ງານວາງສະແດງສິນຄ້ານຳເຂົ້າສາກົນຈີນ ຄັ້ງທີ I ຍຸກສະໄໝໃໝ່ ຊົມໃຊ້ອະນາຄົດຮ່ວມກັນ

254 07 ພ.ຈ. 2018 ຂ່າວໜ້າ​ໜຶ່ງ
ງານວາງສະແດງສິນຄ້ານຳເຂົ້າສາກົນຈີນ ຄັ້ງທີ I ຍຸກສະໄໝໃໝ່ ຊົມໃຊ້ອະນາຄົດຮ່ວມກັນ

    ວັນ​ທີ 5 ພະ­ຈິກ 2018 ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ໄດ້​ນຳ­ພາ​ຄະ­ນະ​ຜູ້​ແທນ​ຂັ້ນ​ສູງ ແຫ່ງ ສປປ ລາວ ເຂົ້າ​ຮ່ວມ​ພິ­ທີ​ເປີດ​ງານ​ວາງ­ສະ­ແດງ​ສິນ­ຄ້າ​ນຳ​ເຂົ້າ​ສາ­ກົນ​ຈີນ ຄັ້ງ​ທີ 1 (China International Import - Expo) ທີ່​ນະ­ຄອນ​ຊຽງ​ໄຮ້ ສປ ຈີນ ພາຍ​ໃຕ້​ການ​ເປັນ​ປະ­ທານ​ຂອງ​ທ່ານ ສີ ຈີ້ນ​ຜີງ ປະ­ທານ​ປະ­ເທດ ແຫ່ງ ສປ ຈີນ ຮ່ວມ​ກັບ 12 ປະ­ເທດ​ທີ່​ຖືກ​ເຊີນ​ມາ​ຮ່ວມ​ງານ​ດັ່ງ­ກ່າວ ໃນ​ຖາ­ນະ​ປະ­ເທດ​ປະ­ທານ​ຮ່ວມ​ເຂົ້າ​ຮ່ວມ​ງານ​ວາງ­ສະ­ແດງ​ຄັ້ງ​ນີ້ ມີ​ຄະ­ນະ​ຜູ້​ແທນ​ທາງ​ພາກ​ລັດ ແລະ ເອ­ກະ​ຊົນ​ເຂົ້າ​ຮ່ວມ​ຈາກ 130 ກວ່າ​ປະ­ເທດ ໃນ​ນີ້​ມີ​ລະ­ດັບ​ປະ­ມຸກ​ລັດ ແລະ ລັດ­ຖະ­ບານ 18 ປະ­ເທດ ລວມ​ທັງ ສປປ ລາວ.

    ງານ​ວາງ­ສະ­ແດງ​ສິນ­ຄ້າ​ນຳ​ເຂົ້າ​ສາ­ກົນ​ຈີນ​ຄັ້ງ​ນີ້ ໄດ້​ຈັດ​ຂຶ້ນ​ເປັນ​ຄັ້ງ​ທຳ​ອິດ​ພາຍ​ໃຕ້​ຫົວ­ຂໍ້ ຍຸກ​ສະ­ໄໝ​ໃໝ່ ຊົມ­ໃຊ້​ອະ­ນາ­ຄົດ​ຮ່ວມ​ກັນ ໂດຍ​ມີ​ຈຸດ­ປະ­ສົງ ແລະ ເປົ້າ​ໝາຍ​ສຳ­ຄັນ​ແມ່ນ​ເປັນ​ກາ­ນວາງ­ສະ­ແດງ​ສິນ­ຄ້າ​ລະ­ດັບ​ສາ­ກົນ ຈາກ​ບັນ­ດາ​ປະ­ເທດ​ທີ່​ເປັນ​ຄູ່​ຄ້າ​ກັບ ສປ ຈີນ ໂດຍ​ສະ­ເພາະ​ປະ­ເທດ​ກຳ­ລັງ​ພັດ­ທະ­ນາ ຊຶ່ງ​ສະ­ແດງ​ໃຫ້​ເຫັນ​ເຖິງ​ຄວາມ​ຕັ້ງ­ໃຈ​ຂອງ ສປ ຈີນ ໃນ​ການ​ສືບ­ຕໍ່​ເປີດ​ປະ­ຕູ​ສູ່​ໂລກ​ພາຍ​ນອກ ທັງ​ເປັນ​ການ​ເອື້ອ​ອຳ­ນວຍ​ໂອ­ກາດ​ອັນ​ດີ​ໃຫ້​ຫຼາຍ​ປະ­ເທດ​ຈາກ​ທົ່ວ​ມຸມ​ໂລກ​ໃນ​ພາກ​ພື້ນ ແລະ ຂົງ­ເຂດ ໄດ້​ມາ​ເຜີຍ­ແຜ່​ໂຄ­ສະ­ນາ​ສິນ­ຄ້າ ພົບ​ປະ​ແລກ­ປ່ຽນ​ຮ່ວມ​ມື​ດ້ານ​ການ​ຄ້າ ແລະ ການ​ລົງ­ທຶນ ແນ­ໃສ່​ຮັກ­ສາ​ລະ­ບຽບ​ການ​ຄ້າ​ສາ­ກົນ ໃນ​ການ​ເປີດ​ກວ້າງ​ການ​ຮ່ວມ​ມື ແລະ ເຊື່ອມ​ໂຍງ​ເສດ­ຖະ­ກິດ​ຂອງ​ຕົນ​ກັບ​ສາ­ກົນ ແລະ ສົ່ງ­ເສີມ​ກົນ​ໄກ​ການ​ຄ້າ​ຫຼາຍ​ຝ່າຍ ເພື່ອ​ແນ­ໃສ່​ສ້າງ​ເສດ­ຖະ­ກິດ​ໂລກ​ໃຫ້​ສືບ­ຕໍ່​ພັດ­ທະ­ນາ​ໄປ​ຕາມ​ທິດ​ທາງ​ທີ່​ເປີດ​ກວ້າງ ແລະ ຕ່າງ​ຝ່າຍ​ຕ່າງ​ມີ​ຜົນ​ປະ­ໂຫຍດ​ຫຼາຍ​ຂຶ້ນ​ກວ່າ​ເກົ່າ ນອກ­ຈາກ​ງານ​ວາງ­ສະ­ແດງ​ສິນ­ຄ້າ​ນີ້​ແລ້ວ ຍັງ​ມີ​ກອງ​ປະ­ຊຸມ​ສຳ​ມະ​ນາ​ໃນ​ຫົວ­ຂໍ້​ຍ່ອຍ​ປີ່ນ​ອ້ອມ ຊຶ່ງ​ເປັນ​ກອງ​ປະ­ຊຸມ​ປຶກ­ສາ​ຫາ­ລື ແລະ ແລກ­ປ່ຽນ​ນະ­ໂຍ­ບາຍ​ດ້ານ​ການ​ຄ້າ-ການ​ລົງ­ທຶນ​ຂອງ​ບັນ­ດາ​ປະ­ເທດ​ທີ່​ມາ​ຮ່ວມ​ງານ ໂດຍ​ແບ່ງ​ອອກ​ເປັນ 3 ກອງ​ປະ­ຊຸມ​ຄື: 1. ກອງ​ປະ­ຊຸມ​ກ່ຽວ​ກັບ​ການ​ຄ້າ ແລະ ການ​ເປີດ​ປະ­ຕູ (Trade and Opening); 2. ກອງ​ປະ­ຊຸມ​ກ່ຽວ​ກັບ​ການ​ຄ້າ ແລະ ນະ​ວັດ­ຕະ​ກຳ​ໃໝ່ (Trade and Innovation); 3. ກອງ​ປະ­ຊຸມ​ກ່ຽວ​ກັບ​ການ​ຄ້າ ແລະ ການ​ລົງ­ທຶນ (Trade and Investment).

