ຂ່າວຫຼ້າສຸດ

ຫົວພັນ ມີຄວາມພ້ອມໂດຍພື້ນຖານ ໃນການສະຫຼອງເມືອງວຽງໄຊ

149 13 ພ.ຈ. 2018 ຂ່າວໜ້າ​ໜຶ່ງ
ຫົວພັນ ມີຄວາມພ້ອມໂດຍພື້ນຖານ ໃນການສະຫຼອງເມືອງວຽງໄຊ

    ປັດ­ຈຸ­ບັນ ພັກ-ລັດ ແລະ ອຳ­ນາດ​ການ​ປົກ­ຄອງ​ແຂວງ​ຫົວ­ພັນ ໄດ້​ສຸມ​ໃສ່​ການ​ກະ­ກຽມ​ຄວາມ​ພ້ອມ​ດ້ານ​ຕ່າງໆ ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ເມືອງ​ວຽງ​ໄຊ ຖານ​ທີ່​ໝັ້ນ​ການ​ປະ­ຕິ­ວັດ​ລາວ​ທີ່​ຈະ​ຈັດ​ຂຶ້ນ​ວັນ​ທີ 30 ພະ­ຈິກ 2018 ໂດຍ​ໄດ້​ສຳ­ເລັດ​ຫຼາຍ​ກິດ­ຈະ­ກຳ ແລະ ໜ້າ​ວຽກ​ປິ່ນ​ອ້ອມ.

    ທ່ານ ພູ​ໂຊນ ທຳ​ມະ​ວິ​ໄຊ ຮອງ​ເຈົ້າ­ແຂວງ​ຫົວ­ພັນ ຫົວ­ໜ້າ​ຄະ­ນະ​ຮັບ­ຜິດ­ຊອບ​ກະ­ກຽມ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ເມືອງ​ວຽງ​ໄຊ ຄົບ­ຮອບ 50 ປີ ຂັ້ນ​ແຂວງ ໃຫ້​ສຳ­ພາດ​ວ່າ: ປັດ­ຈຸ­ບັນ ແຂວງ​ຫົວ­ພັນ ມີ​ຄວາມ​ພ້ອມ​ໂດຍ​ພື້ນ­ຖານ​ໃນ​ການ​ກະ­ກຽມ​ຈັດ​ງານ​ດັ່ງ­ກ່າວ ໂດຍ​ສະ­ເພາະ ວຽກ​ງານ​ຂັ້ນ​ແຂວງ​ຮັບ­ຜິດ­ຊອບ ຄື: ດ້ານ​ເນື້ອ​ໃນ​ໄດ້​ສຳ­ເລັດ​ການ​ສະ­ໜອງ​ຂໍ້​ມູນ​ໃຫ້​ສູນ​ກາງ ເພື່ອ​ຂຽນ​ປະ­ຫວັດ​ຄວາມ​ເປັນ​ມາ​ຂອງ​ເມືອງ​ວຽງ​ໄຊ ບົດ​ສຳ­ລັບ​ສຳ​ມະ​ນາ​ວິ­ທະ­ຍາ­ສາດ ແລະ ບົດ​ປາ­ຖະ­ກະ­ຖາ​ກ່ຽວ​ກັບ​ເມືອງ​ວຽງ​ໄຊ ບົດ​ສູນ​ທອນ​ພົດ​ຂອງ​ກົມ​ການ­ເມືອງ​ສູນ​ກາງ​ພັກ ແລະ ບົດ​ຄຳ​ເຫັນ​ຕ່າງໆ​ໃກ້​ຈະ​ສຳ­ເລັດ​ແລ້ວ ສຳ­ລັບ​ດ້ານ​ການ​ກະ­ກຽມ​ພື້ນ­ຖານ​ໂຄງ​ລ່າງ 9 ໂຄງ­ການ ທີ່​ລັດ­ຖະ­ບານ​ອະ­ນຸ­ມັດ​ຈັດ​ຕັ້ງ​ປະ­ຕິ­ບັດ​ຢູ່​ເມືອງ​ວຽງ​ໄຊ ສຳ­ເລັດ 8 ໂຄງ­ການ ຍັງ​ເຫຼືອ 1 ໂຄງ­ການ​ທີ່​ຍັງ​ບໍ່​ທັນ​ສຳ­ເລັດ ມີ​ໂຄງ­ການ​ສ້າງ​ຕົວ​ໜັງ­ສື​ໃຫຍ່​ໃສ່​ຜາ​ຫີນ​ຄາດ​ວ່າ​ຈະ​ສຳ­ເລັດ​ໄວໆ​ນີ້ ສ່ວນ​ພື້ນ­ຖານ​ໂຄງ​ລ່າງ​ເສັ້ນ­ທາງ ກໍ່​ໄດ້​ຮັບ​ການ​ສ້ອມ­ແປງ ເຮັດ​ໃຫ້­ການ​ໄປ​ມາ​ມີ​ຄວາມ​ສະ­ດວກ​ຂຶ້ນ.

