ລັດຖະບານເຂັ້ມງວດ ວຽກງານກວດກາຄວາມປອດໄພເຂື່ອນໄຟຟ້າ

492 30 ພ.ຈ. 2018 ຂ່າວໜ້າ​ໜຶ່ງ
ລັດຖະບານເຂັ້ມງວດ ວຽກງານກວດກາຄວາມປອດໄພເຂື່ອນໄຟຟ້າ

    ຂະ­ແໜງ​ພະ­ລັງ­ງານ​ໄຟ­ຟ້າ​ຢູ່ ສປປ ລາວ ໄດ້​ເຕີບ​ໃຫຍ່​ຂະ­ຫຍາຍ­ຕົວ​ໄວ ປັດ­ຈຸ­ບັນ​ມີ​ກຳ­ລັງ​ຕິດ​ຕັ້ງ​ໄຟ­ຟ້າ​ລວມ​ປະ­ມານ 2.207 ເມ​ກາ​ວັດ ຖ້າ​ທຽບ­ໃສ່​ປີ 2006 ມີ​ພຽງ 580 ເມ​ກາ​ວັດ ໂດຍ​ການ​ວາງ​ນະ­ໂຍ­ບາຍ​ທີ່​ຖືກ­ຕ້ອງ​ຂອງ​ລັດ­ຖະ­ບານ ສາ­ມາດ​ດຶງ​ດູດ​ການ​ພັດ­ທະ­ນາ​ແຫຼ່ງ​ຜະ­ລິດ​ພະ­ລັງ­ງານ​ໄຟ­ຟ້າ ໂດຍ​ໂຄງ­ການ IPP ໄດ້​ຫຼາຍ​ຂຶ້ນ ແລະ ຕອບ​ສະ­ໜອງ​ຕະ­ຫຼອດ​ພະ­ລັງ­ງານ​ທັງ​ພາຍ​ໃນ-ຕ່າງ­ປະ­ເທດ​ໄດ້​ດີ​ສົມ­ຄວນ ເມື່ອ​ສະ­ຖານ­ທີ່​ການ​ຜະ­ລິດ​ພະ­ລັງ­ງານ​ໄຟ­ຟ້າ​ມີ​ຈຳ­ນວນ​ຫຼາຍ​ເທົ່າ­ໃດ ລັດ­ຖະ­ບານ​ຈຳ­ເປັນ​ຕ້ອງ​ເພີ່ມ​ທະ­ວີ​ວຽກ​ງານ​ກວດ­ກາ​ຄຸ້ມ​ຄອງ ດ້ວຍ​ຄວາມ​ຮັບ­ຜິດ­ຊອບ​ຍິ່ງ​ສູງ​ຂຶ້ນ ເນື່ອງ​ຈາກ​ຖ້າ​ເກີດ​ກໍ­ລະ­ນີ​ເຂື່ອນ​ໄຟ­ຟ້າ​ພະ­ລັງ­ງານ​ນ້ຳ​ປະ­ສົບ​ບັນ­ຫາ ໂດຍ​ສະ­ເພາະ​ບັນ­ຫາ​ເຂື່ອນ​ແຕກ ໄດ້​ສ້າງ​ຜົນ​ເສຍ​ໃຫ້​ຊີ­ວິດ ຊັບ​ສິນ ແລະ ສິ່ງ­ແວ­ດລ້ອມ​ຢ່າງ​ມະ­ຫາ­ສານ.

    ກົມ​ຄຸ້ມ​ຄອງ​ພະ­ລັງ­ງານ ກະ­ຊວງ​ພະ­ລັງ­ງານ ແລະ ບໍ່​ແຮ່ (ພບ) ຈັດ​ກອງ​ປະ­ຊຸມ​ເຜີຍ­ແຜ່ ແລະ ປຶກ­ສາ​ຫາ­ລື​ກ່ຽວ​ກັບ​ແຜນ​ດຳ­ເນີນ​ການ​ກວດ­ກາ​ຄວາມ​ປອດ​ໄພ​ຂອງ​ເຂື່ອນ​ໄຟ­ຟ້າ ທີ່​ມີ​ກຳ­ລັງ​ຕິດ​ຕັ້ງ​ຫຼາຍ​ກວ່າ 15 ເມ​ກາ​ວັດ​ຂຶ້ນ​ໄປ​ທັງ ຢູ່​ໃນ​ໄລ­ຍະ​ດຳ­ເນີນ​ການ​ຜະ­ລິດ ແລະ ກໍ່­ສ້າງ​ໃນ​ທົ່ວ​ປະ­ເທດ 52 ໂຄງ­ການ ຈັດ​ຂຶ້ນ​ວັນ​ທີ 29 ພະ­ຈິກ 2018 ຢູ່​ກະ­ຊວງ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ສີ​ນາ­ວາ ສຸ​ພາ­ນຸ​ວົງ ຮອງ​ລັດ­ຖະ­ມົນ­ຕີ​ກະ­ຊວງ ພບ ມີ​ບັນ­ດາ​ກົມ ຫ້ອງ­ການ ແລະ ຜູ້​ປະ­ກອບ​ການ​ທຸ­ລະ​ກິດ​ເຂົ້າ​ຮ່ວມ.

    ທ່ານ​ຮອງ​ລັດ­ຖະ­ມົນ­ຕີ ກ່າວ​ວ່າ: ເພື່ອ​ຫຼີກ­ເວັ້ນ ແລະ ຫຼຸດ­ຜ່ອນ​ບັນ­ຫາ​ຜົນ​ກະ­ທົບ​ຈາກ​ເຂື່ອນ​ໄຟ­ຟ້າ ເປັນ­ຕົ້ນ ບັນ­ຫາ​ເຂື່ອນ​ແຕກ ກະ­ຊວງ ພບ ໄດ້​ອອກ​ແຈ້ງ​ການ​ເຖິງ​ເຈົ້າ​ຂອງ​ເຂື່ອນ​ໄຟ­ຟ້າ​ທົ່ວ​ປະ­ເທດ ໃຫ້​ດຳ­ເນີນ​ການ​ກວດ­ກາ​ຄວາມ​ປອດ​ໄພ​ຂອງ​ເຂື່ອນ​ຕົນ​ເອງ ແລ້ວ​ສົ່ງ​ບົດ​ລາຍ​ງານ​ໃຫ້​ກະ­ຊວງ ພບ ໂດຍ​ສົມ­ທົບ​ກັບ​ຊ່ຽວ­ຊານ​ຕ່າງ­ປະ­ເທດ ເພື່ອ​ດຳ­ເນີນ​ການ​ທົບ​ທວນ ແລະ ມີ​ມາດ​ຕະ­ການ​ໃນ​ຂັ້ນ​ຕໍ່​ໄປ ເຊິ່ງ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ກວດ­ກາ​ດັ່ງ­ກ່າວ ໄດ້​ເນັ້ນ​ໃຫ້​ເຂື່ອນ​ໄຟ­ຟ້າ​ພະ­ລັງ­ງານ​ນ້ຳ ເນັ້ນ​ກວດ­ກາ​ຄືນ​ການ​ອອກ​ແບບ​ກໍ່­ສ້າງ ແລະ ການ​ບໍ­ລິ­ຫານ​ຄຸ້ມ​ຄອງ​ນ້ຳ​ໃນ​ເຂື່ອນ​ເປັນ​ຫຼັກ.

ຂ່າວທີ່ກ່ຽວຂ້ອງ