ຂ່າວຫຼ້າສຸດ

ສະຫຼອງວັນສ້າງຕັ້ງເມືອງວຽງໄຊ-ຖານທີ່ໝັ້ນການປະຕິວັດລາວ ຢ່າງຄຶກຄື້ນ

445 04 ທ.ວ. 2018 ຂ່າວໜ້າ​ໜຶ່ງ
ສະຫຼອງວັນສ້າງຕັ້ງເມືອງວຽງໄຊ-ຖານທີ່ໝັ້ນການປະຕິວັດລາວ ຢ່າງຄຶກຄື້ນ

    ພິ­ທີ​ໂຮມ​ຊຸມ­ນຸມ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ເມືອງ​ວຽງ​ໄຊ-ຖານ​ທີ່​ໝັ້ນ​ການ​ປະ­ຕິ­ວັດ​ລາວ ຄົບ­ຮອບ 50 ປີ (30/11/1968-30/11/2018) ຈັດ​ຂຶ້ນ​ວັນ​ທີ 30 ພະ­ຈິກ 2018 ຢູ່​ເດີ່ນ​ກີ­ລາ​ເມືອງ​ວຽງ​ໄຊ ແຂວງ​ຫົວ­ພັນ ໂດຍ​ມີ​ພະ​ເຖ­ລາ­ນຸ­ເຖລະ ທ່ານ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ທານ​ປະ­ເທດ ພ້ອມ​ດ້ວຍ​ບັນ­ດາ​ການ​ນຳ​ພັກ-ລັດ ອະ­ດີດ​ການ​ນຳ ພະ­ນັກ­ງານ​ປະ­ຕິ­ວັດ​ອາ­ວຸ­ໂສ​ບຳ­ນານ ພ້ອມ​ແຂກ​ຖືກ​ເຊີນ​ທັງ​ພາຍ​ໃນ ແລະ ຕ່າງ­ປະ­ເທດ.

    ທ່ານ ພັນ​ຄຳ ວິ­ພາ​ວັນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ຮອງ​ປະ­ທານ​ປະ­ເທດ ຫົວ­ໜ້າ​ຄະ­ນະ​ຮັບ­ຜິດ­ຊອບ​ການ​ກະ­ກຽມ​ສະ­ເຫຼີມ­ສະ­ຫຼອງ ວັນ​ສ້າງ­ຕັ້ງ​ເມືອງ​ວຽງ​ໄຊ-ຖານ​ທີ່​ໝັ້ນ​ການ​ປະ­ຕິ­ວັດ​ລາວ ຄົບ­ຮອບ 50 ປີ ກ່າວ​ວ່າ: ການ​ຈັດ​ງານ​ຄັ້ງ​ນີ້ ເພື່ອ​ຫວນ​ຄືນ​ເຖິງ​ມູນ­ເຊື້ອ​ຄວາມ​ປີ​ຊາ​ສາ­ມາດ ຄວາມ​ສະ­ຫຼາດ​ສ່ອງ​ໃສ​ຂອງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ໃນ​ການ​ນຳ­ພາ​ການ​ປະ­ຕິ­ວັດ​ປົດ​ປ່ອຍ​ຊາດ ໂຄ­ສະ­ນາ​ສຶກ​ສາ​ອົບ­ຮົມ​ພະ­ນັກ­ງານ ສະ­ມາ­ຊິກ​ພັກ ນັກ­ຮົບ ປະ­ຊາ­ຊົນ​ບັນ­ດາ­ເຜົ່າ ໂດຍ​ສະ­ເພາະ​ຄົນ​ຮຸ່ນ​ຫຼັງ​ໃຫ້​ເຂົ້າ­ໃຈ​ຢ່າງ​ຈະ­ແຈ້ງ ແລະ ເລິກ­ເຊິ່ງ​ຕໍ່​ເສັ້ນ­ທາງ​ກ້າວ​ເດີນ​ອັນ​ລະ​ອິດ​ລະ​ອ້ຽວ​ຂອງ​ການ​ປະ­ຕິ­ວັດ ແລະ ຖື​ເອົາ​ການ​ສະ­ເຫຼີມ­ສະ­ຫຼອງ​ຄັ້ງ​ນີ້ ເພື່ອ​ຍູ້​ແຮງ​ຂະ​ບວນ​ການ­ຈັດ­ຕັ້ງ​ປະ­ຕິ­ບັດ​ນະ­ໂຍ­ບາຍ​ຂອງ​ພັກ ໂດຍ​ສະ­ເພາະ ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ 10 ຂອງ​ພັກ ໃຫ້​ປາ­ກົດ​ຜົນ​ເປັນ​ຈິງ ບັນ­ດາ​ກິດ­ຈະ­ກຳ​ທີ່​ຈັດ​ຂຶ້ນ​ໃນ​ງານ​ຄັ້ງ​ນີ້​ມີ: ຈັດ​ພິ­ທີ​ໂຮມ​ຊຸມ­ນຸມ​ໃຫຍ່​ຢູ່​ເມືອງ​ວຽງ​ໄຊ ງານ​ວາງ­ສະ­ແດງ​ຮູບ​ພາບ​ຢູ່​ນະ­ຄອນ­ຫຼວງ​ວຽງ​ຈັນ ແລະ ຢູ່​ຖ້ຳ​ຊ້າງ​ລອດ ເມືອງ​ວຽງ​ໄຊ ປາ­ຖະ­ກະ­ຖາ​ເລົ່າ​ມູນ­ເຊື້ອ​ກ່ຽວ​ກັບ​ເມືອງ​ວຽງ​ໄຊ ຕິດ​ພັນ​ກັບ​ມູນ­ເຊື້ອ​ຂອງ​ການ​ປະ­ຕິ­ວັດ​ລາວ ຈັດ​ຂະ​ບວນ​ຄາ​ລາ​ວານ​ສູ່​ເມືອງ​ວຽງ​ໄຊ ຈັດ​ກອງ​ປະ­ຊຸມ ສຳ​ມະ​ນາ​ວິ­ທະ­ຍາ­ສາດ​ຢູ່​ນະ­ຄອນ­ຫຼວງ​ວຽງ​ຈັນ ຮຽບ​ຮຽງ​ປະ­ຫວັດ­ສາດ​ເມືອງ​ວຽງ​ໄຊ ແລະ ອື່ນໆ.

