ຂ່າວຫຼ້າສຸດ

ຮັບຮອງການຊີ້ແຈງກ່ຽວກັບຄຸນະພາບການບໍລິການ ການປິ່ນປົວຢູ່ໂຮງໝໍ ສຸກສາລາ

262 30 ພ.ຈ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ວັນ​ທີ 29 ພະ­ຈິກ 2018 ຢູ່​ຫໍ​ສະ­ພາ​ແຫ່ງ​ຊາດ (ຫຼັກ 6) ໂດຍ​ເປັນ​ປະ­ທານ​ຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ບັນ­ດາ​ລັດ­ຖະ­ມົນ­ຕີ ພ້ອມ​ດ້ວຍ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ເຂົ້າ​ຮ່ວມ.

    ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກ່າວ​ວ່າ: ປີ 2016-2018 ໄດ້​ມີ​ຜົນ­ສຳ­ເລັດ ໃນ​ການ​ຈັດ​ຕັງ​ປະ­ຕິ­ບັດ​ວຽກ​ງານ​ພັດ­ທະ­ນາ​ຊົນ­ນະ­ບົດ ແລະ ລຶ­ບລ້າງ​ຄວາມ­ທຸກ​ຍາກ​ຢູ່​ຈຸດ​ສຸມ​ຕ່າງໆ ເຮັດ​ໃຫ້​ລະ­ບົບ​ການ­ເມືອງ​ຂັ້ນ​ຮາກ​ຖານ​ຂອງ​ທ້ອງ­ຖິ່ນ​ຕ່າງໆ ໄດ້​ຮັບ​ການ​ປັບ­ປຸງ​ມີ​ຄວາມ​ເຂັ້ມ­ແຂງ​ໜັກ​ແໜ້ນ ພື້ນ­ຖານ​ໂຄງ​ລ່າງ​ໄດ້​ຮັບ​ການ​ປັບ­ປຸງ ຍົກ​ລະ­ດັບ ແລະ ກໍ່­ສ້າງ​ໃໝ່ ເພື່ອ​ເອື້ອ​ອຳ­ນວຍ​ໃຫ້­ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ​ເປັນ​ພື້ນ­ຖານ ໃຫ້­ການ​ສູ້​ຊົນ​ບັນ­ລຸ​ຄາດ­ໝາຍ​ດ້ານ​ການ​ພັດ­ທະ­ນາ​ຊົນ­ນະ­ບົດ ແລະ ລຶ­ບລ້າງ​ຄວາມ­ທຸກ​ຍາກ ທີ່​ຕິດ​ພັນ​ກັບ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ໃນ​ນີ້ 11.725 ຄອບ­ຄົວ ໄດ້​ຫຼຸດ​ພົ້ນ​ອອກ​ຈາກ​ຄອບ­ຄົວ​ທຸກ​ຍາກ ຍັງ​ເຫຼືອ 64.593 ຄອບ­ຄົວ ກວມ 5.34% ຂອງ​ຄອບ­ຄົວ​ທັງ​ໝົດ​ທົ່ວ​ປະ­ເທດ ລຶ­ບລ້າງ​ບ້ານ​ທີ່​ມີ​ຄວາມ­ທຸກ​ຍາກ​ຫຼາຍ​ກວ່າ 50% ຂຶ້ນ​ເມືອ ຂອງ​ຈຳ­ນວນ​ຄອບ­ຄົວ​ພາຍ​ໃນ​ບ້ານ​ໄດ້ 22 ບ້ານ ຍັງ​ເຫຼືອ 657 ບ້ານ ລຶ­ບລ້າງ​ບ້ານ​ທຸກ​ຍາກ​ໄດ້ 153 ບ້ານ ຍັງ​ເຫຼືອ 1.536 ບ້ານ ກວມ 18,83% ຂອງ​ບ້ານ​ທັງ​ໝົດ ສ້າງ​ບ້ານ​ພັດ­ທະ­ນາ​ໄດ້ 253 ບ້ານ ລວມ​ເປັນ 4.138 ບ້ານ ສ້າງ​ບ້ານ​ໃຫຍ່​ທີ່​ມີ​ລັກ­ສະ­ນະ​ຕົວ​ເມືອງ​ນ້ອຍ​ໃນ​ຊົນ­ນະ­ບົດ​ໄດ້ 28 ບ້ານ ລວມ​ເປັນ 58 ບ້ານ ໃນ​ປີ 2018.

