ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 05/12/2018

119 05 ທ.ວ. 2018 ຫົວຂໍ້ຂ່າວອື່ນໆ

    ສອງ​ເລື່ອງ​ໜ້າ​ສົນ­ໃຈ​ໃນ​ບົດ​ນີ້​ຂຶ້ນ​ຕົ້ນ ດ້ວຍ​ຂ່າວ​ທາງ​ການ​ຕົວ​ເມືອງ​ຂອງ​ລັດ​ເທັກ​ຊັດ ສ ອາ​ເມ​ຣິ​ກາ ປະ­ຕິ­ເສດ​ສູນ​ບໍ­ລິ­ການ​ຕຸກ­ກະ­ຕາ​ເພື່ອ​ເປົ້າ​ໝາຍ​ທາງ​ເພດ ຕໍ່​ໃສ່​ແຜນ​ຜະ­ເດັດ​ເສິກ​ກັບ​ຖົງ​ຢາງ​ຢູ່​ມາ​ເລ​ເຊຍ.

    ທີ່ ສ ອາ​ເມ​ຣິ​ກາ: ໃນ​ຍຸກ​ໄຮ​ເທັກ ປັດ­ຈຸ­ບັນ ສັງ­ຄົມ​ໂລກ​ຕ່າງ​ກໍ່​ຊອກ​ສະ­ແຫວງ­ຫາ​ແນວ​ສະ­ດວກ​ສະ­ບາຍ ເພື່ອ​ມາ​ຊ່ວຍ​ຫຼື​ເຮັດ​ວຽກ​ແທນ​ແຮງ​ງານ​ຄົນ ເຊັ່ນ: ຫຸ່ນ​ຍົນ ແລະ ສິ່ງ​ທີ່​ມາ​ແຮງ​ແຊງ​ໜ້າ ໃນ​ປັດ­ຈຸ­ບັນ ກໍ່​ແມ່ນ​ການ​ຜະ­ລິດ​ຕຸກ­ກະ­ຕາ​ເພດ​ຍິງ ເພື່ອ​ໃຫ້​ບໍ­ລິ­ການ​ທາງ​ເພດ​ແທນ​ແມ່­ຍິງ ຕຸກ­ກະ­ຕາ​ທີ່​ວ່າ​ນີ້ ຕິດ​ຕັ້ງ​ໂປລ​ແກລມ​ວິນ​ຍານ ແລະ ການ​ກະ­ທຳ​ທຸກ​ຢ່າງ​ຂອງ​ມະ­ນຸດ​ທາງ​ດ້ານ​ເພດ ແຕ່​ບັນ­ຫາ​ນີ້​ມີ​ທັງ​ຜູ້​ເຫັນ​ພ້ອມ ແລະ ຜູ້​ຄັດ­ຄ້ານ ຕົວ­ຢ່າງ: ຫວ່າງ​ບໍ່​ດົນ​ມາ​ນີ້ ທາງ​ການ ນະ­ຄອນ​ເທັກ​ຊັດ (Texus City) ໄດ້​ອອກ­ສຽງ​ຄັດ­ຄ້ານ​ແຜນ​ຕິດ​ຕັ້ງ​ສູນ​ຕຸກ­ກະ­ຕາ​ຍິງ ເພື່ອ​ໃຫ້​ຄວາມ​ອົບ​ອຸ່ນ​ແກ່​ຜູ້​ຕ້ອງ­ການ ແຕ່​ທາງ​ການ ແລະ ຊາວ​ນະ­ຄອນ​ເທັກ​ຊັດ ເອີ້ນ​ສູນ​ດັ່ງ­ກ່າວ​ວ່າ: “ໂຮງ​ໂສ­ເພ­ນີ” ທີ່​ໃຫ້​ບໍ­ລິ­ການ​ທາງ​ເພດ​ລ້ວນໆ ທາງ​ບໍ­ລິ­ສັດ​ຮ້ານ​ຄ້າ​ສະ​ກີງ​ກີ​ໂດນ (Skinky Dolls) ຢູ່​ປະ­ເທດ​ກາ​ນາ​ດາ ທີ່​ມີ​ແຜນ​ຂະ­ຫຍາຍ​ສາ­ຂາ​ສູນ​ດັ່ງ­ກ່າວ​ໄປ​ນະ­ຄອນ​ເທັກ​ຊັດ​ນັ້ນ ບອກ​ວ່າ ບໍ່​ແມ່ນ “ໂຮງ​ໂສ­ເພ­ນີ” ມັນ​ເປັນ​ພຽງ​ສູນ​ຈຳ­ໜ່າຍ​ຕຸກ­ກະ­ຕາ​ຍິງ​ແສນ​ສະ­ຫຼາດ ໃຫ້​ຜູ້​ສົນ­ໃຈ​ເຊົ່າ​ໄປ​ກ່ອນ​ໄດ້​ຖືກ​ໃຈ​ຈຶ່ງ​ຊື້​ຕາມ​ຫຼັງ ແຕ່​ທາງ​ການ​ຊາວ​ນະ­ຄອນ ກໍ່​ຄື ຜູ້­ນຳ​ທາງ​ສາ­ສະ­ໜາ​ຢູ່​ນະ­ຄອນ​ເທັກ​ຊັດ ແກວ່ງ​ຫົວ​ວຶດໆ ປະ­ຕິ­ເສດ​ບໍ່​ໃຫ້​ສູນ​ນີ້​ຕັ້ງ​ຂຶ້ນ​ໄດ້​ຢ່າງ​ເດັດ­ຂາດ ໂດຍ​ໄດ້​ບອກ​ວ່າ: ພວກ​ເຮົາ​ບໍ່​ຕ້ອງ­ການ​ທຸ­ລະ​ກິດ​ປະ­ເພດ​ນີ້​ຢູ່​ເມືອງ​ຂອງ​ພວກ​ເຮົາ ຂ່າວ​ບອກ​ວ່າ ທາງ Texus City ມີ​ແຜນ​ປັບ­ປຸງ​ກົດ­ໝາຍ ເພື່ອ​ກຳ­ນົດ​ຫ້າມ​ທັງ​ໂສ­ເພ­ນີ​ຕຸກ­ກະ­ຕາ ເພາະ​ແຕ່​ກ່ອນ​ມີ​ແຕ່​ກຳ­ນົດ​ກ່ຽວ​ກັບ​ໂສ­ເພ­ນີ​ທີ່​ເປັນ​ຄົນ​ເທົ່າ​ນັ້ນ.

