ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 29/11/2018

117 29 ພ.ຈ. 2018 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ມີ​ຫຼາຍ​ເລື່ອງ​ທີ່​ໜ້າ​ສົນ­ໃຈ ເຊັ່ນ: ແຜນ​ເປີດ​ຮັບ​ແຮງ​ງານ​ຕ່າງ­ປະ­ເທດ​ຂອງ​ຍີ່­ປຸ່ນ ເລື່ອງ​ອິນ​ເດຍ ເພີ່ມ​ມາດ​ຕະ­ການ​ແກ້​ໄຂ​ມົນ​ລະ​ພິດ​ທາງ​ອາ­ກາດ ແລະ ຂ່າວ​ກ່ຽວ​ກັບ​ແຜນ​ຈັດ​ສັນ​ທີ່​ດິນ​ຟາມ​ຄືນ­ໃໝ່​ທີ່ ອາ​ຟຣິ​ກາ​ໃຕ້.

    ທີ່ ຍີ່­ປຸ່ນ: ໃນ​ປັດ­ຈຸ­ບັນ ປະ­ເທດ​ຍີ່­ປຸ່ນ ພວມ​ປະ​ເຊີນ​ກັບ​ບັນ­ຫາ​ຂາດ­ແຄນ​ແຮງ​ງານ​ຢ່າງ​ໜັກ­ໜ່ວງ ຍ້ອນ​ອັດ­ຕາ​ການ​ເກີດ​ໜ້ອຍ ໃນ​ຂະ­ນະ​ທີ່​ສັງ­ຄົມ​ພວມ​ກາຍ­ເປັນ​ສັງ­ຄົມ​ຜູ້​ເຖົ້າ​ລົ້ນ​ເມືອງ ຍີ່­ປຸ່ນ ມີ­ແຮງ​ງານ​ຕ່າງ­ປະ­ເທດ ຈຳ­ນວນ 1,28 ລ້ານ​ຄົນ ແຕ່​ຍັງ​ບໍ່​ພຽງ­ພໍ​ກັບ​ຄວາມ​ຕ້ອງ­ການ​ຕົວ​ຈິງ​ໃນ​ຫຼາຍໆ​ຂະ­ແໜງ­ການ​ເສດ­ຖະ­ກິດ ແລະ ບໍ­ລິ­ການ ນັບ​ແຕ່​ຂະ­ແໜງ​ກະ­ສິ­ກຳ​ກໍ່­ສ້າງ​ໂຮງ­ແຮມ ຈົນ​ຮອດ​ຂະ­ແໜງ­ການ​ແພດ ຍ້ອນ​ແນວ​ນີ້​ເອງ ລັດ­ຖະ­ບານ​ຍີ່­ປຸ່ນ ຈຶ່ງ​ໄດ້​ຜ່ານ​ຮ່າງ​ກົດ­ໝາຍ​ເປີດ​ຮັບ​ແຮງ​ງານ​ຕ່າງ­ປະ­ເທດ ໃນ​ຂະ­ແໜງ​ທຸ­ລະ​ກິດ​ທີ່​ຂາດ­ເຂີນ​ແຮງ​ງານ​ຢ່າງ​ໜັກ­ໜ່ວງ​ດັ່ງ​ໄດ້​ກ່າວ​ມາ​ຂ້າງ​ເທິງ​ນີ້ ທາງ​ການ​ຍີ່­ປຸ່ນ​ໄດ້​ລະ­ບຸ​ຈຳ­ນວນ​ແຮງ​ງານ​ຕ່າງ­ປະ­ເທດ​ທີ່​ຈະ​ເປີດ​ຮັບ​ໃໝ່ ແຕ່​ທາງ​ວົງ​ການ​ສື່​ໄດ້​ຄາດ​ໄວ້​ວ່າ​ຈະ​ສູງ​ເຖິງ 500.000 ຄົນ.

