ຂ່າວຫຼ້າສຸດ

7 ສ ສ້າງຊີວິດ

323 21 ພ.ຈ. 2018 ນານາສາລະ

    ຜູ້​ຂຽນ​ບໍ່​ແນ່​ໃຈ​ວ່າ ແຕ່­ລະ­ຄົນ​ເຄີຍ​ມີ​ເວ­ລາ​ຢຸດ​ພັກ​ສັງ­ເກດ​ການ​ດຳ­ເນີນ​ຊີ­ວິດ​ຂອງ​ຕົນ​ພຽງ​ໃດ ເພາະ​ປີ 2018 ກໍ່​ຍັງ​ບໍ່​ຮອດ​ຫຼາຍ​ເດືອນ ເວ­ລາ​ໝູ­ນວຽນ​ໄປ​ຈະ​ກາຍ­ເປັນ​ປີ 2019 ຜູ້​ຂຽນ​ຈຶ່ງ​ລອງ​ນຳ​ສະ­ເໜີ​ສູດ​ທົບ​ທວນ​ຊີ­ວິດ 7 ສ ເພື່ອ​ແລກ­ປ່ຽນ​ຮຽນ​ຮູ້​ນຳ​ທ່ານ​ຜູ້​ອ່ານ ສູດ​ດັ່ງ­ກ່າວ​ຂໍ​ເລີ່ມ​ຕົ້ນ​ດ້ວຍ 3 ສ ທຳ​ອິດ ຄື:

    1. ສະ​ສາງ​ແນວ​ຄິດ ໝາຍ​ຄວາມ​ວ່າ​ແຕ່​ລະ​ວັນ​ເດືອນ​ປີ​ເຮົາ​ເຄີຍ​ສະ​ສາງ​ຄວາມ​ຄິດ​ຕົນ​ເອງ ຫຼື ບໍ່​ວ່າ​ອັນ​ໃດ​ດີ​ຮັກ­ສາ​ໄວ້ ແລະ ອັນ​ໃດ​ບໍ່​ດີ ໃຊ້​ແລ້ວ​ບໍ່­ເກີດ​ປະ­ໂຫຍດ 2. ສະ​ສາງ​ເຄື່ອງ­ໃຊ້ ທັງ​ຢູ່​ໃນ​ເຮືອນ ແລະ ຫ້ອງ­ການ ໝາຍ​ຄວາມ​ວ່າ ເຄື່ອງ­ໃຊ້​ອັນ​ໃດ​ຍັງ​ໃຊ້​ໄດ້ ແລະ ອັນ​ໃດ​ຄວນ​ປ່ຽນ​ໃໝ່ ຫຼື ເອົາ​ໃຫ້​ຄົນ​ອື່ນ​ແລ້ວ​ມີ​ປະ­ໂຫຍດ​ກວ່າ​ຈະ​ເກັບ​ໄວ້​ຊື່ໆ ທັງ​ຢູ່​ໃນ​ຫ້ອງ­ການ ແລະ ບ້ານ​ເຮືອນ 3. ສະ​ສາງ​ສິ່ງ​ທີ່­ຢູ່​ໃນ​ໂທລະ­ສັບ ເພື່ອ​ໃຫ້­ການ​ໃຊ້​ງານ​ໄວ​ຂຶ້ນ.

    ສາມ ສ ຕໍ່​ມາ​ນີ້​ເວົ້າ​ເຖິງ​ການ​ສະ​ສົມ​ສິ່ງ​ທີ່​ເກີດ​ປະ­ໂຫຍດ ມີ​ຄຸນ­ຄ່າ​ໃນ​ຊີ­ວິດ ຄື: 1. ສະ​ສົມ​ຄວາມ​ຮູ້ ຫຼື ປະ­ສົບ​ການ​ດີໆຈາກ​ສັງ­ຄົມ ເພາະ​ຄວາມ​ຮູ້​ສາ­ມາດ​ສ້າງ​ຊີ­ວິດ​ໃຫ້​ກ້າວ­ໜ້າ​ໄດ້ 2. ສະ​ສົມ​ວັດ­ຖຸ​ທີ່​ຈຳ­ເປັນ​ສຳ­ລັບ​ຊີ­ວິດ ເຊັ່ນ: ເຄື່ອງ­ໃຊ້ ຫຼື ເງິນ​ຄຳ ! ບາງ​ຄົນ​ອາດ​ຄິດ​ວ່າ​ເງິນ​ຈຳ­ເປັນ​ສະ​ສົມ ຫຼື ບໍ່ ? ຄຳ​ຕອບ​ກໍ່​ຄື ເງິນ​ຈຳ­ເປັນ​ຕ້ອງ​ສະ​ສົມ ໝາຍ​ຄວາມ​ວ່າ​ໃຫ້​ເຮົາ​ອົດ­ອອມ​ໃຊ້​ຈ່າຍ​ໃນ​ສິ່ງ​ຈຳ­ເປັນ ບໍ່​ໃຊ້​ຟຸມ​ເຟືອຍ ເພື່ອ​ປ້ອງ​ກັນ​ຍາມ​ເສດ­ຖະ­ກິດ​ຝືດ­ເຄືອງ 3. ສະ​ສົມ​ຄວາມ​ດີ ຊີ­ວິດ​ຂອງ​ຄົນ​ຈະ​ຫາ​ພຽງ​ເງິນ​ລ້ຽງ​ຕົວ​ເອງ​ໄດ້​ຍັງ​ບໍ່​ພໍ ຕ້ອງ​ໄດ້​ສ້າງ​ຄວາມ​ດີ​ໄວ້​ກັບ​ສັງ­ຄົມ ບາງ​ຄົນ​ສ້າງ​ຄວາມ​ດີ​ດ້ວຍ​ການ​ບໍ­ລິ­ຈາກ​ເງິນ ບາງ​ຄົນ​ດ້ວຍ​ການ​ອຸ­ທິດ​ເຫື່ອ­ແຮງ ຈຶ່ງ​ຊື່​ໄດ້​ວ່າ​ບໍ່​ເສຍ​ຊາດ​ເກີດ​ມາ​ເປັນ​ຄົນ.

