ຜູ້ນຳ​ຈາກ​ຫຼາຍ​ປະເທດ​ເຂົ້າ​ຮ່ວມ​ພິທີ​ລະນຶກ​ການ​ສິ້ນ​ສຸດ​ສົງຄາມ​ໂລກ​ຄັ້ງ​ທີ​ໜຶ່ງ ຄົບຮອບ 100 ປີ

300 13 ພ.ຈ. 2018 ຂ່າວຕ່າງປະເທດ
ຜູ້ນຳ​ຈາກ​ຫຼາຍ​ປະເທດ​ເຂົ້າ​ຮ່ວມ​ພິທີ​ລະນຶກ​ການ​ສິ້ນ​ສຸດ​ສົງຄາມ​ໂລກ​ຄັ້ງ​ທີ​ໜຶ່ງ ຄົບຮອບ 100 ປີ

     ຜູ້ນຳ​ປະມານ 70 ທ່ານ ຈາກ​ປະເທດ​ຕ່າງໆ​ໃນ​ໂລກ ໄດ້​ມີໜ້າ​ຢູ່​ໃນ​ເຂດ Arc de Triomphe ຫຼື ອະນຸສາວະລີ​ໄຊຊະນະ​ສະໝໍລະພູມ ໃນ​ນະຄອນຫຼວງ​ປາ​ຣີ (ຝຣັ່ງ) ໃນ​ວັນ​ທີ 11 ພະຈິກ​ນີ້ ເພື່ອ​ເຂົ້າ​ຮ່ວມ​ພິທີ​ລະນຶກ​ການ​ສິ້ນ​ສຸດ ສົງຄາມ​ໂລກ​ຄັ້ງ​ທີ​ໜຶ່ງ ຄົບຮອບ 100 ປີ ໂດຍ​ໄດ້​ມີ​ການ​ລະດົມ​ຕຳຫຼວດ​ປະມານ 10.000 ຄົນ ເຂົ້າ​ຮ່ວມ​ການ​ຮັກສາ​ຄວາມ​ສະຫງົບ ໃຫ້​ແກ່​ເຫດການ​ນີ້

    ເຫດການ​ດັ່ງກ່າວ ເປັນ​ຈຸດ​ສົນໃຈ​ຂອງ​ໂລກ ເພື່ອ​ລ້ຳ​ລຶກ​ເຖິງ​ທະຫານ​ກວ່າ 10 ລ້ານ​ຄົນ ທີ່​ເສຍ​ຊີວິດ ຢູ່​ໃນ​ສົງຄາມ​ໂລກ​ຄັ້ງ​ທີ​ໜຶ່ງ ໃນ​ລະຫວ່າງ​ປີ 1914-1918 ທັງ​ເປັນ​ການ​ລ້ຳ​ລຶກ ເຖິງ​ສັນຍາ​ສະຫງົບ​ເສິກ ທີ່​ໄດ້​ລົງ​ນາມ​ຢູ່​ໃນ​ເຂດ​ທິດຕາເວັນອອກ​ສ່ຽງ​ເໜືອ ຂອງ​ປະເທດ​ຝຣັ່ງ ຊຶ່ງ​ໄດ້​ມີ​ຜົນ​ບັງຄັບ​ໃຊ້ ນັບ​ແຕ່​ເວລາ 11 ໂມງ 00 (ເວລາ​ໃນ​ທ້ອງຖິ່ນ) ຂອງ​ວັນ​ທີ 11 ພະຈິກ ປີ 1918 ເປັນຕົ້ນ​ໄປ.

    ກ່ອນ​ໜ້າ​ນັ້ນ ພິທີ​ລ້ຳ​ລຶກ​ຄົບຮອບ 100 ປີ ແຫ່ງ​ການ​ສິ້ນ​ສຸດ​ສົງຄາມ​ໂລກ​ຄັ້ງ​ທີ​ໜຶ່ງ ກໍ​ໄດ້​ຈັດ​ຂຶ້ນ​ຢູ່​ໃນ​ຫຼາຍ​ປະເທດ​ໃນ​ໂລກ ໃນ​ນັ້ນ​ມີ ນູ​ແວນ​ເຊ​ລັງ ອົດ​ສະ​ຕຣາ​ລີ ອິນ​ເດຍ ຮົງ​ກົງ (ຈີນ) ແລະ ມຽນ​ມາ.

