ຂ່າວຫຼ້າສຸດ

ຮຽນຄຸນສົມບັດຄືນໃໝ່ກັນເທາະ!

246 26 ພ.ຈ. 2018 ນານາສາລະ

    ຕັ້ງ­ແຕ່​ຄາວ​ກ່ອນ ການ​ຮຽນ​ໜັງ­ສື​ໜັງ​ຫາ ນອກ­ຈາກ​ວິ­ຊາ​ຕ່າງໆ​ທີ່​ເປັນ­ຕົ້ນ​ຕໍ​ແລ້ວ ວິ­ຊາ​ສຳ­ຄັນ​ທີ່​ຂາດ​ບໍ່​ໄດ້ ແລະ ແຖມ​ຍັງ​ຕັ້ງ­ໃຈ​ປະ­ຕິ­ບັດ ບໍ່​ວ່າ​ໃນ​ຫ້ອງ ນອກ​ຫ້ອງ ຕະ­ຫຼອດ​ເຖິງ​ຢູ່​ເຮືອນ​ຊານ​ບ້ານ​ຊ່ອງ​ກໍ່​ລະ­ມັດ­ລະ­ວັງ ຖ້າ​ພາດ​ພັ້ງ​ກະ­ທຳ​ລ່ວງ​ເກີນ​ສິ່ງ​ໃດ​ສິ່ງ​ໜຶ່ງ​ຕໍ່​ຄົນ​ໃນ​ສັງ­ຄົມ ກໍ່​ຄື ຄອບ­ຄົວ ຖ້າ​ຄູ-ອາ­ຈານ​ມາ​ເຫັນ ໝູ່​ເພື່ອນ​ມາ​ເຫັນ ແລ້ວ​ຟ້ອງ​ຄູ-ອາ­ຈານ ຫຼື ມີ​ກິ່ນ​ບໍ່​ດີ​ຮອດ​ຄູ-ອາ­ຈານ ມີ​ຫວັງ​ຄະ­ແນນ​ຄຸນ­ສົມ­ບັດ​ຖືກ​ຫຼຸດ​ເປັນ​ແນ່.

    ເວ­ລາ​ເຮັດ​ການ ກໍ່​ຄື ຍາມ​ຮ່ຳ­ຮຽນ​ເຊັ່ນ​ກັນ ຕ້ອງ​ຖື​ຄຸນ­ສົມ­ບັດ​ສຳ­ຄັນ​ຄ້າຍ­ຄື​ຖື​ສິນ ນັ້ນ​ກໍ່​ຄື​ມີ​ສະ­ຕິ​ຕໍ່​ການ­ຈັດ­ຕັ້ງ​ປະ­ຕິ­ບັດ​ລະ­ບຽບ​ວິ­ໄນ​ຂອງ​ໂຮງ­ຮຽນ ຂອງ​ຫ້ອງ­ການ​ປະ­ຕິ­ບັດ​ລະ­ບຽບ​ກົດ­ໝາຍ​ຂອງ​ບ້ານ​ເມືອງ​ຢ່າງ​ຈິງ​ຈັງ ມີ​ຄວາມ​ລະ­ມັດ­ລະ­ວັງ​ໃນ​ການ​ເວົ້າ​ຈາ ທັກ​ທາຍ ຫຼື ສື່­ສານ​ກັບ​ໝູ່​ເພື່ອນ ເພາະ​ຖ້າ​ຂາດ​ຄຸນ­ສົມ­ບັດ​ກໍ່​ຈະ​ແຕະ­ຕ້ອງ​ໄປ​ໝົດ ເປັນ­ຕົ້ນ:

    - ອົງ​ການ­ຈັດ­ຕັ້ງ​ເຍົາ­ວະ​ຊົນ-ຊາວ​ໜຸ່ມ ກໍ່​ຈະ​ບໍ່​ພິ­ຈາ­ລະ­ນາ​ຮັບ​ເປັນ​ສະ­ມາ­ຊິກ.

    - ອົງ​ການ­ຈັດ­ຕັ້ງ​ສະ­ຫະ­ພັນ​ກຳ­ມະ­ບານ ແລະ ສະ​ພັນ​ແມ່­ຍິງ ກໍ່​ອາດ​ປະ­ຕິ­ເສດ.

