ຂ່າວຫຼ້າສຸດ

3 ກຳລັງສ້າງຊີວິດ

274 25 ພ.ຈ. 2018 ນານາສາລະ

    ສຳ­ລັບ​ໂລກ​ທີ່​ກຳ­ລັງ​ໝູນ​ໄວ​ຢູ່​ໃນ​ປັດ­ຈຸ­ບັນ​ນີ້ ເບິ່ງ​ຄື​ວ່າ​ມັນ​ສາ­ມາດ​ພັດ​ຊີ­ວິດ​ໃຫ້​ຫຼາຍ​ຄົນ​ມີ​ຊາ­ຕາ​ຊີ­ວິດ​ພິກ​ຜັນ ປ່ຽນ­ແປງ​ຈາກ​ໜ້າ​ມື​ເປັນ​ຫຼັງ​ມື ຫຼື ຈາກ​ລວຍ​ເປັນ​ຈົນ​ໄດ້ ເຊິ່ງ​ແຕ່­ລະ­ຄົນ​ຖ້າ­ວ່າ​ຕັ້ງ​ຫຼັກ​ຊີ­ວິດ​ບໍ່​ໝັ້ນ ແລະ ຈິດ­ໃຈ​ບໍ່​ທ່ຽງ​ແທ້ ຍ່ອມ​ແລ່ນ​ຕາມ​ກະ­ແສ​ໂລກ​ແບບ​ບໍ່​ຫຼົງ­ໄຫຼ ຫຼື ບາງ​ຄັ້ງ​ບາງ​ຄົນ​ອາດ​ມີ​ຄຳ​ເຫັນ​ຜິດ​ເປັນ​ຖືກ ເຂົ້າ​ທຳ­ນອງ​ເຫັນ​ຖືກ​ເປັນ​ຜິດ ເຫັນ​ກົງ­ຈັກ​ເປັນ​ດອກ​ບົວ ເພາະ​ເຫດ­ຜົນ​ທາງ​ການ​ເງິນ ເວົ້າ​ໃຫ້​ສັ້ນ ກໍ່​ຄື ຄວາມ­ທຸກ​ຈົນ​ເປັນ​ສິ່ງ​ທີ່​ໜ້າ​ຢ້ານ​ກົວ​ທີ່​ສຸດ​ຂອງ​ຊີ­ວິດ.

    ຜູ້​ຂຽນ​ຈຶ່ງ​ນຳ​ສະ­ເໜີ 3 ກຳ­ລັງ ເພື່ອ​ເອົາ​ມາ​ຄ້ຳ​ຫຼັກ​ຊີ­ວິດ​ໃຫ້​ໝັ້ນ­ຄົງ ຄື: ກຳ­ລັງ​ສະ­ໝອງ ກຳ­ລັງ​ກາຍ ແລະ ກຳ­ລັງ​ໃຈ ເພາະ­ວ່າ 3 ກຳ­ລັງ​ນີ້​ມັນ​ໄດ້​ຜ່ານ​ການ​ພິ­ສູດ ແລະ ຍອມ­ຮັບ​ຈາກ​ຄົນ​ທົ່ວ​ໂລກ ເຊິ່ງ​ບາງ​ຄົນ​ອາດ​ປະ­ສົບ​ຜົນ­ສຳ­ເລັດ​ແບບ​ຄິດ​ບໍ່​ອອກ​ວ່າ 3 ກຳ­ລັງ​ນັ້ນ​ຄື​ປັດ​ໄຈ​ສ້າງ​ຊີ­ວິດ​ເຂົາ​ໃຫ້​ສຳ­ເລັດ.

    1. ກຳ­ລັງ​ສະ­ໝອງ ກໍ່​ຕ້ອງ​ເວົ້າ​ເຖິງ​ການ​ຄົ້ນ­ຄວ້າ​ສຶກ​ສາ​ໃຫ້​ເກີດ​ປັນ­ຍາ ເພື່ອ​ຢູ່​ກັບ​ສັງ­ຄົມ​ໃຫ້​ໄດ້ ສັງ­ເກດ​ເຫັນ​ວ່າ​ຫຼາຍ​ຄົນ​ບໍ່​ໃຫ້​ຄວາມ​ສຳ­ຄັນ​ເທົ່າ​ທີ່​ຄວນ ໃສ່​ກຳ­ລັງ​ສະ­ໝອງ​ໜັກ​ໄປ​ກວ່າ​ນີ້ ບາງ​ຄົນ​ອາດ​ຍັງ​ຄິດ​ວ່າ­ການ​ຊື້​ປື້ມ​ມາ​ອ່ານ​ແມ່ນ​ສິ້ນ​ເປືອງ​ລ້າໆ ແຕ່​ຢ່າ​ລືມ​ວ່າ​ຜູ້­ນຳ​ສ່ວນ​ໃຫຍ່ ແລະ ຜູ້​ປະ­ສົບ​ຜົນ­ສຳ­ເລັດ​ລ້ວນ​ແລ້ວ­ແຕ່​ເປັນ​ນັກ​ອ່ານ​ທັງ​ນັ້ນ ຖ້າ​ເຮົາ​ເຂົ້າ​ເບິ່ງ​ຫໍ​ພິ​ພິ​ທະ​ພັນ​ຜູ້­ນຳ ກໍ່​ຈະ​ສັງ­ເກດ​ເຫັນ​ຕູ້​ໜັງ­ສື​ສ່ວນ​ຕົວ​ວາງ­ສະ­ແດງ ໃຫ້​ເຫັນ​ເປັນ​ແບບ­ຢ່າງ​ວ່າ​ພວກ​ເພິ່ນ​ເຫຼົ່າ­ນັ້ນ​ມັກ​ການ​ອ່ານ​ຄົ້ນ­ຄວ້າ.

