ຂ່າວຫຼ້າສຸດ

ສສຊ ຮັບຮອງເອົາບົດລາຍງານໄອຍະການ ແລະ ສານປະຊາຊົນ

162 05 ທ.ວ. 2018 ຂ່າວໜ້າ​ໜຶ່ງ
ສສຊ ຮັບຮອງເອົາບົດລາຍງານໄອຍະການ ແລະ ສານປະຊາຊົນ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ​ຊຸດ​ທີ 8 ດຳ­ເນີນ​ມາ​ຮອດ​ວັນ​ທີ 4 ທັນ­ວາ 2018 ເປັນ​ປະ­ທານ​ຂອງ​ທ່ານ​ນາງ ສີ­ໃສ ລື​ເດດ​ມູນ​ສອນ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ປະ­ຈຳ​ເຂດ​ເລືອກ​ຕັ້ງ​ເຂົ້າ​ຮ່ວມ.

    ກອງ​ປະ­ຊຸມ ສສຊ ໄດ້​ພ້ອມ​ກັນ​ສຸມ​ໃສ່​ປະ­ກອບ​ຄຳ​ຄິດ​ຄຳ​ເຫັນ ຕໍ່​ບົດ​ລາຍ​ງານ​ຂອງ​ອົງ­ການ​ໄອ​ຍະ​ການ ແລະ ສານ​ປະ­ຊາ­ຊົນ​ສູງ​ສຸດ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ​ວຽກ​ງານ​ກາງ​ສະ­ໄໝ (2016-2018) ປະ­ຈຳ​ປີ 2018 ທິດ​ທາງ​ແຜນ­ການ​ຮອດ​ປີ 2020 ແລະ ວຽກ​ຈຸດ​ສຸມ​ປະ­ຈຳ​ປີ 2019 ເພື່ອ​ເຮັດ​ໃຫ້​ການ­ເຄື່ອນ­ໄຫວ​ຈັດ​ຕັ້ງ​ປະ­ຕິ­ບັດ ວຽກ​ງານ​ຂອງ​ອົງ­ການ​ຮັບ­ປະ­ກັນ​ຄວາມ​ສຳ­ເລັດ​ຕາມ​ເປົ້າ​ໝາຍ ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດ ໄດ້​ເປັນ​ເອ­ກະ​ພາບ​ກັນ​ສະ­ເໜີ​ໃຫ້​ອົງ­ການ​ໄອ​ຍະ​ການ​ປະ​ຊົນ​ສູງ​ສຸດ ເພີ່ມ​ຄວາມ​ເອົາ­ໃຈ­ໃສ່​ໃນ​ການ​ປະ­ຕິ­ບັດ​ສິດ​ໜ້າ­ທີ່​ຂອງ​ຕົນ ຕາມ​ທີ່​ໄດ້​ກຳ­ນົດ​ໄວ້​ໃນ​ກົດ­ໝາຍ​ວ່າ​ດ້ວຍ​ອົງ­ການ​ໄອ​ຍະ​ການ​ປະ­ຊາ­ຊົນ ຄົ້ນ­ຄວ້າ ສະ­ກັດ​ກັ້ນ​ຕໍ່​ການ​ລະ­ເມີດ​ກົດ­ໝາຍ ການ​ດຳ­ເນີນ​ຄະ­ດີ​ຢ່າງ​ເຂັ້ມ​ງວດ​ຕໍ່​ຜູ້​ກະ­ທຳ​ຜິດ ເພື່ອ​ໃຫ້​ສາ­ມາດ​ແກ້​ໄຂ​ປາ­ກົດ­ການ​ຫຍໍ້­ທໍ້ ສະ­ເໜີ​ໃຫ້​ເອົາ­ໃຈ­ໃສ່​ຕິດ­ຕາມ​ກວດ­ກາ​ຕໍ່​ການ​ນຳ​ໃຊ້​ມາດ​ຕະ­ການ ສະ­ກັດ​ກັ້ນ​ການ​ດຳ­ເນີນ​ຄະ­ດີ​ອາ­ຍາ​ໃຫ້​ເຂັ້ມ​ງວດ ແລະ ສອດ­ຄ່ອງ​ກັບ​ກົດ­ໝາຍ​ວ່າ​ດ້ວຍ​ການ​ດຳ­ເນີນ​ຄະ­ດີ​ອາ­ຍາ ການ​ຕິດ­ຕາມ​ກວດ­ກາ ການ​ປະ­ຕິ­ບັດ​ກົດ­ໝາຍ​ໃນ​ສະ­ຖານ­ທີ່​ກັກ​ຕົວ ກັກ​ຂັງ ຄ້າຍ​ດັດ​ສ້າງ​ທີ່​ສະ­ມາ­ຊິກ​ສະ­ພາ​ແຫ່ງ​ຊາດ ໄດ້​ຍົກ​ຂຶ້ນ​ມາ​ຫຼາຍ​ແມ່ນ​ສະ­ພາບ​ຄວາມ​ບໍ່​ສະ­ດວກ​ຢູ່​ໃນ​ຄ້າຍ​ຄຸມ​ຂັງ​ດັດ​ສ້າງ ເຊິ່ງ​ຕິດ​ພັນ​ກັບ​ງົບ­ປະ­ມານ ອົງ­ການ​ໄອ​ຍະ​ການ​ປະ­ຊາ­ຊົນ ຕ້ອງ​ປະ­ສານ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ​ເພື່ອ​ແກ້​ໄຂ ແລະ ສະ­ມາ­ຊິກ​ສະ­ພາ​ແຫ່ງ​ຊາດ ປະ­ຈຳ​ແຕ່​ລະ​ເຂດ​ເລືອກ​ຕັ້ງ ກໍ່​ໃຫ້​ເປັນ​ເຈົ້າ​ການ​ຊ່ວຍ​ກັນ​ຄົ້ນ­ຄວ້າ ເພື່ອ​ສະ­ໜອງ​ງົບ­ປະ­ມານ​ໃຫ້​ແກ່​ການ​ປັບ­ປຸງ​ບັນ­ຫາ​ດັ່ງ­ກ່າວ ແລະ ບັນ­ຫາ​ອື່ນໆ​ອີກ​ຈຳ­ນວນ​ໜຶ່ງ.

