ຂ່າວຫຼ້າສຸດ

ທະນາຄານເພື່ອການສົ່ງອອກ-ນຳເຂົ້າ ຂະຫຍາຍທຸລະກິດຢູ່ລາວ

150 05 ທ.ວ. 2018 ຂ່າວໜ້າ​ໜຶ່ງ
ທະນາຄານເພື່ອການສົ່ງອອກ-ນຳເຂົ້າ ຂະຫຍາຍທຸລະກິດຢູ່ລາວ

    ພິ­ທີ​ເປີດ​ສຳ­ນັກ­ງານ​ທະ­ນາ­ຄານ​ເພື່ອ​ການ​ສົ່ງ​ອອກ-ນຳ​ເຂົ້າ ຕົວ​ແທນ​ຢູ່​ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 30 ພະ­ຈິກ 2018 ມີ​ທ່ານ​ນາງ ທິບ​ພະ​ກອນ ຈັນ­ທະ​ວົງ­ສາ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ ອະ­ພິ​ສັກ ຕັນ­ຕິ​ວໍ​ຣະ​ວົງ ລັດ­ຖະ­ມົນ­ຕີ​ກະ­ຊວງ​ການ­ຄັງ​ແຫ່ງ​ປະ­ເທດ​ໄທ ທ່ານ ພິ­ສິດ ເສຣີ​ວິ­ວັດ­ທະ­ນາ ກຳ­ມະ­ການ​ຜູ້​ຈັດ­ການ​ທະ­ນາ­ຄານ​ເພື່ອ​ການ​ສົ່ງ​ອອກ ແລະ ນຳ​ເຂົ້າ​ແຫ່ງ​ປະ­ເທດ​ໄທ (EXIM BANK) ທ່ານ ອຸ​ເດດ ສຸ­ວັນ­ນະ​ວົງ ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ພ້ອມ​ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ ພິ­ສິດ ເສຣີ​ວິ­ວັດ­ທະ­ນາ ກ່າວ​ວ່າ: ການ​ເປີດ​ສຳ­ນັກ­ງານ​ຄັ້ງ​ນີ້ ເພື່ອ​ຮ່ວມ​ເປັນ​ສ່ວນ​ໜຶ່ງ​ຂອງ​ທິມ​ງານ​ປະ­ເທດ​ໄທ ດຳ­ເນີນ​ງານ​ກັບ​ພາກ​ລັດ ແລະ ເອ­ກະ​ຊົນ ໄທ-ລາວ ເພື່ອ​ເພີ່ມ​ມູນ​ຄ່າ​ການ​ລົງ­ທຶນ​ລະ­ຫວ່າງ​ສອງ​ປະ­ເທດ ລວມ​ທັງ​ການ​ຂະ­ຫຍາຍ​ທຸ­ລະ​ກິດ​ເຊື່ອມ​ໂຍງ CLMVT (ກຳ­ປູ­ເຈຍ ລາວ ມຽນ​ມາ ຫວຽດ­ນາມ ແລະ ໄທ) ຕໍ່​ໄປ​ຍັງ​ຕ່າງ­ປະ­ເທດ ໃນ​ພາກ​ພື້ນ​ລຸ່ມ​ແມ່­ນ້ຳ​ຂອງ ແລະ ອາ​ຊຽນ ທັງ​ນີ້ ສຳ­ນັກ­ງານ EXIM BANK ໃນ​ນະ­ຄອນ­ຫຼວງ​ວຽງ​ຈັນ ຈະ​ເຮັດ​ໜ້າ­ທີ່​ໃຫ້​ບໍ­ລິ­ການ​ດ້ານ​ຄຳ​ປຶກ­ສາ ແນະ­ນຳ​ຂໍ້​ມູນ​ການ​ຄ້າ ການ​ລົງ­ທຶນ ລວມ​ທັງ​ຂໍ້​ມູນ​ທີ່​ໄດ້​ຜ່ານ​ການ​ວິ­ເຄາະ ທີ່​ຈະ​ຊ່ວຍ​ໃຫ້​ຜູ້​ປະ­ກອບ​ການ​ໄທ​ທຸກ​ຂະ­ໜາດ​ທຸ­ລະ​ກິດ​ສາ­ມາດ​ເລີ່ມ​ຕົ້ນ ຫຼື ຂະ­ຫຍາຍ​ການ​ຄ້າ ການ​ລົງ­ທຶນ​ໃນ​ລາວ ໄດ້​ຢ່າງ​ປະ­ສົບ​ຜົນ­ສຳ­ເລັດ ຕະ­ຫຼອດ​ຈົນ​ການ​ອຳ­ນວຍ​ຄວາມ​ສະ­ດວກ ໃນ​ການ​ເຮັດ​ທຸ­ລະ​ກຳ​ທາງ​ດ້ານ​ການ​ເງິນ​ລະ­ຫວ່າງ​ປະ­ເທດ ສະ­ແຫວງ­ຫາ​ໂອ­ກາດ​ໃໝ່​ທາງ​ທຸ­ລະ​ກິດ​ໃຫ້​ແກ່​ຜູ້​ປະ­ກອບ​ການ ຕະ­ຫຼອດ​ຈົນ​ຮອດ​ການ​ຂະ­ຫຍາຍ​ການ​ຮ່ວມ​ມື​ໃນ​ຮູບ​ແບບ​ໃໝ່ ເພື່ອ​ຕອບ​ສະ­ໜອງ​ຄວາມ​ຄາດ​ຫວັງ​ຂອງ​ພາກ​ລັດ ແລະ ເອ­ກະ​ຊົນ​ຂອງ​ທັງ​ສອງ​ປະ­ເທດ ຊຸກ­ຍູ້​ໃຫ້​ເກີດ​ການ​ຂະ­ຫຍາຍ­ຕົວ​ທາງ​ດ້ານ​ເສດ­ຖະ­ກິດ ແລະ ການ​ພັດ­ທະ­ນາ​ໃນ​ລະ­ດັບ​ປະ­ເທດ ແລະ ພາກ​ພື້ນ.

