ຂ່າວຫຼ້າສຸດ

ຈະຈັດແຂ່ງຂັນລົດຈັກທາງລຽບຄັ້ງທຳອິດ ຕົ້ນເດືອນທັນວານີ້

98 05 ທ.ວ. 2018 ວົງຈອນກີລາ
ຈະຈັດແຂ່ງຂັນລົດຈັກທາງລຽບຄັ້ງທຳອິດ ຕົ້ນເດືອນທັນວານີ້

    ພິ­ທີ​ຖະ­ແຫຼງ​ຂ່າວ​ການ​ແຂ່ງ­ຂັນ​ລົດ­ຈັກ​ທາງ​ລຽບ​ຄັ້ງ​ທຳ​ອິດ​ຢູ່ ສປປ ລາວ ລາຍ­ການ Winter Race ຊີງ​ຂັນ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 28 ພະ­ຈິກ 2018 ຢູ່​ຮ້ານ​ຂາຍ​ລົດ​ຫົງ​ຟ້າ ໂດຍ​ມີ​ທ່ານ ບຸນ​ຍະ​ເດດ ໄຊ​ສົງ­ຄາມ ປະ­ທານ​ສະ­ໂມ­ສອນ​ວຽງ​ຈັນ ເຣ​ສ​ຊິງ​ເຊີ​ກິດ ທ່ານ ພັທ ໜູ​ຮັກ ຈັນ­ທະ​ລັງ­ສີ ຫົວ­ໜ້າ​ກອງ​ບັນ­ຊາ​ການ ປກສ ເມືອງ​ນາ​ຊາຍ​ທອງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ບຸນ​ຍະ​ເດດ ໄຊ​ສົງ­ຄາມ​ກ່າວ​ວ່າ: ການ​ແຂ່ງ­ຂັນ​ລົດ­ຈັກ​ທາງ​ລຽບ​ຄັ້ງ​ນີ້ ເພື່ອ​ເປັນ​ການ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ວັນ​ສຳ­ຄັນ​ຕ່າງໆ​ຂອງ​ຊາດ ໂດຍ​ສະ­ເພາະ​ວັນ­ຊາດ ທີ 2 ທັນ­ວາ ຄົບ­ຮອບ 43 ປີ ເປັນ​ການ​ເຜີຍ­ແຜ່​ໃຫ້​ຊາວ​ໜຸ່ມ-ເຍົາ­ວະ​ຊົນ ຫັນ​ມາ​ສົນ­ໃຈ​ໃສ່​ຫຼິ້ນ​ກີ­ລາ​ປະ­ເພດ​ດັ່ງ­ກ່າວ​ຫຼາຍ​ຂຶ້ນ ເພື່ອ​ຫຼຸດ­ຜ່ອນ​ບັນ­ຫາ​ການ​ແຂ່ງ­ຂັນ​ລົດ​ຕາມ​ທ້ອງ​ຖະ­ໜົນ­ຫຼວງ ເຊິ່ງ​ເປັນ​ການ​ສ້າງ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ຕໍ່​ສັງ­ຄົມ ຖ້າ​ຫາກ​ເຍົາ­ວະ​ຊົນ-ຊາວ​ໜຸ່ມ​ເຂົ້າ​ມາ​ຮຽນ​ຮູ້​ເລື່ອງ​ການ​ຂັບ​ຂີ່​ແບບ​ມີ​ຄູ​ເຝິກ​ສອນ ຫຼື ໃຫ້​ຄຳ​ແນະ­ນຳ​ທີ່​ຖືກ​ວິ­ທີ ກໍ່​ຈະ​ຫຼຸດ­ຜ່ອນ​ບັນ­ຫາ​ດັ່ງ­ກ່າວ.

    ການ​ແຂ່ງ­ຂັນ​ດັ່ງ­ກ່າວ 11 ຮຸ່ນ​ຄື: ຮຸ່ນ Drag 100-150 ຊີ​ຊີ ທົ່ວ​ໄປ​ບໍ່​ຈຳ­ກັດ​ອາ­ຍຸ ຮຸ່ນ 125-135 ຊີ​ຊີ ລໍ້ 12 ນິ້ວ ເຍົາ­ວະ​ຊົນ​ອາ­ຍຸ​ບໍ່​ເກີນ 15 ປີ ຮຸ່ນ​ລໍ້ 12 ນິ້ວ ລວມ​ຮຸ່ນ​ທົ່ວ​ໄປ​ບໍ່​ຈຳ­ກັດ​ອາ­ຍຸ ຮຸ່ນ 150 ຊີ​ຊີ Naked M-Slaz CB150R ທົ່ວ​ໄປ​ບໍ່​ຈຳ­ກັດ​ອາ­ຍຸ ຮຸ່ນ Sport 150 ຊີ​ຊີ ທົ່ວ​ໄປ​ບໍ່​ຈຳ­ກັດ​ອາ­ຍຸ ຮຸ່ນ 200-400 ຊີ​ຊີ Naked Open ບໍ່​ຈຳ­ກັດ​ອາ­ຍຸ Naked Kawasaki 1 Make Race ບໍ່​ຈຳ­ກັດ​ອາ­ຍຸ ຮຸ່ນ Sport Moto3 Kawasaki 1 Make Race ບໍ່​ຈຳ­ກັດ​ອາ­ຍຸ ຮຸ່ນ Sport Moto3 ລວມ​ບໍ່​ເກີນ 400 ຊີ​ຊີ ບໍ່​ຈຳ­ກັດ​ອາ­ຍຸ ຮຸ່ນ Supper Naked ບໍ່​ຈຳ­ກັດ​ອາ­ຍຸ ແລະ ຮຸ່ນ Supper Sport Open 200 UP ບໍ່​ຈຳ­ກັດ​ອາ­ຍຸ.

    ການ​ແຂ່ງ­ຂັນ​ດັ່ງ­ກ່າວ ຈະ​ຈັດ​ຂຶ້ນ​ວັນ​ທີ 8-9 ທັນ­ວາ​ນີ້ ຢູ່​ບ້ານ​ນາ​ຊອນ ເມືອງ​ນາ​ຊາຍ​ທອງ ໂດຍ​ມື້​ທຳ​ອິດ​ຈະ​ແຂ່ງ­ຂັນ​ໃນ​ຮອບ​ຄັດ​ເລືອກ​ຈັບ​ເວ­ລາ ສ່ວນ​ມື້​ທີ 2 ຈະ​ເລີ່ມ​ແຂ່ງ­ຂັນ​ເວ­ລາ 9:00 ໂມງ​ເປັນ­ຕົ້ນ​ໄປ ໂດຍ​ຜູ້​ທີ່​ສົນ­ໃຈ​ສາ­ມາດ​ເຂົ້າ​ໄປ​ຊົມ-ເຂົ້າ​ໄປ​ເຊຍ​ໄດ້ ໂດຍ​ບໍ່​ເສຍ​ຄ່າ.

ຂ່າວທີ່ກ່ຽວຂ້ອງ