ເປີດນຳໃຊ້ສູນເຝິກອົບຮົມເຕັກນິກກະສິກຳ ແລະ ພັດທະນາຊົນນະບົດ ລາວ-ເກົາຫຼີ

213 07 ພ.ຈ. 2018 ຂ່າວໜ້າ​ໜຶ່ງ
ເປີດນຳໃຊ້ສູນເຝິກອົບຮົມເຕັກນິກກະສິກຳ ແລະ ພັດທະນາຊົນນະບົດ ລາວ-ເກົາຫຼີ

    ພິ­ທີ​ເປີດ​ນຳ​ໃຊ້​ສູນ​ເຝິກ­ອົບ­ຮົມ​ເຕັກ­ນິກ​ກະ­ສິ­ກຳ ແລະ ພັດ­ທະ­ນາ​ຊົນ­ນະ­ບົດ ລາວ-ເກົາ­ຫຼີ ຈັດ​ຂຶ້ນ​ວັນ​ທີ 6 ພະ­ຈິກ 2018 ທີ່​ບ້ານ​ດອນ​ຕິ້ວ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ບຸນ​ທອງ ຈິດ​ມະ­ນີ ຮອງ​ນາ­ຍົກ­ລັດ­ຖະ­ມົນ­ຕີ ທ່ານ Shin Sung Soon ເອກ​ອັກ​ຄະ​ລັດ​ຖະ​ທູດ ສ ເກົາ­ຫຼີ ປະ­ຈຳ ສປປ ລາວ ທ່ານ ໂອ ຊັງ ຊູ ປະ­ທານ​ອົງ­ການ​ກອຍ​ກາ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກ່າວ​ວ່າ: ສູນ​ເຝິກ­ອົບ­ຮົມ​ເຕັກ­ນິກ​ກະ­ສິ­ກຳ ແລະ ພັດ­ທະ­ນາ​ຊົນ­ນະ­ບົດ ລາວ-ເກົາ­ຫຼີ ເປັນ​ການ​ຊ່ວຍ­ເຫຼືອ​ຂອງ​ລັດ­ຖະ­ບານ ແລະ ປະ­ຊາ­ຊົນ ສ ເກົາ­ຫຼີ ໂດຍ​ສະ­ເພາະ​ດ້ານ​ທຶນ­ຮອນ ແລະ ວິ­ຊາ​ການ​ໃຫ້​ໂຄງ­ການ​ພັດ­ທະ­ນາ​ຊົນ­ນະ­ບົດ​ແບບ​ມີ​ສ່ວນ​ຮ່ວມ ຕາມ​ຫຼັກ​ແຊ​ມວນ​ອຸນ​ດົງ ແລະ ທິດ​ນຳ 3 ສ້າງ ໃນ​ນີ້​ມີ​ການ​ກໍ່­ສ້າງ​ສູນ​ເຝິກ­ອົບ­ຮົມ​ເຕັກ­ນິກ​ກະ­ສິ­ກຳ ແລະ ພັດ­ທະ­ນາ​ຊົນນະ​ບົດ ລາວ-ເກົາ­ຫຼີ ເປັນ​ສູນ​ໃຫ້​ບໍ­ລິ­ການ​ເຝິກ­ອົບ­ຮົມ ດ້ວຍ​ຮູບ​ແບບ​ຄົບ​ຊຸດ​ແຫ່ງ​ໜຶ່ງ​ໃນ​ລາວ ສູນ​ດັ່ງ­ກ່າວ ຈະ​ຮັບ​ໃຊ້​ວຽກ​ງານ​ກໍ່­ສ້າງ​ຂີດ​ຄວາມ​ສາ­ມາດ​ໃຫ້​ບຸ​ຄະ­ລາ​ກອນ​ພາກ​ລັດ ເອ­ກະ​ຊົນ ແລະ ຜູ້­ນຳ​ຊຸມ​ຊົນ ປະ­ກອບ­ສ່ວນ​ໃນ​ການ​ພັດ­ທະ­ນາ​ຊົນ­ນະ­ບົດ​ໃໝ່ ລຶ­ບລ້າງ​ຄວາມ­ທຸກ​ຍາກ ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ບັນ­ດາ­ເຜົ່າ​ໃຫ້​ດີ​ຂຶ້ນ​ເທື່ອ​ລະ​ກ້າວ ນອກ​ນີ້​ຍັງ​ເປັນ​ບ່ອນ​ເຝິກ­ອົບ­ຮົມ​ຫຼໍ່​ຫຼອມ​ດ້ານ​ຈິດ​ສຳ­ນຶກ​ທີ່​ຖືກ­ຕ້ອງ ແລະ ຖ່າຍ​ທອດ​ຄວາມ​ຮູ້​ດ້ານ​ວິ­ຊາ​ການ​ໃຫ້​ຊາວ­ບ້ານ​ເປົ້າ​ໝາຍ​ຂອງ​ໂຄງ­ການ​ໃນ 2 ແຂວງ (ວຽງ​ຈັນ ແລະ ສະ­ຫວັນ​ນະ​ເຂດ) ເປັນ​ສູນ​ທີ່​ບໍ­ລິ­ການ​ດ້ານ​ການ​ເຝິກ­ອົບ­ຮົມ​ທີ່​ໄດ້​ມາດ­ຕະ­ຖານ​ຄົບ​ຊຸດ ເວົ້າ​ລວມ​ແລ້ວ ສູນ​ແຫ່ງ​ນີ້​ຈະ​ເປັນ​ເຄື່ອງ­ມື​ທີ່​ສຳ­ຄັນ ໃນ​ການ​ຜັນ​ຂະ­ຫຍາຍ​ຍຸດ​ທະ​ສາດ ການ​ພັດ­ທະ­ນາ​ຂະ­ແໜງ​ກະ­ສິ­ກຳ-ປ່າ­ໄມ້ ແລະ ພັດ­ທະ­ນາ​ຊົນ­ນະ­ບົດ ແກ້​ໄຂ​ຄວາມ­ທຸກ​ຍາກ​ໃຫ້​ປາ­ກົດ​ຜົນ​ເປັນ​ຈິງ ປະ­ກອບ­ສ່ວນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຄັ້ງ​ທີ 8 ໂດຍ​ສະ­ເພາະ​ວຽກ​ງານ​ພັດ­ທະ­ນາ​ຊົນ­ນະ­ບົດ ແລະ ລຶ­ບລ້າງ​ຄວາມ­ທຸກ​ຍາກ​ຂອງ​ລັດ­ຖະ­ບານ.

