ຂ່າວຫຼ້າສຸດ

ຍີ່ປຸ່ນຊ່ວຍເຫຼືອ ໂຄງການສົ່ງເສີມຄວາມສະເໝີພາບ ຍິງ-ຊາຍ

382 04 ທ.ວ. 2018 ຂ່າວໜ້າ​ໜຶ່ງ
ຍີ່ປຸ່ນຊ່ວຍເຫຼືອ ໂຄງການສົ່ງເສີມຄວາມສະເໝີພາບ ຍິງ-ຊາຍ

    ພິ­ທີ​ລົງ​ນາມ​ສັນ­ຍາ​ໂຄງ­ການ​ຊ່ວຍ­ເຫຼືອ​ລ້າ ໃຫ້​ອົງ​ການ­ຈັດ­ຕັ້ງ​ບໍ່​ສັງ­ກັດ​ລັດ­ຖະ­ບານ ໂຄງ­ການ​ສົ່ງ­ເສີມ​ຄວາມ​ສະ­ເໝີ­ພາບ​ບົດ­ບາດ​ຍິງ-ຊາຍ ໃນ​ໂຮງ­ຮຽນ​ມັດ­ທະ­ຍົມ​ສຶກ​ສາ ຈັດ​ຂຶ້ນ​ວັນ​ທີ 29 ພະ­ຈິກ 2018 ຢູ່​ສະ­ຖານ­ທູດ​ຍີ່­ປຸ່ນ ປະ­ຈຳ​ລາວ ລະ­ຫວ່າງ​ທ່ານ ທາ​ເຄ​ຊິ ຮິ​ຄິ​ຮາ​ຣະ ເອກ​ອັກ­ຄະ­ລາ­ຊະ­ທູດ​ຍີ່­ປຸ່ນ ປະ­ຈຳ​ລາວ ແລະ ທ່ານ​ນາງ ຈິ​ຢະ ນາ​ງາ​ຊິ​ມະ ຜູ້​ຮັບ­ຜິດ­ຊອບ​ໂຄງ­ການ​ແພນ​ອິນ​ເຕິ​ເນ​ເຊີນ​ແນວ​ຍີ່­ປຸ່ນ ປະ­ຈຳ​ລາວ (PIJ) ມີ​ຜູ້­ຕາງ­ໜ້າ​ຈາກ​ບັນ­ດາ​ກະ­ຊວງ​ສຶກ​ສາ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ລັດ­ຖະ­ບານ​ຍີ່­ປຸ່ນ ໄດ້​ໃຫ້​ທຶນ​ຊ່ວຍ­ເຫຼືອ​ລ້າ​ມູນ​ຄ່າ 505.210 ໂດ​ລາ​ສະ­ຫະ­ລັດ ຫຼື ປະ­ມານ 4 ຕື້​ກວ່າ​ກີບ ໂດຍ​ໂຄງ­ການ​ແພນ​ອິນ​ເຕິ​ເນ​ເຊີນ​ແນວ​ຍີ່­ປຸ່ນ​ປະ­ຈຳ​ລາວ ເປັນ​ຜູ້​ຈັດ​ຕັ້ງ​ປະ­ຕິ­ບັດ​ໂຄງ­ການ​ສົ່ງ­ເສີມ​ຄວາມ​ສະ­ເໝີ­ພາບ​ບົດ­ບາດ​ຍິງ-ຊາຍ ເພື່ອ​ການ​ສຶກ​ສາ​ຂັ້ນ​ມັດ­ທະ­ຍົມ​ທີ່​ດີ​ຂຶ້ນ​ຂອງ​ນັກ­ຮຽນ​ຍິງ ການ​ສະ­ໜັບ­ສະ­ໜູນ​ຄັ້ງ​ນີ້​ເປັນ​ປີ​ທີ 3 ມີ​ເປົ້າ​ໝາຍ​ສ້າງ​ສະ­ພາບ​ແວດ​ລ້ອມ​ໂຮງ­ຮຽນ ທີ່​ມີ​ຄວາມ​ລະ­ອຽດ​ອ່ອນ​ຕໍ່​ບົດ­ບາດ​ຍິງ-ຊາຍ ພັດ­ທະ­ນາ​ຄວາມ​ອາດ​ສາ­ມາດ​ຂອງ​ຄູ ນັກ­ຮຽນ​ມັດ­ທະ­ຍົມ​ສຶກ​ສາ ແລະ ຊຸມ​ຊົນ​ໃຫ້​ສາ­ມາດ​ເຜີຍ­ແຜ່​ຄວາມ​ສະ­ເໝີ­ພາບ​ບົດ­ບາດ​ຍິງ-ຊາຍ ແນ­ໃສ່​ໃຫ້​ໂຮງ­ຮຽນ​ມັດ­ທະ­ຍົມ 11 ແຫ່ງ ໃນ​ເມືອງ​ຜາ​ອຸ­ດົມ ແຂວງ​ບໍ່​ແກ້ວ ເຊິ່ງ​ເປັນ​ເມືອງ​ທຸກ​ຍາກ ປະ­ຊາ­ກອນ​ສ່ວນ​ໃຫຍ່​ແມ່ນ​ຊົນ­ເຜົ່າ​ທີ່​ມີ​ບັນ­ທັດ­ຖານ ແລະ ຮີດ­ຄອງ​ໃຫ້​ຜູ້­ຍິງ​ເຮັດ​ແຕ່​ວຽກ​ໃນ​ຄົວ​ເຮືອນ ແລະ ແຕ່ງ­ງານ​ໄວ ເຊິ່ງ​ກາຍ­ເປັນ​ການ​ຫຼຸດ​ໂອ­ກາດ​ການ​ໄດ້​ຮັບ​ການ​ສຶກ​ສາ​ຂັ້ນ​ມັດ­ທະ­ຍົມ​ສຶກ​ສາ.