    ສົງຄາມ​ໂລກ​ຄັ້ງ​ທີ​ໜຶ່ງ ເລີ່ມ​ຂຶ້ນ​ຈາກ​ຄວາມ​ຂັດ​ແຍ່ງ​ດ້ານ​ຜົນ​ປະໂຫຍດ ລະຫວ່າງ​ບັນດາ ປະເທດ​ຈັກກະພັດ​ຂະໜາດ​ໃຫຍ່​ໃນ​ເອີ​ຣົບ ໂດຍ​ເລີ່ມ​ຂຶ້ນ​ໃນ​ວັນ​ທີ 28 ກໍລະກົດ ປີ 1914 ເມື່ອ​ຈັກກະພັດ ໂອ​ຕຣິດ-ຮົງ​ກາ​ຣີ ປະກາດ​ສົງຄາມ​ກັບ ແຊກ​ບີ. ເຖິງ​ວ່າ ໃນ​ດ້ານ​ທິດ​ສະ​ດີ​ແລ້ວ ນີ້​ເປັນ​ການ​ແກ້ງ​ແຍ່ງ​ລະຫວ່າງ​ສອງ​ກຸ່ມ​ການ​ທະຫານ ທີ່​ເປັນ​ສັດຕູ​ກັນ ອັນ​ປະກອບ​ດ້ວຍ ກຸ່ມ​ພັນທະ​ພາບ ເຢຍ​ລະ​ມັນ-ໂອ​ຕຣິດ-ຮົງ​ກາ​ຣີ ກັບ​ກຸ່ມ​ສົນ​ທີ​ສັນຍາ ອັງກິດ-ຝຣັ່ງ-ຣັດ​ເຊຍ ໂດຍ​ປະກອບ​ມີ​ບັນດາ​ປະເທດ​ຈັກກະພັດ​ຂະໜາດ​ໃຫຍ່​ເຊັ່ນ ອັງກິດ ເຢຍ​ລະ​ມັນ ຝຣັ່ງ ຣັດ​ເຊຍ ໂອ​ຕຣິດ-ຮົງ​ກາ​ຣີ ແລະ ອົດ​ໂຕ​ມານ (ຕົ້ນ​ກຳເນີດ​ຂອງ​ຕວກ​ກີ ໃນ​ເວລາ​ນີ້) ກໍ​ຕາມ ແຕ່​ໃນ​ຄວາມ​ເປັນ​ຈິງ​ແລ້ວ ມີ​ເກືອບ 70 ປະເທດ ໄດ້​ຖືກ​ດຶງ​ເຂົ້າ​ໃນ​ສົງຄາມ ພາຍ​ໃຕ້​ຫຼາຍ​ຮູບ​ແບບ ທີ່​ແຕກ​ຕ່າງ​ກັນ ໃນ​ນັ້ນ​ມີ​ອີ​ຕາ​ລີ ຖືກ​ດຶງ​ເຂົ້າ​ຮ່ວມ​ໃນ​ປີ 1915 ແລະ ສ ອາ​ເມ​ຣິ​ກາ ໃນ​ປີ 1917.

    ລວມ​ແລ້ວ​ມີ​ກວ່າ 800 ລ້ານ​ຄົນ ໝາຍ​ຄວາມ​ວ່າ​ເທົ່າ​ກັບ​ກວ່າ​ເຄິ່ງ​ໜຶ່ງ​ຂອງ​ຈຳນວນ ປະຊາກອນ​ໃນ​ເວລາ​ນັ້ນ ຢູ່​ໃນ​ບັນດາ​ປະເທດ ຖື​ວ່າ​ໄດ້​ເຂົ້າ​ຮ່ວມ​ສົງຄາມ.  ມີ 20 ລ້ານ​ຄົນ ໄດ້​ຖືກ​ຝ່າຍ ຕ່າງໆ​ລະດົມ​ໃຫ້​ເຂົ້າ​ຮ່ວມ​ໃນ​ເວລາ​ທີ່​ສົງຄາມ​ເລີ່ມ​ຂຶ້ນ ແລະ ຮອດ​ເວລາ​ທີ່​ການ​ພິພາດ ທະວີຄູນ ແລະ​ແຜ່​ກວ້າງ​ອອກ ກໍ​ເຮັດ​ໃຫ້​ຕົວ​ເລກ​ຜູ້​ທີ່​ຖືກ​ລະດົມ​ເຂົ້າ​ຮ່ວມ ເພີ່ມ​ຂຶ້ນ​ຫຼາຍ​ເທົ່າ​ຕົວ ໂດຍ​ເພີ່ມ​ຂຶ້ນ​ເຖິງ 70 ລ້ານ​ຄົນ. ໃນ​ນັ້ນ​ຫຼາຍ​ສຸດ​ແມ່ນ​ເຢຍ​ລະ​ມັນ (13 ລ້ານ​ຄົນ) ຮອງ​ລົງ​ມາ​ແມ່ນ ໂອ​ຕຣິດ-ຮົງ​ກາ​ຣີ (9 ຄົນ). ໃນ​ສົງຄາມ​ດັ່ງກ່າວ ກໍ​ນັບ​ວ່າ​ເປັນ​ເທື່ອ​ທຳ​ອິດ ທີ່​ໄດ້​ນຳ​ໃຊ້​ອາວຸດ​ເຄ​ມີ​ໃນ​ຂອບ​ຂະໜາດ​ໃຫຍ່ ເມື່ອ​ກອງ​ກຳລັງ​ຂອງ​ເຢຍ​ລະ​ມັນ ໃຊ້​ແກ​​ັສ chlorine ເຂົ້າ​ໃນ​ການ​ໂຈມ​ຕີ​ຢູ່​ໃນ​ແບນ​ຊິກ ເມື່ອ​ປີ 1915.

    ຄາດ​ວ່າ ໃນ​ສົງຄາມ​ໂລກ​ຄັ້ງ​ທີ​ໜຶ່ງ ມີ​ຜູ້​ເສຍ​ຊີວິດ ກວ່າ 18,6 ລ້ານ​ຄົນ ແລະ ມີ​ຜູ້​ບາດເຈັບ ປະມານ 60 ລ້ານ​ຄົນ. ຈຳນວນ​ເງິນ​ທີ່​ບັນດາ​ປະເທດ​ເຂົ້າ​ຮ່ວມ​ສົງຄາມ ໃຊ້​ຈ່າຍ​ໃຫ້​ແກ່​ການ​ຕໍ່ສູ້​ມີ​ເຖິງ 85 ຕື້​ໂດ​ລາ​ສະຫະລັດ. ເມື່ອ​ເວົ້າ​ເຖິງ​ຂອບ​ຂະໜາດ ແລະ ຄວາມ​ຮ້າຍແ​​ຮງ​ຂອງ​ສົງຄາມ​ໂລກ​ຄັ້ງ​ທີ​ໜຶ່ງ ນັ້ນ ນັບ​ວ່າ​ເປັນ​ຮອງ​ພຽງ​ສົງຄາມ​ໂລກ​ຄັ້ງ​ທີ​ສອງ.

ຂ່າວທີ່ກ່ຽວຂ້ອງ