    ທີ່ ມາ​ເລ​ເຊຍ: ໃນ​ປັດ­ຈຸ­ບັນ ສະ­ໜາມ­ຮົບ​ຕ້ານ​ຖົງ​ຢາງ ຫຼື ຖົງ​ປລາ­ສະ­ຕິກ ພວມ​ຂະ­ຫຍາຍ​ອາ­ນາ­ເຂດ​ອອກ​ໄປ​ທົ່ວ​ໂລກ ໂດຍ​ເນັ້ນ​ເປົ້າ​ໝາຍ​ຈຳ­ກັດ ແລະ ກຳ­ຈັດ​ຖົງ​ຢາງ​ປະ­ເພດ​ໃຊ້​ເທື່ອ​ດຽວ​ແລ້ວ​ຖິ້ມ​ໂລດ ອອກ​ໜ້າ​ພາ​ທາງ​ໃນ​ສະ­ໜາມ­ຮົບ ນັ້ນ​ກໍ່​ມີ ອົດ​ສະ​ຕຣາ​ລີ ອັງ­ກິດ ສ ເກົາ­ຫຼີ ສີ​ລັງ­ກາ ແລະ ບັນ­ດາ​ປະ­ເທດ​ສະ­ມາ­ຊິກ ສະ­ຫະ­ພາບ​ເອີ​ຣົບ ນອກ­ຈາກ​ນັ້ນ ບໍ­ລິ­ສັດ​ເຄື່ອງ​ດື່ມ ແລະ ອາ­ຫານ​ລະ­ດັບ​ຂ້າມ​ຊາດ ກໍ່​ໄດ້​ປະ­ກາດ​ແຜນ​ຢຸດ​ໃຊ້​ເຄື່ອງ​ໃສ່​ອາ­ຫານ ບ່ວງ ສ້ອມ ທໍ່­ດູດ ທີ່​ເຮັດ​ດ້ວຍ​ປລາ­ສະ­ຕິກ​ເຊັ່ນ​ກັນ ສ່ວນ​ຢູ່​ມາ​ເລ​ເຊຍ ປະ­ເທດ​ສະ­ມາ­ຊິກ​ອາ​ຊຽນ​ຂອງ​ພວກ​ເຮົາ​ນີ້ ກໍ່​ມີ​ແຜນ​ຈັດ­ການ​ກັບ​ຖົງ​ປລາ­ສະ­ຕິກ​ເຈົ້າ​ບັນ­ຫາ​ທຳ­ລາຍ​ສິ່ງ­ແວ­ດລ້ອມ​ເຊັ່ນ​ກັນ ໂດຍ​ມີ​ແຜນ​ເກັບ​ຄ່າ​ຖົງ​ຢາງ​ໃຊ້​ບັນ­ຈຸ​ເຄື່ອງ​ຕາມ​ຮ້ານ​ສັບ­ພະ​ສິນ­ຄ້າ ແລະ ຮ້ານ​ອາ­ຫານ​ເລື່ອງ​ນີ້ ໄດ້​ຮັບ​ການ​ຢັ້ງ­ຢືນ​ຈາກ​ກະ­ຊວງ​ພະ­ລັງ­ງານ ວິ­ທະ­ຍາ­ສາດ ເຕັກ​ໂນ​ໂລ​ຊີ ສິ່ງ­ແວ­ດລ້ອມ ແລະ ການ​ປ່ຽນ­ແປງ​ຂອງ​ອາ­ກາດ ການ​ເກັບ​ຄ່າ​ຖົງ​ຢາງ​ນີ້ ຈະ​ເລີ່ມ​ເຮັດ​ໃນ​ຂອບ 3 ປີ​ກ່ອນ ຄື: ແຕ່​ປີ 2019 ຫາ ປີ 2021 ການ​ເກັບ​ຄ່າ​ຖົງ​ຢາງ​ທີ່​ວ່າ​ນີ້ ໃນ​ຕົວ​ຈິງ​ກໍ່​ແມ່ນ​ລະ­ບົບ​ເກັບ​ຄ່າ “ທຳ­ລາຍ​ສິ່ງ­ແວ­ດລ້ອມ” ຫຼື ຄ່າ “ສ້າງ​ມົນ​ລະ​ພິດ” ນັ້ນ​ເອງ ໂດຍ​ທົ່ວໆ​ໄປ​ແລ້ວ ຖົງ​ຢາງ​ສຳ­ລັບ​ໃສ່­ເຄື່ອງ​ຕາມ​ຮ້ານ​ຄ້າ​ຕ່າງໆ​ນັ້ນ ລູກ​ຄ້າ​ໄດ້​ລ້າ​ຈາກ​ທາງ​ຮ້ານ ແຕ່​ດຽວ­ນີ້ ຫຼາຍໆ​ປະ­ເທດ​ໄດ້​ເລີ່ມ​ລະ­ບົບ​ເກັບ​ຄ່າ​ຖົງ​ຢາງ ໂດຍ​ມີ​ຈຸດ­ປະ­ສົງ​ໃຫ້​ຜູ້​ຈັບ​ຈ່າຍ​ນຳ​ໃຊ້​ຖົງ​ແພ ຫຼື ຖົງ​ທີ່​ໃຊ້​ໄດ້​ຫຼາຍ​ເທື່ອ​ແທນ.

ຂ່າວທີ່ກ່ຽວຂ້ອງ