ຂ່າວຫຼ້າສຸດ

ຍູ້ແຮງການຮ່ວມມື ເພື່ອການພັດທະນາທີ່ມີປະສິດທິຜົນຍືນຍົງ

154 05 ທ.ວ. 2018 ຂ່າວໜ້າ​ໜຶ່ງ
ຍູ້ແຮງການຮ່ວມມື ເພື່ອການພັດທະນາທີ່ມີປະສິດທິຜົນຍືນຍົງ

    ກອງ​ປະ­ຊຸມ​ໂຕະ­ມົນ​ປະ­ຈຳ​ປີ 2018 ຈັດ​ຂຶ້ນ​ວັນ​ທີ 4-5 ທັນ­ວາ 2018 ທີ່​ຫໍ​ປະ­ຊຸມ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ແລະ ທ່ານ ຄາ​ຣິ​ນາ ອິມ​ໂມ​ເນັນ ຜູ້​ປະ­ສານ​ງານ​ອົງ­ການ​ສະ­ຫະ​ປະ­ຊາ​ຊາດ ທັງ​ເປັນ​ຜູ້­ຕາງ­ໜ້າ​ອົງ­ການ​ສະ­ຫະ​ປະ­ຊາ​ຊາດ​ເພື່ອ​ການ​ພັດ­ທະ­ນາ ປະ­ຈຳ​ລາວ ມີ​ຜູ້­ຕາງ­ໜ້າ​ຈາກ​ສູນ​ກາງ ແລະ ທ້ອງ­ຖິ່ນ ພ້ອມ​ທັງ​ຄູ່​ຮ່ວມ​ພັດ­ທະ­ນາ ອົງ​ການ­ຈັດ­ຕັ້ງ​ທີ່​ບໍ່​ສັງ­ກັດ​ລັດ­ຖະ­ບານ ອົງ­ການ​ທີ່​ບໍ່​ຫວັງ​ຜົນ​ກຳ­ໄລ ແລະ ພາກ​ເອ­ກະ​ຊົນ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ພາຍ​ໃຕ້​ຫົວ­ຂໍ້ “ການ​ສະ­ຫຼຸບ​ກາງ​ສະ­ໄໝ ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII ຄວາມ​ຄືບ​ໜ້າ​ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ພັດ­ທະ­ນາ​ແບບ​ຍືນ​ຍົງ ແລະ ວຽກ​ງານ​ການ​ຮ່ວມ​ມື​ເພື່ອ​ການ​ພັດ­ທະ­ນາ​ທີ່​ມີ​ປະ​ສິດ­ທິ​ຜົນ” ໂດຍ​ໄດ້​ຮັບ​ຟັງ​ລາຍ​ງານ​ຜົນ​ຂອງ​ການ​ທົບ​ທວນ​ກາງ​ສະ­ໄໝ ຂອງ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ຄັ້ງ​ທີ VIII ແລະ ປຶກ­ສາ​ຫາ­ລື​ໃນ​ຮູບ​ແບບ​ກຸ່ມ​ສົນ­ທະ­ນາ ສຸມ​ໃສ່ 4 ຂົງ­ເຂດ​ຕົ້ນ­ຕໍ ຄື: ການ​ເຕີບ​ໂຕ​ຢ່າງ​ຕໍ່​ເນື່ອງ ໝັ້ນ​ທ່ຽງ ແລະ ສົມ​ດຸນ​ດ້ານ​ເສດ­ຖະ­ກິດ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ແລະ ສັງ­ຄົມ ດ້ານ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ແລະ ກຽມ­ພ້ອມ​ຮັບ​ມື​ກັບ​ໄພ­ພິ­ບັດ​ທຳ​ມະ​ຊາດ ແລະ ການ​ປ່ຽນ­ແປງ​ດິນ​ຟ້າ​ອາ­ກາດ ແລະ ດ້ານ​ວຽກ​ງານ​ຈຸດ​ສຸມ​ປິ່ນ​ອ້ອມ ທີ່​ຕິດ​ພັນ​ກັບ​ຫຼາຍ​ຂະ­ແໜງ­ການ​ຂອງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ VIII ໂດຍ​ສະ­ເພາະ ການ​ປົກ­ຄອງ​ລັດ​ດ້ວຍ​ກົດ­ໝາຍ ແລະ ປະ­ຕິ­ບັດ​ກົດ­ໝາຍ.