    ໂຄງ­ການ​ນີ້ ຈະ​ຈັດ​ຕັ້ງ​ຫຼາຍ​ກິດ­ຈະ­ກຳ​ພາຍ​ໃນ​ໂຮງ­ຮຽນ​ເປົ້າ​ໝາຍ ໂດຍ 2 ປີ­ຜ່ານ­ມາ ໄດ້​ກໍ່­ສ້າງ​ຫໍ​ພັກ​ນັກ­ຮຽນ ເຝິກ­ອົບ­ຮົມ​ໃຫ້​ອາ­ຈານ ສະ­ມາ­ຊິກ​ຈາກ​ສະ­ມາ­ຄົມ​ຜູ້​ປົກ­ຄອງ ປະ­ທານ​ສະ­ມາ­ຄົມ​ນັກ­ຮຽນ ແລະ ຄູ​ເຝິກ ໂດຍ​ຍົກ​ລະ­ດັບ​ຄວາມ​ຮູ້​ພື້ນ­ຖານ​ບົດ­ບາດ​ຍິງ-ຊາຍ ການ​ບໍ­ລິ­ຫານ​ຈັດ­ການ​ສິ່ງ​ອຳ­ນວຍ​ຄວາມ​ສະ­ດວກ​ຕ່າງໆ ແລະ ການ​ເຝິກ­ອົບ­ຮົມ​ກ່ຽວ​ກັບ​ການ​ບຳ­ລຸງ​ຮັກ­ສາ ສຳ­ລັບ​ການ­ຈັດ­ຕັ້ງ​ປະ­ຕິ­ບັດ​ໄລ­ຍະ​ທີ 3 ເປັນ​ໄລ­ຍະ​ສຸດ​ທ້າຍ​ຂອງ​ໂຄງ­ການ ຈະ​ໄດ້​ສຸມ​ໃສ່​ເຝິກ­ອົບ­ຮົມ ເພື່ອ​ທວນ­ຄືນ​ໃນ​ຫົວ​ຂໍ້­ຄວາມ​ສະ­ເໝີ­ພາບ​ບົດ­ບາດ​ຍິງ-ຊາຍ​ໃຫ້​ລັດ­ຖະ­ກອນ ສະ­ມາ­ຊິກ​ຈາກ​ໂຮງ­ຮຽນ ແລະ ຊຸມ​ຊົນ ນອກ​ນີ້ ຍັງ​ຈະ​ສ້າງ​ຫໍ​ພັກ​ທີ່​ມີ​ຫ້ອງ​ແຕ່ງ­ກິນ ຫ້ອງ​ນ້ຳ ລະ­ບົບ​ນ້ຳ​ປະ­ປາ​ໃຫ້​ໂຮງ­ຮຽນ 1 ແຫ່ງ ຈັດ​ເຝິກ­ອົບ­ຮົມ​ການ​ບໍ­ລິ­ຫານ​ສິ່ງ​ອຳ­ນວຍ​ຄວາມ​ສະ­ດວກ ແລະ ການ​ບຳ­ລຸງ​ຮັກ­ສາ ຕື່ມ​ອີກ.

ຂ່າວທີ່ກ່ຽວຂ້ອງ