ຂ່າວຫຼ້າສຸດ

ມົນລະພິດທາງສຽງ ໜຶ່ງໃນບັນຫາທຳລາຍ ສິ່ງແວດລ້ອມ-ກະທົບຕໍ່ສຸຂະພາບ

118 27 ພ.ຈ. 2018 ຫົວຂໍ້ຂ່າວອື່ນໆ

    ບັນ­ຫາ​ເປີດ​ເຄື່ອງ​ຂະ­ຫຍາຍ​ສຽງ​ດັງ​ເກີນ​ຂອບ​ເຂດ ລົບ​ກວນ​ບ້ານ​ເມືອງ ຍັງ​ມີ​ໃຫ້​ເຫັນ​ບໍ່​ເວັ້ນ​ແຕ່​ລະ​ວັນ ເຊິ່ງ​ສ່ວນ​ຫຼາຍ​ແມ່ນ​ເປີດ​ຢູ່​ຕາມ​ຮ້ານ​ອາ­ຫານ ຮ້ານ​ກິນ​ດື່ມ ຮ້ານ​ບັນ­ເທີງ ຕາມ​ເຮືອນ​ທີ່​ຈັດ​ງານ​ດອງ ງານ​ສູ່­ຂວັນ ງານ​ພົບ​ປະ​ສັງ​ສັນ-ຊຸມ​ແຊວ ທັງ​ນ້ອຍ ແລະ ໃຫຍ່ ນອກ­ຈາກ​ນັ້ນ ຍັງ​ມີ​ໄວ​ລຸ້ນ​ຫຼາຍ​ກຸ່ມ​ຕິດ​ຕັ້ງ​ເຄື່ອງ​ຂະ­ຫຍາຍ​ສຽງ​ໃສ່​ລົດ​ໃຫຍ່ ເປີດ​ເພງ​ດັງ​ເກີນ​ຂອບ​ເຂດ ລົດ­ຈັກ ແລະ ລົດ​ໃຫຍ່​ຈຳ­ນວນ​ໜຶ່ງ​ດັດ­ແປງ​ທໍ່​ອາຍ​ເສຍ ກໍ່­ໃຫ້­ເກີດ​ສຽງ​ດັງ​ຈົນ​ແສບ​ຫູ​ຂີ່​ເລາະ​ຕາມ​ເສັ້ນ­ທາງ​ຕ່າງໆ ໂດຍ​ສະ­ເພາະ ໃນ​ເວ­ລາ​ຄ້າຍ​ແລງ​ຈົນ​ຮອດ​ທ່ຽງ​ຄືນ ໂດຍ​ບໍ່​ເຄົາ­ລົບ​ສິດ­ທິ​ຂອງ​ຄົນ​ອື່ນ ບໍ່​ເກງ​ໃຈ​ຍາມ​ນອນ ຍາມ​ພັກ­ຜ່ອນ​ຂອງ​ຄົນ​ທົ່ວ​ໄປ ແລະ ຜູ້​ທີ່​ເຈັບ​ປ່ວຍ ທີ່​ຕ້ອງ​ທຸກ­ທໍ­ລະ­ມານ​ຕົກ­ໃຈ ຕື່ນ​ສະ­ເດີດ​ເປັນ​ໄລ­ຍະ​ກັບ​ສຽງ​ດັງ​ທີ່​ມີ​ຄົນ​ຈຳ­ນວນ ໜຶ່ງ​ກໍ່​ຂຶ້ນ​ທີ່​ເຂົາ​ວ່າ​ເປັນ­ຄວາມ​ສຸກ ແຕ່​ກາຍ­ເປັນ​ຄວາມ­ທຸກ​ຂອງ​ຄົນ​ຈຳ­ນວນ​ບໍ່​ໜ້ອຍ.

    ຕາມ​ຫຼັກ­ການ​ທາງ​ວິ­ທະ­ຍາ­ສາດ ອະ­ທິ­ບາຍ​ວ່າ: “ມົນ​ລະ​ພິດ​ທາງ​ສຽງ ແມ່ນ​ການ​ກໍ່­ໃຫ້­ເກີດ​ສຽງ ດັງ​ເກີນ​ປົກ­ກະ­ຕິ ແລະ ສຽງ​ຄ່ອຍ ລົບ​ກວນ​ຕໍ່​ເນື່ອງ​ເປັນ​ເວ­ລາ​ດົນໆ ສ້າງ​ຄວາມ​ລຳ​ຄານ​ຕໍ່​ລະ­ບົບ​ໄດ້​ຍິນ​ຂອງ​ມະ­ນຸດ” ມົນ​ລະ​ພິດ​ທາງ​ສຽງ ແມ່ນ​ເກີດ​ຈາກ​ພາ­ຫະ­ນະ​ທີ່​ໃຊ້​ເຄື່ອງ​ຈັກ ເຄື່ອງ​ຈັກ​ຜະ­ລິດ ຈາກ​ການ​ກໍ່­ສ້າງ ຈາກ​ເຄື່ອງ​ຂະ­ຫຍາຍ​ສຽງ ອຸ­ປະ­ກອນ​ສື່­ສານ ສຽງ​ຮຽກ​ເຂົ້າ­ຂອງ​ໂທລະ­ສັບ ລວມ​ທັງ​ສຽງ​ສົນ­ທະ­ນາ​ທີ່​ດັງ​ເກີນ​ຂອບ​ເຂດ​ບໍ່​ຖືກ​ກາ­ລະ​ເທ­ສະ ມົນ​ລະ​ພິດ​ທາງ​ສຽງ​ແມ່ນ​ໜຶ່ງ​ໃນ​ບັນ­ຫາ​ສິ່ງ­ແວ­ດລ້ອມ ເປັນ​ໄພ​ໃກ້​ຕົວ​ທີ່​ເຮົາ​ເບິ່ງ​ບໍ່​ເຫັນ ສຳ­ຜັດ​ບໍ່​ໄດ້ ແຕ່​ຮັບ​ຮູ້​ໄດ້​ຈາກ​ຄວາມ​ຮູ້­ສຶກ​ເທົ່າ​ນັ້ນ ມົນ​ລະ​ພິດ​ທາງ​ສຽງ ມີ​ຜົນ​ກະ­ທົບ​ຕໍ່​ຄົນ​ເຮົາ ເຖິງ​ວ່າ​ຈະ​ບໍ່​ເປັນ​ໄພ​ເຖິງ​ແກ່​ຊີ­ວິດ​ໃນ​ເວ­ລາ​ສັ້ນໆ ແຕ່​ມັນ​ກໍ່​ເປັນ​ສາ­ເຫດ​ສຳ­ຄັນ​ທີ່​ເປັນ​ຜົນ​ກະ­ທົບ​ຕໍ່​ສຸ­ຂະ­ພາບ​ຮ່າງ­ກາຍ ແລະ ຈິດ­ໃຈ​ຂອງ​ຄົນ​ເຮົາ.

    ສຽງ​ດັງ​ເກີນ​ຂອບ​ເຂດ​ເຮັດ​ໃຫ້​ເກີດ​ຄວາມ​ລຳ​ຄານ ເຮັດ​ໃຫ້​ຕົກ­ໃຈ ເສຍ​ສະ­ມາ­ທິ​ໃນ​ການ​ເຮັດ​ວຽກ​ການ​ຫຼັບ​ນອນ ຖ້າ​ຜູ້​ໃດ​ໄດ້​ຟັງ­ສຽງ​ດັງ​ເກີນ​ຂອບ​ເຂດ​ດົນໆ ອາດ​ເຮັດ​ໃຫ້​ຄວາມ­ດັນ­ເລືອດ­ສູງ ຫົວ­ໃຈ​ສັ່ນ ຫົວ­ໃຈ​ເຕັ້ນ​ໄວ ຕີນ​ມື​ເຢັນ ສົ່ງ​ຜົນ​ສະ­ທ້ອນ​ຕໍ່​ການ​ໄຫຼ​ວຽນ​ຂອງ​ເລືອດ ເຈ້ຍ​ຫູ​ຂາດ ແລະ ອາດ​ຈະ​ເກີດ​ອາ­ການ​ຊຶມ​ເສົ້າ ການ​ເປີດ​ເຄື່ອງ​ສຽງ​ດັງ​ຢູ່​ຕາມ​ຮ້ານ​ກິນ​ດື່ມ ຮ້ານ​ບັນ­ເທີງ ຕາມ​ເຮືອນ​ຊານ​ບ້ານ​ຊ່ອງ​ໃນ​ໄລ­ຍະ​ຜ່ານ​ມາ ພາກ­ສ່ວນ​ກ່ຽວ­ຂ້ອງ​ກໍ່​ໄດ້​ອອກ​ແຈ້ງ​ການ ອອກ​ກົດ​ລະ­ບຽບ​ຫຼາຍ​ສະ­ບັບ ແຕ່​ໃນ​ສະ­ພາບ​ຕົວ​ຈິງ​ຍັງ​ມີ​ຮ້ານ​ບັນ­ເທີງ ຮ້ານ​ກິນ​ດື່ມ ແລະ ຕາມ​ສະ­ຖານ­ທີ່​ຊຸມ​ແຊວ​ຕ່າງໆ​ເປີດ​ເພງ​ດັງ​ເກີນ​ຂອບ​ເຂດ​ຈົນ​ທ່ຽງ​ຄືນ ກໍ່​ມີ​ສຳ­ລັບ​ການ​ເປີດ​ເພງ​ດັງໆ​ຢູ່​ໃນ​ລົດ​ຂັບ​ຂີ່​ເລາະ​ບ້ານ​ເລາະ​ເມືອງ​ໃນ​ປັດ­ຈຸ­ບັນ ສັງ­ຄົມ​ໃຫ້​ຄວາມ​ສົນ­ໃຈ​ຫຼາຍ ແລະ ຝາກ​ເຖິງ​ເຈົ້າ​ໜ້າ­ທີ່ ທີ່​ກ່ຽວ­ຂ້ອງ​ລົງ​ມາ​ກວດ­ກາ ແລະ ແກ້​ໄຂ​ບັນ­ຫາ​ດັ່ງ­ກ່າວ.

    ເພື່ອ​ສະ­ກັດ​ກັ້ນ​ບໍ່​ໃຫ້​ເກີດ​ມົນ​ລະ​ພິດ​ທາງ​ສຽງ ເພື່ອ​ຄວາມ​ເປັນ​ລະ­ບຽບ​ຮຽບ​ຮ້ອຍ​ຂອງ​ສັງ­ຄົມ ທັງ​ເປັນ​ການ​ຮັກ­ສາ​ສຸ­ຂະ­ພາບ ເປັນ​ການ​ປົກ​ປັກ​ຮັກ­ສາ​ສິ່ງ­ແວ­ດລ້ອມ ຄວາມ​ເປັນ​ລະ­ບຽບ​ຮຽບ​ຮ້ອຍ ແລະ ຄວາມ​ສະ­ຫງົບ​ສຸກ​ຂອງ​ສັງ­ຄົມ.

ຂ່າວທີ່ກ່ຽວຂ້ອງ