ ມີ​ຄະ­ນະ​ກຳ­ມະ­ການ​ຮ່ວມ​ຂອງ​ໂຄງ­ການ ພ້ອມ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຈຸດ­ປະ­ສົງ​ຂອງ​ກອງ​ປະ­ຊຸມ​ດັ່ງ­ກ່າວ ເພື່ອ​ຮັບ​ຟັງ​ການ​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ ໂຄງ­ການ​ໄຟ­ຟ້າ​ພະ­ລັງ​ຄວາມ​ຮ້ອນ​ຫົງ​ສາ ແລະ ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ​ໄຊ​ຍະ​ບູ​ລີ ໂດຍ​ສະ­ເພາະ​ຂໍ້​ສະ­ດວກ ຂໍ້​ຫຍຸ້ງ­ຍາກ ແລະ ບັນ­ຫາ​ສຳ­ຄັນ​ອື່ນໆ​ປິ່ນ​ອ້ອມ ລວມ​ທັງ​ບັນ­ຫາ​ສະ­ເພາະ​ໜ້າ ແລະ ຍາວ​ນານ ພ້ອມ​ທັງ​ປຶກ­ສາ​ຫາ­ລື​ໃຫ້​ທິດ​ທາງ​ໃນ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ໃນ­ຕໍ່­ໜ້າ.

    ໂຄງ­ການ​ໄຟ­ຟ້າ​ພະ­ລັງ​ຄວາມ​ຮ້ອນ​ຫົງ​ສາ ເລີ່ມ​ກໍ່­ສ້າງ​ປີ 2010 ສຳ­ເລັດ​ປີ 2015 ແລະ ໄດ້​ເປີດ​ການ​ຜະ­ລິດ​ໄຟ­ຟ້າ​ຈັກ​ໜ່ວຍ​ທີ 1 ວັນ​ທີ 3 ມິ­ຖຸ­ນາ ໜ່ວຍ​ທີ 2 ວັນ​ທີ 3 ພະ­ຈິກ ໜ່ວຍ​ທີ 3 ວັນ​ທີ 3 ມີ­ນາ 2015 ສ່ວນ​ວຽກ​ງານ​ການ​ຍົກ­ຍ້າຍ​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ​ຈາກ​ການ​ກໍ່­ສ້າງ​ໂຄງ­ການ ແມ່ນ​ສຳ­ເລັດ 100% ໃນ​ນີ້​ມີ 452 ຄອບ­ຄົວ 452 ຫຼັງ­ຄາ​ເຮືອນ ປັດ­ຈຸ­ບັນ ກຳ­ລັງ​ສຸມ​ໃສ່​ການ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ໂດຍ​ຄາດ​ວ່າ​ຈະ​ບັນ­ລຸ​ພັນ­ທະ​ຕາມ​ສັນ­ຍາ​ສຳ​ປະ­ທານ​ໃນ​ປີ 2022.

    ສຳ­ລັບ​ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ​ໄຊ​ຍະ​ບູ​ລີ ເລີ່ມ​ກໍ່­ສ້າງ​ວັນ​ທີ 15 ຕຸ­ລາ 2012 ຕາມ​ແຜນ​ແມ່ນ​ຈະ​ສຳ­ເລັດ​ໃນ 8 ປີ ຄາດ​ວ່າ​ຈະ​ສາ­ມາດ​ເປີດ​ຂາຍ​ໄຟ­ຟ້າ​ຢ່າງ​ເປັນ​ທາງ​ການ​ໃນ​ປີ 2019 ມາ​ຮອດ​ເດືອນ​ກັນ­ຍາ 2018 ໂຄງ­ການ​ດັ່ງ­ກ່າວ​ກໍ່­ສ້າງ​ຄືບ​ໜ້າ 96,36% ໂຄງ­ການ​ນີ້​ມີ​ປະ­ຊາ­ຊົນ​ໄດ້​ຮັບ​ຜົນ​ກະ­ທົບ 15 ບ້ານ ຕ້ອງ​ໄດ້​ຍົກ­ຍ້າຍ​ໄປ​ບ້ານ​ຈັດ​ສັນ 7 ບ້ານ 663 ຄອບ­ຄົວ ສ່ວນ 8 ບ້ານ ແມ່ນ​ຫຍັບ​ຂຶ້ນ​ຢູ່​ບ່ອນ​ສູງ​ກວ່າ​ຈາກ​ບ້ານ​ເກົ່າ ໃນ​ນີ້ ໄດ້​ສຳ­ເລັດ​ການ​ຍົກ­ຍ້າຍ​ໃນ​ເດືອນ​ກຸມ­ພາ 2017 ປັດ­ຈຸ­ບັນ​ກຳ­ລັງ​ສຸມ​ໃສ່​ການ​ຟື້ນ​ຟູ​ຊີ­ວິດ​ການ​ເປັນ​ຢູ່​ແຕ່​ລະ​ໄລ­ຍະ​ຕາມ​ແຜນ.

ຂ່າວທີ່ກ່ຽວຂ້ອງ