ແລກປ່ຽນປະສົບການຈັດຕັ້ງປະຕິບັດພັນທະ ໃນນາມປະເທດພາຄີ

420 29 ພ.ຈ. 2018 ຂ່າວໜ້າ​ໜຶ່ງ
ແລກປ່ຽນປະສົບການຈັດຕັ້ງປະຕິບັດພັນທະ ໃນນາມປະເທດພາຄີ

    ສະ​ຖາ​ບັນ​ນິ­ເວດ​ວິ­ທະ­ຍາ ແລະ ເຕັກ​ໂນ​ໂລ​ຊີ​ຊີ­ວະ​ພາບ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ (ກວ​ຕ) ຮ່ວມ​ກັບ​ສະ​ຖາ​ບັນ​ຄົ້ນ­ຄວ້າ​ເພື່ອ​ການ​ພັດ­ທະ­ນາ ໂຄງ­ການ​ພັດ­ທະ­ນາ​ແບບ​ຍືນ​ຍົງ​ໃນ​ການ​ນຳ​ໃຊ້​ພືດ ແລະ ສະ­ຖານ­ທູດ​ຝຣັ່ງ​ປະ­ຈຳ​ລາວ ຈັດ​ກອງ​ປະ­ຊຸມ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ອະ­ນຸ​ສັນ­ຍາ​ນາ​ໂກ​ຢາ ວ່າ​ດ້ວຍ​ການ​ເຂົ້າ​ເຖິງ ແລະ ການ​ແບ່ງ­ປັນ​ຜົນ​ປະ­ໂຫຍດ​ຈາກ​ການ​ນຳ​ໃຊ້​ຊັບ­ພະ­ຍາ­ກອນ​ພັນ­ທຸ​ກຳ​ແບບ​ສະ­ເໝີ­ພາບ ແລະ ເປັນ​ທຳ ຈັດ​ຂຶ້ນ​ວັນ​ທີ 28-29 ພະ­ຈິກ 2018 ຢູ່​ໂຮງ­ແຮມ​ລາວ​ພລາ​ຊາ ໂດຍ​ເປັນ​ປະ­ທານ​ຮ່ວມ​ຂອງ​ທ່ານ ສຸ​ລິ​ອຸ​ດົງ ສູນ​ດາ­ລາ ຮອງ​ລັດ­ຖະ­ມົນ­ຕີ ກວ​ຕ ແລະ ທ່ານ​ນາງ ຟລໍ​ຣັອງ​ສ ຊັອງ​ບລັອງ-ຣິ​ສ​ແລກ ເອກ​ອັກ​ຄະ​ລັດ​ຖະ​ທູດ​ຝຣັ່ງ​ປະ­ຈຳ​ລາວ ມີ​ຜູ້­ຕາງ­ໜ້າ​ຈາກ​ຂະ­ແໜງ­ການ ອົງ­ການ​ພາຍ​ໃນ​ພາກ​ພື້ນ ແລະ ສາ­ກົນ ເຂົ້າ​ຮ່ວມ.