    ດ້ານ​ຂະ​ບວນ​ການ ໂດຍ​ສະ­ເພາະ ການ​ກະ­ກຽມ​ລາຍ​ການ­ສະ­ແດງ​ສິ­ລະ​ປະ ປັດ­ຈຸ­ບັນ​ນັກ­ຮຽນ 600 ຄົນ​ຈາກ​ໂຮງ­ຮຽນ ມສ.ວຽງ​ໄຊ ກຳ­ລັງ​ເຝິກ­ແອບ​ຢ່າງ​ຕໍ່​ເນື່ອງ ໂດຍ​ມີ​ກົມ​ສິ­ລະ​ປະ​ການ­ສະ­ແດງ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ມາ​ຊ່ວຍ ນອກ​ນີ້​ຍັງ​ໄດ້​ກະ­ກຽມ​ປະ­ຊາ­ຊົນ ແລະ ຕາງ­ໜ້າ​ຂະ­ແໜງ­ການ​ຕ່າງໆ​ເຂົ້າ​ຮ່ວມ​ກ້ອນ​ກຳ­ລັງ​ສວນ­ສະ­ໜາມ 22 ກ້ອນ ຄືບ​ໜ້າ 95% ສ່ວນ​ສະ­ຖານ­ທີ່​ພັກ​ເຊົາ​ໄດ້​ກະ­ກຽມ​ບັນ­ດາ​ໂຮງ­ແຮມ ແລະ ເຮືອນ​ພັກ ທັງ​ຢູ່​ເມືອງ​ວຽງ​ໄຊ ແລະ ເມືອງ​ຊຳ​ເໜືອ ບັນ­ດາ​ສຳ­ນັກ­ງານ​ຕ່າງໆ​ຂອງ​ລັດ​ໄວ້​ແລ້ວ ນອກ​ນີ້ ວຽກ​ງານ​ປ້ອງ​ກັນ ແລະ ວຽກ​ງານ​ສາ​ທາ ກໍ່​ໄດ້​ມີ​ການ​ກະ­ກຽມ ໂດຍ​ສົມ­ທົບ​ກັບ​ສູນ​ກາງ​ຢ່າງ​ຕໍ່​ເນື່ອງ ເພື່ອ​ໃຫ້​ງານ​ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ ແລະ ມີ​ຄວາມ​ຮັບ­ປະ­ກັນ 100%.

