ໄຂຂະບວນຄາລາວານທ່ອງທ່ຽວ ສູ່ເມືອງວຽງໄຊ

460 29 ພ.ຈ. 2018 ຂ່າວໜ້າ​ໜຶ່ງ
ໄຂຂະບວນຄາລາວານທ່ອງທ່ຽວ ສູ່ເມືອງວຽງໄຊ

    ພິ­ທີ​ໄຂ​ຂະ​ບວນ​ຄາ​ລາ​ວານ​ທ່ອງ​ທ່ຽວ ສູ່​ເມືອງ​ວຽງ​ໄຊ ແຂວງ​ຫົວ­ພັນ ເພື່ອ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ເມືອງ​ວຽງ​ໄຊ ຖານ​ທີ່​ໝັ້ນ​ຂອງ​ການ​ປະ­ຕິ­ວັດ​ລາວ ຄົບ­ຮອບ 50 ປີ ຈັດ​ຂຶ້ນ​ວັນ​ທີ 28 ພະ­ຈິກ 2018 ເລີ່ມ​ຈາກ​ເດີ່ນ​ສະ­ໜາມ​ຫຼວງ ນະ­ຄອນ­ຫຼວງ​ວຽງ​ຈັນ ໂດຍ​ການ​ເຂົ້າ​ຮ່ວມ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ມີ​ທ່ານ ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພ້ອມ​ດ້ວຍ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ແລະ ພາກ­ສ່ວນ​ກ່ຽວ­ຂ້ອງ.

    ທ່ານ ບໍ່​ແສງ​ຄຳ ວົງ​ດາ­ລາ ກ່າວ​ວ່າ: ຈຸດ­ປະ­ສົງ​ຂອງ​ຄາ​ລາ​ວານ​ຄັ້ງ​ນີ້ ເພື່ອ​ເປັນ​ການ​ສຶກ​ສາ​ຮຽນ​ຮູ້ ແລະ ເຜີຍ­ແຜ່​ຄວາມ​ເອກ­ອ້າງ​ທະ​ນົງ​ໃຈ​ຕໍ່​ມູນ­ເຊື້ອ​ປະ­ຫວັດ­ສາດ ການ​ຕໍ່­ສູ້​ຍືດ​ເຍື້ອ​ຍາວ​ນານ ພິ­ລະ​ອາດ​ຫານ​ຂອງ​ປະ­ຊາ­ຊົນ​ບັນ­ດາ­ເຜົ່າ ແລະ ວີ­ລະ​ກຳ​ລ້ຳ​ເລີດ​ບັນ­ດາ​ວິ­ລະ​ຊົນ ນັກ­ຮົບ​ແຂ່ງ­ຂັນ​ໃນ​ພາ­ລະ­ກິດ​ຕໍ່­ສູ້​ປົດ​ປ່ອຍ​ຊາດ ປົກ​ປັກ​ຮັກ­ສາ ແລະ ການ​ພັດ­ທະ­ນາ​ປະ­ເທດ​ຊາດ​ໃນ​ໄລ­ຍະ​ຜ່ານ​ມາ ພາຍ​ໃຕ້​ການ​ນຳ­ພາ​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ເປັນ​ການ​ລະ­ນຶກ ແລະ ສະ­ແດງ​ຄວາມ​ຮູ້​ບຸນ­ຄຸນ​ຢ່າງ​ເລິກ­ເຊິ່ງ​ຕໍ່​ຜົນ­ງານ ແລະ ຄຸນ­ງາມ­ຄວາມ­ດີ​ອັນ​ໃຫຍ່​ຫຼວງ​ຂອງ​ບັນ­ດາ​ຜູ້­ນຳ​ທີ່​ເຄົາ­ລົບ​ຮັກ ນອກ​ນີ້​ຍັງ​ເປັນ​ການ​ປຸກ­ລະ­ດົມ​ຂົນ­ຂວາຍ ແລະ ສ້າງ​ຂະ​ບວນ​ການ​ໂຄ­ສະ­ນາ​ສົ່ງ­ເສີມ​ປີ​ທ່ອງ​ທ່ຽວ​ລາວ 2018 “ລາວ​ທ່ຽວ​ລາວ” ໂດຍ​ສະ­ເພາະ​ຢູ່​ຖານ​ທີ່​ໝັ້ນ​ຂອງ​ການ​ປະ­ຕິ­ວັດ​ລາວ ກໍ່​ຄື ການ​ດຶງ​ດູດ​ນັກ​ທ່ອງ​ທ່ຽວ​ໃຫ້​ມາ​ຊົມ​ບັນ­ດາ​ແຂວງ​ພາກ​ເໜືອ​ໃຫ້​ນັບ​ມື້​ຫຼາຍ​ຂຶ້ນ ແລະ ເປັນ​ຂະ​ບວນ​ຟົດ­ຟື້ນ ແນ­ໃສ່​ຊຸກ­ຍູ້​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ທ້ອງ­ຖິ່ນ ປະ­ກອບ­ສ່ວນ​ໃນ​ການ​ຫຼຸດ­ຜ່ອນ​ຄວາມ­ທຸກ​ຍາກ​ຂອງ​ປະ­ຊາ­ຊົນ.

    ຄາ​ລາ​ວານ​ທ່ອງ​ທ່ຽວ​ຄັ້ງ​ນີ້ ຈະ​ດຳ­ເນີນ​ແຕ່​ວັນ​ທີ 28 ພະ­ຈິກ-2 ທັນ­ວາ ມີ​ລົດ​ເຂົ້າ​ຮ່ວມ​ຂະ​ບວນ​ຄາ​ລາ​ວານ 110 ຄັນ 528 ທ່ານ ຈະ​ເດີນ­ທາງ​ອອກ​ຈາກ​ນະ­ຄອນ­ຫຼວງ​ວຽງ​ຈັນ ໄປ​ຍັງ​ແຂວງ​ບໍ​ລິ​ຄຳ​ໄຊ ແຂວງ​ຊຽງ​ຂວາງ ແລະ ແຂວງ​ຫົວ­ພັນ ເພື່ອ​ເຂົ້າ​ຮ່ວມ​ພິ­ທີ​ສະ­ເຫຼີມ­ສະ­ຫຼອງ​ເມືອງ​ວຽງ​ໄຊ ຖານ​ທີ່​ໝັ້ນ​ຂອງ​ການ​ປະ­ຕິ­ວັດ​ລາວ ຄົບ­ຮອບ 50 ປີ.

ຂ່າວທີ່ກ່ຽວຂ້ອງ