    ສປປ ລາວ ເປັນ​ປະ­ເທດ​ທີ່​ມີ​ປະ­ຊາ­ກອນ 7 ລ້ານ​ກວ່າ​ຄົນ ມີ​ຂະ­ໜາດ​ເສດ­ຖະ­ກິດ​ທີ່​ນ້ອຍ​ທີ່​ສຸດ​ໃນ CLMVT ບໍ່​ມີ​ທາງ​ອອກ​ສູ່​ທະ­ເລ ແຕ່​ເປັນ​ປະ­ເທດ​ທີ່​ມີ​ກອງ​ທຶນ​ການ​ເງິນ​ລະ­ຫວ່າງ​ປະ­ເທດ (IMF) ຄາດ​ວ່າ​ຈະ​ມີ​ອັດ­ຕາ​ການ​ຂະ­ຫຍາຍ­ຕົວ​ທາງ​ດ້ານ​ເສດ­ຖະ­ກິດ ສະ­ເລ່ຍ​ໄລ­ຍະ​ປີ 2018-2022 ປະ­ມານ 7% ຕໍ່​ປີ ສູງ​ທີ່​ສຸດ​ໃນ CLMVT ແລະ ສູງ​ເປັນ​ອັນ​ດັບ​ຕົ້ນ​ຂອງ​ໂລກ ໂດຍ​ອາ­ໄສ​ຈຸດ​ແຂງ​ຂອງ​ລາວ​ໃນ​ການ​ມີ​ພົມ​ແດນ​ຕິດ​ກັບ CLMVT ແລະ ສປ ຈີນ ເຮັດ​ໃຫ້​ລາວ​ເປັນ​ປະ­ຕູ​ເຊື່ອມ​ໂຍງ​ເຄືອ​ຄ່າຍ​ພະ­ລັງ­ງານ ເສັ້ນ­ທາງ​ຄົມ­ມະ­ນາ­ຄົມ​ຂົນ­ສົ່ງ ການ­ທ່ອງ­ທ່ຽວ ແລະ ການ​ຄ້າ​ຂອງ​ພາກ​ພື້ນ.

ຂ່າວທີ່ກ່ຽວຂ້ອງ