ຂ່າວຫຼ້າສຸດ

ການນຳ ພັກ-ລັດ ສະແດງຄວາມຮູ້ບຸນຄຸນຕໍ່ນັກຮົບປະຕິວັດ ໂອກາດວັນຊາດ

399 04 ທ.ວ. 2018 ຂ່າວໜ້າ​ໜຶ່ງ
ການນຳ ພັກ-ລັດ ສະແດງຄວາມຮູ້ບຸນຄຸນຕໍ່ນັກຮົບປະຕິວັດ ໂອກາດວັນຊາດ

    ເນື່ອງ​ໃນ​ໂອ­ກາດ​ສະ­ເຫຼີມ­ສະ­ຫຼອງ​ວັນ­ຊາດ ທີ 2 ທັນ­ວາ ຄົບ­ຮອບ 43 ປີ (2/12/1975-2/12/2018) ການ​ນຳ​ພັກ-ລັດ​ຂັ້ນ​ສູງ ພ້ອມ​ດ້ວຍ​ອົງ​ການ­ຈັດ­ຕັ້ງ​ມະ­ຫາ­ຊົນ ໄດ້​ເຂົ້າ​ວາງ​ພວງ­ມາ­ລາ​ຢູ່​ອະ­ນຸ­ສາ­ວະ­ລີ​ນັກ­ຮົບ​ນິ­ລະ­ນາມ ແລະ ວາງ​ກະ­ຕ່າ​ດອກ​ໄມ້​ຢູ່​ຫໍ​ພິ​ພິ​ທະ​ພັນ ໄກ­ສອນ ພົມ­ວິ­ຫານ ໃນ​ວັນ​ທີ 2 ທັນ­ວາ 2018 ເຊິ່ງ​ປະ­ກອບ​ມີ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ນຳ​ໂດຍ​ທ່ານ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ຄະ­ນະ​ສະ­ພາ​ແຫ່ງ​ຊາດ ນຳ​ໂດຍ​ທ່ານ ສົມ​ພັນ ແພງ​ຄຳ​ມີ ຮອງ​ປະ­ທານ​ສະ­ພາ​ແຫ່ງ​ຊາດ ຄະ­ນະ​ລັດ­ຖະ­ບານ​ນຳ​ໂດຍ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ຄະ­ນະ​ສູນ​ກາງ​ແນວ​ລາວ​ສ້າງ​ຊາດ ແລະ ອົງ​ການ­ຈັດ­ຕັ້ງ​ມະ­ຫາ­ຊົນ​ນຳ​ໂດຍ​ທ່ານ ໄຊ​ສົມ​ພອນ ພົມ­ວິ­ຫານ ປະ­ທານ​ສູນ​ກາງ​ແນວ​ລາວ​ສ້າງ​ຊາດ ຄະ­ນະ​ກະ­ຊວງ​ປ້ອງ​ກັນ​ປະ­ເທດ ນຳ​ໂດຍ​ທ່ານ ພົນ​ໂທ ຈັນ​ສະ­ໝອນ ຈັນ​ຍະ​ລາດ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ຄະ­ນະ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ນຳ​ໂດຍ​ພົນ​ຕີ ສົມ​ແກ້ວ ສີ​ລາ​ວົງ ລັດ­ຖະ­ມົນ­ຕີ​ປ້ອງ​ກັນ​ຄວາມ​ສະ­ຫງົບ ແລະ ຄະ­ນະ​ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ນຳ​ໂດຍ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ.

    ການ​ເຂົ້າ​ວາງ​ພວງ­ມາ­ລາ ແລະ ກະ­ຕ່າ​ດອກ​ໄມ້​ຄັ້ງ​ນີ້ ເພື່ອ​ເປັນ​ການ­ສະ­ແດງ​ຄວາມ​ເຄົາ­ລົບ​ຮັກ ແລະ ຄວາມ​ກະ­ຕັນ­ຍູ​ຮູ້​ບຸນ­ຄຸນ​ຢ່າງ​ລົ້ນ​ເຫຼືອ​ຕໍ່​ຄຸນ­ງາມ­ຄວາມ­ດີ ແລະ ຜົນ­ງານ​ອັນ​ໃຫຍ່​ຫຼວງ​ຂອງ​ບັນ­ພະ­ບຸ­ລຸດ ນັກ­ຮົບ​ປະ­ຕິ­ວັດ​ທີ່​ໄດ້​ເສຍ­ສະ­ຫຼະ​ເລືອດ​ເນື້ອ​ໃນ​ພາ­ລະ­ກິດ​ປະ­ຕິ­ວັດ ກອບ​ກູ້​ເອົາ​ເອ­ກະ­ລາດ ແລະ ຜືນ​ແຜ່ນ­ດິນ​ອັນ​ຄົບ​ຖ້ວນ​ມາ​ໃຫ້​ປະ­ຊາ­ຊົນ​ລາວ​ບັນ­ດາ­ເຜົ່າ ໃຫ້​ມີ​ຄວາມ​ຈະ­ເລີນ​ຮຸ່ງ­ເຮືອງ​ສີ­ວິ­ໄລ​ເປັນ​ກ້າວໆ ທັງ​ເປັນ​ການ­ສະ­ແດງ​ຄວາມ​ກະ­ຕັນ­ຍູ​ຕໍ່​ປະ­ທານ ໄກ­ສອນ ພົມ­ວິ­ຫານ ທີ່​ໄດ້​ສ້າງ​ຜົນ­ງານ​ຈາ­ລຶກ​ໄວ້​ໃຫ້​ພັກ-ລັດ ແລະ ປະ­ຊາ­ຊົນ​ລາວ​ທັງ​ຊາດ ໂດຍ​ສະ­ເພາະ​ການ​ນຳ​ພັກ-ລັດ​ທຸກ​ພາກ­ສ່ວນ ສືບ­ຕໍ່​ຄົ້ນ­ຄວ້າ ຊອກ​ຮູ້​ຮ່ຳ­ຮຽນ​ເອົາ​ແບບ­ຢ່າງ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ ແລະ ແບບ­ແຜນ​ນຳ­ພາ​ວິ­ທີ​ເຮັດ​ວຽກ​ຂອງ​ປະ­ທານ ເພື່ອ​ເປັນ​ເຂັມ​ຊີ້​ທິດ​ໃນ​ການ​ວາງ​ແນວ­ທາງ​ຂອງ​ພັກ ກົດ­ໝາຍ​ຂອງ​ລັດ​ໃຫ້​ຖືກ­ຕ້ອງ ແລະ ສອດ­ຄ່ອງ​ກັບ​ແນວ­ທາງ​ປ່ຽນ­ແປງ​ໃໝ່​ທີ່​ປະ­ທານ ໄກ­ສອນ ພົມ­ວິ­ຫານ ກຳ­ນົດ​ໄວ້ ເພື່ອ​ສືບ­ຕໍ່​ນຳ­ພາ​ພາ­ລະ­ກິດ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ໃຫ້​ກ້າວ​ໄປ​ສູ່​ເສັ້ນ­ທາງ​ສັງ­ຄົມ​ນິ­ຍົມ​ຢ່າງ​ໝັ້ນ­ຄົງ ແລະ ເຂັ້ມ­ແຂງ​ໃຫ້​ທຽບ​ທັນ​ເພື່ອນ​ມິດ­ສາ​ກົນ​ຕະ­ຫຼອດ​ໄປ.

ຂ່າວທີ່ກ່ຽວຂ້ອງ