ຂ່າວຫຼ້າສຸດ

ລັດຖະມົນຕີ ປທສ ຮຽກຮ້ອງໃຫ້ທຸກພາກສ່ວນ ນຳໃຊ້ການບໍລິການດາວທຽມລາວ

155 05 ທ.ວ. 2018 ຂ່າວໜ້າ​ໜຶ່ງ
ລັດຖະມົນຕີ ປທສ ຮຽກຮ້ອງໃຫ້ທຸກພາກສ່ວນ ນຳໃຊ້ການບໍລິການດາວທຽມລາວ

    ວັນ​ທີ 30 ພະ­ຈິກ 2018 ທ່ານ ທັນ​ສະ­ໄໝ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ (ປທສ) ພ້ອມ​ດ້ວຍ​ຄະ­ນະ​ໄດ້​ລົງ​ຢ້ຽມ­ຢາມ ແລະ ເຄື່ອນ​ໄຫວ​ຊຸກ­ຍູ້​ວຽກ​ງານ​ບໍ­ລິ­ສັດ ດາວ​ທຽມ​ລາວ​ເອ​ເຊຍ-ປາ​ຊີ​ຟິກ (LaoSAT) ຢູ່​ສູນ​ບັນ­ຊາ​ການ​ດາວ​ທຽມ​ພາກ​ພື້ນ​ດິນ ຫຼັກ 14 ຖະ­ໜົນ​ທ່າ​ເດື່ອ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ.

    ໂອ­ກາດ​ນີ້ ທ່ານ ດີງ ຢ່ອງ​ບີ້ງ ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ດາວ​ທຽມ​ລາວ​ເອ​ເຊຍ-ປາ​ຊີ​ຟິກ ໄດ້​ລາຍ​ງານ​ການ­ເຄື່ອນ­ໄຫວ​ວຽກ​ງານ​ຂອງ​ບໍ­ລິ­ສັດ​ໃນ​ໄລ­ຍະ​ທີ່​ຜ່ານ​ມາ ແລະ ທິດ​ທາງ​ແຜນ­ການ​ໃນ­ຕໍ່­ໜ້າ ໂດຍ​ສາ­ມາດ​ປະ­ຕິ­ບັດ​ພັນ­ທະ​ໜ້າ­ທີ່​ການ­ເມືອງ​ໃນ​ໄລ­ຍະ​ໃໝ່​ທີ່​ພັກ ແລະ ລັດ­ຖະ­ບານ​ໄດ້​ມອບ​ໝາຍ​ໃຫ້​ໄດ້​ເປັນ​ຢ່າງ​ດີ ມາ​ເຖິງ​ປັດ­ຈຸ­ບັນ ບໍ­ລິ­ສັດ​ໄດ້​ບັນ­ລຸ​ຜົນ­ສຳ­ເລັດ ໃນ​ການ​ດຳ­ເນີນ​ທຸ­ລະ​ກິດ​ໃນ​ຫຼາຍ​ດ້ານ ເຊັ່ນ: ວຽກ​ງານ​ບໍ­ລິ­ການ​ເຄື່ອງ­ຮັບ​ສັນ­ຍານ​ໂທລະ­ພາບ​ຜ່ານ​ດາວ​ທຽມ (Set Top Box) ມີ​ຜູ້​ຊົມ­ໃຊ້​ປະ­ມານ 80.000 ລູກ​ຄ້າ ໃນ​ນັ້ນ ລວມ​ມີ​ລູກ​ຄ້າ​ພາຍ​ໃນ ແລະ ຕ່າງ­ປະ­ເທດ ເຊິ່ງ​ຍັງ​ມີ​ແຜນ​ຈະ​ສູ້​ຊົນ​ເພີ່ມ​ຜູ້​ຊົມ­ໃຊ້​ໃຫ້​ໄດ້ 100.000 ລູກ​ຄ້າ​ໃນ​ທ້າຍ​ປີ 2018 ການ​ບໍ­ລິ­ການ​ສື່­ສານ​ຜ່ານ​ດາວ​ທຽມ​ທີ່​ມີ​ອັດ­ຕາ​ການ​ໃຊ້​ທຣານ​ສະ​ປອນ​ເດີ C-Band ກວມ​ເອົາ 53,37% ແລະ Ku-Band 50% ການ​ບໍ­ລິ­ການ​ເຄືອ​ຄ່າຍ​ອິນ​ເຕີ​ເນັດ​ຄວາມ​ໄວ​ສູງ ແບບ​ບໍ່​ມີ​ສາຍ ໄດ້​ດຳ­ເນີນ​ການ​ເປີດ 20 ສະ­ຖາ­ນີ​ໃໝ່​ໃນ​ຕ່າງ​ແຂວງ ແລະ 60 ສະ­ຖາ­ນີ ໃນ​ນະ­ຄອນ­ຫຼວງ​ວຽງ​ຈັນ ແລະ ເລີ່ມ​ທົດ​ລອງ​ເປີດ​ໃຫ້​ບໍ­ລິ­ການ​ໃນ​ຕົ້ນ​ເດືອນ​ພະ­ຈິກ 2018 ເປັນ­ຕົ້ນ​ມາ ນອກ­ຈາກ​ນັ້ນ ບໍ­ລິ­ສັດ​ຍັງ​ມີ​ແຜນ­ການ​ສ້າງ​ລາຍ​ຮັບ​ຈາກ​ບໍ­ລິ­ການ​ອື່ນໆ​ເພີ່ມ​ເຕີມ​ໃນ­ຕໍ່­ໜ້າ.

