ເບີ່ງບ້ານເຂົາເອົາບົດຮຽນ 08/11/2018

105 08 ພ.ຈ. 2018 ຫົວຂໍ້ຂ່າວອື່ນໆ

    ມື້­ນີ້​ມີ​ຂ່າວ​ເລື່ອງ​ກັນ​ຈັດ​ສັນ​ທີ່​ດິນ​ຢູ່​ອາ​ຟຣິກ​ກາ​ໃຕ້ ທີ່​ມີ​ສຽງ​ຄັດ­ຄ້ານ​ຢ່າງ​ຮຸນ​ແຮງ ແລະ ເລື່ອງ ສປ ຈີນ ສ້າງ­ຕັ້ງ​ກົນ​ໄກ​ເພື່ອ​ຂະ­ຫຍາຍ​ການ​ຄຸ້ມ​ຄອງ​ການ​ຄ້າ​ກັບ​ຕ່າງ­ປະ­ເທດ.

    ທີ່ ອາ​ຟຣິກ​ກາ​ໃຕ້: ມີ​ຂ່າວ​ໃຫຍ່​ໄຟ​ແຮງ​ກວ່າ​ກັບ​ແຜນ​ຈັດ​ສັນ​ທີ່​ດິນ​ຄືນ­ໃໝ່ ໃນ​ອາ​ຟຣິກ​ກາ​ໃຕ້ ເພາະ­ວ່າ​ໃນ​ປັດ­ຈຸ­ບັນ ພົນ­ລະ­ເມືອງ​ຜິວ​ຂາວ​ຂອງ​ປະ­ເທດ​ນີ້​ທີ່​ສືບ​ເຊື້ອ​ມາ​ຈາກ ນັກ​ລ່າ​ອະ​ນາ​ນິ­ຄົມ​ຈາກ​ເອີ​ຣົບ​ນັ້ນ ເປັນ​ເຈົ້າ​ຂອງ​ທີ່​ດິນ ກະ­ສິ­ກຳ-ລ້ຽງ­ສັດ ຈຳ­ນວນ 72% ຂອງ​ເນື້ອ­ທີ່​ດິນ​ທັງ​ໝົດ ທັງໆ​ທີ່​ກຸ່ມ​ຄົນ​ຜິວ​ຂາວ​ນີ້ ກວມ​ເອົາ​ພຽງ 8% ຂອງ​ພົນ­ລະ­ເມືອງ ຂອງ​ປະ­ເທດ ສ່ວນ​ຄົນ​ຜິວ​ດຳ​ທີ່​ເປັນ​ຊົນ­ເຜົ່າ​ພື້ນ­ຖານ​ແທ້ໆ​ນັ້ນ​ເປັນ​ເຈົ້າ​ຂອງ​ທີ່​ດິນ­ພຽງ 28% ດັ່ງ­ນັ້ນ ທ່ານ ຣາ​ມາ​ໂຟ​ຊາ ທີ່​ຫາ­ກໍ່​ຖືກ​ເລືອກ​ເປັນ​ປະ­ທາ­ນາ­ທິ­ບໍ­ດີ ຫວ່າງ​ບໍ່​ດົນ​ມາ​ນີ້ ຈຶ່ງ​ໄດ້​ກຳ­ນົດ​ແຜນ​ຈັດ​ສັນ​ທີ່​ດິນ​ຄືນ­ໃໝ່ ໂດຍ​ຈະ​ແບ່ງ​ເອົາ​ຈາກ​ພູດ​ດິນ​ຂອງ​ຄົນ​ຜິວ​ຂາວ ແບບ​ບໍ່​ມີ​ການ​ຊົດ​ເຊີຍ​ຄືນ ເພື່ອ​ປະ­ຕິ­ບັດ​ຕາມ​ແຜນ­ການ​ດັ່ງ­ກ່າວ ທ່ານ​ປະ­ທາ­ນາ­ທິ­ບໍ­ດີ ໄດ້​ຮຽກ­ຮ້ອງ​ໃຫ້​ມີ​ການ​ດັດ­ແກ້​ລັດ​ຖະ​ທຳ​ມະ­ນູນ​ກ່ອນ ນະ­ໂຍ­ບາຍ​ຈັດ​ສັນ​ທີ່​ດິນ​ຄືນ­ໃໝ່​ນີ້ ໄດ້​ຮັບ​ສຽງ​ຄັດ­ຄ້ານ​ຢ່າງ​ຮຸນ​ແຮງ​ຈາກ​ບັນ­ດາ​ເຈົ້າ​ຂອງ​ເນື້ອ­ທີ່​ດິນ ທີ່​ເປັນ​ພົນ­ລະ­ເມືອງ​ຜິວ​ຂາວ ນອກ​ນັ້ນ ກໍ່​ຍັງ​ມີ​ອະ­ດີດ​ປະ­ທາ­ນາ­ທິ­ບໍ­ດີ ສອງ​ທ່ານ ຄື: ທ່ານ ທາ​ໂບ​ມະ​ເບ​ກີ ແລະ ທ່ານ ຈາ​ຄອບ​ຊູ​ມາ ກໍ່​ໄດ້​ອອກ​ມາ​ປະ­ນາມ​ແຜນ­ການ​ດັ່ງ­ກ່າວ​ວ່າ ມີ​ລັກ­ສະ­ນະ​ຈຳ­ແນກ ໂດຍ​ອ້າງ​ວ່າ ພັກ​ສະ­ພາ​ແຫ່ງ​ຊາດ ອາ​ຟຣິກ​ກາ (ANC) ທີ່​ນຳ­ພາ​ຕໍ່​ການ​ຕໍ່­ສູ້​ຈົນ​ໄດ້​ຮັບ​ໄຊ­ຊະ­ນະ ເມື່ອ 24 ປີ­ຜ່ານ­ມາ​ນັ້ນ ຢຶດ​ໝັ້ນ​ໃນ​ຫຼັກ​ຄວາມ​ສະ­ເໝີ­ພາບ ແລະ ເສລີ­ພາບ​ຂອງ​ປະ­ຊາ­ຊົນ​ເຜົ່າ​ຕ່າງໆ ບໍ່​ວ່າ​ຈະ​ເປັນ​ຄົນ​ຜິວ​ຂາວ ຫຼື ຜິວ​ດຳ ແລະ ວ່າ​ນະ­ໂຍ­ບາຍ​ຢຶດ​ເອົາ​ດິນ​ຂອງ​ຄົນ​ຜິວ​ຂາວ ໂດຍ​ບໍ່​ມີ​ການ​ຊົດ​ເຊີຍ​ນີ້ ຈະ​ເຮັດ​ໃຫ້​ອຸ­ດົມ​ການ​ຂອງ​ພັກ ANC ເສຍ​ຫາຍ ແລະ ຈະ​ກາຍ­ເປັນ​ພັກ “ຄົນ​ດຳ” ອ້ອຍ­ຕ້ອຍ.