    ທ່ານ ຄຳ​ພັນ ເໝືອນ​ສິດ­ທິ​ດາ ຫົວ­ໜ້າ​ຫ້ອງ­ການ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກ່າວ​ວ່າ: ສູນ​ເຝິກ­ອົບ­ຮົມ​ເຕັກ­ນິກ​ກະ­ສິ­ກຳ ແລະ ພັດ­ທະ­ນາ​ຊົນ­ນະ­ບົດ ລາວ-ເກົາ­ຫຼີ ເປັນ​ສູນ​ຫົວ­ໜ່ວຍ​ຂັ້ນ​ທີ​ສອງ​ທີ່​ຂຶ້ນ​ກັບ​ກະ­ຊວງ​ກະ­ສິ­ກຳ ແລະ ປ່າ­ໄມ້ ມີ​ສາຍ​ວິ­ຊາ​ການ​ຂຶ້ນ​ກັບ​ກົມ​ສົ່ງ­ເສີມ​ເຕັກ­ນິກ ແລະ ປຸງ​ແຕ່ງ​ກະ­ສິ­ກຳ ສູນ​ແຫ່ງ​ນີ້​ສ້າງ­ຕັ້ງ​ປີ 2016 ມູນ​ຄ່າ​ການ​ກໍ່­ສ້າງ 3 ລ້ານ​ກວ່າ​ໂດ​ລາ​ສະ­ຫະ­ລັດ ຫຼື ປະ­ມານ 25 ຕື້​ກີບ​ເປັນ​ຂອງ­ຂວັນ​ຈາກ​ປະ­ທາ­ນາ­ທິ­ບໍ­ດີ ສ ເກົາ­ຫຼີ ມອບ​ໃຫ້​ປະ­ທານ​ປະ­ເທດ ສປປ ລາວ ໃນ​ປີ 2012 ທັງ​ເປັນ​ສັນ­ຍະ­ລັກ​ສາຍ​ພົວ­ພັນ​ຮ່ວມ​ມື​ຂອງ​ລັດ­ຖະ­ບານ​ສອງ​ປະ­ເທດ ທີ່​ມີ​ຈຸດ­ປະ­ສົງ​ເພື່ອ​ພັດ­ທະ­ນາ​ບຸ​ຄະ­ລາ​ກອນ​ໃຫ້​ຂະ­ແໜງ​ກະ­ສິ­ກຳ-ປ່າ­ໄມ້ ແລະ ພັດ­ທະ­ນາ​ຊົນ­ນະ­ບົດ ການ​ນຳ​ຂັ້ນ​ບ້ານ ແລະ ຊາວ​ກະ­ສິ­ກອນ​ລາວ ຜູ້​ປະ­ກອບ​ການ​ກະ­ສິ­ກຳ​ທົ່ວ​ປະ­ເທດ ໃນ​ຮູບ​ແບບ​ການ​ພັດ­ທະ­ນາ​ຊົນ­ນະ­ບົດ​ແບບ​ປະ­ສົມ​ປະ­ສານ ແລະ ມີ​ສ່ວນ​ຮ່ວມ​ຂອງ​ປະ­ຊາ­ຊົນ ຕາມ​ຫຼັກ​ແຊ​ມວນ​ອຸນ​ດົງ ແລະ ຕາມ​ນະ­ໂຍ­ບາຍ 3 ສ້າງ ເປັນ​ສູນ​ທີ່​ໄດ້​ຮັບ​ການ​ພັດ­ທະ­ນາ​ດ້ານ​ພື້ນ­ຖານ​ໂຄງ​ລ່າງ​ເຊັ່ນ: ອາ­ຄານ ຫໍ​ພັກ​ສຳ​ມະ​ນາ​ກອນ ຫ້ອງ​ອາ­ຫານ ຫ້ອງ​ສະ­ໝຸດ ສວນ​ສາ­ທິດ​ການ​ຮຽນ​ຮູ້​ວິ­ຊາ​ການ​ການ​ປູກ​ຫຍ້າ​ລ້ຽງ­ສັດ ປູດ​ພືດ-ຜັກ​ໃນ​ເຮືອນ​ຮົ່ມ ແລະ ຈຸດ​ປະ­ສານ​ງານ​ດ້ານ​ການ​ຖ່າຍ​ທອດ​ເຕັກ­ນິກ​ກະ­ສິ­ກຳ ການ​ພັດ­ທະ­ນາ​ຊົນ­ນະ­ບົດ​ຂອງ​ກະ­ຊວງ​ກະ­ສິ­ກຳ ແລະ ປ່າ­ໄມ້.

ຂ່າວທີ່ກ່ຽວຂ້ອງ