    ພ້ອມ​ນີ້ ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ກໍ່​ໄດ້​ຂຶ້ນ​ຊີ້​ແຈງ​ກ່ຽວ​ກັບ​ຄຸ­ນະ­ພາບ​ການ​ບໍ­ລິ­ການ ການ​ປິ່ນ­ປົວ​ຢູ່​ໂຮງ­ໝໍ ສຸກ­ສາ­ລາ ແລະ ທິດ​ທາງ​ແກ້​ໄຂ​ໃນ­ຕໍ່­ໜ້າ ຈາກ​ນັ້ນ ສສຊ ກໍ່​ໄດ້​ປະ­ກອບ​ຄຳ​ຄິດ​ເຫັນ ໂດຍ​ສະ­ເພາະ​ວຽກ​ງານ​ຕາງ​ໜ່າງ​ສາ­ທາ­ລະ­ນະ​ສຸກ ຝາກ​ໃຫ້​ມີ​ການ​ລົງ­ທຶນ​ສ້າງ​ໂຮງ­ໝໍ ແລະ ສຸກ­ສາ­ລາ​ໃຫ້​ຫຼາຍ​ຂຶ້ນ ເພື່ອ​ຫຼຸດ­ຜ່ອນ​ການ​ໄປ​ປິ່ວ​ປົວ​ຢູ່​ປະ­ເທດ​ເພື່ອນ​ບ້ານ ສ້າງ​ບຸ​ຄະ­ລາ​ກອນ​ໃຫ້​ຕິດ​ພັນ​ກັບ​ການ​ບໍ­ລິ­ການ​ຄຸ້ມ​ຄອງ​ໂຮງ­ໝໍ​ເອ­ກະ​ຊົນ ແລະ ຮ້ານ​ຂາຍ​ຢາ ສ້າງ​ບຸ​ຄະ­ລາ​ກອນ ເພື່ອ​ຄຸ້ມ​ຄອງ​ອຸ­ປະ­ກອນ​ການ​ແພດ ການ​ນຳ​ໃຊ້​ບັດ​ປະ­ກັນ​ສຸ­ຂະ­ພາບ​ຍັງ​ບໍ່​ທັນ​ເປັນ​ເອ­ກະ​ພາບ​ລະ­ຫວ່າງ​ໂຮງ­ໝໍ​ເມືອງ ແລະ ແຂວງ ການ​ນຳ​ສົ່ງ​ຄົນ​ເຈັບ​ຈາກ​ເມືອງ​ໄປ​ແຂວງ​ຍັງ​ມີ​ຄວາມ​ຊັກ​ຊ້າ ບາງ​ຄັ້ງ​ກໍ​ເມີນ­ເສີຍ ການ­ບົ່ງ­ມະ­ຕິ​ພະ­ຍາດ​ຍັງ​ບໍ່​ຖືກ­ຕ້ອງ ແລະ ຊັດ​ເຈນ ແພດ​ໝໍ​ທີ່​ປະ­ຈຳ​ຢູ່​ສຸກ­ສາ­ລາ​ຍັງ​ບໍ່​ພຽງ­ພໍ​ຕໍ່​ຄົນ​ເຈັບ ການ​ໂຄ­ສະ­ນາ​ຢາ​ເກີນ​ເຫດ ລວມ​ທັງ​ຢາກ​ໃຫ້​ເຂັ້ມ​ງວດ​ໃນ​ການ​ສຶກ​ສາ​ອົບ­ຮົມ​ຈັນ​ຍາ​ບັນ-ຈັນ­ຍາ­ທຳ​ຂອງ​ແພດ​ໝໍ ແລະ ອື່ນໆ ເພື່ອ​ຍົກ​ສູງ​ດ້ານ​ສຸ­ຂະ­ພາບ ແລະ ການ​ບໍ­ລິ­ການ​ຂອງ​ແພດ​ໃຫ້​ດີ​ຂຶ້ນ.

    ຕອຍ​ທ້າຍ ສສຊ ກໍ່​ໄດ້​ພ້ອມ​ກັນ​ລົງ​ຄະ­ແນນ​ສຽງ ຮັບ­ຮອງ​ເອົາ​ການ​ຊີ້​ແຈງ​ກ່ຽວ​ກັບ​ຄຸ­ນະ­ພາບ​ການ​ບໍ­ລິ­ການ ການ​ປິ່ນ­ປົວ​ຢູ່​ໂຮງ­ໝໍ ສຸກ­ສາ­ລາ ແລະ ທິດ​ທາງ​ແກ້​ໄຂ​ໃນ­ຕໍ່­ໜ້າ ດ້ວຍ​ຄະ­ແນນ​ສຽງ​ສ່ວນ​ໃຫຍ່.

ຂ່າວທີ່ກ່ຽວຂ້ອງ