    ຮ່າງ​ກົດ­ໝາຍ​ເປີດ​ຮັບ​ແຮງ​ງານ​ຕ່າງ­ປະ­ເທດ ຈະ​ກຳ­ນົດ​ວີ​ຊາ​ໃໝ່​ສອງ​ປະ­ເພດ ແຮງ​ງານ​ທີ່​ຈະ​ໄດ້​ຮັບ​ວີ​ຊາ​ປະ­ເພດ​ທຳ​ອິດ ຕ້ອງ​ມີ​ຄວາມ​ສາ­ມາດ​ດ້ານ​ພາ­ສາ​ຍີ່­ປຸ່ນ ມີ​ສີ­ມື​ລະ­ດັບ​ໃດ​ລະ­ດັບ​ໜຶ່ງ ແຮງ​ງານ​ປະ­ເພດ​ນີ້​ຈະ​ສາ­ມາດ​ຢູ່ ແລະ ອອກ­ແຮງ​ງານ​ຢູ່​ຍີ່­ປຸ່ນ​ໄດ້​ສູງ​ສຸດ 5 ປີ ແຕ່​ບໍ່​ສາ­ມາດ​ເອົາ​ຄອບ­ຄົວ​ໄປ​ຢູ່​ນຳ ສ່ວນ​ແຮງ​ງານ​ທີ່​ຈະ​ໄດ້​ຮັບ​ວີ​ຊາ​ປະ­ເພດ​ຕໍ່​ໄປ​ນັ້ນ ຈະ​ຕ້ອງ​ມີ​ຄວາມ​ຊຳ­ນານ​ງານ​ສູງ ສາ­ມາດ​ເອົາ​ຄອບ­ຄົວ​ໄປ​ຢູ່​ນຳ ແລະ ຈະ​ໄດ້​ຮັບ​ສະ­ຖາ­ນະ​ພາບ​ຜູ້​ອາ­ໄສ​ໃນ​ທີ່​ສຸດ ແນວ­ໃດ​ກໍ່​ດີ ນະ­ໂຍ­ບາຍ​ເປີດ​ຮັບ​ແຮງ​ງານ​ຕ່າງ­ປະ­ເທດ​ນີ້ ກໍ່​ໄດ້​ສ້າງ​ຄວາມ​ກັງ­ວົນ​ໃຈ ສຳ­ລັບ​ສະ­ມາ­ຊິກ​ລັດ​ຖະ​ສະ­ພາ​ຫຼາຍ​ທ່ານ ເພາະ​ຢ້ານ​ຈະ​ກໍ່­ໃຫ້­ເກີດ​ມີ​ບັນ­ຫາ​ອາ​ຊະ​ຍາ​ກຳ ແລະ ສົ່ງ​ຜົນ​ກະ­ທົບ​ຕໍ່​ຄ່າ​ແຮງ​ງານ​ຄົນ​ຍີ່­ປຸ່ນ ສ່ວນ​ພັກ​ຝ່າຍ​ຄ້ານ​ນັ້ນ​ເຫັນ​ວ່າ ນະ­ໂຍ­ບາຍ​ນີ້​ເປັນ​ການ​ຟ້າວ​ຝັ່ງ​ເກີນ​ໄປ ທັງໆ​ທີ່​ລັດ­ຖະ­ບານ​ຍັງ​ບໍ່​ທັນ​ມີ​ມາດ​ຕະ­ການ​ຄຸ້ມ​ຄອງ​ສິດ­ທິ​ແຮງ​ງານ​ຕ່າງ­ປະ­ເທດ​ເທື່ອ ແຕ່​ຜ່ານ​ການ​ສຳ​ຫຼວດ​ຄຳ​ເຫັນ​ກ່ຽວ​ກັບ​ນະ­ໂຍ­ບາຍ​ນີ້ ໄດ້​ຊີ້​ອອກ​ວ່າ 51% ຂອງ​ຜູ້​ອອກ​ຄຳ​ເຫັນ​ໄດ້​ສະ­ໜັບ­ສະ­ໜູນ​ໃຫ້​ນຳ​ເຂົ້າ​ແຮງ​ງານ​ດິບ (ແຮງ​ງານ​ບໍ່​ມີ​ທັດ­ສະ­ນະ​ສະ­ເພາະ) ຫຼາຍ​ຂຶ້ນ