    ສຸດ​ທ້າຍ​ອົງ​ການ­ຈັດ­ຕັ້ງ​ພັກ ກໍ່​ບໍ່​ອາດ​ພິ­ຈາ­ລະ­ນາ​ຮັບ​ເຂົ້າ​ສະ­ມາ­ຊິກ​ພັກ​ໄດ້ ຫຼື ເຂົ້າ​ເຮັດ​ວຽກ​ງານ​ບາງ​ບ່ອນ​ກໍ່​ບໍ່​ໄດ້ ປະ­ທານ ໄກ­ສອນ ພົມ­ວິ­ຫານ ທີ່​ເຄົາ­ລົບ​ຮັກ ໄດ້​ກ່າວ​ໃນ​ກອງ​ປະ­ຊຸມ​ຊາວ​ໜຸ່ມ​ຄັ້ງ​ທຳ​ອິດ​ວ່າ “ບໍ່​ສາ­ມາດ​ຝາກ​ອະ­ນາ­ຄົດ​ຂອງ​ປະ­ເທດ​ຊາດ​ໄວ້​ນຳ​ຄົນ​ທີ່​ບໍ່​ມີ​ຄຸນ­ສົມ­ບັດ​ໄດ້”.

    ດັ່ງ­ນັ້ນ ຄຸນ­ສົມ­ບັດ​ຈຶ່ງ​ປຽບ​ເໝືອນ​ຂໍ​ກະ­ແຈ​ຂອງ​ຄົນ​ເຮົາ ທີ່​ຈະ​ໄຂ​ເຂົ້າ​ໄປ​ສູ່​ເສັ້ນ­ທາງ​ໃນ​ການ​ເປັນ​ສະ­ມາ­ຊິກ​ຂອງ​ອົງ­ການ​ມະ­ຫາ­ຊົນ ຫຼື ອົງ​ຈັດ​ຕັ້ງ​ສຳ­ຄັນ​ໃດ​ໜຶ່ງ ຫຼື ການ​ເຂົ້າ​ສູ່​ການ​ເຮັດ​ວຽກ​ງານ​ໃດ​ໜຶ່ງ ຕະ­ຫຼອດ​ເຖິງ​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ​ເຊັ່ນ​ດຽວ​ກັນ.

    ວັນ​ເວ­ລາ​ຜ່ານ​ພົ້ນ​ໄປ ສິ່ງ­ແວ­ດລ້ອມ​ໃນ​ສັງ­ຄົມ​ປ່ຽນ­ແປງ ແລະ ປະ­ເທດ​ຊາດ​ກໍ່​ເປີດ​ກວ້າງ​ການ​ຮ່ວມ​ມື​ດ້ານ​ເສດ­ຖະ­ກິດ​ກັບ​ຕ່າງ­ປະ­ເທດ ພາຍ​ໃຕ້​ລະ­ບຽບ​ກົດ­ໝາຍ​ທີ່​ຕ່າງ​ຝ່າຍ​ຕ່າງ​ມີ​ຜົນ ເພື່ອ​ຮັບ​ເອົາ​ວິ​ທະ​ຍາດ​ສາດ​ເຕັກ­ນິກ​ຂອງ​ຍຸກ​ສະ­ໄໝ ມາ​ພັດ­ທະ­ນາ​ປະ­ເທດ​ຊາດ​ບ້ານ​ເມືອງ ສິ່ງ​ນັ້ນ​ເປັນ​ກົດ­ເກນ​ຂອງ​ໂລກ ຄື: ບໍ່​ມີ​ປະ­ເທດ​ໃດ​ທີ່​ຈະ​ຢືນ​ຢູ່​ດ້ວຍ​ລຳ​ແຄ່ງ​ຂອງ​ຕົນ​ເອງ​ແທ້ໆ​ໄດ້ 100% ໄດ້.