    ພາຍ­ຫຼັງ​ທີ່ ສສຊ ໄດ້​ພ້ອມ​ກັນ​ປະ­ກອບ​ຄຳ​ຄິດ​ຄຳ​ເຫັນ​ຢ່າງ​ກົງ​ໄປ​ກົງ​ມາ ແລະ ໄດ້​ຮັບ​ຟັງ​ການ​ຊີ້​ແຈງ​ກ່ຽວ​ກັບ​ການ​ລະ­ເມີດ​ສັນ­ຍາ​ກູ້​ຢືມ​ທີ່​ມີ​ຫຼັກ​ຊັບ​ຄ້ຳ­ປະ­ກັນ ແຕ່​ນຳ​ມາ​ດຳ­ເນີນ​ຄະ­ດີ​ອາ­ຍາ​ໃນ​ຂໍ້​ຫາ​ສໍ້​ໂກງ​ຊັບ​ຂອງ​ພົນ­ລະ­ເມືອງ ຈາກ​ທ່ານ ຄຳ​ສານ ສຸ​ວົງ ຫົວ­ໜ້າ​ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ເຊິ່ງ​ທ່ານ​ໄດ້​ຍົກ​ໃຫ້​ເຫັນ​ສະ­ພາບ​ລວມ​ຂອງ​ການ­ຈັດ­ຕັ້ງ​ປະ­ຕິ­ບັດ​ຜ່ານ​ມາ ສາ­ເຫດ​ທີ່​ພາ­ໃຫ້​ມີ​ການ​ລະ­ເມີດ​ກົດ­ໝາຍ ແລະ ມາດ​ຕະ­ການ​ແກ້​ໄຂ​ບັນ­ຫາ​ດັ່ງ­ກ່າວ ຈາກ​ນັ້ນ ສສຊ ໄດ້​ລົງ​ຄະ­ແນນ​ສຽງ​ຮັບ­ຮອງ​ເອົາ​ມະ­ຕິ​ກອງ​ປະ­ຊຸມ​ສະ­ພາ​ແຫ່ງ​ຊາດ ວ່າ​ດ້ວຍ​ການ​ຮັບ­ຮອງ​ເອົາ​ການ​ຊີ້​ແຈງ​ຂອງ​ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ດ້ວຍ​ຄະ­ແນນ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