    ສັງ​ລວມ​ແລ້ວ ຫົກ ສ ຂ້າງ​ເທິງ​ນັ້ນ​ກໍ່​ຍັງ​ບໍ່​ພຽງ­ພໍ​ຕໍ່​ການ​ພັດ­ທະ­ນາ​ຊີ­ວິດ​ໃຫ້​ກ້າວ­ໜ້າ ເຊິ່ງ​ຈຳ­ເປັນ​ໃຊ້ ສ ຕົວ​ສຸດ​ທ້າຍ ຄື: ການ​ສ້າງ­ສັນ ເຊັ່ນ: ຄິດ​ສ້າງ­ສັນ ຄິດ​ຊ່ວຍ­ເຫຼືອ​ສັງ­ຄົມ ໂລກ​ທຸກ​ມື້­ນີ້​ເຫັນ​ຄວາມ​ຈຳ­ເປັນ​ຕໍ່​ການ​ມີ​ແນວ​ຄິດ​ສ້າງ­ສັນ ເພາະ​ເຂົ້າ­ໃຈ​ວ່າ­ຄວາມ​ຄິດ​ດັ່ງ­ກ່າວ ສາ­ມາດ​ຄ້ຳ​ຈູນ​ສັງ­ຄົມ​ໃຫ້​ສະ­ຫງົບ​ສຸກ ຫຼື ກ້າວ­ໜ້າ​ໄດ້ ຄິດ​ສ້າງ­ສັນ ຕ້ອງ​ຄິດ​ບໍ່​ອິດ­ສາ ບໍ່​ບຽດ­ບຽນ​ທຳ­ລາຍ​ຄົນ​ອື່ນ ເວົ້າ​ໃຫ້​ກົງ​ປະ­ເດັນ ຄື: ການ​ເວັ້ນ​ຈາກ​ອະ­ຄະ­ຕິ 4 ປະ­ການ​ນັ້ນ​ເອງ ຄື: ບໍ່​ລຳ­ອຽງ ເພາະ​ຮັກ​ລຳ­ອຽງ ເພາະ​ຢ້ານ​ລຳ­ອຽງ​ເພາະ​ໂລບ ຢາກ​ໄດ້​ຂອງ​ເຂົາ ລຳ­ອຽງ​ເພາະ​ຫຼົງ​ມົວ­ເມົາ ບາງ​ຄົນ​ມີ​ແນວ​ຄິດ​ອິດ­ສາ​ຄົນ​ອື່ນ ເຖິງ​ວ່າ​ຢູ່​ຫ້ອງ­ການ​ດຽວ​ກັນ​ກໍ່​ບໍ່​ຢາກ​ໃຫ້​ເຂົາ​ກ້າວ­ໜ້າ​ໄດ້​ດີ​ກວ່າ​ຕົນ ຈຶ່ງ​ວາງ​ແຜນ​ຂັດ​ຂາ​ຂັດ​ແຄ່ງ​ທຸກ​ວິ­ທີ​ທາງ​ເຮັດ​ໃຫ້​ສະ­ພາບ​ບັນ­ຍາ­ກາດ​ຕຶງ​ຄຽດ ເພາະ​ຄິດ​ແຕ່​ທຳ­ລາຍ​ຂວາງ​ກັ້ນ​ຄົນ​ອື່ນ.

    ສະ­ຫຼຸບ​ໄດ້​ວ່າ: ຄວາມ​ຄິດ​ສ້າງ­ສັນ​ສຳ­ຄັນ​ຕໍ່​ການ​ດຳ­ເນີນ​ຊີ­ວິດ ແລະ ປະ­ເທດ​ຊາດ ກົງ­ກັນ­ຂ້າມ ຖ້າ​ບາງ​ຄົນ​ຍັງ​ບໍ່​ສາ­ມາດ​ສະ​ສາງ​ແນວ​ຄິດ​ອິດ­ສາ​ບຽດ­ບຽນ ທຳ­ລາຍ​ເພື່ອນ​ມະ­ນຸດ​ດ້ວຍ​ກັນ ກໍ່​ຈະ​ເຮັດ​ໃຫ້​ສັງ­ຄົມ​ວຸ້ນ­ວາຍ ແຕກ​ແຍກ​ຄວາມ​ສາ­ມັກ­ຄີ ຄົນ​ປະ­ເພດ​ນີ້​ຈຶ່ງ​ບໍ່​ຄວນ​ແຕ່ງ­ຕັ້ງ​ໃຫ້​ເປັນ​ຫົວ­ໜ້າ​ໝູ່.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