    ທ່ານ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ທານ​ປະ­ເທດ ໄດ້​ຍົກ​ໃຫ້​ເຫັນ​ປະ­ຫວັດ​ຄວາມ​ເປັນ​ມາ​ຂອງ​ຊາດ​ລາວ ແລະ ການ​ຕໍ່­ສູ້​ກູ້​ຊາດ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ຕ້ານ​ການ​ຮຸກ​ຮານ​ຂອງ​ພວກ​ຈັກ­ກະ­ພັດ​ຕ່າງ​ດ້າວ​ຜູ້​ຮຸກ​ຮານ ພາຍ​ໃຕ້​ການ​ນຳ­ພາ​ຂອງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ທີ່​ລະ​ອິດ​ລະ​ອ້ຽວ ຍືດ​ເຍື້ອ ຍາວ​ນານ ແລະ ທໍ­ລະ​ຫົດ​ອົດ­ທົນ ຈົນ​ສາ­ມາດ​ຍາດ​ໄດ້​ໄຊ­ຊະ­ນະ ແລະ ສະ­ຖາ­ປະ­ນາ​ເປັນ ສປປ ລາວ ຢ່າງ​ສະ­ຫງ່າ​ຜ່າ­ເຜີຍ​ໃນ​ວັນ​ທີ 2 ທັນ­ວາ​ປີ 1975.

