ສຸກຍາກ ທຸກງ່າຍ ບໍລິໂພກນິຍົມ

902 16 ພ.ຈ. 2018 ນານາສາລະ

    ໂລກ​ແຫ່ງ​ກາມ​ມະ​ຄຸນ ຫຼື ບໍ­ລິ­ໂພກ​ນິ­ຍົມ ສັງ­ເກດ​ໄດ້​ວ່າ: ຄົນ​ເຮົາ​ມີ​ຄວາມ­ສຸກ​ຍາກ ແຕ່​ທຸກ​ໄດ້​ງ່າຍ ຂະ​ບວນ​ການ​ພັດ­ທະ­ນາ​ສ່ວນ​ໜຶ່ງ ກະ​ຕຸ້ນ​ໃຫ້​ຄົນ​ເລັ່ງ​ພັດ­ທະ­ນາ​ສັກ­ກະ​ຍະ​ພາບ​ຂອງ​ຄົນ ເພື່ອ​ສ້າງ​ຊີ­ວິດ​ໃຫ້​ສົມ­ບູນ​ດ້ານ​ວັດ­ຖຸ​ເກີນ​ໄປ ຈົນ​ສູນ​ເສຍ​ຄວາມ​ສາ­ມາດ​ໃນ​ການ​ສ້າງ​ຄວາມ­ສຸກ​ໃຫ້​ເກີດ​ຂຶ້ນ​ໃນ​ຊີ­ວິດ ເພາະ­ວ່າ​ຄົນ​ເຮົາ​ຫຼົງ​ພັດ­ທະ­ນາ​ຄວາມ​ສາ­ມາດ​ໃນ​ການ​ສະ­ແຫວງ­ຫາ​ເພື່ອ​ໃຫ້​ເກີດ​ຄວາມ­ສຸກ ແຕ່​ຂາດ​ການ​ສ້າງ​ຄ່າ​ນິ­ຍົມ​ໃຫ້​ຕົນ​ມີ​ຄວາມ­ສຸກ​ໄດ້​ງ່າຍ ເພາະ​ຫຼົງ​ແລ່ນ​ຕາມ​ຄ່າ​ນິ­ຍົມ​ທີ່​ຄົນ​ອື່ນ​ເຂົາ​ກຳ­ນົດ​ໃຫ້.

    ຄ່າ​ນິ­ຍົມ​ທີ່​ຄົນ​ອື່ນ​ກຳ­ນົດ​ໃຫ້​ມັນ​ຜູກ​ຕິດ​ກັບ​ຄຸນ­ຄ່າ​ຂອງ​ວັດ­ຖຸ ເຮົາ​ຈຶ່ງ​ສັງ­ເກດ​ໄດ້​ວ່າ ຄົນ​ເຮົາ​ຍິ່ງ​ສະ­ແຫວງ­ຫາ​ຫຼາຍ​ຂຶ້ນ ມີ​ຊັບ ແລະ ວັດ­ຖຸ​ຫຼາຍ​ຂຶ້ນ​ກໍ່​ຍັງ​ບໍ່​ພຽງ­ພໍ​ໃນ​ຄວາມ­ສຸກ​ທີ່​ຕົນ​ຄວນ​ຈະ​ພຽງ­ພໍ ແຕ່​ກັບ​ແລ່ນ​ຕາມ​ໄຂວ່​ຄວ້າ​ເພີ່ມ​ທະ­ວີ​ຂຶ້ນ ເພາະ​ຮູ້​ບໍ່​ທັນ​ວ່າ ບໍ­ລິ­ໂພກ​ນິ­ຍົມ ມັນ​ຖືກ​ສ້າງ​ຂຶ້ນ​ມາ​ຈາກ​ຕັນ­ຫາ​ຂອງ​ມະ­ນຸດ​ນັ້ນ​ເອງ ຜູ້​ມີ​ໜ້ອຍ​ຍິ່ງ​ຢາກ​ມີ​ຫຼາຍ​ຂຶ້ນ ສ່ວນ​ຜູ້​ມີ​ຫຼາຍ​ກໍ່​ຍິ່ງ​ສະ­ແຫວງ­ຫາ​ໃຫ້​ຫຼາຍ​ຂຶ້ນ ເຊິ່ງ​ເປັນ​ການ​ຕັກ​ຕວງ​ຊັບ­ພະ­ຍາ­ກອນ​ທີ່​ຄວນ​ສະ­ເລ່ຍ​ແບ່ງ­ປັນ​ໃຫ້​ພີ່­ນ້ອງ​ຮ່ວມ​ຊາດ ແຕ່​ຖືກ​ແມ່​ແຮງ​ຜູກ­ຂາດ​ຂອງ​ຜູ້​ມີ​ກຳ­ລັງ​ມະ­ຫາ­ສານ​ກັກ​ຕຸນ​ໄວ້.

