ຂ່າວຫຼ້າສຸດ

ຫາລືປັບປຸງການດຳເນີນກິດຈະການຫວຍພັດທະນາ

139 05 ທ.ວ. 2018 ຂ່າວໜ້າ​ໜຶ່ງ

    ກົມ​ຄຸ້ມ​ຄອງ​ພັດ­ທະ­ນາ ລັດ​ວິ​ສາ​ຫະ​ກິດ ແລະ ການ​ປະ­ກັນ​ໄພ ບໍ­ລິ­ສັດ ລັດ​ວິ​ສາ​ຫະ​ກິດ​ຫວຍ​ພັດ­ທະ­ນາ ຈັດ​ກອງ​ປະ­ຊຸມ​ທາບ​ທາມ​ຄຳ​ຄິດ​ເຫັນ ຕໍ່​ທິດ​ທາງ​ການ​ປັບ­ປຸງ​ການ​ດຳ­ເນີນ​ກິດ­ຈະ­ການ​ຫວຍ​ພັດ­ທະ­ນາ​ໃນ­ຕໍ່­ໜ້າ ຈັດ​ຂຶ້ນ​ວັນ​ທີ 29 ພະ­ຈິກ 2018 ຢູ່​ບໍ­ລິ­ສັດ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ສີ​ລາ ວຽງ​ແກ້ວ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ ມີ​ທ່ານ ຄຳ​ເພັງ ທິນ­ນະ­ກອນ ຜູ້­ອຳ­ນວຍ­ການ​ຫວຍ​ພັດ­ທະ­ນາ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ບໍ­ລິ­ສັດ ລັດ​ວິ​ສາ​ຫະ​ກິດ​ຫວຍ​ພັດ­ທະ­ນາ ເປັນ​ຫົວ­ໜ່ວຍ​ໜຶ່ງ​ທີ່​ຂຶ້ນ​ກັບ​ການ​ຊີ້​ນຳ​ຄຸ້ມ​ຄອງ​ໂດຍ​ກົງ​ຂອງ​ກະ­ຊວງ​ການ​ເງິນ ຕາມ​ມະ­ຕິ​ຕົກ­ລົງ​ຂອງ​ສະ­ພາ ປີ 1982 ແລະ ໄດ້​ມີ​ການ​ປັບ­ປຸງ​ມາ​ເປັນ​ຂໍ້​ຕົກ­ລົງ​ຂອງ​ນາ­ຍົກ­ລັດ­ຖະ­ມົນ­ຕີ ວ່າ​ດ້ວຍ​ການ​ຄຸ້ມ​ຄອງ​ກິດ­ຈະ­ການ​ຫວຍ​ພັດ­ທະ­ນາ​ປີ 2008 ເຊິ່ງ​ການ­ເຄື່ອນ­ໄຫວ​ແຕ່​ລະ​ໄລ­ຍະ​ໄດ້​ມີ​ການ​ປັບ­ປຸງ​ໃຫ້​ແທດ­ເໝາະ​ກັບ​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ-ສັງ­ຄົມ ເພື່ອ​ຮັບ­ປະ­ກັນ​ໃຫ້​ການ­ເຄື່ອນ­ໄຫວ​ດຳ­ເນີນ​ທຸ­ລະ​ກິດ​ຫວຍ​ພັດ­ທະ­ນາ​ໃນ­ຕໍ່­ໜ້າ​ມີ​ປະ​ສິດ­ທິ​ຜົນ ມີ​ຄວາມ​ສະ­ຫງົບ ແລະ ປະ­ກອບ­ສ່ວນ​ຄືນ​ຜົນ​ປະ­ໂຫຍດ​ໃຫ້​ສັງ­ຄົມ ບໍ­ລິ­ສັດ ລັດ​ວິ​ສາ​ຫະ​ກິດ​ຫວຍ​ພັດ­ທະ­ນາ ຈຶ່ງ​ໄດ້​ສຶກ​ສາ​ຄົ້ນ­ຄວ້າ​ຮູບ​ແບບ​ການ​ດຳ­ເນີນ​ກິດ­ຈະ­ການ​ຫວຍ​ພັດ­ທະ­ນາ​ໃນ 3 ກໍ­ລະ­ນີ​ຄື: ແບບ​ມອບ​ເໝົາ​ຂາດ​ຕົວ (ເຄື່ອນ​ໄຫວ​ໃນ​ປັດ­ຈຸ­ບັນ​ລະ­ຫວ່າງ​ວິ​ສາ​ຫະ​ກິດ​ແມ່ ກັບ​ບັນ­ດາ​ຕົວ​ແທນ​ຈຳ­ໜ່າຍ) ແບບ​ວິ​ສາ​ຫະ​ກິດ​ຈຳ­ໜ່າຍ​ເອງ (ບໍ­ລິ­ສັດ ລັດ​ວິ​ສາ​ຫະ​ກິດ​ຫວຍ​ພັດ­ທະ­ນາ​ຮັບ­ຜິດ­ຊອບ​ພິມ-ຈຳ­ໜ່າຍ​ເອງ) ແລະ ແບບ​ຮ່ວມ​ທຶນ (ລັດ​ຮ່ວມ​ທຶນ​ກັບ​ບຸກ­ຄົນ ເອ­ກະ​ຊົນ).

    ກອງ​ປະ­ຊຸມ​ຄັ້ງ​ນີ້ ໄດ້​ພ້ອມ​ກັນ​ປະ­ກອບ​ຄຳ​ຄິດ​ຄຳ​ເຫັນ​ປຶກ­ສາ​ຫາ­ລື ເພື່ອ​ຊອກ​ຫາ​ທາງ​ອອກ​ທີ່​ສອດ­ຄ່ອງ ເໝາະ​ສົມ​ກັບ​ສະ­ພາບ​ຄວາມ​ເປັນ​ຈິງ ເພື່ອ​ເປັນ​ການ​ປັບ­ປຸງ​ການ​ດຳ­ເນີນ​ກິດ­ຈະ­ການ​ຫວຍ​ພັດ­ທະ­ນາ ໃຫ້​ຮັບ­ປະ­ກັນ​ຄວາມ​ຖືກ­ຕ້ອງ ຊັດ​ເຈນ ຕອບ​ສະ­ໜອງ​ສິດ­ຜົນ­ປະ­ໂຫຍດ​ອັນ​ຊອບ​ທຳ​ຂອງ​ສັງ­ຄົມ.

ຂ່າວທີ່ກ່ຽວຂ້ອງ