    ການ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ເມືອງ​ວຽງ​ໄຊ-ຖານ​ທີ່​ໝັ້ນ​ຂອງ​ການ​ປະ­ຕິ­ວັດ ຄົບ­ຮອບ 50 ປີ ພໍ­ດີ​ກັບ​ບັນ­ຍາ­ກາດ​ການ​ສະ­ເຫຼີມ­ສະ­ຫຼອງ​ວັນ­ຊາດ ທີ 2 ທັນ­ວາ ຄົບ­ຮອບ 43 ປີ ການ​ລະ­ນຶກ​ວັນ​ເກີດ​ປະ­ທານ ໄກ­ສອນ ພົມ­ວິ­ຫານ ຄົບ­ຮອບ 98 ປີ ເມື່ອ​ທົບ​ທວນ​ຫວນ​ຄືນ​ປະ­ຫວັດ​ແຫ່ງ​ການ​ກໍ່​ຕັ້ງ ແລະ ປົກ​ປັກ​ຮັກ­ສາ​ປະ­ເທດ​ຊາດ​ເປັນ​ເວ­ລາ​ພັນ​ປີ​ຂອງ​ຊາວ​ລາວ ເວົ້າ​ລວມ ເວົ້າ​ສະ­ເພາະ ເມືອງ​ວຽງ​ໄຊ-ຖານ​ທີ່​ໝັ້ນ​ຂອງ​ການ​ປະ­ຕິ­ວັດ ຍິ່ງ​ພິ­ສູດ​ໃຫ້​ເຫັນ​ແຈ້ງ­ວ່າ ບໍ່​ມີ​ຍຸກ​ໃດ​ສະ­ໄໝ​ໃດ​ທີ່​ປະ­ເທດ​ຊາດ​ໄດ້​ຮັບ​ເອ­ກະ­ລາດ ປະ­ຊາ­ຊົນ​ມີ​ສິດ​ເສລີ ມີ​ປະ­ຊາ­ທິ­ປະ­ໄຕ ແລະ ໄດ້​ຮັບ​ການ​ພັດ­ທະ­ນາ​ຈະ­ເລີນ​ຮຸ່ງ­ເຮືອງ ເທົ່າ​ກັບ​ຍຸກ​ສະ­ໄໝ​ທີ່​ມີ​ພັກ​ປະ­ຊາ­ຊົນ​ປະ­ຕິ­ວັດ​ລາວ​ເປັນ​ຜູ້​ຈັດ​ຕັ້ງ ແລະ ນຳ­ພາ​ພາ­ລະ­ກິດ​ການ​ປະ­ຕິ­ວັດ​ປະ­ເທດ​ເຮົາ ປັດ­ຈຸ­ບັນ​ເມືອງ​ວຽງ​ໄຊ ໄດ້​ກາຍ­ເປັນ​ມໍ­ລະ­ດົກ​ອັນ​ລ້ຳ​ຄ່າ​ທາງ​ປະ­ຫວັດ­ສາດ ແລະ ທຳ​ມະ​ຊາດ​ຂອງ​ປະ­ເທດ​ເຮົາ ນີ້​ຄື​ຄວາມ​ເອກ­ອ້າງ​ທະ​ນົງ​ໃຈ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ໃນ​ທົ່ວ​ປະ­ເທດ ກໍ່​ຄື​ຊາວ​ເມືອງ​ວຽງ​ໄຊ ແຂວງ​ຫົວ­ພັນ​ວິ­ລະ​ຊົນ ທີ່​ຈະ​ຕ້ອງ​ຈົດ​ຈຳ​ຈາ­ລຶກ​ໄວ້ ແລະ ສືບ​ທອດ​ໃຫ້​ຄົນ​ລຸ້ນ​ຕໍ່​ໄປ.

    ໃນ​ພິ­ທີ​ຄັ້ງ​ນີ້ ລັດ­ຖະ­ບານ​ໄດ້​ຕົກ­ລົງ​ປະ­ດັບ​ຫຼຽນ​ຄຳ​ແຫ່ງ​ຊາດ​ໃຫ້​ເມືອງ​ວຽງ​ໄຊ ພ້ອມ​ທັງ​ຮັບ​ຊົມ​ບົດ​ຟ້ອນ​ສະ​ດຸ​ດີ​ຈາກ​ນັກ­ຮຽນ ມສ ວຽງ​ໄຊ ຈຳ­ນວນ 600 ຄົນ ທີ່​ມີ​ຊື່­ວ່າ: “ສັນ­ລະ­ເສີນ​ເມືອງ​ວຽງ​ໄຊ​ວິ­ລະ​ຊົນ” ທີ່​ມີ​ເນື້ອ​ຄວາມ​ເປັນ​ມາ ແລະ ການ​ສ້າງ­ສາ​ພັດ­ທະ­ນາ​ເມືອງ​ວຽງ​ໄຊ ພາຍ​ໃຕ້​ການ​ຊີ້​ນຳ-ນຳ­ພາ​ຂອງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ຈົນ​ມາ​ເຖິງ​ທຸກ​ວັນ​ນີ້ ເຊິ່ງ​ນັບ​ມື້​ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ເຮັດ​ໃຫ້​ບັນ­ຍາ­ກາດ​ມີ​ຄວາມ​ຄຶກ­ຄື້ນ​ມ່ວນ​ຊຶ່ນ.

ຂ່າວທີ່ກ່ຽວຂ້ອງ