    ເພື່ອ​ສ້າງ​ໂອ­ກາດ​ອັນ​ດີ​ໃຫ້­ການ​ແລກ­ປ່ຽນ​ບົດ­ຮຽນ ແລະ ປະ­ສົບ​ການ​ກ່ຽວ​ກັບ​ການ​ປະ­ຕິ­ບັດ​ພັນ­ທະ ໃນ​ນາມ​ປະ­ເທດ​ພາ­ຄີ​ອະ­ນຸ​ສັນ­ຍາ​ນາ​ໂກ​ຢາ ວ່າ​ດ້ວຍ​ການ​ເຂົ້າ​ເຖິງ ແລະ ການ​ແບ່ງ­ປັນ​ຜົນ​ປະ­ໂຫຍດ ຈາກ​ການ​ນຳ​ໃຊ້​ຊັບ­ພະ­ຍາ­ກອນ​ພັນ­ທຸ​ກຳ​ແບບ​ສະ­ເໝີ­ພາບ ແລະ ເປັນ​ທຳ ພາຍ​ໃຕ້​ສົນ­ທິ­ສັນ­ຍາ​ວ່າ​ດ້ວຍ​ຄວາມ​ຫຼວງ­ຫຼາຍ​ດ້ານ​ຊີ­ວະ​ນາໆພັນ​ທີ່ ສປປ ລາວ ເປັນ​ພາ­ຄີ​ຂອງ​ສົນ­ທິ­ສັນ­ຍາ​ວ່າ​ດ້ວຍ​ສາ­ກົນ​ດັ່ງ­ກ່າວ ເຊິ່ງ​ລັດ­ຖະ­ບານ​ລາວ​ໃຫ້​ສັດ­ຕະ­ຍາ­ບັນ​ອະ­ນຸ​ສັນ­ຍາ​ນາ​ໂກ​ຢາ​ໃນ​ເດືອນ​ກັນ­ຍາ 2012 ແລະ ມີ​ຜົນ​ບັງ­ຄັບ​ໃຊ້​ທົ່ວ​ໂລກ​ຫຼັງ​ເດືອນ​ຕຸ­ລາ 2014 ຈຸດ­ປະ­ສົງ​ຫຼັກ​ຂອງ​ອະ­ນຸ​ສັນ­ຍາ​ດັ່ງ­ກ່າວ ແມ່ນ​ບົນ​ພື້ນ­ຖານ​ການ​ເຂົ້າ​ເຖິງ ແລະ ການ​ແບ່ງ­ປັນ​ຜົນ​ປະ­ໂຫຍດ​ຈາກ​ການ​ນຳ​ໃຊ້​ຊັບ­ພະ­ຍາ­ກອນ​ພັນ­ທຸ​ກຳ ໂດຍ​ຜ່ານ​ການ​ຂໍ­ອະ­ນຸ­ຍາດ ແລະ ຂໍ້​ຕົກ­ລົງ​ຮ່ວມ​ກັນ​ລະ­ຫວ່າງ​ຜູ້­ນຳ​ໃຊ້ ແລະ ຜູ້​ເປັນ​ເຈົ້າ​ຂອງ​ຊັບ­ພະ­ຍາ­ກອນ​ພັນ­ທຸ​ກຳ ລວມ​ເຖິງ​ພູມ​ປັນ­ຍາ​ພື້ນ​ບ້ານ ອັນ​ເປັນ​ມູນ­ເຊື້ອ​ທີ່​ຕິດ​ພັນ​ກັບ​ຊັບ­ພະ­ຍາ­ກອນ​ພັນ­ທຸ​ກຳ ການ­ຈັດ­ຕັ້ງ​ປະ­ຕິ­ບັດ​ອະ­ນຸ​ສັນ­ຍາ​ດັ່ງ­ກ່າວ ປະ­ເທດ​ພາ­ຄີ​ຕ້ອງ​ໄດ້​ສ້າງ​ກົນ​ໄກ ແລະ ລະ­ບຽບ​ການ​ຮອງ​ຮັບ​ໃນ​ການ​ອຳ­ນວຍ​ຄວາມ​ສະ­ດວກ ສົ່ງ­ເສີມ​ການ​ຄົ້ນ­ຄວ້າ ແລະ ພັດ­ທະ­ນາ​ນຳ​ໃຊ້​ຊັບ­ພະ­ຍາ­ກອນ​ພັນ­ທຸ​ກຳ ເພື່ອ​ຕອບ-ຮັບ​ການ​ອະ­ນຸ​ຮັກ ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ສີ­ຂຽວ ແບບ​ຍືນ​ຍົງ ມີ​ການ​ແບ່ງ­ປັນ​ຜົນ​ປະ­ໂຫຍດ​ຈາກ​ການ​ນຳ​ໃຊ້​ຊັບ­ພະ­ຍາ­ກອນ​ດັ່ງ­ກ່າວ.

ຂ່າວທີ່ກ່ຽວຂ້ອງ