    ແຕ່​ໃນ​ຂະ­ນະ​ດຽວ​ກັນ ການ​ປະ­ຕິ­ບັດ​ຕາມ​ກະ­ແສ​ເສລີ​ຖືກ​ກົດ­ໝາຍ ການ​ເປີດ​ກວ້າງ​ການ​ພົວ­ພັນ ມັນ​ພັດ​ເຮັດ​ໃຫ້​ບາງ​ບຸກ­ຄົນ​ຫຼົງ​ລືມ​ທີ່​ມາ​ຂອງ​ຕົນ ໂດຍ​ສະ­ເພາະ ຄຸນ­ສົມ­ບັດ ຫຼັກ​ໝັ້ນ ຄຸນ​ທາດ​ການ­ເມືອງ​ຂອງ​ຕົນ ລືມ​ເສັ້ນ­ທາງ​ກ້າວ​ຂື້ນ​ສັງ­ຄົມ​ນິ­ຍົມ​ທີ່​ພັກ​ວາງ​ໄວ້ ດັ່ງ­ນັ້ນ ຈຶ່ງ​ເກີດ​ມີ​ປາ­ກົດ­ການ ພະ­ນັກ­ງານ​ທີ່​ເຮັດ​ວຽກ​ສ້າງ​ລາຍ​ຮັບ​ແກ່​ປະ­ເທດ​ຊາດ​ຈຳ­ນວນ​ໜຶ່ງ ຂາດ​ສະ­ຕິ ຂາດ​ຄຸນ­ສົມ­ບັດ ຄື: ສໍ້​ລາດ​ບັງ​ຫຼວງ ຮ່ວມ​ຫົວ​ກັບ​ພໍ່­ຄ້າ​ແມ່​ຄ້າ​ກະ­ທຳ​ສິ່ງ​ຜິດ​ກົດ­ໝາຍ ໃຊ້​ວິ­ທີ​ການ​ຂົ່ມ­ຂູ່​ດ້ວຍ​ການ​ໃຊ້​ຊ່ອງ​ຫວ່າງ​ຂອງ​ກົດ­ໝາຍ​ຫາ​ກິນ ແລະ ອື່ນໆ ຊຶ່ງ​ມັນ​ສະ­ແດງ​ອອກ​ວ່າ ພວກ​ດັ່ງ­ກ່າວ​ມີ​ຖາ­ນະ​ທາງ​ເສດ­ຖະ­ກິດ​ດີ​ກວ່າ​ພວກ​ອື່ນໆ ໃນ​ຂະ­ນະ​ດຽວ​ກັນ​ການ​ເວົ້າ​ຈາ​ປາ​ໃສ ກໍ່​ຂ້ອນ​ຂ້າງ​ຢາກ​ໝິ່ນ­ປະ­ໝາດ​ຜູ້​ອື່ນ​ທີ່​ດ້ອຍ​ກວ່າ.

    ຈາກ​ປາ­ກົດ­ການ​ທີ່​ກ່າວ​ມາ​ນີ້ ມັນ​ເປັນ​ການ​ສວນ​ກະ­ແສ​ກັບ​ແນວ­ທາງ​ນະ­ໂຍ­ບາຍ​ກ້າວ​ຂຶ້ນ​ຂອງ​ພັກ ເບິ່ງ​ຈັ່ງ​ໜຶ່ງ​ຄື​ຕັ້ງ​ລືມ​ເສັ້ນ­ທາງ​ໄປ​ແລ້ວ​ດັ່ງ­ນັ້ນ ເວ­ລາ​ນີ້​ຍິ່ງ​ກວ່າ​ເວ­ລາ​ໃດ​ໝົດ ເພາະ​ອົງ­ການ​ຕ່າງໆ​ກໍ່​ມີ​ການ​ເໜັງ​ຕີງ​ຢຶກ​ຢັກ ຕິດ­ຕາມ​ກວດ­ກາ ປະ­ຕິ­ບັດ​ພາ­ລະ​ບົດ­ບາດ​ລະ­ບຽບ​ກົດ­ໝາຍ​ກັນ​ແລ້ວ ແຕ່​ຈະ​ສຳ­ເລັດ​ຜົນ​ແນວ­ໃດ “ຈະ​ເປັນ​ຂີ້​ຊ້າງ​ລອດ ຂີ້​ມອດ​ຄ້າງ” ຫຼື ແລ້ວ “ແຕ່​ທີ​ພະ​ທີ​ຈົວ” ກໍ່​ເປັນ​ເລື່ອງ​ໂຊກ​ຊາ­ຕາ​ຂອງ​ການ­ຈັດ­ຕັ້ງ ວ່າ​ຈະ​ມີ​ເວດ­ມົນ­ກົນ­ຄາ­ຖາ​ອັດ​ຮູ​ຮົ່ວ​ໄດ້​ນ້ອຍ​ຫຼາຍ​ຊ່ຳ​ໃດ ແຕ່​ອັນ​ທີ່​ແນ່ໆ ສິ່ງ​ທີ່​ຄວນ​ເຮັດ ຫຼື ຈະ​ເອີ້ນ​ອຸ່ນ​ຄືນ ກໍ່​ແມ່ນ​ການ​ຮຽນ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ​ຄືນ­ໃໝ່ ປັບ­ປຸງ​ທັດ­ສະ­ນະ​ຫຼັກ​ໝັ້ນ​ແທ້ໆ ເບິ່ງ​ຄືນ​ຄຳ​ປະ­ຕິ­ຍານ​ຕໍ່​ພັກ​ຕໍ່​ລັດ ວ່າ​ຈະ​ຊື່­ສັດ​ບໍ­ລິ­ສຸດ​ນັ້ນ​ມັນ​ກົງ­ກັນ­ຂ້າມ​ຫຼື​ເປັນ​ຈັ່ງ​ໃດ​ກັນ​ແລ້ວ.

ໂດຍ: ຊຽງ​ເອງ

ຂ່າວທີ່ກ່ຽວຂ້ອງ