    ທີ່ ອິນ​ເດຍ: ມີ​ຂ່າວ​ຈາກ​ອິນ​ເດຍ​ຫວ່າງ​ບໍ່​ດົນ​ມາ​ນີ້​ວ່າ ທາງ​ການ​ຂອງ​ປະ­ເທດ​ນີ້ ອາດ​ຫ້າມ​ນຳ​ໃຊ້​ລົດ​ສ່ວນ​ຕົວ​ຢູ່​ພາຍ​ໃນ​ນະ­ຄອນ­ຫຼວງ ຍ້ອນ​ວ່າ​ມົນ​ລະ​ພິດ​ທາງ​ອາ­ກາດ​ໄດ້​ເພີ່ມ​ລະ­ດັບ​ອັນ­ຕະ­ລາຍ​ຮ້າຍ​ແຮງ​ທີ່​ສຸດ​ໃນ​ຫຼາຍ​ມື້​ຜ່ານ​ມາ ນະ­ຄອນ­ຫຼວງ ນິວ​ເດລີ ແລະ ບັນ­ດາ​ຕົວ​ເມືອງ​ໃນ​ເຂດ​ພາກ​ເໜືອ​ຂອງ​ປະ­ເທດ ໄດ້​ປະ​ເຊີນ​ກັບ​ບັນ­ຫາ​ໝອກ​ຄວັນ​ພິດ​ເປັນ​ປະ­ຈຳ​ແຕ່​ລະ​ປີ ເຊິ່ງ​ເກີດ​ມາ​ຈາກ​ການ​ເຜົາ​ຈູດ​ເສດ​ພືດ​ພັນ​ຕາມ​ທ້ອງ​ທົ່ງ​ນາ​ຕ່າງໆ ພາຍ­ຫຼັງ​ການ​ເກັບ​ກ່ຽວ ເພື່ອ​ແກ້​ໄຂ​ບັນ­ຫາ​ມົນ​ລະ​ພິດ​ໃນ​ກະ​ໂຕ​ນະ­ຄອນ­ຫຼວງ ນິວ​ເດລີ ທາງ​ການ​ອິນ​ເດຍ​ໄດ້​ສະ­ເໜີ​ງົດ​ກິດ­ຈະ­ການ​ກໍ່­ສ້າງ ການ​ໃຊ້​ເຄື່ອງ​ປັ່ນ​ໄຟ­ຟ້າ​ທີ່​ໃຊ້​ນ້ຳ­ມັນ​ແອັດ​ຊັງ ໄປ​ພ້ອມໆ​ກັບ​ການ​ສັ່ງ​ງົດ ການ​ເຜົາ​ດິນ­ຈີ່ ແລະ ການ​ຈູດ​ຂີ້​ເຫຍື້ອ ໃນ​ລະ­ຫວ່າງ​ວັນ​ທີ 1-10 ເດືອນ​ພະ­ຈິກ ແຕ່​ຖ້າ­ວ່າ​ອາ­ກາດ​ຍັງ​ບໍ່​ດີ​ຂຶ້ນ ທາງ​ການ​ກໍ່​ຈະ​ສັ່ງ​ຢຸດ​ການ​ໃຊ້​ລົດ​ສ່ວນ​ຕົວ​ອີກ​ຕື່ມ.

    ທີ່ ອາ​ຟຣິ​ກາ​ໃຕ້: ມີ​ຂ່າວ​ຈາກ​ໜັງ­ສື­ພິມ ເດິ​ເນ​ເຊິນ (The Nation) ທີ່​ໃຫ້​ຮູ້​ວ່າ: ລັດ­ຖະ­ບານ​ອາ​ຟຣິ​ກາ​ໃຕ້ ມີ​ແຜນ​ປັບ­ປຸງ​ລັດ​ຖະ​ທຳ​ມະ­ນູນ ທີ່​ອະ­ນຸ­ຍາດ​ໃຫ້​ມີ​ການ​ຈັດ​ສັນ​ທີ່​ດິນ​ປູກ­ຝັງ-ລ້ຽງ­ສັດ ແລະ ຜະ­ລິດ​ກະ­ສິ­ກຳ​ຄືນ­ໃໝ່ ເພາະ​ໃນ​ປັດ­ຈຸ­ບັນ ດິນ​ຟາມ ຈຳ­ນວນ 72% ແມ່ນ​ຢູ່​ໃນ​ກຳ­ມື​ຂອງ​ພົນ­ລະ­ເມືອງ​ຜິວ​ຂາວ ເຊິ່ງ​ກວມ​ເອົາ​ພຽງ 8% ຂອງ​ພົນ­ລະ­ເມືອງ​ປະ­ເທດ ແຜນ­ການ​ແບ່ງ­ປັນ​ທີ່​ດິນ​ຄືນ­ໃໝ່​ນັ້ນ ແມ່ນ​ຈະ​ບໍ່​ມີ​ການ​ຊົດ​ເຊີຍ​ຄືນ ແຜນ­ການ​ດັ່ງ­ກ່າວ ໄດ້​ຮັບ​ການ​ຕຳ​ນິ​ຈາກ​ບັນ­ດາ​ອະ­ດີດ​ຜູ້­ນຳ​ພັກ​ແຫ່ງ​ຊາດ​ອາ​ຟຣິ​ກາ (ANC) ວ່າ​ທໍ­ລະ​ຍົດ​ຕໍ່​ອຸ­ດົມ​ການ​ຂອງ ANC ທີ່​ຕໍ່­ສູ້​ເພື່ອ​ປະ­ຊາ­ຊົນ​ທັງ​ຜິວ​ດຳ ແລະ ຜິວ​ຂາວ.

ຂ່າວທີ່ກ່ຽວຂ້ອງ