    ບໍ­ລິ­ໂພກ​ນິ­ຍົມ​ທີ່​ເຮັດ​ໃຫ້​ຄົນ​ເຮົາ​ມີ​ຄວາມ­ທຸກ​ງ່າຍ ແຕ່​ມີ​ຄວາມ­ສຸກ​ໄດ້​ຍາກ ເພາະ​ຜູ້​ກຳ­ນົດ​ເກນ (ຄ່າ​ນິ­ຍົມ) ເຂົາ​ຜູກ­ຂາດ​ກັບ​ວັດ­ຖຸ ເຊິ່ງ​ມຸ່ງ​ເນັ້ນ​ໃຫ້​ຄົນ​ມີ​ຄວາມ­ສຸກ​ກັບ​ຮູບ ສຽງ ກິ່ນ ລົດ ແລະ ການ​ສຳ­ຜັດ​ທາງ​ກາຍ ເຊິ່ງ​ສະ­ແດງ​ອອກ​ເວ­ລາ​ກິນ-ທ່ຽວ ຕົກ​ຢູ່​ໃນ​ລັກ­ສະ­ນະ​ອວດ​ໜ້າ​ຕາ ຫຼື ໂຊ​ວັດ­ຖຸ​ລາ­ຄາ​ແພງ ເຮັດ​ໃຫ້​ຜູ້​ບໍ່​ມີ​ກໍ່​ຢາກ​ມີ​ຢາກ​ໄດ້ ຈົນ​ເຖິງ​ຂະ­ໜາດ​ຍອມ​ຂາຍ​ສັກ​ສີ ແລະ ຈິດ​ວິນ​ຍານ​ຄວາມ​ເປັນ​ຕົວ​ຕົນ​ເພື່ອ​ໃຫ້​ມີ​ຄື​ເພິ່ນ ດຽວ­ນີ້​ຕົກ​ຍຸກ​ເສດ­ຖະ­ກິດ​ຝືດ ຊີ­ວິດ​ຝາດ​ຂົມ­ຂື່ນ ເພາະ​ຊີ­ວິດ​ເວ­ລາ​ຫາ​ໄດ້​ພັດ​ຂາດ​ການ​ອົດ­ອອມ ຫຼື ຈະ​ເວົ້າ​ວ່າ ຄ່າ​ນິ­ຍົມ​ໃນ​ການ​ສົ່ງ­ເສີມ​ໃຫ້​ຕົນ​ເອງ​ອົດ­ອອມ​ຊັບ​ບໍ່​ມີ​ເລີຍ ເມື່ອ​ເສດ­ຖະ­ກິດ​ຝືດ ຊີ­ວິດ​ຝາດ​ທັນ­ທີ ຖ້າ​ຈະ​ໃຫ້​ເວົ້າ​ຄວາມ​ຈິງ​ສູ່​ກັນ​ຟັງ​ກໍ່​ບອກ​ໄດ້​ວ່າ ຮ້ານ​ນ້ອຍ-ຮ້ານ​ໃຫຍ່​ບາງ​ຮ້ານ​ແຄມ​ທາງ​ປິດ​ລົງ​ໂດຍ​ອັດ­ຕະ­ໂນ­ມັດ ນັກ​ທຸກ​ລະ​ກິດ​ນ້ອຍ​ເອົາ​ສອງ​ມື​ກຸມ​ຫວ່າງ​ຂາ​ໄວ້ ຮູ້​ໂຕ​ທັນ­ທີ​ວ່າ​ຂືນ​ຝືນ​ຈັບ​ຈ່າຍ​ຟຸມ​ເຟືອຍ ຊີ­ວິດ​ກໍ່​ຈະ​ຕົກ​ຂາ​ລົງ​ເຫວ​ໄວ­ວາ.

    ຜູ້​ຂຽນ​ຍົກ​ເຫດ­ການ​ບາງ​ອັນ​ຂ້າງ​ເທິງ ໃນ​ຍຸກ​ເສດ­ຖະ­ກິດ​ຝືດ ທີ່​ຕົກ​ຫຼຸມ​ຄ່າ​ນິ­ຍົມ​ຂອງ​ໂລກ​ບໍ­ລິ­ໂພກ​ນິ­ຍົມ​ນັ້ນ ກໍ່​ເພື່ອ​ແລກ­ປ່ຽນ​ກັບ​ທ່ານ​ຜູ້​ອ່ານ​ວ່າ​ມັນ​ເປັນ​ຈິງ​ແທ້​ພຽງ​ໃດ ເຊິ່ງ​ຢ່າ​ລືມ​ວ່າ​ສົງ­ຄາມ​ເສດ­ຖະ­ກິດ​ໃຜໆ ກໍ່​ຮູ້​ວ່າ​ເກມ​ທຸ­ລະ​ກິດ​ເຂົາ​ບໍ່​ປະ­ກາດ​ສົງ­ຄາມ​ໂດຍ​ກົງ​ດອກ ພຽງ​ແຕ່​ມາ​ຍຸ​ມາ​ຍ້ອງ ຫຼື ມາ​ຍົວະ​ໃຫ້​ເຮົາ​ຂາຍ​ຊັບ​ນັ້ນ​ນີ້​ເພື່ອ​ຫຼອກ​ໃຫ້​ຫຼົງ​ກົນ ບາງ​ຄົນ​ເຖິງ​ກັບ​ຕາຍ­ໃຈ​ໃຫ້​ຫຼ່ຽມ​ນັກ­ທຸ­ລະ­ກິດ​ຂາຍ​ນາ​ມູນ​ເພື່ອ​ຊື້​ລົດ​ຂີ່-ສ້າງ​ເຮືອນ​ຢູ່ ບາດ​ເງິນ​ໝົດ​ກໍ່​ກັບ​ໄປ​ເປັນ​ລູກ­ຈ້າງ​ເຂົາ​ຄືນ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