    ພ້ອມ​ດຽວ​ກັນ​ນີ້ ທ່ານ​ລັດ­ຖະ­ມົນ­ຕີ​ໄດ້​ໃຫ້​ທິດ​ຊີ້​ນຳ ພ້ອມ​ທັງ​ເນັ້ນ​ໃຫ້​ຄະ­ນະ​ອຳ­ນວຍ​ການ ແລະ ພະ­ນັກ­ງານ​ພາຍ​ໃນ​ບໍ­ລິ­ສັດ ສືບ­ຕໍ່​ຕັ້ງ­ໜ້າ​ສູ້​ຊົນ​ຜ່ານ​ຜ່າ​ບັນ­ດາ​ອຸ­ປະ­ສັກ ແລະ ສິ່ງ​ທ້າ​ທາຍ​ຕ່າງໆ ເພື່ອ​ເຮັດ​ໃຫ້​ບໍ­ລິ­ສັດ​ເຮັດ​ສຳ­ເລັດ​ໜ້າ­ທີ່​ການ­ເມືອງ ທີ່​ພັກ ແລະ ລັດ​ມອບ​ໝາຍ​ໃຫ້ ໂດຍ​ສະ­ເພາະ ໃຫ້​ສາ­ມາດ​ນຳ​ໃຊ້​ທ່າ­ແຮງ​ທີ່​ມີ​ຂອງ​ບໍ­ລິ­ສັດ ຊ່ວຍ​ຍູ້​ດັນ​ເສດ­ຖະ­ກິດ​ມະ­ຫາ​ພາກ ໃຫ້​ສາ­ມາດ​ຂັບ​ເຄື່ອນ​ໄປ​ຕາມ​ການ​ຫັນ​ເປັນ​ທັນ​ສະ­ໄໝ ຕາມ​ກົນ​ໄກ​ເສດ­ຖະ­ກິດ​ຕະ­ຫຼາດ​ໃນ​ປັດ­ຈຸ­ບັນ ປະ­ກອບ­ສ່ວນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ວັດ­ທະ­ນະ­ທຳ​ຂອງ​ປະ­ເທດ​ຊາດ ແລະ ການ​ຮ່ວມ​ມື​ກັບ​ສາ­ກົນ​ໃຫ້​ກວ້າງ­ຂວາງ​ຫຼາຍ​ຂຶ້ນ ສ້າງ​ຄວາມ​ສາ­ມັກ­ຄີ​ພາຍ​ໃນ​ລະ­ຫວ່າງ​ບຸ​ຄະ­ລາ​ກອນ​ຈີນ ແລະ ລາວ​ໃຫ້​ສະ­ໜິດ​ແໜ້ນ ເອົາ­ໃຈ­ໃສ່​ຂະ­ຫຍາຍ​ຕະ­ຫຼາດ​ໃຫ້​ກວ້າງ­ຂວາງ​ທັງ​ພາຍ​ໃນ ແລະ ຕ່າງ­ປະ­ເທດ ໂດຍ​ເນັ້ນ​ໜັກ​ທາງ​ດ້ານ​ຄຸ­ນະ­ພາບ ປະ­ສິດ­ທິ­ພາບ ແລະ ລາ­ຄາ ລວມ​ໄປ​ເຖິງ​ຄ່າ​ບໍ­ລິ­ການ ຄ່າ​ຮັບ​ຊົມ ແລະ ການ​ບໍ­ລິ­ການ​ຫຼັງ​ການ​ຂາຍ ເພື່ອ​ສ້າງ​ຄວາມ​ເພິ່ງ​ພໍ­ໃຈ​ໃຫ້​ລູກ​ຄ້າ.

    ນອກ​ນີ້ ທ່ານ​ຍັງ​ໄດ້​ກ່າວ​ຕື່ມ​ວ່າ: ລັດ­ຖະ­ບານ​ລາວ ກໍ່​ຄື ກະ­ຊວງ ປທສ ໃນ​ຖາ­ນະ​ຊີ້​ນຳ​ມະ­ຫາ​ພາກ​ດາວ​ທຽມ​ລາວ ກໍ່​ແມ່ນ​ຊັບ​ສົມ­ບັດ​ທີ່​ມີ​ມູນ​ຄ່າ​ສູງ​ຂອງ​ປະ­ເທດ​ຊາດ​ຂອງ​ພວກ​ເຮົາ ຈຶ່ງ​ເປັນ­ຄວາມ​ຮັບ­ຜິດ­ຊອບ​ຂອງ​ທຸກ​ພາກ­ສ່ວນ​ໃນ​ການ​ອຳ­ນວຍ​ຄວາມ​ສະ­ດວກ ເປັນ­ຕົ້ນ ທາງ​ດ້ານ​ນະ­ໂຍ­ບາຍ ນິ­ຕິ​ກຳ ແລະ ການ​ຮ່ວມ​ມື​ສາ­ກົນ ດັ່ງ­ນັ້ນ ຈຶ່ງ​ຮຽກ­ຮ້ອງ​ໃຫ້​ທຸກ​ພາກ­ສ່ວນ ທັງ​ພາກ​ລັດ ແລະ ເອ­ກະ​ຊົນ ຕະ­ຫຼອດ​ເຖິງ​ປະ­ຊາ­ຊົນ​ລາວ​ບັນ­ດາ­ເຜົ່າ ຈົ່ງ​ສະ­ໜັບ­ສະ­ໜູນ​ໃຫ້­ການ​ຮ່ວມ​ມື​ນຳ​ໃຊ້​ການ​ບໍ­ລິ­ການ​ຂອງ​ບໍ­ລິ­ສັດ ຕາມ​ນະ­ໂຍ­ບາຍ​ຂອງ​ລັດ­ຖະ­ບານ​ດ້ວຍ​ຜົນ­ສຳ­ເລັດ​ສູງ.

ຂ່າວທີ່ກ່ຽວຂ້ອງ