    2. ກຳ­ລັງ​ກາຍ (ສຸ­ຂະ­ພາບ) ທີ່​ຄົນ​ເຮົາ​ບໍ່​ຄວນ​ປະ­ໝາດ​ເບິ່ງ​ຂ້າມ ຍົກ​ຕົວ­ຢ່າງ​ບາງ​ຄົນ​ລົງ­ທຶນ​ໃສ່​ການ​ສຶກ​ສາ​ຢ່າງ​ດຽວ ແຕ່​ບໍ່​ເຄີຍ​ຄິດ​ບຳ­ລຸງ​ສຸ­ຂະ­ພາບ​ຮ່າງ­ກາຍ ສະ­ນັ້ນ ຈຶ່ງ​ມີ​ຫຼາຍ​ຊີ­ວິດ​ກຳ­ລັງ​ປະ­ສົບ​ຜົນ­ສຳ­ເລັດ​ໄດ້​ບໍ່​ດົນ ແຕ່​ກັບ​ມີ​ບັນ­ຫາ​ກັບ​ສຸ­ຂະ­ພາບ ເຖິງ​ແມ່ນ​ວ່າ​ມີ​ຊັບ​ສິນ​ເງິນ​ຄຳ​ຫຼາຍ ທຸ້ມ­ເທ​ປິ່ນ­ປົວ ແຕ່​ບໍ່​ສາ­ມາດ​ດຶງ​ເອົາ​ສຸ­ຂະ­ພາບ​ດີ​ກັບ​ຄືນ​ໄດ້ ເພາະ​ຂາດ​ການ​ເບິ່ງ­ແຍງ​ຕັ້ງ­ແຕ່​ເລີ່ມ​ຕົ້ນ ບັນ­ຫາ​ແບບ​ນີ້​ໂທດ​ຄົນ​ອື່ນ​ບໍ່​ໄດ້​ດອກ ຕ້ອງ​ຈື່​ໄວ້​ເປັນ​ບົດ­ຮຽນ.

    3. ກຳ­ລັງ​ໃຈ ມີ 2 ແບບ ບາງ​ຄົນ​ຫາ​ຂອງ​ຮັກ ຫຼື ຄົນ​ຮັກ​ມາ​ເປັນ​ກຳ­ລັງ​ໃຈ ບາງ​ຄົນ​ສ້າງ​ກຳ­ລັງ​ໃຈ​ຂຶ້ນ​ຈາກ​ພາຍ​ໃນ​ຕົວ​ເອງ ຄື: ສ້າງ​ແຜນ​ຊີ­ວິດ​ເລືອກ​ອາ­ຊີບ​ແນວ­ທາງ​ທີ່​ຕົນ​ມັກ ແລ້ວ​ຄ່ອຍ​ລົງ­ມື​ເຮັດ​ເທື່ອ​ລະ​ກ້າວ ເຊິ່ງ​ມັນ​ແມ່ນ​ວິ­ທີ​ທີ່​ໝັ້ນ­ຄົງ​ກວ່າ​ຫາ​ເອົາ​ສິ່ງ​ພາຍ​ນອກ​ມາ​ເປັນ​ກຳ­ລັງ​ໃຈ​ຂອງ​ຕົວ​ເອງ ເພາະ​ຖ້າ​ຄົນ​ຮັກ​ປະ​ຖິ້ມ​ບາງ​ລາຍ​ຊີ­ວິດ​ເພ­ພັງ.

    ການ​ສ້າງ​ຊີ­ວິດ​ດ້ວຍ 3 ກຳ­ລັງ ຕ້ອງ​ອີງ­ໃສ່​ກັນ 3 ດ້ານ ບາງ​ຄົນ​ມີ​ກຳ­ລັງ​ໃຈ­ດີ ກຳ­ລັງ​ກາຍ​ດີ ແຕ່​ຂາດ​ປັນ­ຍາ​ຍ່ອມ​ສຳ­ເລັດ​ໄດ້​ຍາກ ຫຼື ບາງ​ຄົນ​ມີ​ກຳ­ລັງ​ໃຈ ແລະ ກຳ­ລັງ​ປັນ­ຍາ ແຕ່​ສຸ­ຂະ­ພາບ​ຮ່າງ­ກາຍ​ບໍ່​ແຂງ­ແຮງ ນອນ​ເຈັບ​ນອນ​ປ່ວຍ ກໍ່​ເປັນ​ເຄື່ອງ​ບັ່ນ​ທອນ​ຊີ­ວິດ​ໄດ້ ດັ່ງ­ນັ້ນ 3 ກຳ­ລັງ ຈຶ່ງ​ຈຳ­ເປັນ​ຕໍ່​ຜູ້​ຕ້ອງ­ການ​ຄວາມ​ສຳ­ເລັດ​ໃນ​ຊີ­ວິດ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