    ທີ່ ສປ ຈີນ: ໃນ​ວັນ​ທີ 26 ເດືອນ​ສິງ­ຫາ​ປີ​ນີ້ ສານ​ປະ­ຊາ­ຊົນ​ສູງ​ສຸດ​ຂອງ​ຈີນ ໄດ້​ສ້າງ­ຕັ້ງ​ຄະ­ນະ​ກຳ­ມະ­ການ​ຊ່ຽວ­ຊານ ການ​ຄ້າ​ສາ­ກົນ (ICEC) ຂຶ້ນ ເປົ້າ​ໝາຍ​ຂອງ​ຄະ­ນະ​ກຳ­ມະ­ການ​ນີ້ ແມ່ນ​ເພື່ອ​ເພີ່ມ​ທະ­ວີ​ການ​ຮ່ວມ​ມື​ສາ­ກົນ​ໃນ​ການ​ແກ້​ໄຂ ບັນ­ຫາ​ຂັດ​ແຍ່ງ​ດ້ານ​ການ​ຄ້າ​ແບບ​ສັນ­ຕິ ຫຼື ຜ່ານ​ຂະ​ບວນ​ການ​ຟ້ອງ​ຮ້ອງ ຄະ­ນະ​ກຳ­ມະ­ການ​ມີ​ສະ­ມາ­ຊິກ 32 ຄົນ ເປັນ​ຄົນ​ຈີນ ແລະ ຄົນ​ຕ່າງ­ປະ­ເທດ ທີ່​ເປັນ​ຊ່ຽວ­ຊານ​ດ້ານ​ກົດ­ໝາຍ ເປັນ​ຜູ້­ນຳ​ອົງ​ການ­ຈັດ­ຕັ້ງ​ສາ­ກົນ​ສະ​ຖາ​ບັນ​ຄົ້ນ­ຄວ້າ ກໍ່​ຄື ຜູ້​ທີ່​ມີ​ຄວາມ​ຮັບ​ຮູ້​ພິ­ເສດ ກ່ຽວ​ກັບ​ການ​ແກ້​ໄຂ​ບັນ­ຫາ​ຂັດ​ແຍ່ງ​ທາງ​ເສດ­ຖະ­ກິດ-ການ​ຄ້າ ຂ່າວ​ໃຫ້​ຮູ້​ຕື່ມ​ວ່າ: ກ່ອນ​ໜ້າ​ນັ້ນ ຄື ໃນ​ວັນ​ທີ 29 ມິ­ຖຸ­ນາ ສານ​ປະ­ຊາ­ຊົນ​ສູງ​ສຸດ​ຈີນ ກໍ່​ໄດ້​ສ້າງ­ຕັ້ງ​ສານ​ການ​ຄ້າ​ສາ­ກົນ​ຂຶ້ນ​ສອງ​ແຫ່ງ​ຢູ່​ນະ­ຄອນ­ຫຼວງ​ເສິນ​ເຈິນ ແລະ ເມືອງ​ສີ​ອານ ຄະ­ນະ​ກຳ­ມະ­ການ​ຊ່ຽວ­ຊານ​ການ​ຄ້າ​ສາ­ກົນ​ນີ້ ເປັນ​ໜ່ວຍ​ງານ​ໜຶ່ງ​ທີ່​ເຄື່ອນ​ໄຫວ ພາຍ​ໃຕ້​ການ​ຊີ້​ນຳ​ຂອງ​ສານ​ປະ­ຊາ­ຊົນ​ສູງ​ສຸດ​ຈີນ.

ຂ່າວທີ່ກ່ຽວຂ້ອງ