    ທ່ານ​ນາງ ພອນ​ວັນ ອຸ​ທະ​ວົງ ຫົວ­ໜ້າ​ກົມ​ແຜນ­ການ ກະ­ຊວງ​ແຜນ­ການ ແລະ ການ​ລົງ­ທຶນ ໄດ້​ລາຍ​ງານ​ບົດ​ສະ­ຫຼຸບ​ກາງ​ສະ­ໄໝ (2016-2018) ຂອງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII (2016-2020) ວ່າ: ໃນ​ໄລ­ຍະ 2 ປີ​ກວ່າ​ຜ່ານ​ມາ ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ ຍັງ​ຢູ່​ໃນ​ຈັງ­ຫວະ​ຂະ­ຫຍາຍ­ຕົວ​ທີ່​ຊ້າ​ລົງ ສະ­ເລ່ຍ 6,8% ເຫັນ​ວ່າ​ຫຼຸດ​ແຜນ­ການ​ທີ່​ວາງ​ໄວ້ 0,4% ຂະ­ແໜງ­ການ​ກະ­ສິ­ກຳ​ປະ­ຕິ­ບັດ​ໄດ້ 2,73% ຫຼຸດ​ແຜນ­ການ 3,4% ອຸດ­ສາ­ຫະ­ກຳ 10,43% ບໍ­ລິ­ການ 5,6% ອາ­ກອນ 6,17% ລາຍ​ຮັບ​ມີ​ທ່າ​ອ່ຽງ​ເພີ່ມ​ຂຶ້ນ ແຕ່​ທຽບ​ກັບ​ລາຍ​ຈ່າຍ​ແລ້ວ​ຍັງ​ຂາດ​ດຸນ ນອກ​ນີ້ ໄດ້​ປັບ­ປຸງ​ເງິນ­ເດືອນ​ຂັ້ນ​ຕ່ຳ ແລະ ປັບ­ປຸງ​ຍຸດ​ທະ​ສາດ​ການ​ປ້ອງ​ກັນ​ສັງ­ຄົມ​ແຫ່ງ​ຊາດ ອັດ­ຕາ​ການ​ວ່າງ​ງານ 2% ແຮງ​ງານ​ໃນ​ຂະ­ແໜງ ກະ­ສິ­ກຳ​ກວມ 35,8% ຂາຍ­ຍົກ-ຂາຍ­ຍ່ອຍ 21,4% ປຸງ​ແຕ່ງ​ອຸດ­ສາ­ຫະ­ກຳ 9% ໄຟ­ຟ້າ 0,7% ແລະ ບໍ່​ແຮ່ 0,5% ສ່ວນ​ວຽກ​ງານ​ລຶ­ບລ້າງ​ຄວາມ­ທຸກ​ຍາກ ແລະ ເກັບ​ກູ້​ລະ­ເບີດ​ໄດ້​ຈັດ​ຕັ້ງ​ປະ­ຕິ­ບັດ 92 ຈຸດ​ສຸມ 272 ໂຄງ­ການ ມູນ​ຄ່າ 165,32 ຕື້​ກີບ ທຶນ​ປ່ອຍ​ຜ່ານ​ທະ­ນາ­ຄານ​ນະ­ໂຍ­ບາຍ 2.343 ຕື້​ກີບ ມີ 11.359 ຄອບ­ຄົວ​ໃນ​ຈຳ­ນວນ 206 ບ້ານ​ຂອງ 7 ເມືອງ ໄດ້​ຫຼຸດ​ພົ້ນ​ອອກ​ຈາກ​ບັນ­ຊີ​ທຸກ​ຍາກ ແລະ ສາ­ມາດ​ທຳ­ລາຍ​ລະ­ເບີດ​ທີ່​ບໍ່​ທັນ​ແຕກ​ໄດ້ 53.000 ເຮັກ­ຕາ.

    ໃນ​ໂອ­ກາດ​ກອງ​ປະ­ຊຸມ​ຄັ້ງ​ນີ້ ຄະ­ນະ​ຜູ້​ແທນ​ຍັງ​ໄດ້​ໄປ​ຢ້ຽມ­ຢາມ​ໂຄງ­ການ​ກະ­ສິ­ກຳ​ອິນ​ຊີ ບ້ານ​ທ່າ​ຊ້າງ ເມືອງ​ປາກ​ງື່ມ ແລະ ໂຄງ­ການ​ກໍ່­ສ້າງ​ເສັ້ນ­ທາງ​ລົດ­ໄຟ​ລາວ-ຈີນ ທີ່​ເມືອງ​ນາ​ຊາຍ​ທອງ​ຕື່ມ​ອີກ.

ຂ່າວທີ່ກ່ຽວຂ້ອງ