    ໃນ​ໂອ­ກາດ​ການ​ເປີດ​ງານ​ວາງ­ສະ­ແດງ​ສິນ­ຄ້າ​ສາ­ກົນ​ຈີນ​ໃນ​ຄັ້ງ​ທຳ​ອິດ​ນີ້ ສປປ ລາວ ກໍ່​ໄດ້​ສ້າງ​ຫ້ອງ​ວາງ­ສະ­ແດງ​ແຫ່ງ​ຊາດ National Pavilion ທີ່​ມີ​ລັກ­ສະ­ນະ​ຂອງ​ລາວ ໂດຍ​ເອົາ​ຮູບ​ແບບ​ຂອງ​ວັດ​ຊຽງ​ທອງ​ທີ່​ເປັນ​ວັດ​ຄູ່​ບ້ານ​ຄູ່​ເມືອງ​ຂອງ​ນະ­ຄອນ­ຫຼວງ​ພະ​ບາງ ແລະ ເປັນ​ທີ່​ຮູ້­ຈັກ​ກັນ​ດີ​ໃນ​ຖາ­ນະ​ເປັນ​ເມືອງ​ມໍ­ລະ­ດົກ​ໂລກ ທີ່​ຕິດ​ພັນ​ກັບ​ແຫຼ່ງ​ທ່ອງ​ທ່ຽວ​ອັນ​ດັບ​ຕົ້ນ​ຂອງ​ສາ­ກົນ ໃນ​ຫ້ອງ​ວາງ­ສະ­ແດງ​ນີ້ ໄດ້​ມີ​ກາ­ນວາງ­ສະ­ແດງ​ເຜີຍ​ແຜ​ຂໍ້​ມູນ​ຂ່າວ­ສານ​ກ່ຽວ​ກັບ​ນະ­ໂຍ­ບາຍ​ສົ່ງ­ເສີມ​ການ​ຄ້າ ແລະ ການ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ ນອກ­ຈາກ​ນັ້ນ ກະ­ຊວງ​ກ່ຽວ­ຂ້ອງ​ຍັງ​ໄດ້​ລະ­ດົມ​ຫົວ­ໜ່ວຍ​ທຸ­ລະ​ກິດ​ລະ­ດັບ​ແນວ​ໜ້າ​ຂອງ​ປະ­ເທດ 10 ບໍ­ລິ­ສັດ​ເຂົ້າ​ຮ່ວມ​ວາງ­ສະ­ແດງ​ສິນ­ຄ້າ​ຂອງ​ຕົນ ຊຶ່ງ​ສິນ­ຄ້າ​ທີ່​ບັນ­ດາ​ບໍ­ລິ­ສັດ​ດັ່ງ­ກ່າວ ໄດ້​ນຳ​ມາ​ວາງ­ສະ­ແດງ​ລ້ວນ​ແຕ່​ເປັນ​ສິນ­ຄ້າ​ທີ່​ມີ​ຄຸ­ນະ­ພາບ ແລະ ໄດ້​ມາດ­ຕະ­ຖານ​ສາ­ກົນ ເປັນ­ຕົ້ນ​ແມ່ນ ເຄື່ອງ​ດື່ມ ເຄື່ອງ​ຫັດ­ຖະ­ກຳ ຜະ­ລິດ​ຕະ​ພັນ​ກະ­ສິ­ກຳ​ປຸງ​ແຕ່ງ ກະ­ສິ­ກຳ​ສະ­ອາດ ແລະ ອື່ນໆ.

ຂ່າວທີ່ກ່ຽວຂ້ອງ