    ງານ​ຄັ້ງ​ນີ້​ເປັນ​ງານ​ລະ­ດັບ​ຊາດ ຄາດ​ວ່າ​ຈະ​ມີ​ຜູ້​ເຂົ້າ​ຮ່ວມ​ຫຼາຍ​ພັນ​ຄົນ ດັ່ງ­ນັ້ນ ບັນ­ຫາ​ທີ່​ເປັນ​ຫ່ວງ​ກໍ່​ແມ່ນ​ສະ­ຖານ­ທີ່​ພັກ ແລະ ອາ­ຫານ​ການ​ກິນ​ຢ້ານ​ບໍ່​ພຽງ­ພໍ ແຕ່​ອົງ­ການ​ປົກ­ຄອງ​ມີ​ແຜນ​ຮອງ​ຮັບ​ໄວ້​ແລ້ວ ເພາະ​ນອກ­ຈາກ​ຈະ​ໃຫ້​ແຂກ​ພັກ​ເຊົາ​ຕາມ​ໂຮງ­ແຮມ ເຮືອນ​ພັກ ແລະ ສຳ­ນັກ­ງານ​ຕ່າງໆ​ຂອງ​ລັດ​ແລ້ວ ຍັງ​ຈະ​ໃຫ້​ພັກ​ເຊົາ​ນຳ​ປະ­ຊາ­ຊົນ​ຢູ່​ພາຍ​ໃນ​ເມືອງ​ວຽງ​ໄຊ ເຊິ່ງ​ໄດ້​ໄດ້​ກະ­ກຽມ​ໄວ້​ແລ້ວ ນອກ​ນີ້ ຖ້າ​ຜູ້​ທີ່​ມາ​ຮ່ວມ​ງານ​ຕ້ອງ­ການ​ກາງ​ເຕັ້ນ​ນອນ​ຢູ່​ເມືອງ​ວຽງ​ໄຊ ກໍ່​ຈະ​ຄົ້ນ­ຄວ້າ ແລະ ອຳ­ນວຍ​ຄວາມ​ສະ­ດວກ​ໃຫ້ ສ່ວນ​ອາ­ຫານ​ການ​ກິນ ໄດ້​ອະ­ນຸ­ຍາດ​ໃຫ້​ຜູ້​ປະ­ກອບ​ການ​ຢູ່​ເມືອງ​ອ້ອມ​ຂ້າງ ເຂົ້າ​ມາ​ໃຫ້​ບໍ­ລິ­ການ​ຊ່ວຍ​ດ້ານ​ອາ­ຫານ​ຢູ່​ເມືອງ​ວຽງ​ໄຊ​ໃນ​ໄລ­ຍະ​ຈັດ​ງານ ຄາດ​ວ່າ​ຈະ​ພຽງ­ພໍ​ກັບ​ຄວາມ​ຕ້ອງ­ການ​ຂອງ​ແຂກ.

    ໂດຍ​ລວມ​ແລ້ວ ການ​ຈັດ​ງານ​ຄັ້ງ​ນີ້ ນອກ­ຈາກ​ຈະ​ມີ​ຄວາມ​ສຳ­ຄັນ​ທາງ​ປະ­ຫວັດ­ສາດ​ແລ້ວ ຍັງ​ຈະ​ເຮັດ​ໃຫ້​ຫຼາຍ​ຄົນ​ພາຍ​ໃນ ແລະ ຕ່າງ­ປະ­ເທດ​ຮູ້­ຈັກ​ເມືອງ​ວຽງ​ໄຊ​ຫຼາຍ​ຂຶ້ນ ໂດຍ​ສະ­ເພາະ ສະ­ຖານ­ທີ່​ທ່ອງ​ທ່ຽວ​ຖ້ຳ​ຜູ້­ນຳ​ຢູ່​ເມືອງ​ວຽງ​ໄຊ ແລະ ວິ­ຖີ​ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ​ບັນ­ດາ­ເຜົ່າ​ແຂວງ​ຫົວ­ພັນ ໂດຍ​ສະ­ເພາະ ປະ­ຊາ­ຊົນ​ເມືອງ​ວຽງ​ໄຊ​ຫຼາຍ​ຂຶ້ນ​ຕື່ມ​ອີກ.

ຂ່າວທີ່ກ່ຽວຂ້ອງ